MUNTU wifundile mwikadilo wa kūlu ubandaula musa kwikadila kūlu. Wamone kimpumpu kileta kyaka kyenda kifwena mu kifuko mudi bantu bavule. Byatele mutyima ku būmi bwa bantu, webadyumuna pampikwa kukōka kumeso kwa kitatyi.

Mu muswelo umo onka, pano Yehova udyumunanga bantu ba pa ntanda ku “kimpumpu” kileta kyaka bininge kutabuka kimpumpu kyo-kyonso kilayanga befundi ba mwikadilo wa kūlu. Le wibadyumunanga namani? Ne mwanda waka tubwanya kukulupila’mba ushilanga bantu kitatyi kya kulonga’po kintu? Pa kulondolola bino bipangujo, tubandaulei’ko bidi bidyumu bimobimo byāletele Yehova pa kala.

Mu bitatyi byāsonekelwe Bible, Yehova wādyumwine bantu ku “bimpumpu” bishileshile, nansha ku butyibi bwaādi wa kutyibila boba bāpelele kukōkela mbila yandi ku kusaka. (Nki. 10:25; Yel. 30:23) Mu myanda yonso, wādi udyumuna bantu kumeso kwa kitatyi ne kwibalombola bashinte kukwatañana na kiswa-mutyima kyandi. (2 Ba. 17:12-15; Neh. 9:29, 30) Pa kwibakwasha bashinte, divule dine wādi wingidija bengidi bandi ba kikōkeji basapule butyibi bwandi ne kulombola’mba i bwa kampeja-bukidi.​—Amo. 3:7.

Noa ubadilwa mu bano bengidi ba kikōkeji. Mu bula bwa myaka mivule, wādyumwine na bukankamane babisekese ne bantu basenswe bya lūma ba mu andi mafuku amba kusa kwikala Dilobe dya ntanda yonso. (Ngo. 6:9-13, 17) Kadi wēbalombwele byobādi bafwaninwe kulonga pa kupanda​—o mwanda bāmwityile mwenda mafuku bu “musapudi wa boloke.”​—2 Pe. 2:5.

Nansha Noa byaālongele bukomo, bantu bāikele’ko kumeso kwa Dilobe dya ntanda yonso bāpumpunya musapu wāmupele Leza. Bālombwele amba kebadipo na lwitabijo. Mfulo mfulō bāfwa pāfikile Dilobe “dyēbakomba bonso.” (Mat. 24:39; Bah. 11:7) Pāfikile mfulo yabo, kebādipo na bubinga bwa kunena’mba Leza kebadyumwinepo.

Mu bitatyi bikwabo, Yehova wādyumwine bantu kitatyi kityetye kumeso kwa “kimpumpu” kya bonakani bwandi kushilula. Ino nansha nankyo, wāshidile bantu kitatyi kilampe amba balonge’po kintu. Kimfwa, wāletele bidyumu kumeso kwa Bipupo Dikumi kuponena Edipito wa kala. Kimfwa kimo bidi, Yehova wātumine ba Mosesa ne Alone bakadyumune Felo ne bengidi bandi ku kipupo kya busamba-bubidi kya mvula wa mabwe wa kyonakanya. Uno mvula byaādi wa kunoka difuku dilonda’ko, lelo Leza wēbapele kitatyi kilampe kya kukimba kwa kufyama amba bapande ku kino kimpumpu? Bible ulondolola’mba: “Mwingidi wa Felo ense waakaminwe kinenwa kya Yehova, wakatwejeje bukidi bengidi bandi ne bimunanwa byandi mu mobo, ino yewa katelepo mutyima ku kinenwa kya Yehova walekele bengidi bandi ne bimunanwa byandi mu ntanda.” (Div. 9:18-21) Na bubine, Yehova wēbapele bidyumu bivule, kadi boba bonso bātejeje bukidibukidi bāpanda ku kino kipupo kibikibi.

Felo ne bengidi bandi nabo bēbadyumwine kumeso kwa kipupo kya dikumi kushilula. Ino bāpela kidyumu bya bulembakane. (Div. 4:22, 23) Mfulo mfulō, babo bana babedi bāfwa. Bine i kya bulanda! (Div. 11:4-10; 12:29) Le bādyumwinwe kumeso kwa kitatyi? Bine! Mosesa wādyumwine bene Isalela ku kipupo kya dikumi kyāfwenene ne kwibalombola mwa kupandijija byabo bisaka. (Div. 12:21-28) Le bantu  bavule bātejeje kino kidyumu? Mungya kufwatakanya, bantu midiyo isatu ne musubu, kubadila’mo bene Isalela ne “kibumbo kisobakane” kya bantu bampikwa kwikala bene Isalela ne bene Edipito, bāpanda ku butyibi bwa Leza, bātamba mu Edipito.​—Div. 12:38, kunshi kwa dyani.

Monka mwalombwela bino bimfwa, Yehova ushilanga nyeke bantu kitatyi kilampe kya kwivwana bidyumu byandi. (Kup. 32:4) Le i bika byādi bilengeja Leza ebadyumune? Mutumibwa Petelo wāshintulwile amba Yehova “kasakilepo muntu nansha umo oneke, ino usaka bonso bafikile pa kwisāsa.” (2 Pe. 3:9) Bine, Leza utele bantu mutyima. Usakanga besāse ne kulonda madingi andi kumeso kwa butyibi bwandi kufika.​—Isa. 48:17, 18; Loma 2:4.

Dyalelo nadyo, bantu bafwaninwe kuteja lubila lwa kampeja-bukidi lwelwa ntanda yonso dyalelo. Yesu paādi pano pa ntanda, wādyumwine amba ino ngikadilo ya bintu isa konakanibwa pa “kyamalwa kikatampe.” (Mat. 24:21) Pa mwanda utala buno butyibi bwa kumeso, wāletele bupolofeto palapala bulombola byadi bya kwimwena balondi bandi shi kino kitatyi kibafwena. Mu uno muswelo, Yesu wātelele binkumenkume bikatampe bya ntanda byotumona bilongeka dyalelo.​—Mat. 24:3-12; Luka 21:10-13.

Kukwatañana na buno bupolofeto, pano Yehova udyumunanga muntu ense akōkele ku buludiki bwandi bwa buswe. Usakanga bantu ba kikōkeji bekale na būmi buyampe tamba’nka pano ne kukeselwa madyese mu mafuku a kumeso mu ntanda mipya ya boloke. (2 Pe. 3:13) Pa kuningija lwitabijo mu milao yandi, Yehova i mulete musapu wa būmi​—“myanda miyampe ya Bulopwe,” mine yālaile Yesu amba “ikasapulwa pa ntanda yonso ikelwe na bantu mwanda wa bukamoni ku mizo yonso.” (Mat. 24:14) Leza i muteakanye batōtyi bandi ba bine mwanda wa kupāna buno “bukamoni,” nansha kusapula uno musapu wa Leza, mu kintu kya matanda 240. Yehova usakanga bantu bavule bateje kidyumu kyandi amba bapande ku “kimpumpu” kiya’ko kya butyibi bwandi boloke.​—Zef. 1:14, 15; 2:2, 3.

Nanshi kipangujo kya mvubu ke kya kukimbapo kuyuka shi Yehova upānga bantu kitatyi kilampe kya kuteja bidyumu byandi. Bukamoni bulombola’mba wibapanga’kyo nyeke. Ino kipangujo kikatampe i kino: Lelo bantu bakateja kidyumu kya Leza pano pakidi’ko kitatyi? Byotudi mikendi ya Leza, twendelelei kukwasha bantu bavule bakapande ku mfulo ya ino ngikadilo ya bintu.