TAMBA kala bitapwa bidi na mvubu mu mutōtelo wa bine. Bene Isalela bādi balambula bitapwa bya banyema, bene Kidishitu nabo balambulanga nyeke “kitapwa kya mitendelo.” Inoko, kudi bitapwa bikwabo bisangajanga Leza. (Bahebelu 13:15, 16) Bino bitapwa bituletelanga nsangaji ne madyese’nka na mwikilombwela bimfwa bilonda’ko’bi.

Hana, mwingidi wa kikōkeji wa kala, wādi wabila kwikala na mwana, inoko wādi ñumba. Wāpikile mpiko kudi Yehova mu milombelo yandi amba shi abutule mwana, nabya ukamupāna “kudi Yehova mafuku onsololo a bumi bwandi.” (1 Samwele 1:10, 11) Kitatyi pa kupita’po, Hana wāimita ne kubutula mwana mwana-mulume, wāmwinika bu Samwele. Samwele pa kulekeshibwa, Hana wākamutwala ku kipema, enka na mwaāpikile mpiko yandi. Yehova wāesele Hana pa mwanda wa mutyima wandi wa kwipāna. Wāikele na dyese dya kubutula bana bakwabo batano, kadi Samwele wāikele bu mupolofeto ne mulembi wa Bible.​—1 Samwele 2:21.

Pamo bwa ba Hana ne Samwele, bene Kidishitu dyalelo badi na dyese dya kwipāna mu mwingilo wa Umpangi wabo. Yesu wālaile amba kitapwa kyonso kyotulambula mwanda wa kutōta Yehova, kiketupadilwa mpalo mivule.​—Mako 10:28-30.

Mu myaka katwa kabajinji, mwana-mukaji umo mwine Kidishitu witwa bu Dokasa wādi muyukane mwanda wa “bilongwa biyampe bivule ne kupāna byabuntu bingi bya ku lusa”​—ko kunena’mba byabuntu byaādi ukwasha nabyo bantu bakwabo. Inoko yō, mwanda “wabelele wafwa,” ne kino kyāletēle kipwilo kyonso bulanda. Bana ba bwanga pa kwivwana’mba Petelo udi ku kibundi kya pabwipi, bākamwita āye bukidibukidi. Langa’po bidi mobāivwanine nsangaji pāile Petelo ne kusangula Dokasa​—aye ye muntu mubajinji kusangulwa na mutumibwa! (Bilongwa 9:36-41) Leza kāidilwepo byabuntu bya Dokasa. (Bahebelu 6:10) Nsekununi ya kimfwa kyandi kya buntu yālaminwe mu Kinenwa kya Leza bu kimfwa kiyampe kyotufwaninwe kwiula.

Mutumibwa Polo nandi wāshile kimfwa kiyampe kya kuta bantu mutyima ne kupāna kitatyi kyandi ku buntu bitupu. Aye pa kulembela banababo bene Kidishitu ba mu Kodinda, wānenene amba: “Amiwa’ko nsa kusangela mpata kupāna bintu byami ne kupānwa ami ense pa mwanda wa myuya yenu.” (2 Kodinda 12:15) Polo wāyukile kupityila ku byāemwenine amba kwipānina bantu bakwabo kekuletangapo’tu enka nsangaji kete​—ino kya mvubu nakampata—kuletanga madyese a Yehova ne kwitabijibwa nandi.​—Bilongwa 20:24, 35.

Bine, Yehova usangalanga shi twingidija kitatyi ne bukomo bwetu mwanda wa kwendeleja kumeso tumweno twa Bulopwe ne kukwasha banabetu. Ino le kudi miswelo mikwabo yotubwanya kukwatakanya’mo mwingilo wa busapudi bwa Bulopwe? En-en, idi’ko! Kutentekela pa mingilo yetu ya buswe, tubwanya kadi kutumbija Leza kupityila ku byabuntu byetu bya kwilanga. Bino byabuntu bingidijibwanga mwanda wa kukwatakanya mwingilo wa busapudi wa ntanda yonso, bamishonele ne bengidi bakwabo ba pa bula ba kitatyi kyonso. Kadi, kuteakanibwa ne kwalamunwa kwa mabuku ne mavideo, mwingilo wa kukwasha bantu baponenwa na bimpengele bya kipangila, ne lūbako lwa Mobo mapya a Bulopwe, bino byonso’bi bikwatakanibwanga na byabuntu byetu bya kwilanga. Tukulupilei amba “yewa udi ne dīso dya bu-kyababulāle ukeselwa.” Kadi, shi tupa Yehova bintu byetu bya bulēme, nabya tumutumbijanga.​—Nkindi 3:9; 22:9.