1-2. Le mwikeulu umo walombola bana-bakaji bika ku kibundu kya Yesu, ne Yesu webalombola bika aye mwine?

TUDI mu difuku dya 16 lubanga bwē, mu Kweji wa Nisane 33 Yesu Ke Mwiye. Na bulanda ku mityima, kisumpi kya bana-bakaji bakaminwe Leza abaenda ku kibundu kyobatūdile’mo umbidi wa Mfumwetu Yesu Kidishitu ke papite mansá 36 ne musubu. Pobafika ku kibundu, kebasake kushinga umbidi binuka mwenye ne māni a mananshi, abatulumuka pa kumona mu kibundu umbidi mutupu’o! Mwikeulu umo walombola bano bana-bakaji amba Yesu wasangulwa mu bafwe, ne kubweja’ko amba: “Wemubadikila mu Ngadilea, e momukamumona.”​—Mat. 28:1-7; Luka 23:56; 24:10.

² Bana-bakaji pobataluka ku kibundu, Yesu mwine webafwena, webanena’mba: “Endai, kasapwilei banabetu amba bende ku Ngadilea, e kobakamona ami.” (Mat. 28:10) Yesu udi na mwanda wa mvubu wa kulombola bana bandi ba bwanga, o mwanda wateakanya dibajinji kuno kwitana pa kupwa kusanguka!

3-4. Mwanda waka tunena’mba musoñanya ulembelwe mu Mateo 28:19, 20 kewāpelwepo’nka batumibwa kete? (Tala kifwatulo pa kibalu.)

³ Tanga Mateo 28:16-20. Ku kwitana kwāteakenye Yesu, wālombwele’ko mwingilo wa mvubu wādi wa kwingila bandi bana ba bwanga mu myaka katwa kabajinji, mwingilo mwine otwingila ne dyalelo. Yesu wānenene amba: “Nanshi, endai mukalonge bana ba bwanga mu bantu ba ku mizo yonso, . . . mwibafundijei kulama byonso byonemusoñenye.”

⁴ Yesu usakanga balondi bandi bonso basapule. Uno musoñanya kāpele’opo’nka batumibwa 11 ba kikōkeji. Mwanda waka tubanena namino? Le bine kitatyi kyāletele  Yesu uno musoñanya ku lūlu lwa mu Ngadilea, kwādi’nka batumibwa kete? Vuluka’mba mwikeulu wālombwele bana-bakaji amba: “Mu Ngadilea, e momukamumona.” Nanshi bimweka’mba bano bana-bakaji ba kikōkeji nabo bātenwe’ko. Ino kekupwilepo. Mutumibwa Polo ulombola’mba Yesu wāmwekēle “banabetu 500 ne musubu kya pamo.” (1 Ko. 15:6) Kwepi?

5. Le kisonekwa kya 1 Bene Kodinda 15:6 kitufundija bika?

⁵ Tudi na bubinga buyampe bwa kukulupidila’mba, mu 1 Bene Kodinda 15:6 Polo wādi wisambila pa kwitana kwa mu Ngadilea kutelelwe mu Mateo 28. Le i bubinga’ka? Bubajinji, bana ba bwanga bavule ba Yesu bādi bene Ngadilea. Nanshi lūlu lwa mu Ngadilea kyādi kifuko kiyampe kubungakena’po kibumbo kikatampe kya bantu kupita mu njibo ya muntu mu Yelusalema. Bwa bubidi, Yesu musanguke wādi kala kemwitane na batumibwa bandi 11 mu njibo imo ya mu Yelusalema. Shi Yesu wādi usaka kusapwila’nka batumibwa kete basapule ne kulonga bana ba bwanga, wādi wa kwibasapwila mu Yelusalema pa kyaba kya kwibanena abo ne bana-bakaji ne bantu bakwabo bakamutane mu Ngadilea.​—Luka 24:33, 36.

6. Le Mateo 28:20 ulombola namani amba musoñanya wa kulonga bana ba bwanga ufikidilanga dyalelo, ne bantu i bakōkele namani ku uno musoñanya?

⁶ Tala buno bubinga bwa busatu bwine bwa mvubu. Ke enkapo bene Kidishitu ba mu myaka katwa kabajinji bāpelwe na Yesu musoñanya wa kulonga bana ba bwanga. Le tubayuka kino namani? Pa kupwa kupa balondi bandi uno musoñanya, Yesu wānenene ku mfulo amba: “Ami ngidi nenu mafuku onso kufika ne ku mvuyo ya ngikadilo ya bintu.” (Mat. 28:20) Binenwa bya Yesu i bya bine, mwanda dyalelo mwingilo wa kulonga bana ba bwanga wingilwanga ne pa mfulo. Langa’po bidi! Kubwipi kwa bantu 300 000 babatyijibwanga mwaka ne mwaka ke Batumoni ba Yehova kadi ke balondi ba Yesu Kidishitu!

7. Le i bika byotusa kwisambila’po pano, ne mwanda waka?

⁷ Bantu bavule befunda Bible bendelelanga bafika ne ku kubatyijibwa. Inoko, bimweka’mba bantu bamo botwifundanga nabo Bible kitatyi ne kitatyi badi na moyo wa kwikala bana ba bwanga. Basenswe kwifunda, inoko kebendelelangapo kufika ne ku kubatyijibwa. Shi wendejanga kifundwa kya Bible, tukulupile amba usakanga kukwasha omwifunda nandi engidije byaefunda ne kwikala mwanā bwanga wa Kidishitu. Kino kishinte kisa kwisambila pa muswelo otubwanya kutenga mutyima wa muntu otwifunda nandi ne pa muswelo otubwanya kumukwasha endelele ku mushipiditu. Mwanda waka tufwaninwe kwisambila pa uno mwanda? Mwanda kyaba kimo biketulomba kuyuka shi tukendelela kwifunda nansha kuleka’byo kwifunda.

8. Mwanda waka bibwanya kwikala bikomo kukwasha botwifunda nabo basanswe Yehova?

⁸ Yehova usakanga bantu bamwingidile pa mwanda wa buswe bobamusenswe. Nanshi kitungo kyetu i kya kukwasha botwifunda nabo bayuke amba Yehova utele umo ne umo mutyima bininge ne amba wibasenswe bininge. Tusakanga kwibakwasha bamone Yehova bu “Shandya bampikwa bashabo ne mulami wa bakaji ba kishala.” (Ñim. 68:5) Shi bantu bowifunda nabo abajingulula’mba Leza wibasenswe, padi mityima yabo ikatengwa ne buswe bobamuswele bukavudila’ko. Bantu bamo botwifunda nabo babwanya kukomenwa kumona Yehova bu Tata wa buswe, mwanda bashabo kebebalombwelepo  buswe ne kisanso kikatampe. (2 Tm. 3:1, 3) Nanshi powifunda na bantu, wisambile bininge pa ngikadila ya Yehova isangaja. Kwasha bomwifunda nabo bevwanije amba Leza wetu wa buswe usakanga bakamone būmi bwa nyeke, kadi usakanga kwibakwasha bakebumone. Ino le i bika bikwabo byotubwanya kulonga?

9-10. Le i mabuku’ka otufwaninwe kwingidija kitatyi kyotwifunda Bible na bantu, ne mwanda waka twingidije ano mabuku?

⁹ Ingidija dibuku “Lelo I Bika Bitufundija Bible?” ne dibuku “Mwa Kwikadila Nyeke mu Buswe bwa Leza.” Ano mabuku i malupulwe mwanda wa kwitukwasha tutenge mityima ya botwifunda nabo. Kimfwa, shapita 1 wa dibuku Bitufundija ulondolola bino bipangujo: Lelo Leza ketutelepo mutyima kadi le udi na mutyima mūmu? Lelo Leza wivwananga namani pasusuka bantu? Le ubwanya kwikala mulunda na Yehova? Le dibuku Kwikala Nyeke mu Buswe bwa Leza nadyo le? Dino dibuku dikakwasha otwifunda nandi evwanije amba kwingidija misoñanya ya mu Bible kubwanya kulumbulula būmi bwandi ne kumufwenya kudi Yehova. Nansha shi kodi mufundije  kala bantu bakwabo na dino dibuku, teakanya senene pa kukafundija muntu mukwabo, kadi lama mu ñeni bisakibwa bya umo ne umo owifunda nandi.

¹⁰ Ino langa’po bidi shi omwifunda nandi wasangela mwanda wisambilwe’po mu dibuku kedidipo mu byetu Bingidilwa bya Kufundija Nabyo. Padi ubwanya kumukankamika atange aye mwine dino dibuku, mwanda wa mwendelele kwifunda nandi mu dibuku dya kwifunda nadyo Bible pa otwatela kala.

11. Le i kitatyi’ka kyotufwaninwe kushilula ne kuvuya kifundwa na milombelo, ne i muswelo’ka otubwanya kwisambila pa mvubu ya milombelo?

¹¹ Shilula kifundwa na milombelo. Divule dine i biyampe kushilula ne kufudija kifundwa na milombelo pampikwa kwija, nakampata mu mayenga’tu matyetye na potwashilwile kwifunda. Tufwaninwe kukwasha otwifunda nandi ayuke amba tubwanya kwivwanija Kinenwa kya Leza enka na bukwashi bwa mushipiditu wa Leza. Bafundiji bamo ba Bible balombolanga mvubu ya milombelo na kutanga Yakoba 1:5, mwine unena’mba: “Shi momudi’mo mudi umo ubudilwe tunangu, nankyo alombe’to nyeke kudi Leza.” Kupwa mwendeji waipangula waefunda nandi amba, “Le i muswelo’ka otubwanya kulomba tunangu twa Leza?” Padi omwifunda nandi uketabija’mba tufwaninwe kulombela kudi Leza.

12. Le ukengidija namani Ñimbo ya Mitōto 139:2-4 pa kukwasha omwifunda nandi alumbulule milombelo yandi?

¹² Fundija omwifunda nandi muswelo wa kulombela. Mukulupije amba Yehova usakanga kwivwana milombelo yandi itamba ku mutyima. Mushintulwile amba mu milombelo yetu ya pa kasuku, tubwanya kushitwila Yehova mutyima bininge​—kumulombola bintu byotutyinanga padi kulombola bantu bakwabo. Mwanda Yehova uyukile kala milangwe idi munda mwetu. (Tanga Ñimbo ya Mitōto 139:2-4.) Kadi tubwanya kukankamika otwifunda nandi alombe Leza amukwashe ashinte milangwe yandi mibi ne kuleka bibidiji bibi. Kimfwa, langa’po bidi shi kemudi befunde na muntu mu kitatyi kampanda, ino usenswe mafetyi atambile ku Bajentaila. Aye uyukile amba i bibi, ino na bubine usangedile bintu bimo bipitanga’ko. Mukankamike alombole Yehova mwawiivwanina kadi amulombe mwanda wa amukwashe asanswe’nka byobya bisenswe Leza kete.​—Ñim. 97:10.

13. (a) Mwanda waka tufwaninwe kwita botwifundanga nabo batanwe ku kupwila enka’tu potukidi ku ngalwilo? (b) Le i muswelo’ka otukakwasha yewa otwifundanga nandi eivwane biyampe ku Njibo ya Bulopwe?

¹³ Pomukidi ku ngalwilo, ita omwifundanga nandi akatanwe ku kupwila. Byobya bikamona ne kwivwana yewa omwifundanga nandi ku kupwila, bibwanya kutenga mutyima wandi ne kumukwasha endelele. Mutadije video inena’mba I Bika Biloñwanga ku Njibo ya Bulopwe? kupwa mwite na nsangaji mukatanwe nandi ku kupwila. Shi bibwanika mwipangule shi usakilwa kalupeto ka kufuta kyendwa nakyo. I biyampe kunena basapudi beshileshile bakatanwe pomwifunda. Mu uno muswelo, yewa omwifunda nandi ukeyuka na bantu bakwabo mu kipwilo, kadi padi ukeivwana biyampe ku kupwila.

14. Le i bika bibwanya kulengeja muntu otwifunda nandi endelele ku mushipiditu?

¹⁴ Kitungo kyetu i kya kukwasha otwifunda nandi Bible endelele ku mushipiditu. (Ef. 4:13) Shi muntu waitabija kwifunda Bible, padi ke mulangulukile kala pa muswelo ukamukwasha kifundwa. Inoko, shi wasanswa Yehova bininge, padi ukashilula  kulangulukila pa muswelo wabwanya kukwasha bantu bakwabo, kubadila’mo ne bantu ba mu kipwilo. (Mat. 22:37-39) Pa kitatyi kifwaninwe, ukokeja kumulombola’mba nandi udi na mukenga wa kukwatakanya mwingilo wa Bulopwe na lupeto.

15. Le i muswelo’ka otubwanya kukwasha otwifundanga nandi Bible ayuke kya kulonga shi kubatambe myanda?

¹⁵ Fundija omwifunda nandi Bible ayuke kya kulonga shi kubatambe myanda. Kimfwa, langa’po bidi shi omwifundanga nandi i musapudi wa kubulwa kubatyijibwa, wakulombola’mba kudi muntu kampanda mu kipwilo wamusanshije. Pa kyaba kya kwitabila’po umo, ubulwepo kumulombola byobya binena’po Bisonekwa? Aye ubwanya kulekela mwanetu, ino shi kabwanyapo kuleka bitupu mwanda’wa, nabya akesambe nandi na kanye ne buswe na kitungo kya ‘kwaluja mwanetu.’ (Dingakanya na Mateo 18:15.) Kwasha omwifundanga nandi ateakanye byakanena. Mulombole mwa kwingidijija mpangiko ya JW Library^®, Dibuku dya Bukimbi dya Batumoni ba Yehova, ne jw.org^® mwanda wa ayuke miswelo miyampe ya mwa kupwila myanda. Shi wafundijibwa bininge kumeso kwa kubatyijibwa, ukekala biyampe na bakwabo mu kipwilo shi wabatyijibwa.

16. Mwanda waka i biyampe kunena musapudi mukwabo atanwe potwifunda na muntu?

¹⁶ Nena bantu bakwabo ba mu kipwilo ne mutadi wa kipindi papempula kyenu kipwilo bakatanwe pomwifunda. Mwanda waka? Kutentekela pa bubinga botwaletanga kala, basapudi bakwabo babwanya kukwasha omwifundanga nandi mu muswelo okubwanyapo abe mwine kumukwasha. Kimfwa, langa’po bidi shi omwifundanga nandi uloñanga bukomo bwa kuleka kutoma mfwanka ino kitatyi kivule ukomenwa. Nena Kamoni walekele kino kibidiji, padi pa kupwa kukomenwa misunsa mivule, akatanwe pomwifunda. Mwanenu Kamoni ubwanya kuleta madingi mayampe asakilwa kwivwana yewa owifunda nandi. Shi wivwananga moyo wa kwendeja kifundwa pomudi na mwanetu wa bwino, munene endeje’kyo. Kitatyi kyonso, boila ñeni kudi bakwenu ba bwino. Vuluka, kitungo kyetu i kukwasha otwifunda nandi endelele ku mushipiditu.

17-18. Le i bika byofwaninwe kulangulukila’po pa kuyuka shi ufwaninwe kwifunda na muntu nansha kuleka’byo kwifunda?

¹⁷ Shi muntu omwifunda nandi Bible kendelelapo, kyaba kimo ukeipangula’mba, ‘le mfwaninwe kuleka kwifunda nandi?’ Polangulukila pa uno mwanda, ufwaninwe kuta mutyima ku bwino bwa muntu. Bamo bendelelanga lubilolubilo ino bakwabo nabo bityebitye. Wiipangule amba: ‘Le otwifundanga nandi wendelelanga biyampe mungya ngikadilo yadi’mo?’ ‘Le kemushilule “kulama,” nansha kwingidija bintu byaefunda?’ (Mat. 28:20) Yewa wifunda Bible ubwanya kwendelela bityebitye, inoko ufwaninwe kushinta būmi bwandi.

 ¹⁸ Ino le tukalonga namani shi muntu otwifunda nandi mu bula bwa kitatyi kampanda kalombolapo amba usangedile kwifunda? Langulukila pa uno mwanda: Mubapu kwifunda na muntu dibuku Bitufundija, ne padi kemudi bashilule nandi mu dibuku Kwikala Nyeke mu Buswe bwa Leza, ino katenwe ku kupwila nansha kumo, nansha ke ku Kivulukilo kwine! Kadi kyaba kyonso upela kwifunda pa bubinga bwampikwa kwendela’mo. Mu uno muswelo, i biyampe wisambe na omwifundanga nandi pampikwa kafinda. *

19. Le i bika byobwanya kulombola muntu umweka bu kasangelangapo kwifunda Bible, ne i bintu’ka byofwaninwe kulangulukila’po?

¹⁹ Ubwanya kushilula na kumwipangula’mba, ‘Le i kintu’ka kikatampe kikulengeja ukomenwe kwikala Kamoni wa Yehova?’ Padi omwifundanga nandi ubwanya kulondolola’mba, ‘Nsenswe kwifunda Bible, inoko nkibwanyapo nansha dimo kwikala Kamoni wa Yehova!’ Shi ye mwalangila papo kemudi befunde nandi mu kitatyi kampanda, i kutupu bubinga nansha bumo bwa kwendelela kwifunda nandi. Pakwabo napo, omwifundanga nandi ubwanya kukulombola bine bimukambakanya. Kimfwa, padi aye umwene amba kabwanyapo kusapula ku njibo ne njibo. Shi ubayuka bine bimukambakanya, ukabwanya kumukwasha senene.

20. Le kwivwanija kisonekwa kya Bilongwa 13:48 kubwanya kwitukwasha namani tuyuke shi tukendelela kwifunda na muntu nansha kuleka’byo?

²⁰ Ino i kya bulanda, mwanda bantu bamo befundanga Bible badi pamo bwa bene Isalela ba mu mafuku a Ezekyele. Yehova wālombwele Ezekyele pa mwanda wabo amba: “Tala! Kobadi abe udi pamo bwa lwimbo lwa bukena, lwimbwa na diwi diyampe ne kombwa na bwino na kyombanwa kya myonji. Bakevwana binenwa byobe, ino i kutupu nansha umo ukebilonda.” (Ezk. 33:32) Tubwanya padi kukomenwa kulombola muntu amba tusa kuleka’byo kwifunda nandi. Inoko, “kitatyi kyashala’ko kibatyepa.” (1 Ko. 7:29) Pa kyaba kya kujimija kitatyi na kwifunda na muntu kendelelapo, tufwaninwe kukimba’ko yewa ulombola’mba udi “na mutyima muyampe wa kukamona būmi bwa nyeke.”​—Tanga Bilongwa 13:48.

21. Le kisonekwa kyetu kya mwaka wa 2020, i kisonekwa’ka, ne mwanda waka i kifwaninwe?

²¹ Mu bula bwa mwaka wa 2020, kisonekwa kyetu kya mwaka kiketukwasha tute mutyima ku kulumbulula mwingilo wetu wa kulonga bana ba bwanga. Kiselele binenwa bya Yesu byaānenene ku kwitana kwa kasekuseku kwa ku lūlu lwa mu Ngadilea, bya amba: “Nanshi, endai mukalonge bana ba bwanga . . . , mwibabatyijei.”​—Mat. 28:19.