1, 2. Le Dyabola wālongele bika pa kusanshija muzo wa muntu bininge?

BINTU bimo bya busendwe, kimfwa telefone, ampulu, motoka, ne fidigo, bilumbululanga būmi. Inoko bintu bikwabo bya busendwe, kimfwa mvwanda, mamine, mfwanka, ne mabombe atomike, bitūlanga būmi mu kyaka kikatampe. Inoko kudi kintu kikwabo kya kala kupita bino byonso, kine kisanshija muzo wa muntu bininge. Le i kintu’ka? I bubela! Kubepa bubela i kunena kintu kyoyukile amba ke kya binepo mwanda wa kongola muntu nansha kumudimba. Le i ani wābepele bubela bubajinji? I Dyabola! Yesu Kidishitu wāmutelele bu “shandya bubela.” (Tanga Yoano 8:44.) Le wābepele bubela bubajinji kitatyi’ka?

² Wābepele’bo mu budimi bwa Edena pano kepadi myaka tununu na tununu. Ba Adama ne Eva bādi bekele na nsangaji mu Paladisa milumbuluke yebālongēle Yehova. Leza wēbalombwele amba shi badye “ku mutyi wa kuyuka biyampe ne bibi,” nabya bakafwa. Nansha Satana byaādi uyukile kino, wāingidije nyoka, wāsapwila Eva amba: “Bine kemukafupo.” Buno bo bwādi bubela bubajinji. Kadi Satana wābwejeje’ko amba: “Leza uyukile amba mu dine difuku dyomukadya’ko, meso enu akapūtuka kadi mukekalanga pamo bwa Leza, mukayuka biyampe ne bibi.”​—Ngalwilo 2:15-17; 3:1-5.

3. Mwanda waka bubela bwa Satana bwādi bwa nshikani, ne i bika bilongeka pa mwanda wa buno bubela?

 ³ Bubela bwa Satana bwādi bwa nshikani mwanda wādi uyukile amba shi Eva amukulupile ne kudya kipa, nabya ukafwa. Ne kadi ye mobyāikadile. Ba Adama ne Eva bāpela kukōkela musoñanya wa Yehova, ebiya bafwa mwenda mafuku. (Ngalwilo 3:6; 5:5) Kadi kibi kutabukidila, pa mwanda wa bubi bwa Adama, ‘lufu lwāsambakene ku bantu bonso.’ Bine, “lufu lwābikele bulopwe . . . , enka ne pa boba bene kebalongelepo bubi na mwājilwidile Adama.” (Loma 5:12, 14) O mwanda twi ba kubulwa kubwaninina kadi ketudipo na būmi bwa nyeke na mwādi musakila Leza. Tuloñanga’tu kintu kya “myaka 70, nansha 80 shi muntu i mukomo bininge” kadi būmi bwetu i buyule “makambakano ne bulanda.” (Ñimbo ya Mitōto 90:10) Bino byonso bilongekanga pa mwanda wa bubela bwa Satana!

4. (a) Le i bipangujo’ka byotufwaninwe kulondolola? (b) Kukwatañana na Ñimbo ya Mitōto 15:1, 2, i bāni kete bakokeja kupwana na Yehova?

⁴ Yesu wānenene pa mwanda utala Satana amba: “Kāimanijepo mu bubine, mwanda munda mwandi bubine i mutupu’bo.” Satana kashintyilepo. Ukyongolanga “ntanda yonso ikelwe na bantu” na bubela bwandi. (Kusokwelwa 12:9) Ino batwe ketusakengapo kongolwa na Satana. O mwanda tufwaninwe kuyuka malondololo a bino bipangujo bisatu. Le Satana ongolanga bantu namani dyalelo? Mwanda waka bantu babepanga? Ne i muswelo’ka otubwanya kwisamba bubine kitatyi kyonso kutyina twakajimija kipwano kyetu na Yehova, na mwājimijije’kyo ba Adama ne Eva?​—Tanga Ñimbo ya Mitōto 15:1, 2.

5. Le Satana ongolanga bantu namani dyalelo?

⁵ Tubwanya kupela kongolwa na Satana. Mutumibwa Polo wānenene amba: “Ketwidilwepo milangwe yandi.” (2 Kodinda 2:11; kunshi kwa dyani) Tuyukile amba ntanda yonso iludikwanga na Satana, kubadila’mo ne bipwilo bya bubela, imbikalo mibi, ne busunga bwa lwiso. (1 Yoano 5:19) O mwanda ketutulumukangapo shi Satana ne bandemona bandi batonona bantu ba lupusa babepe “bubela.” (1 Temote 4:1, 2) Kimfwa, bansunga bamo babepanga pa bintu bya kupoteja byobasumbija nansha kudimba bantu ne kwibeba lupeto lwabo.

6, 7. (a) Mwanda waka i bibi nakampata shi bendeji ba bipwilo babepa bubela? (b) Le i bubela’ka bokodi mwivwane bendeji ba bipwilo babepa?

⁶ Nakampata i bibi shi bendeji ba bipwilo babepa bubela. Mwanda waka? Mwanda shi muntu akulupile bufundiji bwabo bwa bubela ne kulonga bintu bishikilwe Leza, nabya ukajimija mukenga wa kwikala’ko nyeke. (Hosea 4:9) Yesu wādi uyukile amba bendeji ba bipwilo ba mu andi mafuku bādi bongola bantu. Wēbanenene pampikwa moyo amba: “Malwa enu, basonekeji ne Bafadiseo, banwe banzazangi! mwanda mutyibulukanga dijiba ne ntanda mukakimba muntu umo wa kwalamuka, ne shi waalamuka, mwamulonga ke mufwaninwe Ngehena,” ko kunena’mba wa konakanibwa lonso. (Mateo 23:15; kunshi kwa dyani) Yesu wānenene amba bano bendeji ba bipwilo bya bubela bādi pamo bwa shabo Dyabola, “ntapañani.”​—Yoano 8:44.

⁷ Dyalelo nadyo kudi bendeji bavule ba bipwilo. Bebetanga bu bapashitele, babitobo, balabi, baswami, nansha bitenta bikwabo. Pamo bwa Bafadiseo, kebafundijangapo bubine bwa mu Kinenwa kya Leza, ino bashintanga “bubine bwa Leza na bubela.” (Loma 1:18, 25) Bubela bumobumo bidi i buno, kalunganyembo ka mudilo, bantu badi na muya keufu, bafwe bealamunanga, Leza witabije kulāla ne busongi bwa bantu ba ngitu imo.

8. Le i bubela’ka busa kubepa bendeji ba politike panopano ponka, ino batwe tukalonga’po namani?

 ⁸ Bantu ba politike nabo babepanga mwanda wa kongola bantu. Bubela bumo bukatampe bobasa kubepa panopano ponka i bwa amba basa kuleta “ndoe ne mutyima-ntenke” pano pa ntanda. Ino “po pakebafikila na mu kukopa kwa diso konakanibwa kwa mu kitulumukila.” Nanshi ketufwaninwepo kukulupila bano bendeji ba politike banena’mba bintu byendanga bilumbuluka. Bakabepanga’nka bubela ayo ntanda papo mu kyaka kikatampe. Bubine i buno amba, tuyukile “biyampe amba difuku dya Yehova dīyanga enka pamo bwa ngivi bufuku.”​—1 Tesalonika 5:1-4.

9, 10. (a) Mwanda waka bantu babepanga bubela, ne i bika bilupukanga’ko? (b) Le i bika byotufwaninwe kuvuluka padi Yehova?

⁹ Dyalelo, ke’nkapo bantu ba lupusa babepanga. Kishinte kimo kya Bhattacharjee kidi na mutwe wa mwanda unena’mba “Kine Kyotubepela,” kinena’mba “kubepa bubela ke kato kāle miji mu ngikadila minemine ya bantu.” Ko kunena’mba, bantu balañanga’mba i kyendele’mo kubepa bubela. Bantu bavudile kubepa mwanda wa kwikinga, padi mwanda wa kufya bilubo byobalongele nansha kwipaya kobepaile muntu. Kadi babepanga mwanda wa kusokola lupeto nansha kumwena’mo mu muswelo mukwabo. Kadi kishinte kinena monka’mba bantu bamo kebakolelwangapo kubepela “beni, bobengila nabo, balunda, ne babutule babo.”

¹⁰ Le buno bubela bufulanga kwepi? Bantu balekanga kwikulupila ne kipwano nakyo kyaoneka. Kimfwa, langa’po bidi mobibipile shi mulume ulamete wandi mukaji waivwana’mba wandi mukaji ulālanga na muntu mukwabo ino umubepela mwanda wa kufya bintu byalonga. Kadi langa’po mobibipile shi mulume ususula wandi mukaji ne bandi bana ku njibo, ino shi ke pa bantu bakwabo wimwekeja’mba wibasenswe ne kwibata mutyima. Bantu ba uno muswelo babwanya kongola bakwabo, ino tufwaninwe kuyuka’mba kebabwanyapo kongola Yehova. Bible unena’mba “bintu byonso bidi mutaka kadi i bisokokele patōka” ku meso andi.​—Bahebelu 4:13.

11. Le kimfwa kibi kya ba Ananaisa ne Safaila kitufundija bika? (Tala kifwatulo ku ngalwilo.)

¹¹ Mu Bible mudi kimfwa kya ba mulume ne mukaji bene Kidishitu bāsukuminwe na Satana mwanda wa kubepela Leza. Ba Ananaisa ne Safaila bātompele kudimba batumibwa. Bāpoteje kintu kyabo, ino bāpa batumibwa kipindi kya lupeto. Ba Ananaisa ne Safaila byobādi bakimba kutulumuna bakwabo mu kipwilo, bāsapwidile batumibwa’mba abaleta lupeto lonso. Inoko Yehova wāyukile amba ababepa, ebiya wēbapa mfuto.​—Bilongwa 5:1-10.

12. Le i bika bikafikila boba babepa bubela bwa nshikani kwisāsa mpika, ne mwanda waka?

¹² Le Yehova umonanga namani bantu babepa bubela? Bantu bonso babepa bubela bwa nshikani ino kwisāsa mpika, bakelwa mu “dijiba dya mudilo,” pamo ne Satana. Ko kunena’mba bakonakanibwa lonso. (Kusokwelwa 20:10; 21:8; Ñimbo ya Mitōto 5:6) Mwanda waka? Mwanda Yehova umwene bano bambepai na mwamwenine bantu bakwabo bonso “balongalonga bya mukenye ku meso a Leza.”​—Kusokwelwa 22:15, kunshi kwa dyani.

13. Le i bika byotuyukile padi Yehova, ne bitutononanga tulonge bika?

¹³ Tuyukile amba Yehova “ke muntupo wa bitupu ubepa bubela” ne amba ‘Leza kakokejapo kubepa.’ (Umbadilo 23:19; Bahebelu 6:18) ‘Yehova ushikilwe ludimi lubepa bubela.’ (Nkindi 6:16, 17) Shi tusaka kumusangaja,  tufwaninwe kunena bubine. Nanshi ‘ketwakibepelai batwe bene na bene.’—Kolose 3:9.

14. (a) Le bene Kidishitu ba bine i beshile na bantu ba mu bipwilo bya bubela pa bika? (b) Shintulula musoñanya udi mu Luka 6:45.

¹⁴ Le bene Kidishitu ba bine i beshile muswelo’ka na bantu ba mu bipwilo bya bubela? ‘Twisambanga bubine.’ (Tanga Zekadia 8:16, 17.) Polo wānenene amba: “Twiyukanyanga bu bengidi ba Leza, . . . mu mīsambo ya bine.” (2 Kodinda 6:4, 7) Yesu nandi wānenene amba bantu banenanga “byobya biyudile ku mutyima.” (Luka 6:45) Kino kishintulula’mba muntu wampikwa budimbidimbi ukanena bubine. Ukanena bubine ku beni, bobengila nabo, balunda, ne ku babutule bandi. Twisambilei bidi pa bimfwa bimobimo bya muswelo otubwanya kulombola’mba twielelanga’ko kwikala bampikwa budimbidimbi mu bintu byonso.

15. (a) Mwanda waka i bibi kwikala na būmi bwa mapala abidi? (b) Le i bika bibwanya kukwasha bankasampe bakomene kuningilwa na bakwabo? (Tala kunshi kwa dyani.)

¹⁵ Shi wi nkasampe, usakanga padi bakwenu bakwitabije. Ino pa mwanda wa kino, bankasampe bamo badi na būmi bwa mapala abidi. Bemwekejanga bu badi na mwiendelejo muyampe kitatyi kyobadi pamo na kisaka kyabo nansha ku kipwilo, ino balonga bintu bingi pobesamba na bantu pa Entelenete nansha pobadi na bantu kebengidilapo Yehova. Bakokeja kutukana, kuvwala bibi, kwivwana minjiki mibi, kukolwa mālwa, kutoma bitomibwa bikolwañana, kulonga busekese kufula, nansha kulonga bintu bikwabo bibi. Babepelanga bambutwile babo, batutu ne bakaka, ne Yehova mwine. (Ñimbo ya Mitōto 26:4, 5) Ino Yehova uyukile kitatyi kyotunena’mba tumulēmekele koku tulonga bintu byashikilwe. (Mako 7:6) I biyampe kulonga byobya binena lukindi lumo amba: “Mutyima obe kewakabila babipya-mambo, ino tyina Yehova difuku dyonso dituntulu.”​—Nkindi 23:17. * (Tala kunshi kwa dyani.)

16. Le i muswelo’ka otufwaninwe kulondolola ku bipangujo potudinga fomu wa mwingilo wa kitatyi kyonso?

¹⁶ Shi ukimba kwikala pania wa lonso nansha kushilula mwingilo wa pa bula wa kitatyi kyonso, kimfwa kwenda ku Betele, nabya ufwaninwe kudinga fomu. I biyampe ulondolole pampikwa budimbidimbi ku bipangujo bitala bukomo bwa ngitu, kwipwija  mukose, ne mwikadilo obe. (Bahebelu 13:18) Ino le bikekala namani shi wi mulonge bintu bishikilwe Yehova nansha bintu bikutopeka mutyima obe wa mundamunda ino kwalombwele’mo bakulumpe? Wibanene bakukwashe mwanda wa wingidile Yehova na mutyima wa mundamunda utōka.​—Loma 9:1; Ngalatea 6:1.

17. Le i bika byotufwaninwe kulonga shi bantu betupangapanga betwipangula myanda ya banabetu?

¹⁷ Le ukalonga namani shi mwingilo wetu i mukankajibwe mu kifuko moshikete ne ba lupusa abakwimika, kebakwipangula myanda ya banabetu? Lelo ukebalombola myanda yonso yoyukile? Le Yesu wālongele namani pobāmwipangwile kudi mbikavu wa Loma? Yesu wāingidije musoñanya wa mu Bible wa amba kudi “kitatyi kya kwikala talala ne kitatyi kya kwisamba,” kadi kyaba kimo wālekele kunena kintu nansha kimo! (Musapudi 3:1, 7; Mateo 27:11-14) Shi netu tubatanwa mu ino ngikadilo, tufwaninwe kwikala badyumuke kutyina’mba twakatūla banabetu mu kyaka.​—Nkindi 10:19; 11:12.

18. Le tudi na kiselwa’ka shi bakulumpe abetwipangula myanda ya banabetu?

¹⁸ Le bikekala namani shi ubayuka bubi bukatampe bulongele muntu wa mu kipwilo? Bakulumpe badi na kiselwa kya kulama butōki bwa kipwilo, o mwanda bakokeja kukwipangula myanda yoyukile. Le ukalonga namani nakampata shi muntu’wa i mulunda nobe nansha mubutule? Bible unena’mba: “Yewa uleta bukamoni bwa binebine ukanena bubine.” (Nkindi 12:17; 21:28) O mwanda udi na kiselwa kya kulombola bakulumpe bubinebine bonso pampikwa kufya’ko kintu nansha kimo. Bakulumpe badi na lupusa lwa kuyuka myanda yonso mwanda wa bamone muswelo muyampe wa kukwasha muntu alongolole kipwano kyandi na Yehova.​—Yakoba 5:14, 15.

19. Le i bika byotukabandaula mu kishinte kilonda’ko?

¹⁹ Davida wālombele Yehova amba: “Usangelanga bubine budi mu muntu wa munda.” (Ñimbo ya Mitōto 51:6) Davida wādi uyukile amba muntu wa munda ye aye wa mvubu mpata. Bene Kidishitu ba bine besambanga “bubine umo ku mukwabo” kyaba kyonso. Muswelo mukwabo otubwanya kulombola’mba twi beshile na bantu ba mu bipwilo bya bubela i kufundija bubine bwa mu Bible. Kishinte kilonda’ko kikabandaula muswelo otukokeja kufundija bubine mu busapudi.