1. Le bene Kidishitu babatyijibwe bafwaninwe kwendelela kulonga bika?

LELO kodi mubatyijibwe? Shi i amo, nabya walombwele ku meso a bantu amba udi na lwitabijo mudi Yehova ne amba usakanga kumwingidila pamo na bulongolodi bwandi. * Bine, lwitabijo lobe mudi Yehova lufwaninwe kukomena’ko. Kadi ufwaninwe kuningija nyeke kikulupiji kyokulupile amba Yehova wingidijanga bulongolodi bwandi dyalelo.

2-3. Le Yehova wendejanga bulongolodi bwandi dyalelo namani? Leta bimfwa.

² Dyalelo, ngikadila, mpango ne misoñanya ya Yehova bimwekelanga mu muswelo waendeja bulongolodi bwandi. Pano twisambilei bidi pa ino ngikadila isatu ya Yehova imwekela ku bulongolodi bwandi.

³ Mibajinji, “Leza kadipo na mboloji.” (Bil. 10:34) Buswe bwa Yehova bwāmutonwene apāne wandi Mwana bu ‘kinkūlwa kya bonso.’ (1 Tm. 2:6; Yoa. 3:16) Yehova wingidijanga bantu bandi basapwile bantu bonso bateja myanda miyampe, kadi mu uno muswelo, bakwashanga bantu bavule bamwene mu kinkūlwa. Ya bubidi, Yehova i Leza wa ndudi ne ndoe. (1 Ko. 14:33, 40) O mwanda tufwaninwe kukulupila’mba batōtyi bandi bakamwingidila mu ndudi ne mu ndoe. Ya busatu, Yehova i ‘Mufundiji Mukatakata.’ (Isa. 30:20, 21) O mwanda bulongolodi bwandi butele mutyima ku kufundija Kinenwa kyandi kya ku bukomo bwa mushipiditu, mu kipwilo ne mu  mwingilo wa busapudi. Le ino ngikadila isatu ya Yehova yāmwekele namani mu kipwilo kibajinji kya bwine Kidishitu? Le imwekanga namani mu ano etu mafuku? Ne mushipiditu ujila, ubwanya kukukwasha namani poingidila pamo na bulongolodi bwa Yehova dyalelo?

4. Monka mokilombwedilwe mu Bilongwa 1:8, le Yesu wāsoñenye balondi bandi balonge bika, ne bādi ba kukwashibwa na bika?

⁴ Mu myaka katwa kabajinji. Musapu wādi usapula Yesu wāpele bantu bonso lukulupilo. (Luka 4:43) Wāsoñenye balondi bandi bendelele kwingila mwingilo waāshilwile, wa kusapula “ne kulakula kwine kwa ntanda.” (Tanga Bilongwa 1:8.) Na bubine, kebādipo babwanya kwingila uno mwingilo na bukomo bwa abo bene. Bādi basakilwa mushipiditu ujila​—“mukwashi” wēbalaile Yesu.​—Yoa. 14:26; Zek. 4:6.

5-6. Le mushipiditu ujila wākweshe balondi ba Yesu muswelo’ka?

⁵ Balondi ba Yesu bātambwile mushipiditu ujila mu Pentekosa 33 Yesu Ke Mwiye. Na bukwashi bwa uno mushipiditu, bāshilula kusapula kiponka na ponka, kadi mu kitatyi’tu kityetye, bantu tununu ne tununu bāitabija myanda miyampe. (Bil. 2:41; 4:4) Mu kitatyi kya kupangwapangwa, bana ba bwanga kēbaivwenepo moyo, ino bālomba Leza ebakwashe. Bālombele amba: “Kwasha bapika bobe besambe’nka kwisamba mwanda obe pampikwa moyo.” Ebiya bayulwa mushipiditu ujila, “kebesambe mwanda wa Leza pampikwa moyo.”​—Bil. 4:18-20, 29, 31.

⁶ Bana ba bwanga ba Yesu bātenwe ne na makambakano makwabo. Kimfwa, mikanda ya Bisonekwa yādi mityetye. Kebādipo na mabuku a kwifunda na otudi nao dyalelo. Kadi bana ba bwanga bānenwe kusapwila bantu besamba ndimi mivule mishileshile. Nansha byokwādi ano makambakano onso’a, bano bana ba bwanga bapyasakane bālongele bintu byādi bimweka bu kebibwanikapo​—kadi mu makumi a myaka mityetye’tu, bāsapula myanda miyampe “mu bipangwa byonso bidi munshi mwa diulu.”​—Kol. 1:6, 23.

7. Myaka 100 ne kupita kunyuma, le bengidi ba Yehova bayukile namani byobya byadi bibasakila Leza, ne balongele’po namani?

⁷ Mu ano etu mafuku. Yehova ukyendeja bantu bandi ne kwibapa bukomo. Na bubine, wibendejanga kupityila ku Kinenwa kya ku bukomo bwa mushipiditu wandi. Mudi myanda itala mwingilo wa Yesu ne musoñanya waāsoñenye balondi bandi bendelele kwingila mwingilo waāshilwile. (Mat. 28:19, 20) Mu Kweji 7, 1881, dipepala dimo dyadi na bubinga bwa kunenena’mba: Ketwaityilwepo nansha kushingwa māni mwanda wa kupebwa ntumbo ne kungwija bupeta, ino i kujimija ne kujimina, ne kusapula myanda miyampe.” Kabuku kalupwilwe mu 1919 kadi na mutwe wa mwanda unena’mba, Bantu Bapelwe Mwingilo (Angele) kanenene amba: “Mwingilo umweka bu mukatampe bininge, ino tukengila’o mwanda wa Mfumwetu kadi ku bukomo bwandi.” Bine, pamo bwa bene Kidishitu babajinji, bano banabetu baingile bininge mwingilo na bukankamane koku bakulupile amba mushipiditu ujila ukebakwasha basapwile bantu ba miswelo yonso. Netu tukulupile uno muswelo ne dyalelo.

8-9. Le bulongolodi bwa Yehova bwingidijanga manwa’ka mwanda wa kusambakanya myanda miyampe?

⁸ Bulongolodi bwa Yehova bwingidijanga bingidilwa biyampe byobudi nabyo mwanda wa kusambakanya myanda miyampe. Mu bino bingidilwa mubadilwa, mabuku matampe, “Foto Drame ya Bupangi,” mafono, myotoka ya malansevwa, mīsambo ya ku ladiyo, ne bya busendwe bya panopano.  Kadi pano po pene, bulongolodi bwa Leza bwalamunanga mabuku mu ndimi mivule! Mwanda waka? Mwanda wa bantu ba miswelo yonso bevwane myanda miyampe mu lwabo ludimi. Yehova kadipo na mboloji; wālaile amba myanda miyampe ikasapulwa ku “mizo yonso ne bisaka ne ndimi ne bantu.” (Kus. 14:6, 7) Usakanga bantu bonso bevwane musapu wa Bulopwe.

⁹ Le boba boketubwanyapo kusapwila, padi pa mwanda wa kushikata kobashikete mu mobo alamwa nabo le? Pa mwanda wa kusapwila bano bantu, bulongolodi bwa Yehova bwashilwile kwingidija misapwilo mishileshile ya mu bantu bavule. Kimfwa mu 2001, Kitango Kyendeji kyaitabije bengidije tumatempa twa mabuku nansha miswelo mikwabo ya kutūla mabuku mu Franse, kupwa mwenda mafuku banabetu ba mu bifuko bikwabo nabo bashilula kusapula uno muswelo. Kwalupukile bipa biyampe. Mu 2011, bashilula uno muswelo mupya wa mwa kusapwila mu États-Unis mu bifuko bya bantu bavule bya mu New York City. Mu mwaka’tu mubajinji, bapele bantu mabuku 102 129 ne mapepala 68 911. Kadi bantu 4 701 balomba kwifunda Bible! Bine, mushipiditu ujila wakweshe pa kwingila uno mwingilo. O mwanda Kitango Kyendeji kyaitabije kwingidija tumatempa ne miswelo mikwabo ya kutūla mabuku kujokoloka ntanda yonso.

10. Le i bika byotubwanya kulonga pa kulumbulula mwingilo wetu?

¹⁰ Byobwanya kulonga. Mwena ne pa mfulo mu bufundiji buleta Yehova ku kupwila. Sapula kitatyi ne kitatyi pamo na kisumpi kyenu kya busapudi. Batutu ne bakaka ba mu kisumpi bakakukwasha usapule ne kufundija biyampe, kadi kimfwa kiyampe kya bakwenu kikakukankamika. Endelela kusapula. Monka mwituvulwija’kyo kisonekwa kimanine’po mutwe wa mwanda, ketuloñangapo kiswa-mutyima kya Leza na bukomo bwa batwe bene, ino i kupityila ku mushipiditu ujila. (Zek. 4:6) Ne kadi bidi, twingilanga mwingilo wa Leza.

11. Le kitango kyendeji kya mu myaka katwa kabajinji kyāingile mu bumo namani mwanda wa kwikale nyeke ndudi mu bantu ba Leza?

¹¹ Mu myaka katwa kabajinji. Kitango kyendeji kya mu Yelusalema kyādi kingila mu  bumo mwanda wa kwikale nyeke ndudi ne ndoe mu bantu ba Leza. (Bil. 2:42) Kimfwa, mwanda wa disao powākomene dya mu mwaka wa 49 Yesu Ke Mwiye, kitango kyendeji kyēsambīle pa uno mwanda na buludiki bwa mushipiditu ujila. Shi kipwilo kyeābenye pa uno mwanda, longa kebābwenyepo kusapula biyampe. Nansha byobādi Bayuda, batumibwa ne bakulumpe kebālondelepo bisela bya Bayuda nansha bufundiji bwabo. Ino bātangile Kinenwa kya Leza ne kulomba mushipiditu wibaludike. (Bil. 15:1, 2, 5-20, 28) Byāfula namani? Yehova wāesela butyibi bwabo, kipwilo kyāikala mu ndoe ne mu bumo, kadi mwingilo wa busapudi wāendelela kumeso.​—Bil. 15:30, 31; 16:4, 5.

12. Le i bika bilombola’mba dyalelo mu bulongolodi bwa Yehova mudi ndudi ne ndoe?

¹² Mu ano etu mafuku. Bulongolodi bwa Yehova buloñanga bukomo amba ndudi ne ndoe bikale nyeke mu bantu ba Yehova. Mu 1895, Kiteba kya Mulami kya Ziona ne dipepala Messager de la Présence de Christ dya mafuku 15 Kweji 11, mwadi kishinte kinena’mba “Avec bienséance et ordre” kimanine pa kisonekwa kya 1 Bene Kodinda 14:40. Kino kishinte kyadi kinena’mba: “Batumibwa bāsapwidile kipwilo kibajinji bintu bivule pa mwanda utala ndudi . . . I biyampe kwivwana nyeke na katentekeji bintu ‘byālembelwe pa kala . . . mwanda wa kwitufundija.’” (Loma 15:4) Bine, ndudi ne ndoe yādi mu bene Kidishitu babajinji, idi ne mu bulongolodi bwa Yehova dyalelo. Tulete kimfwa: Shi wadi wa kukatanwa ku Kifundwa kya Kiteba kya Mulami mu kipwilo kikwabo nansha mu ntanda ingi​—wadi kala wa kuyuka muswelo obakendeja kifundwa ne kishinte kine kya kukefunda. Bine, ukeivwana’nka na abe udi kwenu! Mwene i enka mushipiditu wa Leza kete ubwanya kuleta buno bumo?​—Zef. 3:9, kunshi kwa dyani.

13. Le kisonekwa kya Yakoba 3:17 kitulengeja twiipangule bipangujo’ka?

¹³ Byobwanya kulonga. Yehova usakanga bantu bandi balame “bumo bwa mushipiditu mu kijimba kya ndoe kilungila pamo.” (Ef. 4:1-3) Nanshi wiipangule amba: ‘Le ndetanga bumo ne ndoe mu kipwilo? Le nkōkele boba batangidile? Le bakwetu babwanya kunkulupila, nakampata shi ngidi na biselwa mu kipwilo? Le mfikanga pa  kitatyi, na mutyima wa kukwasha ne kwingila?’ (Tanga Yakoba 3:17.) Shi ubamone amba kudi posakilwa kwilemununa, lomba mushipiditu ujila. Shi wiuleke ulumbulule ngikadila yobe kadi ukuludike mu byolonga, batutu ne bakaka bakakusanswa ne kukumona’mba udi na mvubu.

14. Mungya Bene Kolose 1:9, 10, le Yehova wāfundije bantu bandi ba mu myaka katwa kabajinji namani?

¹⁴ Mu myaka katwa kabajinji. Yehova usangedile kufundija bantu bandi. (Ñim. 32:8) Usakanga bamuyuke, bamusanswe, kadi bekale’ko nyeke bu bandi bana baswedibwe. Bino kebyadipo bya kubwanika shi kadipo witufundija. (Yoa. 17:3) Yehova wāfundije bantu bandi kupityila ku kipwilo kya bwine Kidishitu kya mu myaka katwa kabajinji. (Tanga Bene Kolose 1:9, 10.) Mushipiditu ujila​—“mukwashi” wālaile Yesu, wāingile mwingilo mukatampe. (Yoa. 14:16) Wāpele bana ba bwanga bujinguludi bwa Kinenwa kya Leza, ne kwibavuluja bintu bivule byānenene Yesu, byaālongele, kupwa byālembwa mwenda mafuku mu Maevanjile. Buno buyuki bwāningije lwitabijo lwa bene Kidishitu babajinji ne kuvudija buswe bobādi basenswe Leza, wandi Mwana ne abo bene na bene.

15. Le i muswelo’ka omonanga Yehova ufikidija mulao wandi udi mu Isaya 2:2, 3?

¹⁵ Mu ano etu mafuku. Yehova wālaile amba, “ku mfulo ya mafuku,” bantu ba mizo yonso bakatūtyikila ku lūlu lwandi lwa kyelekejo mwanda wa kufundijibwa mashinda andi. (Tanga Isaya 2:2, 3.) Tumonanga buno bupolofeto bufikidila. Mutōtelo wa bine i muzunzulwe pangala pa mitōtelo yonso ya disubi. Bine, Yehova i musobele bantu bandi masobo a ku mushipiditu! (Isa. 25:6) Kupityila kudi “umpika mukōkele ne mudyumuke,” witupanga byakudya bivule kadi bya miswelo mishileshile mu  bishinte, mīsambo, bifwatulo bijina ne mavideo. (Mat. 24:45) Twiivwananga na mwēivwanine Edihu mulunda na Yoba, wānenene amba: “Le i mufundiji’ka udi pamo bwa [Leza]?”​—Yoba 36:22.

16. Le i bika byobwanya kulonga pa kumwena mu bufundiji bwa Yehova?

¹⁶ Byobwanya kulonga. Mushipiditu wa Leza ukakukwasha wingidije biyampe byobya byotanga ne byowifunda mu Kinenwa kya Leza. Lombela na mwālombedile mulembi wa Mitōto amba: “A Yehova, mfundije dishinda dyobe. Nkendanga mu bubine bobe. Kutyila mutyima wami mu bumo amba ntyine dijina dyobe.” (Ñim. 86:11) Nanshi endelela na kumwena mu bidibwa bya ku mushipiditu bileta Yehova kupityila ku Kinenwa kyandi ne ku bulongolodi bwandi. Na bubine, kitungo kyobe ke kya kwikalapo na buyuki bitupu. Ino ufwaninwe kutweja bubine mu mutyima obe, ne kwibwingidija mu būmi bobe. Mushipiditu wa Yehova ukakukwasha ulonge namino. Kadi ufwaninwe kukankamika batutu ne bakaka. (Bah. 10:24, 25) Mwanda waka? Mwanda i kisaka kyobe kya ku mushipiditu. Lomba mushipiditu wa Leza ukukwashe ulondolole biyampe ku kupwila kadi ulonge bukomo kitatyi kyodi na kipindi ku mpangiko. Mu uno muswelo, ukalombola Yehova ne wandi Mwana amba usenswe “mikōko” yabo milēme.​—Yoa. 21:15-17.

17. Le i muswelo’ka okalombola’mba ukwatakenye na kikōkeji bulongolodi bwa Yehova?

¹⁷ Panopano ponka, bulongolodi bumo kete busa kushala pano pa ntanda i bulongolodi buludikwa na mushipiditu wa Leza. Nanshi ingidila pamo na bulongolodi bwa Yehova na bupyasakane. Sapwila bantu bonso botana myanda miyampe, ulombole amba usenswe bantu na mwibasanshilwe Leza. Iula buswe bwaswele ndudi ne ndoe na kuleta bumo mu kipwilo. Kadi teja Mufundiji obe Mukatakata na kumwena ne pa mfulo mu masobo a ku mushipiditu asoba. Nabya, pano penda pafwena ntanda ya Satana ku mfulo, abe kukekalapo na moyo. Ino ukemanija nshinkidingi mu bantu bengila na kikōkeji pamo na bulongolodi bwa Yehova.