KISHINTE KYA KWIFUNDA 42
Mwa Kwendejeja Kifundwa kya Bible Kufika ne ku Lubatyijo—Kipindi kya Bubidi
“Kyaba kyonso wite mutyima abe mwine ne bufundiji bobe.”—1 TM. 4:16.
LWIMBO 77 Kitōkeji mu Ntanda ya Mfindi
BIDI MU KISHINTE *
1. Le twayukile namani amba mwingilo wa kulonga bana ba bwanga i mwingilo upandija būmi?
MWINGILO wa kulonga bana ba bwanga i mwingilo upandija būmi! Le tubayuka kino namani? Yesu paāletele musoñanya udi mu Mateo 28:19, 20, wānenene amba: “Endai mukalonge bana ba bwanga . . . , mwibabatyijei.” Le kubatyijibwa kudi na mvubu’ka? Boba basaka kupanda, bafwaninwe bidi kubatyijibwa. Yewa usaka kubatyijibwa ufwaninwe kwitabija’mba tukapanda kupityila enka pa lufu lwa Yesu lwa bu kitapwa ne kusangulwa kwandi. O mwanda mutumibwa Petelo wasapwidile banababo bene Kidishitu amba: “Lubatyijo, nalo lwimupandijanga . . . kupityila ku lusangukilo lwa Yesu Kidishitu.” (1 Pe. 3:21) Nanshi shi mwanā bwanga mupya wabatyijibwa, ubwanya kukulupila’mba ukapanda.
2. Le kisonekwa kya 2 Temote 4:1, 2 kinena’mba tufwaninwe kwikala bafundiji ba muswelo’ka?
2 Pa kulonga bana ba bwanga, tufwaninwe kwikala na “bwino bwa kufundija.” (Tanga 2 Temote 4:1, 2.) Mwanda waka? Mwanda Yesu wētusoñenye amba: “Endai mukalonge bana ba bwanga . . . , mwibafundijei.” Mutumibwa Polo nandi wētusoñenye ‘kūminina’ mu uno mwingilo, ‘mwanda shi tulonge namino tukepandija batwe bene ne boba betwivwana.’ Polo wādi na bubinga bwendele’mo bwa kunenena’mba: “Kyaba kyonso [tá] mutyima . . . [ku] bufundiji bobe.” (1 Tm. 4:16) Byotufundijanga mwanda wa kulonga bana ba bwanga, bufundiji bwetu bufwaninwe kwikala buyampe bininge.
3. Le i bika byotusa kwisambila’po mu kino kishinte mu mwanda utala kwendeja bifundwa bya Bible?
3 Tufundijanga kyaba kyonso bantu midiyo ne midiyo bubine bwa mu Bible. Ino monka mwanenene’kyo kishinte kibadikile, tusakanga kuyuka muswelo otubwanya kwibakwasha bekale bana ba bwanga ba Yesu Kidishitu babatyijibwe. Mu kino kishinte, tusa kwisambila’mo pa bintu bitano bikwabo bifwaninwe kulonga mufundiji ense pa kukwasha waefunda nandi endelele kufika ne ku kubatyijibwa.
LEKA BIBLE MWINE AFUNDIJE
Nena mufundiji wa bwino akukwashe ulumbulule bwino bobe bwa kuleka Bible mwine afundije (Tala musango 4-6) *
4. Mwanda waka mufundiji ufwaninwe kwīfula kitatyi kyaendeja kifundwa kya Bible? (Tala kunshi kwa dyandi.)
4 Tusenswe bintu byotufundija mu Kinenwa kya Leza. O mwanda tubwanya padi kukimba kwisambila bininge pa bintu byotusenswe. Inoko, shi wendejanga Kifundwa kya Kiteba kya Mulami, Kifundwa kya Bible kya Kipwilo, nansha kifundwa kya Bible ku njibo ya muntu, kufwaninwepo kwisamba bivulevule. Pa kuleka Bible mwine afundije, mufundiji ufwaninwe kwīfula ne kuleka kushintulula bintu byonso byayukile pa vese nansha pa mwanda kampanda wa mu Bible. * (Yoa. 16:12) Dingakanya bidi buyuki bwa mu Bible bowadi nabo powabatyijibwe na bodi nabo pano. Padi mu kine kitatyi’kya, wadi’tu na buyuki bwa kyalwilo. (Bah. 6:1) Byakulombele myaka mivule pa kwifunda bintu byoyukile dyalelo, o mwanda kokalonga bukomo bwa kufundija omwifunda nandi bintu byonso mwa kimo.
5. (a) Kukwatañana na 1 Bene Tesalonika 2:13, le tusakanga yewa otwifunda nandi ayuke bika paefunda? (b) Le i muswelo’ka otubwanya kukankamika otwifunda nandi asapule bintu byaefunda?
5 Tusakanga otwifunda nandi ayuke amba byaefunda bitambanga mu Kinenwa kya Leza kya ku bukomo bwa mushipiditu. (Tanga 1 Bene Tesalonika 2:13.) Le tukamukwasha namani? Kankamika omwifunda nandi asapule bintu byaefunda. Pa kyaba kya kumushintulwila nyeke myanda ya mu Bible, munene akushintulwile’ko imoimo. Kwasha omwifunda nadi ayuke mwa kwingidijija Kinenwa kya Leza. Mwipangule bipangujo bya kumukwasha alombole byalanga, ne mwamwena bisonekwa byaatanga. (Luka 10:25-28) Kimfwa, mwipangule amba: “Le i ngikadila’ka imo ya Yehova yowamona kupityila ku kino kisonekwa?” “Le i muswelo’ka obwanya kumwena mu buno bubine bwa mu Bible?” “Le ubamone namani bino byowefunda?” (Nki. 20:5) Kintu kya mvubu ke bungipo bwa bintu biyukile omwifunda nandi, ino i muswelo wasenswe byobya byayukile ne waebingidija.
6. Mwanda waka i biyampe padi kwenda na mufundiji wa bwino potukendeja kifundwa kya Bible?
6 Pokendeja kifundwa kya Bible, le wendanga na basapudi badi na bwino bwa kufundija? Shi i amo, ubwanya kwibepangula mobamwena muswelo owaendeja kifundwa ne muswelo owaingidija Bible pa kufundija. Pa kulumbulula bwino bobe bwa kufundija, ufwaninwe kwikala mwityepeje. (Dingakanya na Bilongwa 18:24-26) Kupwa, ipangula musapudi wa bwino alombole shi omwifunda nandi waivwanijanga bubine. Kadi ubwanya kunena uno musapudi akendeje kifundwa kitatyi kyokukekala’kopo yenga umo nansha mayenga mavule. Nabya omwifunda nandi ukefunda kitatyi ne kitatyi ne kuyuka’mba kwifunda kudi na mvubu. Kokalanga nansha dimo amba i kifundwa “kyobe” ne amba i kutupu muntu mukwabo ubwanya kwikyendeja. Ne kadi bidi, usakilanga omwifunda nandi biyampe mwanda wa endelele kwifunda nyeke bubine.
FUNDIJA NA BUZANZAMUKE NE NA KIKULUPIJI
Lombola omwifunda nandi bimfwa bimweke bya kumukwasha ayuke muswelo wa kwingidija misoñanya ya mu Bible (Tala musango 7-9) *
7. Le i bika bikakwasha yewa wifunda Bible asangele byaefunda?
7 Yewa omwifunda nandi ufwaninwe kumona buzanzamuke bobe ne kikulupiji kyokulupile bubine budi mu Bible. (1 Ts. 1:5) Nabya, padi ukasangela byobya byaefunda. Shi i byendele’mo, mulombole mwa kukwashishe kulonda misoñanya ya mu Bible. Nabya ukayuka’mba mu Bible mudi bulombodi buyampe bubwanya kumukwasha ne aye.
8. Le i bika bikwabo byobwanya kulonga pa kukwasha omwifunda nandi, ne mwanda waka ufwaninwe kwibilonga?
8 Kitatyi kyomwifunda Bible, lombola omwifunda nandi bimfwa bimweke bya bantu badi bekonda na makambakano na adi nao kupwa beanekenya. Pokendeja kifundwa, ubwanya kwenda na muntu wa mu kipwilo ukokeja kukwasha yewa omwifunda nandi. Ubwanya nansha kutana bimfwa bikankamika mu bishinte binena’mba “Bible Ushintanga Būmi” * bidi pa jw.org. Bino bishinte ne mavideo, bikakwasha omwifunda nandi amone amba kwingidija misoñanya ya mu Bible mu būmi bwandi i kuyampe.
9. Le i muswelo’ka obwanya kukankamika owifunda nandi asapwile bantu ba mu kisaka ne balunda nandi byobya byaefunda?
9 Shi omwifunda nandi udi na mwinē pandi, le mwinē pandi nandi wifundanga? Shi kefundengapo, munene āye atanwe pomwifunda. Kankamika omwifunda nandi asapwile bantu ba mu kyandi kisaka ne balunda nandi byobya byaefunda. (Yoa. 1:40-45) Namani? Ubwanya kumwipangula’tu amba: “Le i muswelo’ka obwanya kushintulwila bantu ba mu kyobe kisaka buno bubine? nansha’mba “le i kisonekwa’ka kyobwanya kwingidija pa kubingija byowifunda kudi mulunda nobe?” Mu uno muswelo, ukafundija omwifunda nandi ekale mufundiji. Kupwa, shi wabwanya bisakibwa, ukokeja kusapula bu musapudi wampikwa kubatyijibwa. Ubwanya ne kwipangula omwifunda nandi shi uyukile’ko muntu mukwabo usaka kwifunda Bible. Shi wakutelela’ye, ubwanya kwisamba nandi ne kumunena mwifunde nandi. Mutadije video inena’mba I Bika Biloñwanga mu Kifundwa kya Bible? *
KANKAMIKA OMWIFUNDA NANDI APWANE NA BANTU BA MU KIPWILO
Kankamika omwifunda nandi apwane na bantu ba mu kipwilo (Tala musango 10-11) *
10. Mungya 1 Bene Tesalonika 2:7, 8, le mufundiji ukeula kimfwa kya Polo namani?
10 Bafundiji bafwaninwe kuta bobefunda nabo mutyima bya binebine. Mwibamonei bu bantu bakekala batutu ne bakaka mu mafuku a kumeso. (Tanga 1 Bene Tesalonika 2:7, 8.) Inoko kebibapēlelangapo kuleka balunda bobadi nabo mu ino ntanda ne kushinta mwanda wa kwingidila Yehova. O mwanda tufwaninwe kwibakwasha basokole balunda bayampe mu kipwilo. Pwana na omwifunda nandi na kupityija nandi kitatyi pomwifunda ne mu bitatyi bikwabo. Kumwita ku telefone, kumutumina musapu, nansha kukamupempula bityetye mu kitatyi kyokemwifundepo, kukalombola’mba umutele mutyima bya binebine.
11. Le tusakanga boba botwifunda nabo bemone namani mu kipwilo, ne mwanda waka?
11 Banenanga’mba: “Mwana i wa kafu-bukidi.” Nanshi tubwanya kunena’mba: “Kulonga mwanā bwanga i mwingilo wa kipwilo.” O mwanda bafundiji bayampe ba Bible bayukanyanga bobefunda nabo ku bantu bakwabo mu kipwilo, bene babwanya kwibakwasha bafwene kudi Leza. Mu uno muswelo boba botwifunda nabo bakapwana na bantu ba Leza, bene bakokeja kwibakwasha ku mushipiditu ne mu ñeni. Tusakanga muntu yense wifunda Bible emone bu udi mu kipwilo ne amba udi mu kisaka kyetu kya ku mushipiditu. Kadi tusakanga yewa wifunda Bible akokwe na buswe bwetu bwa bu bana na bana. Nabya ukapēlelwa kutyiba kipwano na bantu kebabwanyapo kumukwasha asanswe Yehova. (Nki. 13:20) Shi balunda nandi ba pa kala abamunyema, aye ukayuka’mba ubwanya kusokola balunda bayampe mu bulongolodi bwa Yehova.—Mako 10:29, 30; 1 Pe. 4:4.
WISAMBILE PA KITUNGO KYA KWIPĀNA NE KUBATYIJIBWA
Bityebitye, muntu wampikwa budimbidimbi wifunda Bible ubwanya kufikila pa kitungo kya kubatyijibwa (Tala musango 12-13)
12. Mwanda waka tufwaninwe kwisambila pa myanda itala kwipāna ne kubatyijibwa na yewa otwifunda nandi?
12 Wisambe patōkelela myanda itala kwipāna ne kubatyijibwa. Ne kadi bidi, kitungo kyotwendejejanga bifundwa bya Bible i kukwasha muntu ekale mwanā bwanga mubatyijibwe. Pa kupwa’tu kwifunda mu myeji mityetye ne nakampata shi yewa wifunda Bible washilula kutanwa ku kupwila, mulombole ayuke amba, wifundanga Bible mwanda wa kushilula kwingidila Yehova bu Kamoni wandi.
13. Le i bika byalonga yewa wifunda Bible pa kusaka endelele kufika ne ku kubatyijibwa?
13 Bityebitye, muntu wampikwa budimbidimbi wifunda Bible ukokeja kufikila pa kitungo kya kubatyijibwa! Dibajinji, wayuka Yehova, wamusanswa ne kumwitabija. (Yoa. 3:16; 17:3) Kadi yewa wifunda Bible wapwana na Yehova ne banabetu mu kipwilo. (Bah. 10:24, 25; Yak. 4:8) Mwenda mafuku, waleka bilongwa bibi ne kwisāsa bubi bwandi. (Bil. 3:19) Kadi, lwitabijo lwandi lubamulengeja asapwile bakwabo bubine. (2 Ko. 4:13) Kupwa wepāna kudi Yehova ne kulombola kwipāna kwandi na kubatyijibwa. (1 Pe. 3:21; 4:2) Bine, difuku dya kubatyijibwa i difuku dya nsangaji ku muntu ense! Palonga omwifunda nandi bukomo bwa kufikila pa kitungo kyandi, mufwije’ko bya binebine ne kumukankamika endelele kumeso.
BANDAULA KYABA NE KYABA KWENDELELA KWA OMWIFUNDA NANDI
14. Le mufundiji ubwanya kubandaula kwendelela kwa obefunda nandi namani?
14 Potukwasha otwifunda nandi endelele kufika ne ku kwipāna ne kubatyijibwa, tufwaninwe kwikala na kitūkijetyima. Inoko kyaba kimo, tufwaninwe kujingulula shi usakanga kwingidila Yehova Leza. Le umwene biyukeno bilombola’mba omwifunda nandi uloñanga bukomo bwa kukōkela misoñanya ya Yesu? Nansha le usakanga’tu kuyuka myanda ya bine idi mu Bible?
15. Le i biyukeno’ka bifwaninwe kutala mufundiji bilombola kwendelela kwa obefunda nandi?
15 Bandaula kitatyi ne kitatyi kwendelela kwa omwifunda nandi. Kimfwa, le umwene Yehova namani? Le ulombelanga kudi Yehova? (Ñim. 116:1, 2) Le usangelanga kutanga Bible? (Ñim. 119:97) Le utanwanga ku kupwila kitatyi ne kitatyi? (Ñim. 22:22) Le ke mushinte mu būmi bwandi? (Ñim. 119:112) Le ke mushilule kusapwila bantu ba mu kyabo kisaka ne balunda nandi byobya byaefunda? (Ñim. 9:1) Ne kya mvubu kutabuka, le usakanga kwikala Kamoni wa Yehova? (Ñim. 40:8) Shi omwifunda nandi kendelelapo mu ino myanda, tompa na bunwa kuyuka kine kyakendelelapo, kupwa wisambile nandi pa uno mwanda na kanye inoko pampikwa kafinda. *
16. Le i bika padi bibwanya kulombola’mba tufwaninwe kuleka’byo kwifunda na muntu?
16 Bandaula kyaba ne kyaba shi ufwaninwe kwendelela kwifunda na muntu. Wiipangule amba: ‘Le otwifunda nandi kateakanyangapo bya kwifunda? Le kasakengapo kutanwa ku kupwila? Le ukidi na bibidiji bibi? Le ukidi mu kipwilo kya bubela?’ Shi malondololo i en-en, nabya kwendelela kwifunda nandi kudi pamo bwa kulonga bukomo bwa kufundija muntu kusumba aye papo mupele kubomba! Shi omwifunda nandi kasangedilepo byaefunda kadi kasakepo kushinta, le kyowifundila nandi i kika?
17. Mungya 1 Temote 4:16, le i bika bifwaninwe kulonga bafundiji bonso ba Bible?
17 Tumwene na mvubu mwingilo wetu wa kulonga bana ba bwanga, kadi tusakanga kukwasha boba botwifunda nabo Bible bendelele kufika ne ku kubatyijibwa. O mwanda tukaleka Bible mwine afundije, kadi tukafundija na buzanzamuke ne kikulupiji. Tukakankamika otwifunda nandi apwane na bantu ba mu kipwilo. Kadi tukesambila pa kitungo kya kwipāna ne kubatyijibwa, ne kubandaula kyaba ne kyaba kwendelela kwa otwifunda nandi. (Tala kapango kadi pa paje 13 kanena’mba, “ Bifwaninwe Kulonga Bafundiji pa Kukwasha Bobefunda Nabo Bafule ku Kubatyijibwa.”) Twi basangale pa kuyuka’mba tubwanya kwingila uno mwingilo upandija būmi! Nanshi tusumininwei kulonga bukomo bwa kwendeja bifundwa bya Bible byendelela kufika ne ku kubatyijibwa.
LWIMBO 79 Wibafundije Bemanije
^ mus. 5 Kitatyi kyotwendeja bifundwa bya Bible, tudi na dyese dya kukwasha bantu balange, beivwane, ne kulonga bintu mu muswelo wibasakila Yehova. Kadi kino kishinte kisa kushintulula muswelo otubwanya kulumbulula bwino bwetu bwa kufundija.
^ mus. 4 Tala kishinte kinena’mba “Epuka Bino Bilubo Poendeja Kifundwa kya Bible” kidi mu Kabuku ka ku Kupwila Būmi ne Mwingilo ka Kweji 9, 2016.
^ mus. 8 Twela mu MYANDA ITUTALA > MYANDA MIMWEKE.
^ mus. 9 Pa jw.org, twela mu BIBLE NE ABE > BINGIDILWA BYA KUFUNDIJA NABYO BIBLE > WIFUNDE NA MUNTU WA KUKUFUNDIJA.
^ mus. 15 Tala kishinte kinena’mba “Kusanswa Yehova ne Mutyima wa Kumufwija’ko Bikakulengeja Ubatyijibwe” ne kinena’mba “Le Kodi Mwiteakanye Mwanda wa Kubatyijibwa” bidi mu Kiteba kya Mulami kya Kweji 3, 2020.
^ mus. 77 NSHINTULWILO YA KIFWATULO: Kyaba kimo pa kupwa kwifunda Bible, kaka wa bwino ukwasha kaka wadi wendeja kifundwa ayuke mwa kulekela kwisamba bivulevule paefunda na muntu.
^ mus. 79 NSHINTULWILO YA KIFWATULO: Paefunda Bible, lolo umo wayuka mwa kwikadila mukaji muyampe. Kupwa, kasapwila wandi mulume byaefunda.
^ mus. 81 NSHINTULWILO YA KIFWATULO: Lolo umo wifunda Bible waenda na wandi mulume ku njibo ya mulunda nandi waasokola ku Njibo ya Bulopwe.
