1, 2. (a) Lelo i mpalo’ka itengēle bengidi ba Leza? (b) I bika bitukwasha tubambile nyeke meso ku mpalo? (Tala kifwatulo ku ngalwilo.)

BENE Kidishitu bashingwe māni badi na lukulupilo lulēme. Batengele kukekala mūlu. Mutumibwa Polo wātelele luno lukulupilo bu “mpalo ya lwito lwa mūlu” lwibetyile Leza. (Fidipai 3:14) Bakaludikanga mūlu na Yesu Kidishitu mu Bulopwe bwandi ne kwingila nandi pamo mwanda wa kukwasha bantu bafikile ku bubwaninine. (Kusokwelwa 20:6) Bine luno i lukulupilo lwa kutendelwa! Mikōko mikwabo itengēle mpalo mishile na ino. Bakulupile kukekala nyeke mu Paladisa pano pa ntanda, kadi luno lukulupilo lwibaletelanga nsangaji ya bine!​—2 Petelo 3:13.

² Polo wāsakile kukwasha banababo bene Kidishitu bashingwe māni bekale nyeke na kikōkeji ne kutambula mpalo. Wēbasapwidile amba: “Tai nyeke mityima ku bintu bya kokwa kūlu.” (Kolose 3:2) Bādi basakilwa kuta mutyima ku lukulupilo lwabo lulēme lwa momwa mūlu. (Kolose 1:4, 5) Kulangulukila pa madyese a Yehova kukwashanga bengidi bonso ba Leza  babambile nyeke meso ku mpalo. Ekale boba badi na lukulupilo lwa kwenda mūlu nansha ke boba badi na lukulupilo lwa kwikala pano pa ntanda.​—1 Kodinda 9:24.

3. Lelo Polo wādyumwine bene Kidishitu ku bika?

³ Kadi Polo wādyumwine bene Kidishitu ku byaka byādi bibwanya kwibabudija mpalo. Kimfwa, wālembēle bene Kolose myanda itala bene Kidishitu ba bubela, bene bādi bemona bu basangajanga Leza na kulonda Bijila bya Mosesa pa kyaba kya kwitabija mudi Kidishitu. (Kolose 2:16-18) Polo wēsambīle ne pa byaka bidi’ko dyalelo bibwanya netu kwitubudija mpalo. Wāshintulwile muswelo wa kukomena bilokoloko bya busekese ne bintu byotubwanya kulonga shi kubalupuka makambakano mu kisaka nansha shi tubepi myanda na banabetu mu kipwilo. Ano madingi mayampe a Polo abwanya kwitukwasha netu dyalelo. Shi ke pano tubandaulei’ko bidyumu bimobimo bya buswe bitanwa mu mukanda wandi ku bene Kolose.

4. Mwanda waka bilokoloko bya busekese bibwanya kuketubudija mpalo?

⁴ Polo pa kupwa kuvuluja banababo myanda itala lukulupilo lwabo lwa kutendelwa, wālembele amba: “Nanshi, ipayai bya ku ngitu byenu bidi pano panshi mu myanda ya busekese, disubi, bilokoloko bya busekese, kusakasaka kubi, ne makomwa-meso.” (Kolose 3:5) Bilokoloko bya busekese bibwanya kwitutādila bininge ne kwitujimijija kipwano kyetu na Yehova ne lukulupilo lwetu lwa mu mafuku āya kumeso. Tutu umo wetumpile mu busekese ne kwalujibwa mu kipwilo mwenda mafuku, unena’mba bilokoloko byandi byatamine bininge “pa kyaba kya kwibikomena pobyadi bikishilula.”

5. I muswelo’ka otubwanya kwikinga ku ngikadilo ileta kyaka?

⁵ Tufwaninwe kutadija nakampata potudi mu ngikadilo ibwanya kwitulengeja tuleke kukōkela misoñanya ya Yehova ya mu mwikadilo. Kimfwa, i kya tunangu ku bantu basaka kwisonga betūdile’ko mikalo tamba ku ngalwilo pa myanda itala kwikaila pa ngitu, kwififya, ne kwitolwela kwa bubidi bwabo. (Nkindi 22:3) Tubwanya kutanwa na byaka bikwabo potudi mu ñendo ya bya busunga nansha potwingila na muntu wa ngitu ingi. (Nkindi 2:10-12, 16) Le i bika byobwanya kulonga pa kwikinga? Wiyukanye amba wi Kamoni wa Yehova. Ikala na mwiendelejo muyampe, kadi kokelwa’mba kwiselembeja kutwalanga ku musala. Kadi tufwaninwe kutadija ne kitatyi kyotudi na njia nansha kyotwimona bu tudi bunka. Tubwanya kwabila muntu wa kwitulengeja twimone amba betusenswe. Tubwanya kutyumukwa mutyima bininge, twafula’nka ne kukwitabija kutebwa mutyima na muntu ye-yense. Kino i kyaka. Shi wiivwananga uno muswelo, nabya kokalonga kintu nansha kimo kibwanya kukubudija mpalo. Lomba bukwashi kudi Yehova ne ku batutu ne bakaka.​—Tanga Ñimbo ya Mitōto 34:18; Nkindi 13:20.

6. I bika byotufwaninwe kuvuluka potutonga kwipwija mukose?

⁶ Pa kwipaya bilokoloko bya busekese, tufwaninwe kupela kwipwija mukose kubi. Kwipwija mukose kuvule kudi’ko dyalelo kwituvulujanga bintu byādi bilongeka mu Sodoma ne Ngomola. (Yude 7) Bantu bapunga bya kwipwija nabyo mukose bamwekejanga busekese bu i bwendele’mo. O mwanda tufwaninwe nyeke kwikala badyumuke. Ketufwaninwepo’tu kwitabija kwipwija mukose ko-konso kwa mu ino ntanda. Ino, tufwaninwe kutonga kwipwija mukose kekuketubudijapo mpalo ya būmi.​—Nkindi 4:23.

7. I myanda’ka ibwanya kulupuka mu kipwilo kya bwine Kidishitu?

⁷ Tudi na nsangaji pa kubadilwa mu kipwilo kya bwine Kidishitu. Twifundanga Kinenwa kya Leza ku kupwila, ne kwikwatakanya na buswe batwe bene na bene. Kino kitukwashanga tubambile nyeke meso ku mpalo. Inoko kyaba kimo kubulwa kumvwañana kubwanya kulengeja twipye myanda na batutu ne bakaka. Shi tuleke kupwija myanda’ya, ibwanya kwitulengeja twikale na kiji.​—Tanga 1 Petelo 3:8, 9.

8, 9. (a) I ngikadila’ka itukwasha tukatambule mpalo? (b) I bika bibwanya kwitukwasha tulame ndoe shi mwanetu mwine Kidishitu wetusanshija?

⁸ Ketufwaninwepo kuleka nansha dimo kiji kitubudije mpalo. Polo wālombwele byobya bifwaninwe kulonga bene Kidishitu amba: “Byomudi batongwe ba Leza, bajila kadi baswedibwe, vwalai kisanso kya mutyima wa lusalusa, kanye, kwityepeja, kutalala, ne kitūkijetyima. Endelelai kwitūkijija mityima banwe bene na bene ne kwilekela na mutyima umo nansha shi kudi udi na mwanda na mukwabo. Monka mwemulekēle Yehova na mutyima umo, nenu mufwaninwe kulongela monka. Ino, kutentekela pa bino byonso’bi, vwalai buswe, mwanda abo i kijimba kibwaninine kya bumo.”​—Kolose 3:12-14.

⁹ Buswe ne kanye bibwanya kwitukwasha tulekele bakwetu. Shi abetunena nansha kwitulonga bintu bisansa, nabya tufwaninwe kuvuluka misunsa yetulekele bakwetu potwebanenene nansha kwibalonga bintu bibafītyija mutyima. Bine twafwijije’ko pa buswe ne kanye byobalombwele kotudi! (Tanga Musapudi 7:21, 22.) Kadi tufwijanga’ko pa muswelo ulungile Kidishitu na kanye batōtyi ba bine. (Kolose 3:15) Batwe bonso tusenswe Leza umo, tusapula musapu umo, ne kwikonda na makambakano mavule a muswelo umo. Shi tudi na kanye ne buswe ne kwilekela batwe bene na bene, nabya kipwilo kikekala bininge mu bumo ne kino kiketukwasha tubambile meso ku mpalo.

10, 11. (a) Mwanda waka mukao uletanga kyaka? (b) I bika byotubwanya kulonga pa kusaka’mba mukao uleke kuketubudija mpalo?

¹⁰ Mukao ubwanya kuketubudija mpalo. Bimfwa bya mu Bible bilombola byaka bidi mu kwikala na mukao. Kimfwa, Kaini wākwatyilwe Abele mukao, kupwa wāmwipaya. Kola, Datani, ne Abilama bākwatyilwe Mosesa mukao ne kumutombokela. Mulopwe Solo nandi wākwatyilwe Davida mukao, kakimbe kumwipaya. Byobya binena Kinenwa kya Leza i bya bine, amba: “Kokwa konso kudi mukao ne lupotopoto, ko kudi ne kavutakanya ne bintu byonso bibibibi.”​—Yakoba 3:16.

¹¹ Shi tulonga bukomo bwa kwikala na buswe bwa binebine ne kanye, nabya ketukekalapo na mukao. Kinenwa kya Leza kinena’mba: “Buswe budi na kitūkijetyima ne kanye. Buswe kebudipo na mukao.” (1 Kodinda 13:4) Pa kukomena mukao uleke kwitutādila, tufwaninwe kulonga bukomo bwa kumona bintu na mwibimwena Yehova. Tufwaninwe kumona batutu ne bakaka pamo bwa bipindi bya ku umbidi umo onka, ke kipwilo kadi. Bible unena’mba: “Shi kya ku ngitu kimo kitumbijibwe ntumbo, bya ku ngitu byonso bisangalanga pamo nakyo.” (1 Kodinda 12:16-18, 26) Shi mwanetu walongelwa kintu kiyampe, nabya tukasangala nandi pamo, ino kwampikwa kumukwatyilwa mukao. Langulukila pa kimfwa kiyampe kya Yonafane mwanā Mulopwe Solo. Yonafane kākwetwepo mukao pātongelwe Davida kwikala bu mulopwe pa kyaba kya aye. Wākankamikile’nka ne Davida ne kumukwatakanya. (1 Samwele 23:16-18) Lelo ubulwe’po kwikala na buswe ne kanye pamo bwa Yonafane?

12. I madingi’ka a mu Bible akakwasha kisaka kyonso kituntulu kikatambule mpalo?

¹² Shi umo ne umo wa mu kisaka wingidija misoñanya ya mu Bible, nabya kisaka kyetu kikekala na ndoe ne nsangaji, kadi kikatambula mpalo. Polo wāpele bisaka ano madingi a tunangu amba: “Banwe bakaji, kōkelai bininge balume benu, monka mokifwaninwe mudi Mfumwetu. Banwe balume, sanswai nyeke bakaji benu kadi kemwakibalobelai bulobo bulula bululu. Banwe bana, kōkelai bambutwile benu mu byonso, mwanda kino’ki kisangajanga Mfumwetu. Banwe bashabo, kemwakikolomonai benu bana, kutyina’mba bakanyoñama pa mityima.” (Kolose 3:18-21) Le ubamone muswelo ubwanya ano madingi kukwasha kyobe kisaka?

13. Le kaka mwine Kidishitu ubwanya kukwasha namani wandi mulume wampikwa kwitabija ekale na mutyima wa kwingidila Yehova?

¹³ Padi wi kaka udi na mulume kengidilangapo Yehova. Le ukalonga namani shi ubamone amba kakikwendejangapo mobifwaninwe? Padi ubwanya kukalabala ne kwipotomeja nandi, ino le kulonga uno muswelo kukalumbulula myanda? Nansha shi ubamutādila pomwipotomeja, le ukamulengeja ekale na mutyima wa kwingidila Yehova? Nansha dimo. Inoko shi umulēmekele bu mutwe wa kisaka, nabya ubwanya kukwasha kisaka kyobe kikale na ndoe mivule ne kino kikatumbija Yehova. Kyobe kimfwa kiyampe kibwanya’nka  ne kulengeja obe mulume ekale na mutyima wa kwingidila Yehova, penepa banwe bonso bubidi mukatambula mpalo.​—Tanga 1 Petelo 3:1, 2.

14. Lelo mulume mwine Kidishitu ufwaninwe kulonga bika shi wandi mukaji wampikwa kwitabija kamulēmekelepo?

¹⁴ Pakwabo napo wi tutu udi na mukaji kengidilangapo Yehova. Le i bika byobwanya kulonga shi umona’mba kakulēmekelepo? Shi umufunina na kwimwekeja’mba abe ye mutwe, le ukakulēmeka? Nansha dimo! Leza ukusakilanga wikale mulume wa buswe wiula Yesu. (Efisesa 5:23) Yesu, mutwe wa kipwilo, udi nyeke na kitūkijetyima ne buswe. (Luka 9:46-48) Shi wiula Yesu, mwenda mafuku obe mukaji ubwanya kwikala na mutyima wa kwingidila Yehova.

15. Le mulume mwine Kidishitu ukalombola namani amba usenswe wandi mukaji?

¹⁵ Yehova udingila balume amba: “Sanswai nyeke bakaji benu kadi kemwakibalobelai bulobo bulula bululu.” (Kolose 3:19) Mulume wa buswe ulēmekanga wandi mukaji. Muswelo’ka? Wivwananga milangwe yandi ne kumulengeja amone amba ukwete na mvubu byanena’bya. (1 Petelo 3:7) Nansha mulume byakabwanyapo nyeke kulonga byonso bimulomba wandi mukaji, kuteja mukaji kubwanya kumukwasha akwate butyibi buyampe. (Nkindi 15:22) Mulume wa buswe kaningilangapo wandi mukaji amulēmeke. Inoko, umulengejanga aye mwine amulēmeke. Shi mulume usenswe wandi mukaji ne bana, nabya bakekala na nsangaji pobengidila Yehova, kadi bakatambula mpalo ya būmi.

16, 17. A bankasampe, i muswelo’ka omukepuka kukalela bambutwile benu?

¹⁶ Padi wi nkasampe, ne umona’mba bambutwile bobe kebakwivwanangapo, nansha’mba badi na lupusa bininge podi. Kino kibwanya kukulobeja bininge, wafula’nka ne kulanga ya kuleka’byo kwingidila Yehova. Inoko shi uleke kwingidila Yehova, kukatanapo muntu nansha umo mu ino ntanda ukusenswe bininge pamo bwa bambutwile bobe bene Kidishitu ne balunda nobe mu kipwilo.

¹⁷ Langulukila pa kino: Shi bambutwile bobe kebadipo bakulemununa, le wadi wa kuyuka namani amba bakutele mutyima bya binebine? (Bahebelu 12:8) Na bubine, byobadi bampikwa kubwaninina, o mwanda kyaba kimo muswelo obakulemununa ubwanya kukulobeja. Inoko kokata mutyima pa kino. Longa bukomo bwa kwivwanija kine kyobanenena ne kulonga nabya. Uba talala, kadi kokakimba kwibingija. Kinenwa kya Leza kinena’mba: “Yewa utyepeja binenwa byandi udi ne kuyukidija: Kadi yewa utalaja wandi mushipiditu i muntu wa kwivwanija.” (Nkindi 17:27) Witungile kitungo kya kwikala muntu mutame mu ñeni, witabija madingi ne kuboila’ko ñeni nansha shi i maletwe muswelo’ka. (Nkindi 1:8) Vuluka nyeke amba kwikala na bambutwile basenswe Yehova i kyabuntu kilēme mpata. Basakanga kukukwasha mwanda wa ukamone būmi bwa nyeke.

18. Mwanda waka wi musumininwe kubambila meso ku mpalo?

¹⁸ Ekale tudi na lukulupilo lwa būmi bwa nyeke momwa mūlu nansha mu paladisa pano pa ntanda, batwe bonso tutengele bintu bya kutendelwa mu mafuku āya kumeso. Lukulupilo lwetu i lwa bine. Lwimanine pa milao ya Umpangi wa diulu ne ntanda, mwine unena’mba: “Panopanshi pakayula ne kuyukidija kwa Leza.” (Isaya 11:9) Panopano ponka muntu ense pano pa ntanda ukafundijibwa na Leza. Bine ino i mpalo ya kutendelwa yotufwaninwe kukankamena. Shi ke pano vuluka nyeke milao ikulaile Yehova, kadi kokaleka kintu nansha kimo kikubudije mpalo!