1. Le tumwenanga namani na kutanwa ku Kivulukilo kya lufu lwa Kidishitu kiloñwanga mwaka ne mwaka?

 NA BUBINE abe nobe witabije amba kinkūlwa i kyabuntu kilēme! (2 Ko. 9:15) Yesu byaāpene būmi bwandi bwa bu muntu, ubwanya kupwana na Yehova Leza. Kadi ubwanya kwikala na kyepelo kya kwikala’ko nyeke. Bine, tudi na bubinga buvule bwa kufwijija’ko Yehova, mwine wāletele kinkūlwa pa mwanda wa buswe bukatampe bwaetusenswe! (Loma 5:8) Pa kwitukwasha twendelele kufwija’ko ne kuleka kumona kinkūlwa bu kintu kya bituputupu, Yesu wētusoñenye tutanwe ku Kivulukilo kya lufu lwandi kiloñwanga mwaka ne mwaka.—Luka 22:​19, 20.

2. Le i bika byotusa kubandaula mu kino kishinte?

² Uno mwaka, Kivulukilo kikalongwa mu Dya Mposo, mafuku 12 Kweji 4, 2025. Na bubine, batwe bonso twiteakanyanga mwanda wa kutanwa’ko. Tukamwena’mo bininge shi twitudile’ko kyaba kya kulangulukila a pa bitulongēle ba Yehova ne Yesu mu kitatyi kya Kivulukilo. Mu kino kishinte, tusa kumona’mo bitufundija kinkūlwa padi Yehova ne wandi Mwana. Kishinte kilonda’ko, kiketukwasha twivwanije muswelo otubwanya kumwena mu kinkūlwa ne otubwanya kulombola kufwija’ko.

BITUFUNDIJA KINKŪLWA PADI YEHOVA

3. Le lufu lwa muntu umo lwādi lwa kukūla namani bantu midiyo ne midiyo? (Tala ne kifwatulo.)

³ Kinkūlwa kitufundija boloke bwa Yehova. (Kup. 32:4) Muswelo’ka?  Kimfwa: Pa mwanda wa kubulwa kikōkeji kwa Adama, twi bapyane bubi bwine bwitulengeja tufwe. (Loma 5:12) O mwanda pa kwitukūla ku bubi ne lufu, Yehova wākwete’ko mpangiko ya kwitupa Yesu bu kinkūlwa. Ino le kitapwa kya muntu umo mubwaninine kyādi kya kukūla namani bantu midiyo ne midiyo? Mutumibwa Polo wāshintulwile amba: “Monka mwālengeje kubulwa kikōkeji kwa muntu umo [Adama] bavule ke babipya-mambo, ne kikōkeji kya muntu umo [Yesu] nakyo mo monka kikalengeja bavule ke boloke.” (Loma 5:19; 1 Tm. 2:6) Mu muneneno mukwabo i amba, kupityila ku muntu umo mubwaninine wa kubulwa kikōkeji twaikele bapika ba bubi ne lufu. Inoko, twanyongolwelwe kupityila ku muntu umo mubwaninine kadi wa kikōkeji.

4. Mwanda waka Yehova kālekelepo’tu bana ba Adama bāmukōkele bekale’ko nyeke?

⁴ Le Yesu wādi unenwe’nka kufwa mwanda wa kwitukūla? Mwanda waka Yehova kālekelepo’tu bana ba Adama bāmukōkele bekale’ko nyeke? Ku bantu ba kubulwa kubwaninina, uno ubwanya kumweka bu muswelo muyampe wa kupwija myanda. Inoko kulonga namino kekwādipo kwa kulombola boloke bubwanine bwa Yehova. Yehova byadi Leza wa boloke, kātadilepo kilomonyeka kilonga kya kubulwa kikōkeji kya Adama.

5. Mwanda waka tubwanya kukulupila’mba Yehova ukalonga nyeke byoloke?

⁵ Le penepo byādi bya kwikala namani shi Yehova kālombwelepo boloke bwandi na kuleka kuleta kinkūlwa, inoko waleka bana ba Adama ba kubulwa kubwaninina bekale’ko nyeke? Padi kino kyādi kya kulengeja bantu batatane amba Yehova kakalombolapo boloke ne mu myanda mikwabo. Kimfwa, padi bantu badi ba kutatana’mba Yehova kakafikidijapo milao yandi yonso. Inoko bintu kebyadipo bya kulongeka uno muswelo. Bubine i amba, Yehova wālongele bintu na boloke nansha byobyāmulombele kupāna kintu kikatampe—ko kunena’mba kulambula wandi Mwana muswedibwe. O mwanda tubwanya kukulupila’mba ukalonga nyeke byoloke.

6. Le i muswelo’ka umo bidi ulombolanga kinkūlwa buswe bwa Yehova? (1 Yoano 4:​9, 10)

⁶ Kinkūlwa kitukwasha twivwanije amba Yehova i Leza wa boloke. Kadi kitukwasha nakampata tumone mubaile buswe bwandi. (Yoa. 3:16; tanga 1 Yoano 4:​9, 10.) Kinkūlwa kilombola’mba Yehova usaka twikale na būmi bwa nyeke ne kutwela mu kisaka kyandi. Kimfwa: Kitatyi kyālongele Adama bubi, Yehova wāmupangile mu kisaka kya batōtyi bandi. Kino i kilengeje batwe bonso tubutwilwe panja pa kisaka kya Leza. Inoko kupityila ku kinkūlwa, Yehova witulekelanga bubi bwetu,  kadi ku mfulo ukatweja mu kisaka kyandi boba bonso balombola lwitabijo mwadi ne kumukōkela. Shako enka ne pano, tubwanya kwikala mu kipwano kiyampe na Yehova ne na batōtyi-netu. Bine, Yehova i mwitusanswe kisanso kikatampe!—Loma 5:​10, 11.

7. Le masusu a Yesu etukwasha namani twivwanije mwitusanshilwe Yehova?

⁷ Tubwanya kwivwanija senene mwitusanshilwe Yehova shi tubandaule bintu byaēsuminwe pa kufuta kinkūlwa. Satana wānenene amba i kutupu mwingidi wa Leza nansha umo ukashala wa lulamato kwadi shi watanwa na matompo makatampe. Pa kubepulula buno bubela, Yehova wālekele Yesu asusuke kumeso kwa kufwa. (Yoba 2:​1-5; 1 Pe. 2:21) Yehova wāmwene Yesu ufutululwa na bendeji ba mutōtelo bādi bamulwa, ukupilwa nsonde na basola, ne kupopwa ku mutyi. Kadi wāmwene wandi Mwana ufwa lufu lusansa. (Mat. 27:​28-31, 39) Yehova udi na bukomo bwaādi ubwanya kukankaja bino byonso bileke kulongeka. Kimfwa, balwana pobānenene amba: “[Leza] āyenga pano amunyongolole shi umuswile,” Yehova wādi ubwanya kumukūla. (Mat. 27:​42, 43) Inoko shi Leza wālongele namino, kinkūlwa kekyādipo kya kufutwa, kadi ketwadipo ba kwikala na lukulupilo. O mwanda Yehova wālekele wandi Mwana ōminine masusu enka ne byaāfwile.

8. Le byāsense Yehova paāmwene wandi Mwana ususuka? Shintulula. (Tala ne kifwatulo.)

⁸ Ketufwaninwepo kulanga’mba Leza byadi mwinē bukomo bonso, kabwanyapo kwiivwana biyampe nansha bibi! Byotwāpangilwe mu kyelekejo kya Leza na bukomo bwa kwiivwana biyampe nansha bibi, o mwanda i byendele’mo kulanga’mba Yehova nandi wiivwananga biyampe nansha bibi. Bible ulombola’mba tubwanya ‘kumusanshija’ ne ‘kumufītyija mutyima.’ (Ñim. 78:​40, 41) Tubandaulei’ko nsekununi ya Abalahama ne Izake. Yehova wāsoñenye Abalahama alambule wandi mwana umo kete bu kitapwa. (Ngo. 22:​9-12; Bah. 11:​17-19) Fwatakanya’po mwēivwanine Abalahama kitatyi kyaādi ukimba kwipaya wandi mwana Izake na kipete. Bine, Yehova nandi wēivwene bibi bininge paāmwene wandi Mwana ususulwa bibibibi ne kwipaibwa na bantu bampikwa bwine Leza!—Tala pa jw.org video Iulai Lwitabijo Lwabo—Abalahama, Kipindi 2.

9. Le Bene Loma 8:​32, 38, 39 ukukwasha namani wivwanije mubaile buswe bukusenswe Yehova ne bwasenswe batōtyi-nobe?

⁹ Kinkūlwa kitufundija’mba i kutupu muntu witusenswe na mwitusanshilwe Yehova—ekale mubutule wa pabwipi bininge nansha mulunda netu muswedibwe. (Tanga Bene Loma 8:​32, 38, 39.) Na bubine Yehova witusenswe bininge kutabuka ne motwisanshilwe batwe bene. Le usakanga kwikala’ko nyeke? Yehova  ye mwine usakanga bininge amba wikale’ko nyeke. Lelo usakanga kulekelwa bubi bobe? Yehova ye mwine usakanga bininge kukulekela. Inoko kintu’tu kyaetulomba i kwitabija kyabuntu kyandi kya ku bitupu na kulombola lwitabijo mwadi ne kumukōkela. Bine, kinkūlwa i kilomboji kikatampe kya buswe bwa Leza. Kadi mu ntanda mipya, tukefundila’ko myanda mivule pa buswe bwa Yehova.—Mus. 3:11.

BITUFUNDIJA KINKŪLWA PADI YESU

10. (a) Mwanda waka Yesu wēivwene bibi bininge pangala pa lufu lwandi? (b) Le Yesu wābingije namani dijina dya Yehova? (Tala ne kapango “ Bululame bwa Yesu Bwābingije Dijina dya Yehova.”)

¹⁰ Yesu utele mutyima bininge ku muswelo umonwa dijina dya Shandi. (Yoa. 14:31) Yesu wāfītyilwe bininge pa kutyibilwa nsambu ya kwipaibwa bu nkuma-bibi ne bu muntu utuka Leza, mwanda kino kyādi kya kufutulwija dijina dya Shandi. O mwanda wālombēle amba: “A Tata, shi bibwanika, kino kitomeno kimpityile kulampe.” (Mat. 26:39) Yesu wābingije dijina dya Yehova na kulama bululame bwandi kufika ne ku lufu.

11. Le Yesu wālombwele namani buswe bukatampe ku bantu? (Yoano 13:1)

¹¹ Kadi kinkūlwa kitufundija’mba Yesu utele bantu mutyima bininge, nakampata bandi bana ba bwanga. (Nki. 8:31; tanga Yoano 13:1.) Kimfwa, Yesu wādi uyukile amba bintu bimo byākalonga mu mwingilo wandi wa pano pa ntanda bikekala bisansa bininge, kutabukidila kitatyi kyaādi wa kufwa lufu lusansa. Yesu wālongele bino bintu byonso mwanda wādi usenswe Leza. Inoko kadi i mwanda wādi usenswe ne bantu. Wālombwele amba usenswe bininge bantu na kwibasapwila, kwibafundija, ne kwibakwasha. Enka ne mu difuku dyaādi wa kwipaibwa, Yesu wētūdile’ko kitatyi kya koija batumibwa bandi ku maulu,  wēbashadika na binenwa bisenga ne kwibapa bulombodi. (Yoa. 13:​12-15) Kupwa paādi ku mutyi wa masusu, Yesu wētūdile’ko kitatyi kya kulombola nkuma-bibi wādi kubwipi nandi binenwa bya lukulupilo ne kukwata’ko mpangiko ya mwa kukwatakenya inandi. (Luka 23:​42, 43; Yoa. 19:​26, 27) Nanshi, Yesu kālombwelepo buswe bwandi enka na kufwila bantu, ino i ne mu bintu byonso byaālongele paādi pano pa ntanda.

12. Le Yesu wendelelanga kwipāna pa mwanda wetu mu buluji’ka?

¹² Nansha Kidishitu byaāfwile “dimo kupwididile,” aye ukyendelela kwipāna pa mwanda wetu. (Loma 6:10) Muswelo’ka? Ukyendelela kwingila mwanda wa kwitupa bintu bivule biyampe bilupukile ku kinkūlwa. Tubandaulei’ko bintu byakilonga ne pano. Wingilanga bu Mulopwe wetu, bu Kitobo Mukatampe, ne bu mutwe wa kipwilo. (1 Ko. 15:25; Ef. 5:23; Bah. 2:17) Kadi utangidile mwingilo wa kukongakanya bashingwe māni ne kibumbo kikatampe, mwingilo mwine ukavuika kumeso kwa kyamalwa kikatampe kufula. b (Mat. 25:32; Mako 13:27) Ne kadi wingidijanga umpika mukōkele mwanda wa kupa bengidi bandi ba kikōkeji byakudya bya ku mushipiditu mu ano mafuku a mfulo. (Mat. 24:45) Kadi ukendelela kwitwingidila enka ne mu wandi Umbikalo wa Myaka Kanunu. Bine, Yehova i mwitupe wandi Mwana!

KOKALEKA NANSHA DIMO KWIFUNDA

13. Le kulanguluka kubwanya kukukwasha namani wendelele kwifunda myanda itala buswe bwitusenswe Leza ne Kidishitu?

¹³ Tubwanya kwendelela kwifunda myanda itala buswe bwitusenswe ba Yehova Leza ne Yesu Kidishitu shi twendelele kulangulukila’po. Padi mu kitatyi kya Kivulukilo kya uno mwaka, ubwanya kutanga na katentekeji Evanjile imo nansha mavule. Kokepangila kutanga mashapita mavule musunsa umo. Inoko tanga bityebitye ne kukimbila’ko bubinga bukwabo botufwaninwe kusanshilwa ba Yehova ne Yesu. Kadi sapwila bantu bakwabo myanda yowifunda.

14. Mungya Ñimbo ya Mitōto 119:​97, le bukimbi bubwanya kwitukwasha namani twifunde myanda itala kinkūlwa ne bufundiji bukwabo? (Tala ne kifwatulo.)

¹⁴ Shi kodi mulonge myaka mivule mu bubine, ubwanya padi kukimba kuyuka shi bibwanika kusokwela’ko bintu bipya pa myanda yotuyukile senene, pamo bwa boloke bwa Leza, buswe bwandi, ne kinkūlwa. Bubine i amba  tukendelela kwifundila’ko bintu bipya pa ino myanda ne pa myanda mikwabo. Le tubwanya kwifunda’yo namani? Witūdile’ko kitatyi kya kutanga myanda itendelwa idi mu mabuku etu. Shi ubatana vese okwivwanijepo senene, longela’po bukimbi. Kupwa, langulukila mu bula bwa difuku pa myanda yowasokola, pa byoikufundija padi Yehova, padi wandi Mwana, ne pa buswe bobakusenswe.—Tanga Ñimbo ya Mitōto 119:97.

15. Mwanda waka tufwaninwe kwendelela kukimba myanda mipya mu Bible?

¹⁵ Shi kusokwelepo myanda mipya nansha isangaja kitatyi kyonso kyotanga ne kulonga bukimbi, kokatyumukwa mutyima. Mu muswelo kampanda, udi pamo bwa muntu ukimba olo. Na kitūkijetyima, bakimbi ba olo bapityijanga mansá nansha mafuku mavule pa kusokola tuolo nansha tutyetye bininge. Inoko bendelelanga na kukimba, mwanda nansha ke tuolo tutyetye bininge tudi na mvubu kobadi. Bine, bubine bupya botusokola mu kwifunda budi na mvubu mpata kupita olo! (Ñim. 119:127; Nki. 8:10) Nanshi ikala na kitūkijetyima kadi londa mpangiko yobe ya butangi bwa Bible.—Ñim. 1:2.

16. Le i muswelo’ka otubwanya kwiula Yehova ne Yesu?

¹⁶ Powifunda Bible, kimba’ko miswelo ya kwingidija’mo myanda yowifunda. Kimfwa, iula boloke bwa Yehova na kulongela bantu bakwabo bintu pampikwa mboloji. Iula buswe bwa Yesu bwasenswe Shandi ne bantu, na kukimba kususuka na mutyima umo pa mwanda wa Yehova ne kwipāna pa mwanda wa batutu ne bakaka. Kadi iula Yesu na kusapwila bantu bakwabo amba nabo bamone mukenga wa kwitabija kyabuntu kilēme kya Yehova.

17. Le i bika byotukabandaula mu kishinte kilonda’ko?

¹⁷ Shi twendelele kwivwanija mvubu ya kinkūlwa ne kulombola mutyima wa kufwija’ko, po pene tukasanshilwa’ko Yehova ne wandi Mwana. Ne kino kikalengeja nabo betusanshilwe’ko. (Yoa. 14:21; Yak. 4:8) Nanshi twingidijei Bible ne mabuku alupulwa na bulongolodi bwetu mwanda wa kwendelela kwifunda myanda itala kinkūlwa. Mu kishinte kilonda’ko, tukabandaula’mo muswelo otubwanya kumwena mu kinkūlwa ne otubwanya kulombola kufwija’ko pa buswe bwa Yehova.