1. Le i bika bikwiyanga mu ñeni polangulukila padi Yehova?

 LE KASHĀ kodi mulangulukile pa mwikadile Yehova? Le i bika bikwiyanga mu ñeni powisamba nandi mu milombelo? Nansha Yehova byakamwekangapo, Bible umutela mu miswelo mivule. Umutela bu “dyuba ne ngabo” ne bu “mudilo uloteja.” (Ñim. 84:11; Bah. 12:29) Mumwekelo wandi i mudingakanibwe pamo bwa dibwe dya safile, kintu kikelema, ne pamo bwa nkongolo ukelema. (Ezk. 1:26-28) Bintu bimo mu bino bidingakanibwe nabyo Yehova bibwanya kwitukwatyija moyo nansha kwituzakaja.

2. Le i bika bibwanya kukankaja bamo baleke kufwena kudi Yehova?

² Yehova byakamwekangapo, tubwanya kukomenwa kwitabija amba witusenswe. Bamo balañanga’mba Yehova kabwanyapo kwibasanswa pa mwanda wa būmi bwabo bwa pa kala. Padi kebadipo na mbutwile wadi wibasenswe. Yehova wivwanije milangwe yabo ne mobeivwanina. Mwanda wa kwitukwasha, Yehova i mwitusokwele ngikadila yandi ya buswe mu Kinenwa kyandi.

3. Mwanda waka twifunde buswe bwa Yehova?

³ Binenwa bimo bitela Yehova amba i buswe. (1 Yo. 4:8) Ko kunena’mba aye mwine ye buswe. Byonso byalonga wibiloñanga na buswe. Buswe bwa Leza i bukatampe, kadi wibulombolanga ne ku boba kebamusenswepo. (Mat. 5:44, 45) Mu kino kishinte, tusa kumona’mo mwikadile Yehova, ne mwalombwelanga buswe bwandi. Potwifunda bivule padi Leza wetu, po pene tukamusanswa.

YEHOVA WITUSENSWE BININGE

4. Le buswe bwa Yehova bwitulengejanga twiivwane namani? (Tala ne kifwatulo.)

⁴ “Yehova i muyule kisanso kya ku mutyima.” (Yak. 5:11)  Widingakanyanga mu Bible pamo bwa inabana wa buswe. (Isa. 66:12, 13) Mona’po mu ñeni inabana ukwatakanya wandi mwana mutyetye na buswe. Umutūdile pa maulu umunyunya, umwisambija na buswe kadi na diwi ditūke. Shi wadila nansha shi udi na misanshi, inandi umupanga byonso byasakilwa. Netu kitatyi kyotutyumukwa mutyima, tukulupilei amba Yehova witusenswe. Kaimba wa mitōto wālembele amba: “Kuzumbazumba pokwandēmenene, waunsengele ne kuntalaja.”—Ñim. 94:19.

5. Le buswe bwa Yehova bwa ndamatyidile bushintulula bika kodi?

⁵ Yehova i wa buswe bwa ndamatyidile. (Ñim. 103:8) Kalekangapo kwitusanswa nansha shi tubalonga bubi. Muzo wa Isalela wādi ulubila Yehova kitatyi ne kitatyi; ino wāendelele kulombola buswe bwa ndamatyidile ku bantu bandi besāshile na kwibakulupija’mba: “Waikele mulēme ku meso ami, walēmekelwe, kadi nakusanswa.” (Isa. 43:4, 5) Buswe bwa Leza kebushintyilepo. Tubwanya nyeke kukulupila’mba witusenswe. Yehova ketwelangapo nansha shi tubalonga bilubo bikatampe. Kitatyi kyotwisāsa ne kujokela kwadi, tukamona’mba buswe bwandi kebushintyilepo. I mwitulaye amba ‘uketulekela bya binebine.’ (Isa. 55:7) Bible utela lulekelo lwa Yehova bu “bitatyi bya kutūja bitambe kudi Yehova mwine.”—Bil. 3:19.

6. Le Zekadia 2:8 witufundija bika padi Yehova?

⁶ Tanga Zekadia 2:8. Yehova byaetusenswe, utele mutyima ku mwiivwanino wetu kadi usakanga kwitukinga. Wiivwananga bibi kitatyi kyotutyumukwa mutyima. O mwanda tubwanya kumulomba’mba: “Ndame pamo’nka bwa nkishi wa mu diso dyobe.” (Ñim. 17:8) Diso i kipindi kilēme mpata ku ngitu. Nanshi petudingakanya Yehova pamo bwa nkishi wa mu diso dyandi, bidi pamo bwa aye unena’mba, ‘Yewa ense wimulonga kibi, banwe bantu bami, nabya walonga kibi byobya bilēme kondi.’

7. Mwanda waka tusakilwa kukomeja kikulupiji kyetu mu buswe bwa Yehova?

⁷ Yehova usaka tukulupile amba usenswe umo ne umo motudi. Ino uyukile amba pa mwanda wa bintu byetutene pa kala, tubwanya kukomenwa kumona’mba witusenswe. Nansha  padi tubwanya kulwa na makambakano abwanya kutūla pa ditompo kikulupiji kyetu mu buswe bwitusenswe Yehova. Le i bika bikakomeja kikulupiji kyetu? I kwifunda muswelo ulombolanga Yehova buswe bwandi kudi Yesu, bashingwe māni, ne ku batwe bonso.

MUSWELO ULOMBOLANGA YEHOVA BUSWE BWANDI

8. Mwanda waka Yesu wādi ukulupile mu buswe bwa Shandi?

⁸ Mu bula bwa myaka mivule, Yehova ne wandi Mwana muswedibwe i baningije kijimba kya buswe bukatampe. Kipwano kyabo ye ke kīje bininge mūlu ne pano panshi. Monka mulombwela’kyo Mateo 17:5, Yehova wānenene patōkelela amba usenswe Yesu. Yehova wādi ubwanya’tu kunena’mba, ‘Uno’u ye muntu ondoelelwe.’ Inoko, wādi usaka tuyuke amba usenswe Yesu bininge, o mwanda wāmwityile amba “wami Mwana, muswedibwe.” Yehova wādi witemba Yesu, mwanda wādi wa kupāna būmi bwandi. (Ef. 1:7) Kadi Yesu kādipo utatana’mba Shandi umusenswe. Wadi ukulupile bya binebine amba Yehova umusenswe. Wānenene misunsa mivule na kikulupiji amba Tata unsenswe.—Yoa. 3:35; 10:17; 17:24.

9. Le i binenwa’ka bilombola’mba Yehova usenswe bashingwe māni? Shintulula. (Bene Loma 5:5)

⁹ Kadi Yehova ulombolanga’mba usenswe bashingwe māni. (Tanga Bene Loma 5:5.) Tala binenwa “bupungulwilwe.” Dibuku dimo dishintulula bino binenwa amba, bidi “pamo bwa mema etupungulukila.” Na bubine kino i kimfwa kifike’po kilombola buswe bukatampe bwa Yehova pa bashingwe māni! Bashingwe māni bayukile amba ‘bebasenswe kudi Leza.’ (Yude 1) Mutumibwa Yoano wālombwele mwiivwanino wabo paālembele amba: “Talai mwikadile buswe bwitusenswe Tata, amba twitwe bu bana ba Leza!” (1 Yo. 3:1) Le Yehova usenswe’nka bashingwe māni kete? Aa, witusenswe batwe bonso.

10. Le i kintu’ka kikatampe kikukulupija’mba Yehova ukusenswe?

¹⁰ Le i kintu’ka kikatampe kikukulupija’mba Yehova ukusenswe? I kinkūlwa—kilomboji kikatampe kya buswe bwa Yehova pa ntanda yonso! (Yoa. 3:16; Loma 5:8) Yehova wētupēle wāndi Mwana mulēme, na kumuleka afwile bantu bonso mwanda wa tulekelwe bubi ne kwikala balunda nandi. (1 Yo. 4:10) Potulangulukila pa mfutwa yāfutyile ba Yehova ne Yesu, po pene tukevwanija mubaile buswe bwabo ku umo ne umo motudi. (Ngt. 2:20) Kinkūlwa kekyāfutyilwepo’tu mwanda wa Yehova alombole boloke bwandi. Ino i kyabuntu kya buswe. Yehova wālombwele buswe kotudi na kupāna kintu kilēme mpata kwadi—ke Yesu kadi. Yehova wālekele wandi Mwana asusuke ne kufwa pa mwanda wetu.

11. Le i bika byotwifunda mu Yelemia 31:3?

¹¹ Monka motwekimwena, Yehova ulombolanga’mba witusenswe bininge. (Tanga Yelemia 31:3.) Yehova i mwitukokele kwadi mwanda witusenswe. (Dingakanya na Kupituluka mu Bijila 7:7, 8.) I kutupu kintu nansha muntu ubwanya kwitusansanya na buno buswe. (Loma 8:38, 39) Le buno buswe bukulengejanga wiivwane namani? Tanga Ñimbo ya Mitōto 23, mwanda wa umone mwēivwanine Davida pa buswe bwa Yehova ne pa mwaādi umutedile mutyima, ne muswelo otubwanya kwiivwana batwe bonso.

LE BUSWE BWA YEHOVA BUKULENGEJANGA WIIVWANE NAMANI?

12. Nena mu kīpi myanda idi mu Ñimbo ya Mitōto 23.

¹² Tanga Ñimbo ya Mitōto 23:1-6. Ñimbo ya Mitōto 23 i lwimbo lwitukulupija’mba Yehova witusenswe kadi witukwatakanyanga  na kanye. Davida mulembi wa uno mutōto, ulombola kipwano kikomo kyādi pa bukata bwandi na Mukumbi wandi, Yehova. Davida wālekele Yehova amuludike, ne kadi wādi ukulupile bininge mwadi. Davida wādi uyukile amba buswe bwa Yehova bukamuludika mu būmi bwandi bonso. Le i bika byāmulengeje ekale na kino kikulupiji?

13. Mwanda waka Davida wādi ukulupile amba Yehova ukamukwatakanya?

¹³ “Nkikabulwangapo kintu nansha kimo.” Davida wēivwene bu mukwatakanibwe biyampe, mwanda Yehova wādi umupa nyeke byonso byaādi usakilwa. Kadi wādi uyukile amba Yehova i mulunda nandi ne amba i mumwitabije. Kino kyo kyākulupije Davida amba nansha shi wakatanwa na bika, Yehova ukendelela kumupa byonso byasakilwa. Kikulupiji kya Davida mu buswe bwa Yehova kyādi kikomo kutabuka kintu kyo-kyonso kyādi kibwanya kumuzakaja, kadi kyādi kimupa nsangaji mivule ne katōkwe.—Ñim. 16:11.

14. Le i muswelo’ka witukwatakanyanga Yehova na buswe?

¹⁴ Yehova witukwatakanyanga na buswe, nakampata shi tubatanwa na bintu bibi mu būmi bwetu. Claire, a waingile ku Betele mu bula bwa myaka 20 ne kupita, watyumukilwe mutyima kitatyi kyatenwe kisaka kyabo na makambakano makatampe. Shandi wabelele misongo ya bulebe, mwanabo mwana-mukaji wapangwa, kadi kisaka kyabo kyajimije kaji ne njibo. Le Yehova webakwatakenye namani na buswe? Claire unena’mba: “Yehova wakwatakenye kisaka kyami na buswe na kwibapa byonso byobadi basakilwa difuku ne  difuku. Kitatyi ne kitatyi, Yehova webapēle kutabuka ne byobadi basakilwa kadi byokebadipo bafwatakanya! Nangulukilanga divule pa buswe bwa Yehova bonemwenine, kadi nkikebwilwapo. Kuvuluka bino bintu i kunkwashe ñuminine nyeke byamalwa.”

15. Mwanda waka Davida wātūkije mutyima? (Tala ne kifwatulo.)

¹⁵ “Untūkijanga mutyima.” Kitatyi kimo, Davida wātyumikilwe mutyima pa mwanda wa masusu ne makambakano awādi ulwa nao. (Ñim. 18:4-6) Ino buswe bwa Yehova bwāmutūkije mutyima. Yehova wākunkwije mulunda nandi mutyumukwe mutyima mu “madyo a lumenya,” ne mu “bifuko bya kukōkolokwa bisangilwe mema biyampe.” Kino kyākomeje Davida ne kumukwasha endelele kwingidila Yehova.—Ñim. 18:28-32.

16. Le buswe bwa Yehova bukutūkijanga mutyima namani?

¹⁶ Ne dyalelo nadyo, buswe bwa ndamatyidile bwa Yehova bwitukwashanga tūminine kitatyi kyotulwa na matompo ne makambakano mu būmi. (Mad. 3:22; Kol. 1:11) Tubandaulei’ko kimfwa kya kaka Rachel. Watyumukilwe mutyima kitatyi kyamutombokele wandi mulume ne kuleka Yehova mu kitatyi kya kipupo kya Corona. Le Yehova wamulongēle bika? Unena’mba: “Yehova wanengeje nemone bu muswibwe. Walengeje balunda bapityije nami kitatyi pamo, kundetela byakudya, kuntumina misapu ne bisonekwa, kunsepeja, kadi badi bamvuluja nyeke amba Yehova unkwatakanyanga. Mfwijanga’ko bininge Yehova pa kumpa kisaka kikatampe kya buswe.”

17. Mwanda waka Davida ‘kātyininepo kibi nansha kimo’?

¹⁷ “Nkityinangapo kibi nansha kimo, mwanda abe udi nami.” Divule, būmi bwa Davida bwādi mu kyaka, kadi wādi na balwana bavule bankomokomo. Inoko, buswe bwa Yehova bwāmulengeje eivwane biyampe ne bu mukingwe. Kuyuka kwādi kuyukile Davida amba Yehova udi nandi mu bitatyi byonso, kwāmukulupije amba ukamukwasha. O mwanda wāimbile amba: “[Yehova] waunkūla ku moyo wami onso.” (Ñim. 34:4) Moyo wa Davida wādi mwendele’mo, ino buswe bwa Yehova bwādi bukomo bupita moyo wandi.

18. Le kuyuka’mba Yehova ukusenswe kubwanya kukukomeja namani kitatyi kyokwetwe moyo?

¹⁸ Le kuyuka’mba Yehova witusenswe kubwanya kwitukomeja namani kitatyi kyotwikonda  na makambakano makomo? Kaka umo pania witwa bu Susi ulombola muswelo obeivwene na wandi mulume kitatyi kyeyowele wabo mwana, amba: “Makambakano a mu kitulumukila avutakanyanga ñeni, kadi abwanya kulengeja muntu azoze ne kwimona bu wa bule. Inoko buswe bwitusenswe Yehova bwetulengeje twiivwane biyampe ne kwitukinga.” Kaka Rachel, otwesambilanga’po uvuluka’mba: “Bufuku bumo poneivwene bibi ne kwivwana moyo, nalombēle Yehova na diwi ditunduke. Ponka na ponka wantūkija ne kuntalaja mutyima pamo na mulongelanga lolo na wandi mwana, kupwa naponena mu tulo. Nkikelwapo nansha dimo kyokya kitatyi.” Mukulumpe umo witwa bu Tasos, wakutyilwe mu bula bwa myaka iná mwanda wa kupela kutwela busola. Le wemwenine namani buswe bwa Yehova ne muswelo waamukwatakenye? Unena’mba: “Yehova wankwatakenye ne kumpa bintu bivule kutabuka ne byonadi nsakilwa. Kino kyanengeje nkulupile bininge mwadi. Kadi kupityila ku mushipiditu wandi, Yehova wampēle ndoe nansha byonadi mu kaso. Kino kyankweshe njingulule amba shi nkulupile bininge mudi Yehova, nandi ukendelela kunsanswa. O mwanda nashilwile kwingila bu pania wa lonso mu kaso.”

FWENA KUDI LEZA OBE WA KANYE

19. (a) Le kuyuka’mba Yehova witusenswe kubwanya kwikala na lupusa’ka pa myanda yotulomba mu milombelo? (b) Lombola mokodi mwimwene buswe bwa Yehova mu bobe būmi. (Tala kapango “ Binenwa Bitukwasha Twivwanije Mubaile Buswe bwa Yehova.”)

¹⁹ Myanda mimweke yotwesambila’po ilombola’mba Yehova, “Leza wa buswe,” udi netu! (2 Ko. 13:11) Utele umo ne umo motudi mutyima. Tukulupile amba ‘tujokolokelwe na buswe bwandi bwa ndamatyidile.’ (Ñim. 32:10) Shi tulangulukila pa mwitusanshilwe Yehova, po pene tukamumona bu muntu wa bine kotudi kadi tukamufwena. Tubwanya kumufwena pampikwa moyo ne kumulombola motusakilwa buswe bwandi. Tubwanya kumulombola makambakano etu onso na kikulupiji kya amba, wivwanije ngikadilo yotudi’mo kadi usakanga kwitukwasha.—Ñim. 145:18, 19.

20. Le buswe bwa Yehova bwitufwenyanga namani kwadi?

²⁰ Monka mwitukokelanga kyanga pokudi mashika, ye mwitukokelanga ne buswe bwa Yehova. Nansha buswe bwa Yehova byobudi na bukomo, ino kadi budi na kanye. Nanshi tabija buswe bwa Yehova mu bobe būmi. Kadi batwe bonso tubwanya kulondolola ku buswe bwandi na kunena’mba: “Amiwa nsenswe Yehova”!—Ñim. 116:1.