1. Le i butyibi’ka buyampe bubwanya kukwata muntu?

DIVULE dine, butyibi bukwatanga bambutwile bwikalanga na lupusa pa babo bana mu kitatyi kilampe. Shi bambutwile bakwata butyibi bubi, babwanya kuletela babo bana makambakano. Ino shi bakwata butyibi buyampe, bakaletela bana dyese dya kwikala na būmi bwa nsangaji. Inoko, bana nabo bafwaninwe kukwata butyibi buyampe. Butyibi buyampe bubwanya kukwata muntu i bwa kwingidila Yehova, Tata wetu wa mūlu wa buswe.​—Ñim. 73:28.

2. Le i butyibi’ka buyampe bwākwete Yesu ne bambutwile bandi?

² Bambutwile ba Yesu bādi basumininwe kukwasha babo bana bengidile Yehova, kadi butyibi bwākwete bambutwile bwālombwele amba kwingidila Leza kudi na mvubu mu būmi bwabo. (Luka 2:40, 41, 52) Yesu nandi wākwete butyibi buyampe bwāmukweshe avuije mwingilo wandi mu mpango ya Yehova. (Mat. 4:1-10) Yesu pa kutama, wāikele muntu wa kanye, wa lulamato ne bukankamane​—mwana obādi babwanya kusangela ne kwitemba kudi mbutwile ye-yense wakaminwe Leza.

3. Le i bipangujo’ka byotusa kulondolola mu kino kishinte?

³ Mu kino kishinte, tusa kulondolola bino bipangujo: Le Yehova wākwete butyibi’ka buyampe pangala pa Yesu? Le i ñeni’ka ibwanya kuboila bambutwile bene Kidishitu ku butyibi bwākwete bambutwile ba Yesu? Ne bankasampe bene Kidishitu babwanya kuboila ñeni’ka ku butyibi bwākwete Yesu?

4. Le Yehova wātongele butongi’ka buyampe pangala pa wandi Mwana?

⁴ Yehova wātongēle Yesu bambutwile bayampe. (Mat. 1:18-23; Luka 1:26-38) Binenwa bya Madia byampikwa budimbidimbi  bisonekelwe mu Bible, bilombola’mba wādi usenswe bininge Yehova ne Kinenwa kyandi. (Luka 1:46-55) Kadi muswelo wālondele Yosefa bulombodi bwa Yehova ulombola’mba wādi wakaminwe Leza, kadi usaka kumusangaja.​—Mat. 1:24.

5-6. Le Yehova wālekele wandi mwana emwene bika?

⁵ Yukai amba Yehova kātongēlepo Yesu bambutwile bampeta. Kitapwa kyālambwile ba Yosefa ne Madia pābutwilwe Yesu, kilombola’mba bādi balanda. (Luka 2:24) Padi Yosefa wādi na kakifuko katyetye kubwipi na yandi njibo mu Nazala mwaādi wingidila bu sendwe wa mbao. Mobimwekela būmi bwabo bwādi bukomo, nakampata mwanda bādi dibajinji na bana basamba-babidi nansha ne kupita.​—Mat. 13:55, 56.

⁶ Yehova wākingile Yesu ku byaka bimobimo, inoko kākingilepo wandi Mwana ku makambakano onso. (Mat. 2:13-15) Kimfwa, Yesu wādi ushikete na babutule kebādipo bamwitabije. Langa’po bidi mwādi mutyumukilwe Yesu mutyima pa kwikala na bantu ba mu kyabo kisaka kebādipo bamwitabije dibajinji amba i Meshiasa. (Mako 3:21; Yoa. 7:5) Kadi padi wāūminine bushiyena bwa kufwilwa Yosefa, shandi wa bulelwa. Kufwilwa shandi uno muswelo, kwālengeje Yesu, mwana mukulu, atangidile mingilo ya kisaka. (Mako 6:3) Yesu pa kutama, wēfundile mwa kuvuijija bisakibwa bya kyabo kisaka. Wādi padi wingila bininge mwanda wa kwibakwatakanya. O mwanda wāyukile mukōkelanga muntu shi waingila difuku dituntulu.

7. (a) Le i bipangujo’ka bikakwasha ba mulume ne mukaji bakimba kubutula bana? (b) Le kisonekwa kya Nkindi 2:1-6 kibwanya kwibakwasha namani bafundije babo bana?

⁷ Shi mwi ba mulume ne mukaji, kadi musaka kubutula bana, mwiipangulei amba: ‘Le twi bantu betyepeje kadi badi na mulangilo wa Leza, bobatonga kudi Yehova mwanda wa kulela mwana usa kubutulwa?’ (Ñim. 127:3, 4) Shi wi mbutwile kala, wiipangule amba: ‘Le mfundijanga bami bana’mba kwingila bininge kudi na mvubu?’ (Mus. 3:12, 13) ‘Le noñanga bukomo bwa kukinga bami bana ku byaka bya ku ngitu ne mu ñeni bibwanya kwibatana mu ntanda ya Satana?’ (Nki. 22:3) Kubwanyapo kukinga bobe bana ku makambakano onso abwanya kwibatana. I bikomo  kulonga namino. Ino ubwanya kwibateakanya bityetye na buswe ku makambakano a mu būmi na kwibafundija mwa kukimbila madingi mu Kinenwa kya Leza. (Tanga Nkindi 2:1-6.) Kimfwa, shi mubutule wapele mutōtelo wa bine, kwasha bobe bana bayuke kupityila ku Kinenwa kya Leza amba kulamata Yehova kudi na mvubu. (Ñim. 31:23) Kadi nansha shi muntu otusenswe wafu, lombola bobe bana muswelo wa kwingidija Kinenwa kya Leza amba baleke kwikala na njia, ino bekale na ndoe.​—2 Ko. 1:3, 4; 2 Tm. 3:16.

8. Mungya Kupituluka mu Bijila 6:6, 7, le ba Yosefa ne Madia bālongele bika?

⁸ Bambutwile ba Yesu ba pano pa nshi bāmukweshe atame bu muntu mwitabijibwe na Leza; bālondele bulombodi bobāpele bambutwile kudi Yehova. (Tanga Kupituluka mu Bijila 6:6, 7.) Ba Yosefa ne Madia bādi basenswe Yehova bininge, kadi bādi batele mutyima dibajinji ku kukankamika babo bana nabo bamusanswe bininge.

9. Le ba Yosefa ne Madia bākwete butyibi’ka bwa mvubu?

⁹ Ba Yosefa ne Madia bātongele kulama kibidiji kiyampe kya kutōta Leza mu kisaka. O mwanda bādi benda yenga ne yenga kukapwila ku shinankonka ya mu Nazala, ne ku Pashika ya mwaka ne mwaka mu Yelusalema. (Luka 2:41; 4:16) Padi pobādi benda na kisaka ku Yelusalema bādi bafundija Yesu ne banababo mānga ya bantu ba Yehova, padi pobādi benda bapempula bifuko bitelelwe mu Bisonekwa. Bana pobādi benda bavula mu kisaka, ba Yosefa ne Madia kebāpēlelwepo kulama bibidiji biyampe bya ku mushipiditu. Inoko bāmwenine’mo! Byobādi batangidije butōtyi bwa Yehova kumeso, kisaka kyabo kyāfwenene kubwipi na Yehova.

10. Le bambutwile bene Kidishitu babwanya kuboila ñeni’ka kudi ba Yosefa ne Madia?

¹⁰ Le bambutwile bakaminwe Leza, babwanya kuboila ñeni’ka kudi ba Yosefa ne Madia? Kintu kya mvubu mpata i kino, fundija bobe bana kupityila ku binenwa ne bilongwa amba usanswe Yehova bininge. Yuka’mba kyabuntu kikatampe mpata kyobwanya kwibapa i kwibakwasha basanswe Yehova. Kadi kintu kya mvubu bininge kyobwanya kwibafundija, i kwibalombola mwa kwikadila na kibidiji kiyampe  kya kutanga, kulombela, kupwila ne kusapula. (1 Tm. 6:6) Shako, ufwaninwe kupa bobe bana bintu bya ku ngitu byobasakilwa. (1 Tm. 5:8) Inoko vuluka’mba kintu kikakwasha bobe bana bakapande ku mfulo ya ino ngikadilo minunu ne kutwela mu ntanda mipya ya Leza i kipwano kyabo na Yehova, ke bintupo bya ku ngitu. *​—Ezk. 7:19; 1 Tm. 4:8.

11. (a) Le madingi adi mu 1 Temote 6:17-19, akakwasha bambutwile namani bakwate butyibi buyampe pobalelele babo bana? (b) Le i bitungo’ka bibwanya kwitungila kyenu kisaka, ne kukalupuka madyese’ka? (Tala kapango kanena’mba, “ Le Uketungila Bitungo’ka?”)

¹¹ Bine, bisangaja’po kashā kumona bambutwile bavule bene Kidishitu bakwata butyibi buyampe bwa kukwasha byabo bisaka bifwene kudi Leza! Bengidilanga Yehova pamo kitatyi kyonso. Batanwanga ku kupwila ne ku bitango. Kadi basapulanga myanda miyampe. Bisaka bimo nabyo bibwanya’nka ne kukasapula mu mwaba usapulwanga’mo na dimodimo. Bakwabo bakapempulanga ku Betele nansha kukwatakanya mwingilo wa kūbaka mobo a bulongolodi. Bino bisaka bijimijanga lupeto lwabo pa kulonga bino bintu, kadi bibwanya kwikonda na makambakano. Inoko Yehova wibeselanga bya binebine. (Tanga 1 Temote 6:17-19.) Divule dine, bantu bataminanga mu bisaka bya uno muswelo bendelelanga kulonga bino bintu biyampe kitatyi kyobatama, kadi kebealakanyangapo! *​—Nki. 10:22.

12. Le i bika byādi bifwaninwe kulonga Yesu pawātamine?

¹² Shandya Yesu wa mūlu ukwatanga nyeke butyibi buyampe, kadi bambutwile bandi nabo bākwete butyibi bwa tunangu. Inoko, pātamine Yesu wādi unenwe kwikwatyila butyibi. (Ngt. 6:5) Wādi na kyabuntu kya bwanapabo bwa kwitongela pamo’nka bwa batwe. Wādi ukokeja kutonga kukimba bidi tumweno twa aye mwine. Inoko, aye wātongele kwikala nyeke mu kipwano kiyampe na Yehova. (Yoa. 8:29) Le kimfwa kyandi kibwanya kukwasha bankasampe dyalelo namani?

13. Le Yesu wātongele butongi’ka buyampe paādi nkasampe?

¹³ Yesu paādi nkasampe, wātongele kukōkela bambutwile bandi. Kāpelelepo nansha dimo bulombodi bwa bambutwile bandi na kulanga’mba aye uyukile bivule kwibapita. Ino “wadi mwibakōkele nyeke.” (Luka 2:51) Bine, Yesu kābudilwepo kuvuija mwingilo wandi wa bu mwana mukulu. Wālongele bukomo bwa kwifunda busendwe kudi shandi wa bulelwa mwa kukwashisha’ko kisaka kyabo.

14. Le tubayuka namani amba Yesu wādi mwifundi muyampe wa Kinenwa kya Leza?

 ¹⁴ Padi bambutwile ba Yesu bāmulombwele myanda ya kubutulwa kwandi kwa mu kingelengele ne bintu byānenene mikendi ya Leza pa mwanda wandi. (Luka 2:8-19, 25-38) Yesu kāimaninepo’tu enka pa byobāmulombwele, ino wēfundile ne Bisonekwa aye mwine. Le tubayuka namani amba Yesu wādi mwifundi muyampe wa Kinenwa kya Leza? Mwanda paādi ukidi nkasampe, bafundiji ba mu Yelusalema “badi bāna’nka kwana ñeni yandi ne bilondololwa byandi.” (Luka 2:46, 47) Kadi aye pa kubwanya’tu myaka 12, Yesu wādi kala ukulupile amba Yehova ye Shandi.​—Luka 2:42, 43, 49.

15. Le Yesu wālombwele namani amba i mutonge kulonga kiswa-mutyima kya Yehova?

¹⁵ Yesu paāyukile byādi bimusakila Yehova kulonga, wāitabije mwingilo wandi. (Yoa. 6:38) Wādi uyukile amba bantu bavule bādi ba kumushikwa, kadi kābudilwepo kulangulukila pa uno mwanda. Inoko, wātongele kukōkela Yehova. Yesu paābatyijibwe mu 29 Y.M., wālongele bidi dibajinji byobya byādi bimusakila Yehova. (Bah. 10:5-7) Nansha ke paādi ufwila ku mutyi wa masusu, Yesu kālekelepo kulonga kiswa-mutyima kya Shandi.​—Yoa. 19:30.

16. Le bana babwanya kuboila ñeni’ka kudi Yesu?

¹⁶ Kōkelai bambutwile benu. Bambutwile benu i bampikwa kubwaninina pamo bwa ba Yosefa ne Madia. Inoko, Yehova i mupe bambutwile benu mwingilo wa kwimukinga, kwimufundija ne kwimwendeja. Shi muteja madingi obemupa ne kulēmeka lupusa lwabo, nabya ‘bikemwendekela.’​—Ef. 6:1-4.

17. Mungya Yoshua 24:15, le i butyibi’ka bufwaninwe kukwata bankasampe abo bene?

¹⁷ Tongai omukengidila. Mufwaninwe bidi kuyuka banwe bene Yehova i ani, mpango yandi, ne mwa kulongela kiswa-mutyima kyandi. (Loma 12:2) Nabya mukabwanya kukwata butyibi bwa mvubu mpata mu būmi bwenu, ke bwa kwingidila Yehova kadi. (Tanga Yoshua 24:15; Mus. 12:1) Shi mulonda kitatyi ne kitatyi mpangiko ya kutanga Bible ne kwifunda’ye, mukendelela kusanswa Yehova bininge kadi lwitabijo lwenu lukaningila’ko.

18. Le i butyibi’ka bufwaninwe kukwata bankasampe ne kukalupuka bika?

¹⁸ Tongai kutangidija kumeso kiswa-mutyima kya Yehova mu būmi bwenu. Ntanda  ya Satana ilayanga’mba mukekala na nsangaji shi mwingidije bwino bwenu mwanda wa tumweno twa banwe bene. Inoko bubine i buno amba, boba batele mutyima ku bintu bya ku ngitu betapatapanga “na misanshi mivule mine.” (1 Tm. 6:9, 10) Ino shi muteje Yehova ne kutangidija kumeso kiswa-mutyima kyandi mu bwenu būmi, mukekala na būmi bwa nsangaji kadi “[mukalonga] bintu na tunangu.”​—Yos. 1:8.

19. Le bambutwile bafwaninwe kuvuluka bika?

¹⁹ A bambutwile, longai bukomo bwa kukwasha bana bengidile Yehova. Mukulupilei, nandi ukemukwasha mukwate butyibi bwa tunangu. (Nki. 3:5, 6) Vulukai amba benu bana bakalonda byomulonga kupita’ko byomunena. Nanshi, kwatai butyibi bukakwasha benu bana betabijibwe na Yehova.

20. Le i madyese’ka akeselwa bankasampe shi batonge kwingidila Yehova?

²⁰ A bankasampe, bambutwile benu babwanya kwimukwasha mukwate butyibi bwa tunangu mu būmi. Inoko pa kwitabijibwa na Leza, mufwaninwe kukwata butyibi buyampe. Nanshi iulai Yesu ne kutonga kwingidila Shenu wa mūlu wa buswe. Shi mulonge namino, mukekala tamba’nka pano na būmi buyampe kadi bwa nsangaji. (1 Tm. 4:16) Kadi mu mafuku a kumeso, mukekala na būmi bwa nsangaji kutabuka!