SHITEVANI wimene ku meso a kibumbo kya bantu ba mushikwa. Byobadi ba mu Sanedini, kidye kikatampe mu Isalela, bano batyibi 71 badi na lupusa lukatampe pa muzo. I bakongakanibwe na Kitobo Mukatampe Kaifasa, mwine watangidile dibajinji kidye mu myeji mityetye kitatyi kyatyibilwe Yesu nsambu ya lufu. (Mateo 26:57, 59; Bilongwa 6:8-12) Pobeta bantu bamusambile bya bubela yeu ke yeu, abamone kintu kitulumuja padi Shitevani​—mpala yandi keimweka “pamo bwa mpala ya mwikeulu.”​—Bilongwa 6:13-15.

Le Shitevani wābwenye namani kwikala talala ne kusumininwa mu ino ngikadilo ilenga moyo? Kumeso kwa kumuleta ku Sanedini, Shitevani wādi utakamenine mwingilo wandi wa busapudi na lupusa lwa bukomo bwa mushipiditu wa Leza. (Bilongwa 6:3-7) Pobādi bamusambija, uno mushipiditu wādi wingila mwadi, bu musengi ne bu wa kumuvuluja. (Yoano 14:16, kunshi kwa dyani) Shitevani paādi wibingija pampikwa moyo na binenwa bidi mu Bilongwa shapita 7, mushipiditu ujila wāmuvuluja bisonekwa 20 ne kupita bya mu Bisonekwa bya Kihebelu. (Yoano 14:26) Inoko lwitabijo lwa Shitevani lwākomene’ko paāmwene mu kimonwa Yesu wimene ku lundyo lwa Leza.​—Bilongwa 7:54-56, 59, 60.

Padi netu difuku dimo tubwanya kuzakajibwa ne kupangwapangwa. (Yoano 15:20) Kudya Kinenwa kya Leza kyaba ne kyaba ne kukankamana mu busapudi, kukalengeja mushipiditu wa Yehova wingile motudi. Kadi tukamona bukomo bwa kunekenya kupangwapangwa koku tulamine ndoe yetu ya mutyima.​—1 Petelo 4:12-14.