1. Le i bika byotubwanya kulonga pa kusangaja Yehova?

 FWATAKANYA’PO ubape muntu osenswe kyabuntu kiyampe kadi kingila senene. Bine ukatyumukwa mutyima shi uno muntu wekitūla’tu mu kibīko ne kuleka kwikingidija! Inoko ukekala na nsangaji shi uno muntu wikingidija biyampe ne kulombola kufwija’ko. Le i bika byotwifunda’ko? Yehova wāpene wandi Mwana pa mwanda wetu. Na bubine, Yehova usangalanga kitatyi kyotulombola kufwija’ko pa kino kyabuntu kilēme ne pa buswe bwaētulombwele, bwine bwāmutonwene alete kinkūlwa!—Yoa. 3:16; Loma 5:​7, 8.

2. Le i bika byotusa kwisambila’po mu kino kishinte?

² Inoko mu kupita kwa kitatyi, tubwanya kushilula kumona kinkūlwa bu kekikidipo na bulēme. Kulonga namino kudi pamo bwa kutūla kyabuntu kya Leza mu kibīko. Twi basangale pa kwikala na kino kyabuntu, inoko tubekitūla pantu pampikwa kumweka. Pa kusaka’mba kino kileke kulongeka, tufwaninwe kufwija’ko kitatyi ne kitatyi pa bitulongēle Leza ne Kidishitu. Kino kishinte kisa kwitukwasha tulonge namino. Tusa kwisambila pa muswelo otumwenanga mu kinkūlwa tamba pano ne otukamwena’mo mu mafuku a kumeso. Kadi tusa kubandaula ne muswelo otubwanya kulombola mutyima wa kufwija’ko pa buswe bwa Yehova, kutabukidila mu kitatyi kya Kivulukilo.

MUSWELO OTUMWENANGA’MO TAMBA PANO

3. Le i muswelo’ka umo bidi otumwenanga mu kinkūlwa tamba pano?

³ Tumwenanga kala mu kinkūlwa kya Kidishitu. Kimfwa kupityila ku kinkūlwa, Yehova witulekelanga bubi bwetu. Aye kanenwepo’nka kwitulekela. Ino nansha nankyo, usakanga kwitulekela. Mulembi wa mitōto pa kulombola mutyima wa kufwija’ko wāimbile amba: “Mwanda abe Yehova, wi muyampe kadi kwijepo kulekela.”—Ñim. 86:5; 103:​3, 10-13.

4. Mwanda waka Yehova wāletele kinkūlwa? (Luka 5:32; 1 Temote 1:15)

 ⁴ Bantu bamo babwanya kulanga’mba, kebafwaninwepo kulekelwa na Yehova. Shako batwe bonso ketufwaninwepo kulekelwa. Mutumibwa Polo wānenene amba ‘kafwaninwepo nansha kwitwa bu mutumibwa,’ mwanda ‘wādi upangapanga kipwilo kya Leza.’ Kupwa wābweja’ko amba: “Pa kanye ka ku buntu bitupu ka Leza kendi mongikadile’mu.” (1 Ko. 15:​9, 10) Shi tubesāsa bubi bwetu, Yehova witulekelanga. Mwanda waka? Ke pa mwandapo wa amba twi bafwaninwe kulekelwa na Yehova, ino i mwanda witusenswe. Shi uzumbijanga mutyima ne kulanga’mba kufwaninwepo kulekelwa, vuluka’mba Yehova kāletelepo kinkūlwa pa mwanda wa bantu babwaninine, inoko i pa mwanda wa banonga-bibi besāsa.—Tanga Luka 5:32; 1 Temote 1:15.

5. Le tunenwe kulanga’mba Yehova ufwaninwe’nka kwitulekela? Shintulula.

⁵ Ketunenwepo kulanga’mba Yehova ufwaninwe’nka kwitulekela, mwanda’po’tu ketudi balonge myaka mivule mu kumwingidila. Shako, Yehova usangelanga bintu byonso byotumulongela. (Bah. 6:10) Wētupele wandi Mwana bu kyabuntu kya ku bitupu, ke bu mfutwapo ya mingilo yotumwingidila. Nanshi ketunenwepo kulanga’mba Yehova ufwaninwe kwitulekela mwanda’po’tu ketudi balonge bivule mu mwingilo wandi. Shi tulange uno muswelo, bidi pamo bwa batwe banena’mba Kidishitu wāfwile bya bitupu.—Dingakanya na Bene Ngalatea 2:21.

6. Mwanda waka Polo wālongele bivule mu mwingilo wa Yehova?

⁶ Polo wāyukile amba kabwanyapo kwitabijibwa na Leza. Ino mwanda waka wālongele bivule mu mwingilo wa Yehova? Ke pa mwandapo wa kulombola’mba ufwaninwe kulekelwa, ino i mwanda wa kulombola kufwija’ko pa kanye ka ku buntu bitupu ka Yehova. (Ef. 3:7) Pamo bwa Polo, netu twendelelanga kwingidila Yehova na bupyasakane, ke mwandapo wa kulombola’mba tufwaninwe kulekelwa na Yehova, ino i mwanda wa kulombola kufwija’ko.

7. Le i muswelo’ka mukwabo otumwenanga mu kinkūlwa tamba pano? (Bene Loma 5:1; Yakoba 2:23)

⁷ Muswelo mukwabo otumwenanga mu kinkūlwa tamba pano, i kupwana bininge kipwano kya bunka na Yehova. a Monka mwalombwedile’kyo kishinte kibadikile, potwabutwilwe ketwadipo tupwene na Leza. Inoko pa mwanda wa kinkūlwa, tubwanya kwikala mu “ndoe na Leza” ne kupwana nandi.—Tanga Bene Loma 5:1; Yakoba 2:23.

8. Mwanda waka tufwaninwe kufwija’ko Yehova pa dyese dyotudi nadyo dya kulombela kwadi?

⁸ Kulombela kudi Yehova i dyese dya pa bula dyotumwenanga mu kupwana nandi. Yehova wivwananga milombelo ilombelanga bengidi bandi kitatyi kyobebungile pamo, ino kadi wivwananga ne milombelo ilombelanga muntu ne muntu kwa bunka bwandi. Milombelo ibwanya kutalaja mityima yetu ne kwitupa ndoe ya mutyima. Inoko kudi ne muswelo mukwabo otubwanya kumwena mu milombelo. Milombelo ibwanya kuningija kipwano kyetu na Leza. (Ñim. 65:2; Yak. 4:8; 1 Yo. 5:14) Yesu paādi pano pa ntanda, wādi ulombela kitatyi ne kitatyi mwanda wādi uyukile amba Yehova wivwananga milombelo yandi, ne amba milombelo iningijanga kipwano kyandi na Shandi. (Luka 5:16) Bine, tufwijanga’ko bininge mwanda kupityila ku kitapwa kya Yesu, tubwanya kupwana na Yehova enka ne kwisamba nandi mu milombelo!

 MUSWELO OTUKAMWENA’MO MU MAFUKU A KUMESO

9. Le batōtyi ba Yehova ba kikōkeji bakamwena namani mu kinkūlwa mafuku a kumeso?

⁹ Le batōtyi ba Yehova ba kikōkeji bakamwena namani mu kinkūlwa mafuku a kumeso? Bakapebwa kyepelo kya kwikala’ko nyeke. bantu bavule balañanga’mba kino kekikabwanikapo, mwanda bantu bāshilwile kufwa pano kepadi myaka tununu ne tununu. Inoko mpango ya Yehova mibajinjibajinji pa bantu i ya kwikala’ko nyeke. Shi Adama kālongelepo bubi, longa i kutupu muntu nansha umo ulanga’mba mulao wa kwikala’ko nyeke i wa bubela. Kadi nansha shi pano i bikomo kulanga’mba tubwanya kwikala’ko nyeke, tubwanya kukulupila’mba kino kikalongeka mwanda tuyukile amba Yehova wāfutyile mfutwa mikatampe, ko kunena’mba būmi bwa wandi Mwana, mwanda wa kino kilongeke.—Loma 8:32.

10. Le i bika bitengēle kwimwena bashingwe māni ne mikōko mikwabo?

¹⁰ Nansha shi būmi bwa nyeke i dyese dyotusa kwimwena mu mafuku āya kumeso, Yehova usaka tulangulukile’po tamba’nka pano. Bashingwe māni batengēle būmi buyampe momwa mūlu, mwine mobakaludika ino ntanda pamo na Kidishitu. (Kus. 20:6) Mikōko mikwabo itengēle kwikala’ko mu paladisa pano pa ntanda kwampikwa misanshi nansha bulanda. (Kus. 21:​3, 4) Lelo wi wa mu mikōko mikwabo mine idi na lukulupilo lwa kwikala’ko nyeke pano pa ntanda? Ino mpalo ke mfutwapo ya kwitusenga’tu nayo! Inoko Yehova wāpangile bantu mwanda wa bekale’ko nyeke. Bine, kwikala’ko nyeke pano pa ntanda kuketuletela nsangaji.

11-12. Le i madyese’ka amo otutengēle kwimwena mu Paladisa? (Tala ne bifwatulo.)

¹¹ Fwatakanya’po mukekadila būmi bobe mu Paladisa pano pa ntanda. Kukazumbijapo mutyima pa mwanda wa misongo nansha lufu. (Isa. 25:8; 33:24) Yehova ukavuija ne pa mfulo bisakasaka mutyima obe. Le i bwino’ka bokimba kwifunda? Lelo ukimba kwifunda myanda ya lubalo, shimi, komba minjiki, nansha kupunga bintu? Na bubine, mu Paladisa mukasakilwa bantu bayukile kupunga bintu, kūbaka, ne  kudima. Kadi mukasakilwa ne bantu ba kukwatakanya ne kulama bintu. Kimfwa, kuteka byakudya, kupunga bingidilwa bya kwingila nabyo, kudima madimi ne kwialongolola. (Isa. 35:1; 65:21) Byokekala’ko nyeke mafuku a kumeso, ukekala na kitatyi kya kulonga bintu byonso byolanga.

¹² Ikekala nsangaji mikatampe kutundaila bantu bakasangulwa! (Bil. 24:15) Fwatakanya’po muswelo okasangela kwifunda myanda itala Yehova na kubandila bintu bivule byapangile. (Ñim. 104:24; Isa. 11:9) Kadi kya mvubu kutabuka i amba, tukatōka Yehova pampikwa kintu kitulengeja tuzumbije mutyima! Le usaka kupoteja ano madyese etutengēle mu mafuku a kumeso na “nsangaji ya lupito ya bubi”? (Bah. 11:25) Aa! Ano madyese atabukile bukomo bonso botubwanya kulonga pano. Vuluka, mulao wa kwikala’ko mu Paladisa pano pa ntanda ke kukungilapo kyakungile ngulube. Ukafikidila binebine. Ano madyese onso keadipo a kufikidila shi Yehova kētulombwelepo buswe na kwitupa kyabuntu kya wandi Mwana!

FWIJA’KO PA BUSWE BWA YEHOVA

13. Le i muswelo’ka otubwanya kulombola kufwija’ko pa buswe bwa Yehova? (2 Bene Kodinda 6:1)

¹³ Le i muswelo’ka otubwanya kufwija’ko Yehova pa kwitupa kinkūlwa? I na kutūla mwingilo wandi pa kifuko kibajinji mu bwetu būmi. (Mat. 6:33) Kadi Yesu wāfwile “amba boba badi na būmi kebafwaninwepo kwikala monka na būmi pa mwanda wa abo bene, aa, ino i pa mwanda wa yewa webafwidile kupwa wasanguka.” (2 Ko. 5:15) Bine, Yehova i mwitulombole kanye ne lusa. Tulombolanga’mba tukwete na bulēme bintu byaetulongēle, kadi tusakanga kumufwija’ko na kulonga byonso byotubwanya mwanda wa kumwingidila.—Tanga 2 Bene Kodinda 6:1.

14. Le i muswelo’ka otubwanya kukulupila bwendeji bwa Yehova?

¹⁴ Kadi tubwanya kulombola kufwija’ko pa buswe bwa Yehova na kukulupila bwendeji bwandi ne kwibulonda. Muswelo’ka? Shi kebitulombe kukwata butyibi, pamo bwa masomo a kufunda nansha kaji ka kwingila, tufwaninwe kubandaula bitusakila Yehova kulonga. (1 Ko. 10:31; 2 Ko. 5:7) Shi tulombole lwitabijo lwetu mu bilongwa, tukemwena kintu kiyampe—ko kunena’mba lwitabijo lwetu ne bulunda bwetu na Yehova bikaningila’ko. Ne lukulupilo lwetu nalo lukaningila’ko.—Loma 5:​3-5; Yak. 2:​21, 22.

15. Le i muswelo’ka otubwanya kulombola kufwija’ko mu kitatyi kya Kivulukilo?

¹⁵ Muswelo mukwabo otubwanya kulombola kufwija’ko pa buswe bwa Yehova i na kulonga byonso byotubwanya mu kitatyi kya Kivulukilo mwanda wa kulombola mutyima wa kufwija’ko pa kinkūlwa. Kutentekela pa kutanwa ku Kivulukilo, tubwanya kwita ne bantu bakwabo batanwe’ko. (1 Tm. 2:4) Shintulwila boba boita bintu bikalongeka ku Kivulukilo. Ubwanya kulonga namino na kwibalombola pa jw.org video inena’mba Mwanda Waka  Yesu Wāfwile? ne Vuluka Lufu lwa Yesu. Bakulumpe bafwaninwe kulonga bukomo bwa kwita boba kebakingilangapo. Fwatakanya’po nsangaji ikalanga mūlu ne pano panshi shi mukōko mujimine wa Yehova ubalonga bukomo bwa kujokela mu luombe! (Luka 15:​4-7) Ku Kivulukilo, tufwaninwe kwiimuna batwe bene na bene, ino nakampata bapya batanwa’ko nansha boba balonga kitatyi kilampe kutanwa’ko mpika. Tusakanga kwibalengeja beivwane bu batundailwe senene!—Loma 12:13.

16. Mwanda waka tufwaninwe kusapula bininge mu kitatyi kya Kivulukilo?

¹⁶ Le wabulwa’po kusapula bininge mu kitatyi kya Kivulukilo? Kulonga namino i muswelo muyampe wa kulombola kufwija’ko pa bintu bitulongēle Leza ne Kidishitu. Shi tulonge bivule mu mwingilo wandi, nandi uketukwatakanya. Kadi kino kikalengeja kikulupiji kyetu mwadi kiningile’ko. (1 Ko. 3:9) Ne kadi londa mpangiko ya butangi bwa Bible bwa Kivulukilo idi mu Tubandaulei Bisonekwa Difuku ne Difuku, nansha yoya itūdilwe mu kabuku ka ku kupwila. Ubwanya enka ne kwitungila kitungo kya kutanga bino bisonekwa mu kifundwa kyobe kya pa kasuku.

17. Le i bika bisangajanga Yehova? (Tala ne kapango “ Miswelo ya Kulombola’mo Kufwija’ko pa Buswe bwa Yehova.”)

¹⁷ Shako, padi ngikadilo yobe keikakulengejapo ulonge byonso byotwesambilapo mu kino kishinte. Inoko vuluka’mba Yehova kadingakanyangapo buvule bwa bintu byolonga na bilonga bantu bakwabo; aye umonanga bidi mu mutyima obe. Usangalanga bininge pamona mutyima obe wa kufwija’ko pangala pa kyabuntu kyandi kilēme, ko kunena’mba kinkūlwa.—1 Sa. 16:7; Mako 12:​41-44.

18. Mwanda waka tufwijanga’ko Yehova Leza ne Yesu Kidishitu?

¹⁸ Kinkūlwa i kilengeje tulekelwe bubi bwetu, tupwane na Yehova, ne kwikala na lukulupilo lwa kwikala’ko nyeke. Nanshi tufwijei’ko nyeke pangala pa buswe bwa Yehova, bwine bwāmulengeje etwesele ano madyese a kutendelwa. (1 Yo. 4:19) Kadi tufwijei’ko Yesu mwine wētusenswe bininge ne kupāna būmi bwandi bwa bu muntu pa mwanda wetu!—Yoa. 15:13.