1, 2. (a) Le i mwingilo’ka wādi na mvubu mpata mu būmi bwa Yesu, ne mwanda waka? (b) Byotudi “bengidi bengila pamo na Leza,” le i bika byotufwaninwe kulonga pa kulupula bipa biyampe?

YESU KIDISHITU wādi sendwe wa mbao kupwa ke mwingidi. (Mako 6:3; Loma 15:8) Wāingile senene ino mingilo yonso ibidi. Byaādi sendwe wa mbao, wēfundile muswelo wa kwingidija bingidilwa byandi mwanda wa kupunga bintu biyampe bya mityi. Kadi byaādi mwingidi, wāingidije buyuki bwandi buvule bwa Bisonekwa mwanda wa kukwasha bantu bevwanije bubine bwa mu Kinenwa kya Leza. (Mateo 7:28; Luka 24:32, 45) Yesu paābwenye myaka 30, wālekele mwingilo wa bu sendwe wa mbao, wāikala ke mwingidi, mwanda wādi uyukile amba uno o mwingilo wa mvubu mpata wa aye kwingila. Wānenene amba Leza wāmutumine pano pa ntanda mwanda wa kusapula myanda miyampe ya Bulopwe bwa Leza. (Mateo 20:28; Luka 3:23; 4:43) Yesu wādi utele mutyima ku kusapula myanda miyampe mu būmi bwandi, kadi wādi usaka bakwabo nabo basapule’yo.​—Mateo 9:35-38.

² Bavule motudi ke basendwepo ba mbao, ino batwe bonso twi bengidi bafundija bakwetu myanda miyampe. Uno mwingilo otwingila na Leza udi na mvubu mpata. O mwanda twitwanga bu “bengidi bengila pamo na Leza.” (1 Kodinda 3:9; 2 Kodinda 6:4) Twitabije byobya byānenene mulembi wa mitōto amba: “Kinenwa kyobe kyonsololo i bubine.” (Ñimbo ya Mitōto 119:159, 160) Kinenwa kya  Yehova bo abo bubine. O mwanda tusakanga kuyuka shi twingidijanga “kinenwa kya bubine mobifwaninwe” mu busapudi. (Tanga 2 Temote 2:15.) Nanshi tufwaninwe nyeke kulonga bukomo bwa kwingidija Bible na bwino, kingidilwa kyetu kinekine kya kufundija nakyo bakwetu myanda ya Yehova, Yesu, ne ya Bulopwe. Pa kwitukwasha tulupule bipa biyampe mu busapudi, bulongolodi bwa Yehova i bwitupe bingidilwa bikwabo bya kamweno, kadi netu tufwaninwe kuyuka mwa kwibingidijija. Bino bingidilwa bibadilwa mu Bingidilwa Byetu bya Kufundija Nabyo.

3. Le tufwaninwe kuta mutyima ku bika mu mwingilo wetu, ne Bilongwa 13:48 witukwasha namani tulonge namino?

³ Ubwanya padi kwiipangula mwanda waka twibita bu Bingidilwa bya Kufundija Nabyo pa kyaba kya bu Bingidilwa bya Kusapula Nabyo. I mwanda “kusapula” i kupāna musapu, ino “kufundija” i kushintulula musapu mwanda wa muntu evwanije byobya byaivwana kupwa bimutonone alonge’po kintu. Mu kino kitatyi kityetye kyashala’ko mu ino ngikadilo, tufwaninwe kuta mutyima ku kushilula bifundwa bya Bible ne kufundija bantu bubine mwanda wa bekale bana ba bwanga ba Kidishitu. Kino kitulomba kukimba na bupyasakane boba bonso “badi na mutyima muyampe wa kukamona būmi bwa nyeke” ne kwibakwasha bashilule kwingidila Yehova.​—Tanga Bilongwa 13:44-48.

4. Le i muswelo’ka otubwanya kusokola boba “badi na mutyima muyampe wa kukamona būmi bwa nyeke”?

⁴ Le i muswelo’ka otubwanya kusokola boba “badi na mutyima muyampe wa kukamona būmi bwa nyeke”? Ku bene Kidishitu babajinji, muswelo umo kete wādi wa kusokola bano bantu i kusapula. Yesu wēnenene bandi bana ba bwanga amba: “Mu kibundi kyonso kikatampe nansha kityetye momutwela, kimbai’mo yewa mufwaninwe.” (Mateo 10:11) Netu tufwaninwe kulonga namino dyalelo. Na bubine, shi bantu badi na budimbidimbi, mitatulo, nansha kuta mutyima ku myanda ya Leza mpika, ketukasakepo’nka bateje myanda miyampe. Tukimbanga bantu bampikwa budimbidimbi, betyepeje, kadi basaka kuyuka bubine. Tubwanya kudingakanya kukimba kotukimba bantu na byobya byādi bilonga Yesu paādi sendwe wa mbao. Kumeso kwa kupunga kipungwa, mulango, lupungu, nansha kintu kikwabo, wādi bidi ufwaninwe kusokola mutyi muyampe. Ebiya wāsela bingidilwa byandi, wāingidija bwino bwandi, ne kupunga kintu. Muswelo umo onka dyalelo, netu tufwaninwe bidi kusokola bantu bampikwa budimbidimbi, kupwa ketwingidija bingidilwa ne bwino bwetu mwanda wa kwibakwasha bekale bana ba bwanga.​—Mateo 28:19, 20.

5. Le i bika byotufwaninwe kuyuka pa Bingidilwa Byetu bya Kufundija Nabyo? Leta kimfwa. (Tala bifwatulo ku ngalwilo.)

⁵ Mu bingidilwa bya kwingila nabyo, kingidilwa ne kingidilwa kidi na mwingilo kampanda. Kimfwa, langulukila pa bingidilwa byāingidije Yesu paādi sendwe wa mbao. * (Tala kunshi kwa dyani.) Wādi usakilwa bingidilwa bya kupima nabyo, kutūla biyukeno, kutyiba, kutubula, kuseneja, ne bingidilwa bya kuneñenya nabyo ne bya kubambakanya nabyo. Muswelo umo onka, kingidilwa kyonso kya mu Bingidilwa Byetu bya Kufundija Nabyo kidi na mwingilo kampanda. Shi ke pano tutalei muswelo wa kwingidija bino bingidilwa bya kamweno.

6, 7. (a) Le wingidijanga tulata twa bupempudi namani? (b) Mwanda waka twingidijanga tukanda twa lwito lwa ku kupwila?

⁶ Tulata twa bupempudi. Tuno tulata i tutyetye ino i kingidilwa kiyampe kituyukanya ku bantu ne kwibaludikila pa diteba dyetu dya jw.org. Pa diteba dyetu, babwanya kuyukila’po myanda mivule itutala enka ne kulomba  kifundwa kya Bible. Bantu 400 000 ne kupita balombanga kwifunda Bible pa jw.org, kadi bantu tutwa na tutwa baloñanga namino difuku ne difuku! Ubwanya kwilamija’ko tulata tutyetye twa bupempudi ne kwitwingidija powisamba na bantu bomwitana nabo mu bula bwa difuku.

⁷ Tukanda twa Lwito. Kakanda ka lwito lwa ku kupwila kwetu kanena’mba: “Tukwita wifunde Bible na Batumoni ba Yehova.” Kadi kanena’mba ukokeja kulonga namino “ku kupwila kwetu kwa bantu bonso” “nansha kwifunda na muntu.” Nanshi tukanda twa lwito twituyukanyanga ku bantu ne kwita boba “bayukile amba kudi byobasakilwa ku mushipiditu” befunde netu Bible. (Mateo 5:3) Na bubine twitanga bantu bāye ku kupwila kwetu, ekale betabije nansha kupela kwifunda Bible. Shi abaiya ku kupwila kwetu, bemwenanga muswelo obabwanya kwifunda myanda mivule ya mu Bible.

8. Mwanda waka i biyampe bantu bāye ku kupwila kwetu nansha’tu musunsa umo? Leta kimfwa.

⁸ I biyampe twendelele kwita bantu bāye ku kupwila kwetu nansha’tu musunsa umo. Mwanda waka? Mwanda shi abaiya, bakamona’mba Batumoni ba Yehova bafundijanga bubine bwa mu Bible ne kukwasha bantu bayuke Leza, bintu kebiloñangapo bipwilo bya bubela. (Isaya 65:13) Kimfwa, ba mulume ne mukaji bamo ba mu États-Unis ba Ray ne Linda bemwenine kuno kwishila pano kepadi myaka. Badi bakulupile mudi Leza kadi badi basaka kumuyuka senene. Ebiya bakwata butyibi bwa kwenda mu bipwilo byonso bya mu kyabo kibundi mwanda wa kubandaula bintu bibidi kumeso kwa kutwela’ko mu kimo. Kibajinji, badi basaka kuyuka kintu kampanda pa kipwilo’kya, ne kya bubidi, bantu ba mu kipwilo bafwaninwe kuvwala bu bantu bengidila Leza. Byebalombele myaka mivule mwanda kwadi bipwilo bingi. Ino batyumukwa mutyima bininge. Kebayukilepo kintu nansha kimo, kadi bantu ba mu bipwilo badi bavwala bya busenga. Abo pa kupwa kutwela mu kipwilo kya mfulo, Linda waenda ku kaji, Ray nandi wakajokela ku njibo. Paadi ujokela ku njibo, wapityila bidi dya ku Njibo ya Bulopwe. Wanena’mba ‘Leka bidi ntwele’mo, ntale bipita’mo.’ Na bubine, wemwenine bintu biyampe kashā! Bonso ku Njibo ya Bulopwe badi biyampe kadi bya bulunda, bavwele biyampe. Ray washikata ku mulongo wa kumeso kadi wasangela byaefundile! Kino kituvuluja muntu wēsambīle’po mutumibwa Polo, yewa wāile ku kupwila musunsa mubajinji, wānena’mba: “Bine Leza udi mu bukata mwenu.” (1 Kodinda 14:23-25) Kupwa Ray washilula kwiya ku kupwila Dya Yenga dyonso. Mwenda mafuku, washilula ne kwiya ku kupwila kwa mu bukata bwa yenga. Linda nandi washilula kwiya ku kupwila, ne kadi nansha byobadi kebadi na myaka 70 ne musubu, befundile Bible, kupwa babatyijibwa.

9, 10. (a) Mwanda waka matrakte apēlanga kwingidija? (b) Lombola mwa kwingidijija trakte unena’mba Lelo Bulopwe bwa Leza I Bika?

⁹ Matrakte. Tudi na matrakte mwānda mu bingidilwa byetu. Apēlanga kwingidija, kadi endekanga biyampe pa kushilula mīsambo. Tamba’tu trakte mubajinji wa mu ano matrakte ulupulwa mu 2013, ke kutampwe kintu kya matrakte midiyala itano! Ano matrakte onso adi muswelo umo. Shi uyuke’tu muswelo wa kwingidija’ko umo, ubwanya kwingidija onso. Le i muswelo’ka obwanya kwingidija trakte pa kushilula mīsambo na muntu?

¹⁰ Padi usakanga kwingidija trakte unena’mba Lelo Bulopwe bwa Leza I Bika? Lombola muntu kipangujo kidi pangala, kupwa umwipangule amba: “Le kashā kodi mwiipangule amba Bulopwe bwa Leza i Bika? Le abe amba i . . . ?” Kupwa munene atonge malondololo amo pa asatu. Pa kyaba kya kumulombola shi walondolola bya bine nansha bya bubela, abe pūtula’tu trakte pa kipindi kinena’mba “Bible Unena’mba,” munda mwa trakte ne kumutangila bisonekwa bidi’po, kya Danyele 2:44 ne kya Isaya 9:6. Kupwa kwa mīsambo yenu, mwipangule kipangujo kidi panyuma mu kamutwe ka mwanda kanena’mba  “Languluka’po Bidi,” amba: “Lelo būmi bukekala namani mu buludiki bwa Bulopwe bwa Leza”? Ubwanya kukalondolola kino kipangujo pokāya monka. Shi mubetana nandi monka, ubwanya kwingidija kifundwa kya 7 kya boloshile Myanda Miyampe Itamba Kudi Leza!, kingidilwa kya kushilula nakyo bifundwa bya Bible.

11. Lelo mapepala etu alupwilwanga bika, ne tufwaninwe kuyuka bika pa ano mapepala?

¹¹ Mapepala. Kiteba kya Mulami ne Langukai! i mapepala alupulwanga bininge ne kwalamunwa pano pa ntanda! Bantu ba mu matanda meshileshile byobatañanga ano mapepala, mitwe ya myanda ya pa kibalu ilupulwanga mu muswelo wa kusangaja bantu konsokonso. Tufwaninwe kwingidija mapepala mwanda wa kukwasha bantu bate mutyima ku bintu bya mvubu mpata mu būmi dyalelo. Ino dibajinji, tufwaninwe kuyuka bidi muntu mwine obalupwidile dipepala ne dipepala.

12. (a) Le Langukai! i mulupwilwe bāni, ne udi na kitungo’ka? (b) Le i bintu’ka biyampe byowemwenine panopano na kino kingidilwa?

¹² Langukai! i mulupwilwe bantu bayukile bityetye nansha kubulwa kuyuka myanda ya mu Bible. Padi kebayukilepo kintu nansha kimo pa bufundiji bwa bene Kidishitu, kebakulupilepo mu bipwilo, nansha padi kebayukilepo amba Bible ubwanya kwibakwasha mu būmi bwabo. Kitungo kine kya Langukai! i kya kukulupija mutangi amba Leza udi’ko. (Loma 1:20; Bahebelu 11:6) Kadi ukwashanga mutangi etabije amba Bible ‘i kinenwa kya Leza binebine.’ (1 Tesalonika 2:13) Manimelo asatu a mu 2018 adi na mitwe ya myanda inena’mba: “Dishinda dya Būmi bwa Nsangaji,” “Bintu 12 Bileta Nsangaji mu Kisaka,” ne “Bukwashi ku Boba Badi na Njia.”

13. (a) Lelo Kiteba kya Mulami kya bantu bonso kilupwilwanga bāni? (b) Le i bintu’ka biyampe byowemwenine panopano na kino kingidilwa?

¹³ Kitungo kikatampe kya Kiteba kya Mulami kya bantu bonso i kushintulula bufundiji bwa mu Bible ku bantu balēmekele’ko Leza ne Bible. Padi bayukile’ko myanda kampanda ya mu Bible, ino pampikwa kwivwanija senene bufundiji budi’mo. (Loma 10:2; 1 Temote 2:3, 4) Manimelo asatu a mu 2018 alondolola ku bino bipangujo: “Lelo Bible Ukidi na Mvubu Dyalelo?,” “Lelo I Bika Bitutengēle Kumeso?,” ne “Lelo Leza Ukutele Mutyima?”

14. (a) Le mavideo aná a mu Bingidilwa Byetu bya Kufundija Nabyo i malupwilwe bika? (b) Le i bintu’ka biyampe byowemwenine pa kutadija ano mavideo?

¹⁴ Mavideo. Mu mafuku a Yesu, sendwe wa mbao wādi’nka na bingidilwa bya makasa. Inoko pano, basendwe ba mbao bengidijanga ne bingidilwa bingila na mudilo wa nshinga, kimfwa maso, bya kutubula nabyo, ne bya kuseneja nabyo. Kutentekela pa mabuku matampe, potusapula dyalelo, tudi na mavideo malumbuluke a kutadija bantu. Mavideo aná adi mu bingidilwa byetu i ano: Mwanda Waka Twifunde Bible?, I Bika Biloñwanga mu Kifundwa kya Bible?, I Bika Biloñwanga ku Njibo ya Bulopwe?, ne Lelo Batwe Batumoni ba Yehova—Twi Bāni? Mavideo mēpi abwanya kulonga minite ibidi ne kwika kadi endekanga biyampe mu kwitana kubajinji. Mavideo malampe abwanya kwingidijibwa mu kujokela’mo ku boba badi na kitatyi kivule. Ano mavideo i bingidilwa biyampe mwanda akokeja kukankamika bantu befunde Bible ne kwiya ku kupwila.

15. Le kutala mavideo etu mu ludimi lwisamba bantu kubwanya kwibakwasha namani? Leta bimfwa.

¹⁵ Kimfwa, kaka umo wetene na lolo umo wavilukile ku Mikronezi, wadi wisamba ludimi lwa Yapese. Uno kaka wamutadija video inena’mba Mwanda Waka Twifunde Bible? mu ludimi lwa Yapese. Video pa kushilula, uno lolo wanena’mba: “Eh, i lwetu ludimi. I bikomo kwitabija! Muneneno wandi ulombola’mba i muntu wa kwetu. Wisambanga lwetu  ludimi!” Kupwa wanena’mba usa kwenda akatange ne kutala bintu byonso bya mu lwabo ludimi pa jw.org. (Dingakanya na Bilongwa 2:8, 11.) Kimfwa kikwabo i kya kaka wa mu États-Unis udi na mwanā mwanabo ushikatanga mu ntanda mikwabo. Wamutumīne pa Entelenete kashinda kamutweja pa ino video imo yonka mu ludimi lwandi. Watala video, wamulembela pa Entelenete amba: “Kipindi kīsambila pa lupusa lubi luludika ino ntanda kibakoke milangwe yami bininge. Nalombele kwifunda Bible.” Kino kisangaja mpata mwanda ushikatanga mu ntanda mobakankeje mwingilo wetu!

16. Lombola kitungo kya boloshile: (a) Teja Leza Amba Wikale Mūmi Nyeke. (b) Myanda Miyampe Itamba Kudi Leza! (c) Le I Bāni Balonga Kiswa-Mutyima kya Yehova Dyalelo?

¹⁶ Maboloshile. Le tukafundija bubine namani ku muntu kayukilepo kutanga biyampe nansha yewa kadipo na mabuku esambila pa Bible mu lwabo ludimi? Tubwanya kwingidija boloshile Teja Leza Amba Wikale Mūmi Nyeke. * (Tala kunshi kwa dyani.) Boloshile Myanda Miyampe Itamba Kudi Leza! i kingidilwa kiyampe pa kushilula bifundwa bya Bible. Ubwanya kulombola muntu mitwe ya myanda 14 idi pa kibalu kya panyuma ne kumunena atonge’po wamusangaja. Kupwa shilula kwifunda nandi pa kifundwa kyaatonga. Le kodi mutompe kulonga namino mu kujokela’mo? Boloshile wa busatu mu bingidilwa byetu i Le I Bāni Balonga Kiswa-Mutyima kya Yehova Dyalelo? I mulupwilwe kufundija bifundwa bya Bible mwikadile bulongolodi bwetu. Shi usaka kuyuka muswelo wa kwingidija uno boloshile ku kifundwa ne kifundwa kya Bible, tala Kabuku ka ku Kupwila​—Būmi ne Mwingilo wetu wa Bwine Kidishitu ka Kweji 3, 2017.

17. (a) Lelo dibuku dyonso dya kwifunda didi na kitungo’ka? (b) Le bapya bonso babatyijibwa bafwaninwe kulonga bika, ne mwanda waka?

¹⁷ Mabuku. Shi ubashilula kwifunda na muntu mu boloshile, ubwanya kutundulukila nandi kitatyi kyo-kyonso mu dibuku Lelo I Bika Bitufundija Bible? Kino kingidilwa kibwanya kukwasha bantu bayuke myanda mivule ya bufundiji bwa Bible bwa kyalwilo. Shi mwifundi waendelela, mubapu dino dibuku, ubwanya kwendeleja nandi mu dibuku Mwa Kwilamina mu Buswe bwa Leza. Kino kingidilwa kikafundija mwifundi mwa kwingidijija misoñanya ya mu Bible mu būmi bwandi bwa difuku ne difuku. Vuluka’mba nansha shi muntu mupya wabatyijibwa, ufwaninwe kwendelela kwifunda kufika’nka ne byapwa ano mabuku onso abidi. Kino kikamukwasha ekale na lwitabijo lukomo mudi Yehova ne kumulamata nyeke.​—Tanga Kolose 2:6, 7.

18. (a) Lelo 1 Temote 4:16 witukankamika tulonge bika potufundija bubine, ne i bika bikalupuka’ko? (b) Le tukengidija Bingidilwa Byetu bya Kufundija Nabyo na kitungo’ka?

¹⁸ Batwe Batumoni ba Yehova, tudi na kiselwa kya kufundija bantu “musapu wa bubine wa myanda miyampe” ubwanya kwibaletela būmi bwa nyeke. (Kolose 1:5; tanga 1 Temote 4:16.) Pa kusaka’mba tufikile’po, tudi na Bingidilwa bya Kufundija Nabyo byotusakilwa. (Tala kapango kanena’mba “ Bingidilwa bya Kufundija Nabyo.”) Twingidijei bino bingidilwa ponso potubwanya. Batwe bonso tubwanya kutonga i kingidilwa’ka kya kwingidija ne kitatyi kya kwikingidija. Inoko tuvulukei amba kitungo kyetu ke kya kwabanyapo’tu mabuku, kadi ketufwaninwepo kupa’o bantu kebasangelapo musapu wetu. Kitungo kyetu i kya kulonga bantu bampikwa budimbidimbi bekale ke bana ba bwanga, bantu betyepeje, basaka bine kuyuka Leza, bantu badi “na mutyima muyampe wa kukamona būmi bwa nyeke.”​—Bilongwa 13:48; Mateo 28:19, 20.