1. Mwanda waka tufwaninwe kulamata Yehova bunka bwandi?

YEHOVA ye otufwaninwe kulamata bunka bwandi, mwanda ye Umpangi wetu kadi ye Mwine witupele būmi. (Kus. 4:11) Inoko, tutanwanga na bikoleja. Nansha byotusenswe Yehova ne kumulēmeka, ino tubwanya kukomenwa kumulamata bunka bwandi. Tufwaninwe kuyuka muswelo ubwanya kulongeka kino. Dibajinji, twisambilei bidi pa mushintulwila kulamata Yehova bunka bwandi.

2. Mungya Divilu 34:14, le i bika byotukalonga shi tulamete Yehova bunka bwandi?

² Mu Bible, kulamata Leza i kumusanswa bya binebine. Shi tulamete Yehova bunka bwandi, tukamutōta’nka aye kete. Ketukalekapo muntu nansha kintu kipingakene pa kifuko kyandi mu mutyima wetu.​—Tanga Divilu 34:14.

3. Le i bubinga’ka botudi nabo bwa kulameta Yehova?

³ Ketulametepo Yehova pa kubulwa bubinga. Mwanda waka? Mwanda myanda yotwefundile pādi yo itulengeje tumulamate. Ngikadila yandi miyampe yetusangeje bininge. Twayukile ne kwitabija bintu byasenswe ne byashikilwe. Twaivwanije mpango yandi itala bantu ne kwiikwatakanya. Twimwene bu balēme pa kwitupa mukenga wa kwikala balunda nandi. (Ñim. 25:14) Bintu byonso byotwifunda padi Umpangi wetu bitufwenyanga kwadi.​—Yak. 4:8.

4. (a) Le Dyabola wingidijanga bika mwanda wa tuleke kulamata Yehova? (b) Le i bika byotusa kwisambila’po mu kino kishinte?

 ⁴ Dyabola uludikanga ino ngikadilo ya bintu, kadi wiingidijanga mwanda wa kutwelela pa bya kusakasaka byendele’mo bya bantu ne pa bukōkekōke bwa ngitu. (Ef. 2:1-3; 1 Yo. 5:19) Kyasaka i tuleke kusanswa Yehova ne kumulamata bunka bwandi. Twisambilei’ko pa miswelo ibidi ibwanya kulonga Satana namino. Mubajinji, usakanga tulondelonde bupeta, ne wa bubidi, utompanga kwitutonona tutonge kwipwija mukose kubi.

5. Mwanda waka tufwaninwe kudyumuka kusanswa lupeto?

⁵ Mungya kipangila tusakanga kwikala na byakudya bivule, bisandi biyampe bya kuvwala, ne kifuko kiyampe mwa kwikala. Inoko tufwaninwe kudyumuka kusanswa lupeto. Bantu bavule ba mu ntanda ya Satana i “ba kusanswa lupeto” ne bintu bipotwa na lupeto. (2 Tm. 3:2) Yesu wādi uyukile amba balondi bandi babwanya kwikala pa ditompo dya kusanswa lupeto. Wānenene amba: “I kutupu ubwanya kwingidila bamfumwandi babidi bu umpika; mwanda ukashikwa’ko umo wasanswa’ko mukwabo, nansha kadi ukalamata umo ne kupēleka mukwabo. Kemukokejapo kwingila bu bapika ba Leza koku kadi bapika ba Bupeta.” (Mat. 6:24) Muntu utōta Yehova koku kadi upityija kitatyi kivule ne kulonga bukomo bwa kusokola bupeta bwa ino ntanda, udi pamo bwa aye ulonga bukomo bwa kwingidila bamfumwandi babidi. Kakalamatapo Yehova bunka bwandi.

6. Le i ñeni’ka yotubwanya kuboila ku madingi obādingile kipwilo kya Laodesea kudi Yesu?

⁶ Dya ku mfulo kwa myaka katwa kabajinji Yesu Ke Mwiye, bantu ba mu kipwilo kya Laodesea bēaninye amba: “Ami ne mpeta kadi namone bya bupeta, kekudipo  kyombudilwe nansha kimo.” Ino ku meso a Yehova ne Yesu bādi bamonwa bu “kimonya-malwa kadi udi bya lusa, mulanda, mpofu kadi udi mutaka.” Yesu kebādingilepo pa mwanda wa bupeta, ino i mwanda, kuswa bupeta kwāonene kipwano kyabo na Yehova. (Kus. 3:14-17) Shi tubajingulula’mba tubaikala na mutyima wa kulondalonda bupeta, tufwaninwe kulemununa mulangilo wetu bukidibukidi. (1 Tm. 6:7, 8) Shi bitupu, tukekala na mityima ibidi kadi Yehova kaketabijapo butōtyi bwetu. Aye “usakanga kulamatwa bunka.” (Kup. 4:24) Le muswelo otumona lupeto ubwanya kushinta namani?

7-9. Le i ñeni’ka yowaboila ku myanda yatene mukulumpe umo witwa bu David?

⁷ Tulangulukilei pa kimfwa kya David, mukulumpe wingila bininge ushikatanga mu États-Unis. Aye mwine wetelele bu mwingidi wingila bininge. Sosiete yabo yamupele kaji kayampe ne lupeto luvule kadi wadi muyukane mu ntanda yabo pa mwanda wa kano kaji. David unena’mba, “kyaba kimo nadi nanga’mba i Yehova wangesela.” Le i bya bine?

⁸ David washilwile kumona biyukeno bimudyumuna’mba kandi kaji kabaone kipwano kyandi na Yehova. Unena’mba, “nadi kenangulukila pa myanda ya ku kaji ku kupwila enka ne pondi mu busapudi pene. Nadi mona lupeto luvule, inoko ñeni yadi imvutakana bininge, kadi twaikala na makambakano mu busongi.”

⁹ David wajingulwile amba ufwaninwe kubandaula bintu byatangidije kumeso. Unena’mba, “nakwete butyibi busumininwe bwa kolola bintu.” David wajadikile mpangiko ya kaji, kupwa wakalombola’mo mukulu wandi wa kaji. Byaikala namani? Kaji ka David kapwa! Le walongele’po namani? Unena’mba, “difuku dilonda’po nadinga  fomu wa kwingila bu pania mukwashi.” Pa kwikwatakanya, David ne wandi mukaji bashilwile mwingilo wa bukundwe. Mwenda mafuku waikala ke pania wa lonso, mfulo mfulō ne wandi mukaji mwine washilula mwingilo wa bupania. Bano ba mulume ne mukaji batongele kwingila kaji kapela bantu bavule kwingila, inoko kintu kyadi na mvubu mpata kobadi ke kajipo kobengila. Nansha byobasokola lupeto lutyetye bininge na lobadi basokola dibajinji, kweji ne kweji badi na lupeto lwa kupota byobasakilwa. Basakanga kutangidija Yehova kumeso, kadi i bemwene amba ukwatakanyanga boba batangidije tumweno twa Bulopwe kumeso.​—Mat. 6:31-33.

10. Le tubwanya kulama mutyima wetu namani?

¹⁰ Ekale shi tudi na bintu bingi nansha bityetye, tufwaninwe kulama mutyima wetu. Namani? Kokasanswa bupeta. Kadi kokatangidija kaji ka ku ngitu kumeso kupita’ko mwingilo oingidila Yehova. Le ukayuka namani shi kodi musanswe bupeta ne kutangidija kaji kumeso? Wiipangule bino bipangujo: ‘Le divule dine nangulukilanga pa kaji ka ku ngitu pondi ku kupwila nansha mu busapudi? Lelo nzumbijanga mutyima bininge pa mwa kwikadila na lupeto luvule mu mafuku a kumeso? Lelo twipyanga myanda na mwinē pami pa mwanda wa lupeto ne bituntwa? Le nketabija kwingila kaji ka ku ngitu kapela bakwetu kwingila, inoko kankwasha mpityije kitatyi kilampe mu mwingilo wa Yehova?’ (1 Tm. 6:9-12) Potulangulukila pa bino bipangujo, tuvulukei amba Yehova witusenswe kadi i mulae boba bamulamete amba: “Nkikakushiyepo nansha dimo kadi nkikakwelapo nansha dimo.” O mwanda mutumibwa Polo wālembele amba: “Mwikadilo wa būmi bwenu wikale wa kubulwa kusanswa lupeto.”​—Bah. 13:5, 6.

11. Le i bika bibwanya kufikila muntu pa mwanda wa kwipwija mukose?

¹¹ Yehova usakanga tusangele būmi, kadi kwipwija mukose kubwanya kwitukwasha tusangele’bo. Na bubine, Kinenwa kya Leza kinena’mba, “i kutupu kintu kipityile buya ku muntu kutabuka kudya ne kutoma ne kuloelelwa mingilo yandi mikomo.” (Mus. 2:24) Inoko kwipwija mukose kuvule mu ino ntanda kubwanya kwitona. Konanga misoñanya ya bantu ya mwa kwikadila ne kwibakankamika betabije nansha kusanswa bintu bipeleje Kinenwa kya Leza.

12. Mungya 1 Bene Kodinda 10:21, 22, mwanda waka tufwaninwe kutonga kwipwija mukose na tunangu?

 ¹² Tusakanga kulamata Yehova bunka bwandi, o mwanda ketubwanyapo kudya ku “meza a Yehova” ne ku “meza a bandemona.” (Tanga 1 Bene Kodinda 10:21, 22.) Divule dine kudya na muntu byakudya i kilomboji kya bulunda. Shi tubatonge kwipwija mukose kukankamika bya lūma, majende, busekese, nansha bya kusakasaka bya ngitu ne mikadila mikwabo mibi, nabya tudi pamo bwa batwe badya byakudya bitēkele balwana na Leza. Mfulo mfulō, ketukesanshijapo’nka batwe bene, ino tukona ne kipwano kyetu na Yehova.

13-14. Kukwatañana na Yakoba 1:14, 15, mwanda waka ketufwaninwepo kutamija bya kusakasaka bibi? Leta kimfwa.

¹³ Tala miswelo imoimo ilombola’mba kwipwija mukose i kwiifwane na kudya byakudya. Kitatyi kyotudya, tutanga mutyima ku bintu byotwela mukanwa. Inoko shi tubamina byakudya, byanzanga kwingila mu ngitu, ne bumeni budi mu byakudya bwashala mu imbidi yetu. Byakudya biyampe bibwanya kwitupa bukomo bwa ngitu; ino byakudya bibi bibwanya kwitubeleka. Bintu bilupuka’ko kebibwanyapo kumweka ponka na ponka, ino bikamweka mwenda mafuku.

¹⁴ Muswelo umo onka, kitatyi kyotutonga kwipwija mukose, tufwaninwe kubandaula bintu byotutweja mu ñeni yetu. Mwanda shi bibatwela’mo, bikashilula kwingila, ebiya byashinta ñeni ne mutyima wetu. Kwipwija mukose kuyampe kubwanya kwitukwasha twiivwane biyampe; ino kwipwija mukose kubi kuketusanshija. (Tanga Yakoba 1:14, 15.) Bintu bilupuka ku kwipwija mukose kubi kebibwanyapo kumweka ponka na ponka, ino bikamweka mwenda mafuku. O mwanda Bible witudyumuna’mba: “Kemwakyongolwai: Leza kabengwepo kibengo. Mwanda kyokya kikuna muntu shi kika shi kika, e kyonka kyakangula; mwanda yewa ukuna pa mwanda wa ngitu yandi ukangulanga bubole ku ngitu yandi.” (Ngt. 6:7, 8) Bine, i biyampe tupele kwipwija mukose konso kukankamika bintu bishikilwe Yehova!​—Ñim. 97:10.

15. Le Yehova i mwitupe kyabuntu’ka?

¹⁵ Bantu bavule ba Yehova batalanga Televijo ya JW, televijo yetu miyampe ya pa Entelenete. Kaka umo witwa bu Marilyn unena’mba: “Televijo ya JW inkwashanga ngikale na milangwe miyampe, kadi ntalanga bintu byonso bidi’mo. Kitatyi kyonemona bu ngidi bunka nansha kyontyumukilwe mutyima, nondanga mwisambo ukankamika nansha butōtyi bwa lubanga. Kino kimfwenyanga bininge kudi Yehova ne ku bulongolodi bwandi. Mpangiko ya Televijo ya JW i mishinte bininge būmi bwami.” Le umwenanga mu kino kyabuntu kya Yehova? Kutentekela pa mpangiko ya kweji ne kweji, mu Televijo ya JW mudi myanda mikwatwe ku mawi, mavideo mavule, ne ñimbo ikankamika, kadi ubwanya kwibilonda kitatyi kyonso kyosaka.

16-17. Mwanda waka tufwaninwe kuta mutyima bininge ku kitatyi kyotupityija mu kwipwija mukose, ne tubwanya kulonga kino namani?

¹⁶ Ketufwaninwepo’nka kuta mutyima ku muswelo wa kwipwija mukose, ino tufwaninwe kuta’o ne ku bula bwa kitatyi kyotwipwija mukose. Shi bitupu, tubwanya kupityija kitatyi kilampe mu kwipwija mukose, kupita’ko kyotupityija mu mwingilo wa Yehova. Bantu bavule bakomenwanga kuta mutyima ku bula bwa kitatyi kyobapityija mu kwipwija mukose.  Kaka umo wa myaka 18 witwa bu Abigail unena’mba: “Kutala televijo kumpwanga mukose shi napu kaji. Ino shi nkitadijepo, mbwanya kupityija mansá mavule ntala televijo.” Tutu umo nkasampe witwa bu Samuel nandi unena’mba: “Kyaba kimo ntalanga tumavideo twipitwipi ketupu pa Entelenete. Nshilulanga’tu na kutala kamo, ino utulumuka ke mansá asatu nansha aná.”

¹⁷ Le i muswelo’ka obwanya kuta mutyima ku bula bwa kitatyi kyopityija mu kwipwija mukose? Kintu kibajinji i kuyuka bidi bula bwa kitatyi kyopityija’mo. Ubulwepo kulemba bula bwa kitatyi kyopityijanga’mo mu yenga mutuntulu? Lemba mu kalandadiye buvule bwa mansá opityijanga utala televijo, ukimba myanda pa Entelenete, ne kukaya makayo a mu telefone. Shi ubamone amba upityijanga kitatyi kivule, witūdile’ko mpangiko. Witūdile’ko kitatyi kya kulonga dibajinji bintu bya mvubu mikatampe, kupwa ke kitatyi kya kwipwija mukose. Kintu kya bubidi lomba Yehova akukwashe ulēmeke yobe mpangiko. Mu uno muswelo, ukekala na kitatyi ne bukomo bosakilwa bwa kwifunda Bible, kulonga butōtyi bwa kisaka, kutanwa ku kupwila, ne kwingidila Yehova mu mwingilo wa kusapula ne kufundija. Padi kadi kuketopekapo pa kitatyi kyopityija mu kwipwija mukose.

18-19. Le tukalombola namani amba tulamete Yehova bunka bwandi?

¹⁸ Mutumibwa Petelo paāpwile kulemba myanda itala mfulo ya ntanda ya Satana ne myanda itala ntanda mipya īya’ko, wānenene amba: “A baswedibwe, byomutengele bino bintu, longai bukomo bwenu bonso amba ku mfulo akemutane bampikwa dikeme ne bampikwa kakoba kadi mu ndoe.” (2 Pe. 3:14) Shi tukōkele ano madingi ne kulonga bukomo bwa kwikala nyeke batōka mu mwikadilo ne ku mushipiditu, tukalombola’mba tulamete Yehova bunka bwandi.

¹⁹ Satana ne ngikadilo yandi bakalonga nyeke bukomo amba tushinte bintu byotutangidije kumeso. (Luka 4:13) Ino nansha shi tubatanwa na bikoleja’ka, ketukalekapo muntu nansha kintu kipingakene pa kifuko kya Yehova mu mutyima wetu. Twi basumininwe kupa Yehova kete byobya byafwaninwe​—kumulamata bunka bwandi!