1. Le i kikoleja’ka kyotwikondanga nakyo batwe bonso?

 TUSAKILWANGA kukwata butyibi difuku ne difuku. Bumo bwikalanga bupēla, pamo bwa kutonga bintu byotusaka kudya nansha nsá ya kulāla. Inoko butyibi bukwabo bwikalanga bukomo bininge kukwata. Bubwanya kwikala na lupusa pa bukomo bwetu bwa ngitu, pa nsangaji yetu, pa baswe betu, nansha pa butōtyi bwetu. Tusakanga butyibi botukwata bwitulengeje twikale na nsangaji pamo ne kisaka kyetu. Inoko kutabukidila, tusakanga butyibi bwetu busangaje Yehova.—Loma 12:​1, 2.

2. Le i matabula’ka aketukwasha tukwate butyibi bwa tunangu?

² Pa kukwata butyibi bwa tunangu, tufwaninwe (1) kukimba kuyuka mwikadile myanda, (2) kuyuka mulangila’po Yehova, ne (3) kubandaula manwa obwanya kwingidija. Mu kino kishinte tusa kubandaula’mo ano manwa, kadi kisa kwitukwasha tumone muswelo wa kwingidija bukomo bwetu bwa kusansanya.—Nki. 2:11.

KIMBA KUYUKA MWIKADILE MYANDA

3. Leta kimfwa kilombola kine kyotufwaninwe kuyukila mwikadile myanda kumeso kwa kukwata butyibi.

³ Ditabula dibajinji diketukwasha tukwate butyibi buyampe, i kukimba kuyuka mwikadile myanda. Mwanda waka kulonga namino i kwa mvubu? Fwatakanya’po muntu ubela wakamone dokitele mwanda wa amundape misongo mikatampe. Le dokitele ukakwata butyibi bwa kumupa lawa kwampikwa kumupima nansha kumwipangula bipangujo? Aa! Nobe ukakwata butyibi buyampe shi ukimbe dibajinji kuyuka mwikadile myanda mu mwanda okimba kukwata butyibi. Le i muswelo’ka obwanya kulonga namino?

4. Le mungya Nkindi 18:​13, i bika byotunenwe kulonga pa kukimba kuyuka mwikadile myanda? (Tala ne kifwatulo.)

 ⁴ Ubwanya kukimba kuyuka mwikadile myanda na kwipangula bipangujo. Langa’po bidi abakwite ku fetyi. Lelo ukatanwa’ko? Shi kuyukilepo mwine ukwityile nansha mpangiko ikwetwe’ko, ufwaninwe kumwipangula bipangujo pamo bwa bino: “Le i kitatyi’ka ne i kwepi kukalongelwa ino fetyi? Le kukekala bantu banga? I ani le ukemanina ino fetyi? I bāni bakatanwa’ko? Le i mingilo’ka ikengilwa’ko? Kukaletwa ne mālwa?” Malondololo a bino bipangujo akakukwasha ukwate butyibi bwa tunangu—Tanga Nkindi 18:13.

5. Le i bika byofwaninwe kulonga shi ubayuka mwikadile myanda?

⁵ Shi ubapu kuyuka mwikadile myanda, kimba kuyuka na katentekeji myanda yonso. Kimfwa, le ukalonga namani shi ubajingulula’mba bantu betyilwe ku ino fetyi kebalēmekelepo misoñanya ya mu Bible, nansha’mba kukabanibwa ne mālwa ino kwampikwa muntu wa kwimanina’o? Le umwene mubwanya kwalamukila ino fetyi ke mibimibi? (1 Pe. 4:3) Ino le bikekala namani shi kitatyi’kya ino fetyi kibedye mponye na kitatyi kyobe kya kupwila nansha kya kusapula? Kuyuka myanda yonso, kukakukwasha ukwate butyibi buyampe. Inoko usakilwa kutabula ne ditabula dikwabo dya mvubu. Pano ubayuka  mwikadile myanda; le Yehova nandi umona’po namani?—Nki. 2:6.

BANDAULA MULANGILA’PO YEHOVA

6. Le mungya Yakoba 1:​5, mwanda waka tufwaninwe kulomba Yehova etukwanshe?

⁶ Lomba Yehova akukwashe wivwanije mwalangila’po. Aye i mulaye kwitupa tunangu tuketukwasha tujingulule shi butyibi kampanda bukamusangaja. Witupanga tuno tunangu “na mutyima tō pampikwa kutopeka.”—Tanga Yakoba 1:5.

7. Le i muswelo’ka obwanya kuyuka mulangilo wa Yehova? Leta kimfwa.

⁷ Shi ubalombe Yehova akuludike, tá mutyima ku muswelo wakulondolola. Tulete kimfwa: Shi udi mu lwendo ebiya ubajimina, ukalomba bantu ba kwine’kwa bakukwashe. Ino le ukataluka’po kumeso kwa bakukwashe? Aa. Ukata mutyima bininge ku byobakakulombola. Ne abe nobe, shi ubalombe Yehova akupe tunangu, longa bukomo bwa kujingulula malondololo na kukimba bijila bya mu Bible ne misoñanya yobwanya kwingidija mu ngikadilo yodi’mo. Kimfwa, kitatyi kyokwata butyibi bwa kukatanwa ku fetyi yotwesambilanga’po ku ngalwilo nansha kuleka kutanwa’ko, ubwanya kubandaula binena Bible pa mafetyi mabimabi, kupwana na balunda babi, ne kamweno kadi mu kubadikija kumeso tumweno twa Bulopwe pa kyaba kya bintu byokimba kulonga.—Mat. 6:33; Loma 13:13; 1 Ko. 15:33.

8. Le i bika byobwanya kulonga shi usakilwa bukwashi pa kusokola myanda yokimba? (Tala ne kifwatulo.)

 ⁸ Shako kyaba kimo ubwanya kusakilwa bukwashi pa kusokola myanda yokimba. Ubwanya padi kukimba bukwashi kudi tutu nansha kaka wa bwino. Inoko kadi ubwanya kumwena ne mu kulonga abe mwine bukimbi. Kudi myanda mivule ibwanya kukukwasha mu mabuku a kulonga nao bukimbi, pamo bwa Dibuku dya Bukimbi dya Batumoni ba Yehova ne Bisonekwa Bikwasha Mwine Kidishitu mu Būmi. Vuluka’mba kitungo kyobe i kukwata butyibi busangaja Yehova.

9. Le i bika bibwanya kwitukulupija’mba butyibi bwetu bukasangaja Yehova? (Bene Efisesa 5:17)

⁹ Le i bika bibwanya kwitukulupija’mba butyibi bwetu bukasangaja Yehova? Dibajinji, tufwaninwe kumuyuka biyampe. Bible unena’mba, “Buyuki bwa Mwine Ujila Nakampata yo ñeni.” (Nki. 9:10) Na bubine, ñeni ya bine itambanga ku kuyuka ngikadila ya Yehova, kitungo kyandi, bintu byasenswe ne byashikilwe. Wiipangule amba, ‘Byonayuka ino myanda padi Yehova i butyibi’ka bonkakwata bukamusangaja?’—Tanga Bene Efisesa 5:17.

10. Mwanda waka misoñanya ya mu Bible i ya mvubu kutabuka bibidiji bya kisaka nansha bya kotushikete?

¹⁰ Pa kusangaja Yehova, kitatyi kimo biketulomba kulonga bintu kebikasangajapo bantu botupwene nabo. Kimfwa, bambutwile bamo ba kukanina kuyampe babwanya kuningila wabo mwana mwana-mukaji asongwe na muntu wa lupeto mwine ukebapa buko buvule—nansha shi ke mukomopo ku mushipiditu. Na bubine, basakanga wabo mwana akale na būmi buyampe. Ino le i ani ukamukwasha endelele biyampe ku mushipiditu? Le Yehova umona namani uno mwanda? Tutana malondololo mu Mateo 6:33. Kino kisonekwa kikankamika bene Kidishitu “[bakimbe] bidi nyeke Bulopwe.” Nansha byotulēmekele bambutwile betu ne bantu betujokolokele, kintu kyotutele’ko mutyima bininge i kusangaja Yehova.

BANDAULA MANWA OBWANYA KWINGIDIJA

11. Le i ngikadila’ka itelelwe mu Bene Fidipai 1:​9, 10 ikakukwasha uyuke manwa a kwingidija?

¹¹ Shi ubasokola misoñanya ya mu Bible yobwanya kwingidija pa kukwata butyibi, ufwaninwe ne kujingulula manwa obwanya kwingidija. (Tanga Bene Fidipai 1:​9, 10.) Kusansanya kubwanya kukukwasha umone bintu bibwanya kulupuka ku manwa okengidija. Kitatyi kimo butyibi bubwanya kwikala bupēla kukwata. Inoko ke butyibipo bonso bwikalanga bupēla. Kusansanya kukakukwasha ukwate butyibi bwa tunangu enka ne mu myanda mikutakane.

12-13. Le kusansanya kukakukwasha namani ukwate butyibi bwa tunangu pokimba kaji?

¹² Tubandaulei’ko uno mwanda. Langa’po ukimbanga kaji mwanda wa kukwatakanya kyobe kisaka. Ebiya ubatana twaji tubidi. Ubabandaula myanda yonso, kimfwa kaji kene kosa kwingila, mpangiko ya kaji, kitatyi kyokekala ulonga pa kufika ku kaji, ne myanda mikwabokwabo. Ubamone amba tuno twaji tonso tubidi i twitabijibwe ku mwine Kidishitu. Ebiya ubatonge’po kaji kamo, padi ye kowadi wabila nansha padi ye kobafuta lupeto luvule. Nansha nankyo kudi myanda mikwabo yofwaninwe kubandaula pa kukwata butyibi.

¹³ Kimfwa, le tuno twaji tubidi tubwanya kwidya mponye na mpangiko ya ku kupwila? Le tuno twaji tubwanya kwitudya kitatyi kyotusakilwa pa kukwatakanya bisakibwa bya mu malango ne bya ku ngitu bya kyetu kisaka. Kwiipangula bipangujo pamo bwa bino, kukakukwasha ubadikije kumeso “bintu bya  mvubu mikatampe”—kimfwa, butōtyi ne bisakibwa bya kyobe kisaka pa kyaba kya bintu bya ku ngitu. Shi ulonge namino, Yehova ukesela butyibi bokakwata.

14. Le kusansanya ne kulombola buswe kuketukwasha namani twepuke kukukaja bakwabo?

¹⁴ Kadi kusansanya kuketukwasha tulangulukile pa lupusa lubwanya kwikala na butyibi bwetu pa bantu bakwabo kutyina ‘kwibakukaja.’ (Fid. 1:10) Kulonga namino i kwa mvubu ne kitatyi kyotukwata butyibi mu mwanda utala bivwalwa ne muswelo wa kwidyangula. Kimfwa, tubwanya kusangela muvwadilo kampanda nansha mwidyangwilo kamukaya. Ino le bikekala namani shi uno mwidyangwilo nansha muvwadilo ubakukaja bantu ba mu kipwilo nansha ba panja pa kipwilo? Kusansanya kuketukwasha tulēmeke muswelo obeivwana. Kadi buswe buketutonona tukimbe ‘kamweno ka mukwetu’ ne kwikala na butūkanye.  (1 Ko. 10:​23, 24, 32; 1 Tm. 2:​9, 10) Mu uno muswelo, tukakwata butyibi bulombola’mba tusenswe bakwetu kadi twibalēmekele.

15. Le i bika byofwaninwe kulonga kumeso kwa kukwata butyibi bukatampe?

¹⁵ Shi kokwata butyibi bukatampe, langulukila pa bintu byonso byonenwe kulonga pa kwibufikidija. Yesu wētufundije ‘kubala lupeto lwa kujimija.’ (Luka 14:28) Nanshi bandaula kitatyi, lupeto, ne bukomo bokasakilwa pa kufikidija butyibi bokwata. Kyaba kimo, ubwanya kwisamba na ba mu kyobe kisaka mwanda wa uyuke bintu bifwaninwe kulonga muntu ne muntu mu kisaka mwanda wa kufikidija butyibi bobe. Mwanda waka bidi na mvubu kulonga namino? Padi kulonga namino kukakukwasha ujingulule amba ufwaninwe kujadika butyibi bobe nansha kwibushinta. Kadi kitatyi kyowisamba na ba mu kyobe kisaka ne kuteja milangwe yabo, bakakukwasha ukwate butyibi buyampe.—Nki. 15:22.

KWATA BUTYIBI BUYAMPE

16. Le i matabula’ka akakukwasha ukwate butyibi buyampe? (Tala ne kapango “ Mwa Kukwatyila Butyibi bwa Tunangu.”)

¹⁶ Shi ulonde ano matabula onso otwesambila’po, ukakwata butyibi bwa tunangu. Ubayuka myanda yonso ne kubandaula misoñanya ikakukwasha ukwate butyibi busangaja Yehova. Ebiya ubwanya kulomba Yehova akukwashe ukwate butyibi buyampe.

17. Le i kintu’ka kikatampe kikakukwasha ukwate butyibi buyampe?

¹⁷ Nansha shi wakwete butyibi buvule buyampe mafuku kunyuma, vuluka’mba kintu kikakukwasha ukwate butyibi buyampe i kukulupila mu tunangu tutamba kudi Yehova, ke mu ñenipo yobe nansha mu bwino bobe. Aye ye ubwanya kukupa buyuki bwa bine, ñeni ne kusansanya—bintu bya mvubu pa kwikala na tunangu. (Nki. 2:​1-5) Bine, Yehova ubwanya kukukwasha ukwate butyibi bumusangaja.—Ñim. 23:​2, 3.