Padi pamo bwa bavule motudi, nobe bikukomenanga kuvuluka myanda yowifunda. Inoko i bipēla kuvuluka bintu bivule byētufundije Yesu mwanda wādi wingidija divule byelekejo. Bino byelekejo bibwanya kwitwiya mu ñeni, kadi kino kitukwashanga tuvuluke byaāfundije. Abe nobe, ubwanya kuvula myanda mivule yowifunda na kufwatula bifwatulo. Le i muswelo’ka obwanya kulonga namino? I na kufwatula bifwatulo powifunda.

Bantu bafwatula bifwatulo bya bintu bipya byobefunda, divule bebivulukanga senene. I bamone amba ano manwa ebakwashanga bevwanije binenwa ne myanda mikatampe yobefunda. Bifwatulo byabo kebikalangapo bikutakane, ino bikalanga’tu bipēla. Kadi bukamoni bulombola’mba enka ne banunu babwanya kumwena bininge mu ano manwa.

Kitatyi kikwabo kyosa kwifunda, ubwanya kutompa kufwatula bifwatulo kampanda pa myanda yowifunda. Padi ukatulumuka bininge pa kuvuluka myanda mivule yowifunda!