Le Wadi Uyukile?
Le minjiki yādi na mvubu’ka mu Isalela wa kala?
MINJIKI yādi na mvubu mikatampe mu Isalela wa kala. Divule Bible utela bantu bādi bomba minjiki ne kwiimba. Kadi mu Bible kintu kya mikanda dikumi i ñimbo. Kimfwa, Ñimbo ya Mitōto, Lwimbo lwa Ñimbo, ne Madilo. O mwanda dibuku Minjiki mu Kitatyi Kyālembelwe Bible dya mu Angele dinena’mba, Bible “ulombola’mba bene Isalela bādi bengidija minjiki mu mingilo mivule ya mu būmi bwabo.”
Minjiki mu būmi bwa difuku ne difuku. Bene Isalela bādi bomba minjiki mwanda wa kulombola malango abo. (Isa. 30:29) Bana-bakaji bādi bomba maoma, bemba ñimbo na nsangaji, ne kuja mu kitatyi kya masobo pamo bwa kubikikwa kwa mulopwe mupya, kitatyi kijoka basola banekenye ku bulwi, ne kitatyi kya masobo a mu butōtyi. (Bat. 11:34; 1 Sa. 18:6, 7; 1 Ba. 1:39, 40) Kadi bene Isalela bādi bemba ñimbo mwanda wa kulombola bulanda kitatyi kifwa muntu. (2 Bi. 35:25) O mwanda Cyclopedia ya McClintock ne Strong inena’mba “i kimweke patōka’mba bene Isalela bādi basenswe bininge minjiki.”
Minjiki mu kipango kya bulopwe. Balopwe ba Isalela bādi basenswe minjiki. Mulopwe Solo wāityile Davida mu kipango kyandi kya bulopwe mwanda wa kumombela minjiki. (1 Sa. 16:18, 23) Mwenda mafuku pābikele Davida bu mulopwe, wāpungile’ko byombanwa bya minjiki, wābunda’ko ñimbo miyampe, ne kuteakanya’ko bisumpi bya batuimba ba kwimba ku tempelo ya Yehova. (2 Bi. 7:6; Amo. 6:5) Mulopwe Solomone wādi na batuimba bana-balume ne bana-bakaji mu kipango kyandi.—Mus. 2:8.
Minjiki mu butōtyi. Kya mvubu kutabuka, bene Isalela bādi bengidija minjiki mu butōtyi bobādi batōta Yehova. Kadi bana-balume 4000 bādi bomba byombanwa bya minjiki ku tempelo mu Yelusalema. (1 Bi. 23:5) Bādi bomba membo, byombanwa bya myonji, nsense, ne bimpungidi. (2 Bi. 5:12) Inoko ke enkapo bano batuimba ba bwino bādi batōta Yehova na minjiki. Na bubine bene Isalela bavule bādi bemba Ñimbo ya Kukanda Nayo pobādi benda ku masobo a pa mwaka mu Yelusalema. (Ñim. 120–134) Kadi mungya bilembwa bya Bayuda, bene Isalela bādi bemba Ñimbo ya Mitōto ya Halele a pa bidibwa bya Pashika.
Enka ne pano minjiki i ya mvubu mpata mu bantu ba Yehova. (Yak. 5:13) Twimbilanga Yehova ñimbo mwanda wa kumutendela. (Ef. 5:19) Ñimbo itulungilanga mu bumo na banabetu bene Kidishitu. (Kol. 3:16) Kadi itukomejanga kitatyi kyotwikonda na makambakano. (Bil. 16:25) Bine, minjiki i muswelo mulumbuluke wa kulombola lwitabijo lwetu mudi Yehova ne buswe botumusenswe.
a Bene Isalela batela Ñimbo ya Mitōto 113 kutūla ku 118 bu Ñimbo ya Mitōto ya Halele, mine yobādi bemba mwanda wa kutendela Yehova.
