1-2. (a) Le i bika bitukwashanga tūminine difuku ne difuku? Shintulula. (b) Le i bika byotusa kwisambila’po mu kino kishinte?

“KITATYI kyonangulukilanga pa makambakano auntene, monanga’mba nkyaūminine’opo na bukomo bwa ami mwine.” Le nobe kodi munene bintu bya uno muswelo? Bavule motudi kebanene’byo. Padi wanenene bino bintu pa kupwa kulangulukila pa muswelo owabwenye kūminina misongo mikatampe nansha kufwilwa muntu osenswe. Kitatyi kyovuluka’o, umonanga’mba wabwenye kūminina difuku ne difuku mwanda mushipiditu ujila wa Yehova wakupele “bukomo butabukile bwikalanga na bantu.”​—2 Ko. 4:7-9.

² Kadi tusakilwa mushipiditu ujila pa kukomena lupusa lwa ino ntanda mibi. (1 Yo. 5:19) Ne kadi, tufwaninwe kulwa na “bibumbo bya mishipiditu mibi.” (Ef. 6:12) Pa kino, tusa kwisambila pa miswelo ibidi ibwanya kwitukwasha mushipiditu ujila. Kupwa tusa kwisambila ne pa byotubwanya kulonga pa kuludikwa ne pa mfulo na mushipiditu ujila.

3. Le i muswelo’ka umo witukwashanga Yehova tūminine makambakano?

³ Mushipiditu ujila wa Yehova witukwashanga na kwitupa bukomo bwa kuvuija mingilo yetu nansha shi tudi mu makambakano. Mutumibwa Polo wābwenye kwingidila nyeke Yehova nansha byaādi mu makambakano mwanda wādi ukulupile “bukomo bwa Kidishitu.” (2 Ko. 12:9) Mu lwendo lwandi lwa bubidi lwa bumishonele, Polo wāsapwile bininge koku wikwatakanya aye mwine. Wādi ushikete ku njibo ya ba Akwila ne Pishila mu Kodinda. Bādi basona mapema. Polo nandi byaādi uyukile kusona’o, wādi wingila nabo kitatyi kimokimo. (Bil. 18:1-4) Mushipiditu ujila wāpele Polo bukomo bwa kwingila kaji ka ku ngitu ne bwa kuvuija mwingilo wandi wa busapudi.

4. Mungya 2 Bene Kodinda 12:7b-9, le Polo wādi ulwa na makambakano’ka?

 ⁴ Tanga 2 Bene Kodinda 12:7b-9. Le i bika byādi bisaka kunena Polo mu kino kisonekwa paānenene amba ulwanga na “mwiba mu ngitu”? Shi mwiba ubakutunge mu ngitu, wikalanga usansa bininge. Nanshi Polo wādi usaka kunena’mba ulwanga na makambakano kampanda asansa bininge. Wāityile ano makambakano bu “mwikeulu wa Satana” wādi’nka ‘umukupila mapi’ (‘wa kumukupila,’ kunshi kwa dyani). Satana nansha bandemona bandi kebālengejepo makambakano a Polo, pamo bwa abo bamutunga mwiba mu ngitu. Inoko, ino mishipiditu mibi poyāmwene uno “mwiba,” yādi na ayo ityityimikila’o bininge, mwanda wa kusanshija Polo bininge. Le Polo wālongele’po namani?

5. Lelo Yehova wālondolwele namani milombelo ya Polo?

⁵ Dibajinji, Polo wādi usaka bamutalule “mwiba.” Unena’mba: “Nalombele Mfumwetu [Yehova] misunsa isatu mituntulu . . . amba antalule uno mwiba.” Nansha Polo byaālombele bininge, ino mwiba wādi’nka mu ngitu. Le ko kunena’mba Yehova kālondolwelepo milombelo ya Polo? Mhm. Wālondolwele’yo. Yehova kātalwilepo makambakano a Polo, ino wāmupele bukomo bwa kūminina’o. Yehova wānenene amba: “Bukomo bwami bufikijibwanga pa bubwaninine mu buzoze.” (2 Ko. 12:8, 9) Kadi na bukwashi bwa Leza, Polo wābwenye kulama nsangaji ne ndoe yandi ya mutyima!​—Fid. 4:4-7.

6. (a) Le Yehova ubwanya kulondolola milombelo yetu namani? (b) Le i milao’ka idi mu bisonekwa bitelelwe ikupa bukomo?

⁶ Pamo bwa Polo, le kwazenzele Yehova akutalule makambakano? Shi ulombelanga na kininga, ino makambakano kupwa mpika​—enda’nka abipila’ko​—le uzumbijanga mutyima’mba padi Yehova kakusangedilepo? Shi i amo, nabya vuluka kimfwa kya Polo. Monka mwālondolwedile Yehova milombelo yandi, bine usa kulondolola ne milombelo yobe! Yehova ubwanya kuleka kutalula makambakano. Inoko kupityila ku mushipiditu ujila, ukakupa bukomo bosakilwa pa kūminina makambakano. (Ñim. 61:3, 4) Abe ubwanya padi ne ‘kubaswa pa nshi,’ ino Yehova kakakwelapo.​—2 Ko. 4:8, 9; Fid. 4:13.

7-8. (a) Le mushipiditu ujila udingakene namani na luvula? (b) Le Petelo wāshintulwile namani mwingidila mushipiditu ujila?

⁷ Le i muswelo’ka mukwabo witukwashanga mushipiditu ujila? Pamo bwa luvula lupukuma lwimutwala komwenda nansha shi pa dijiba padi luvula lukwabo, mushipiditu ujila nao witukwashanga tūminine matompo makomo enka ne byotukafika mu ntanda mipya ilaile Leza.

⁸ Mutumibwa Petelo byaādi kiluwe kya lui, wādi wibidile kwenda lwa mema. O mwanda wāingidije bishima bikwatañane na lwendo lwa pa mema pa kushintulula mwingidila mushipiditu ujila. Wālembele amba: “Bupolofeto kebwatambilepo ku kiswa-mutyima kya muntu nansha dimo, ino bantu besambile bya kwa Leza monka mobadi baludikilwa na mushipiditu ujila.” Kishima kya Kingidiki kyalamwinwe bu “baludikilwa” kishintulula’tu amba “mobadi batwadilwa; baselelwa.”​—2 Pe. 1:21; kunshi kwa dyani.

9. Le i bika byādi bikimba kunena Petelo pa kutela kishima “baselelwa”?

⁹ Le i bika byādi bikimba kunena Petelo pa kutela kishima “baselelwa”? Luka mulembi wa mukanda wa Bilongwa nandi i mwingidije kino kishima kya Kingidiki pa kwisambila pa kyombo ‘kyeja’ na luvula. (Bil. 27:15) Mwifundi umo wa Bible unena’mba, pālembele Petelo amba balembi ba Bible bādi “baselelwa,” wāingidije “muneneno  wa ku mema.” Na bubine, Petelo wānenene amba, monka muselelwanga kyombo na kivula pa kufika kokyenda, bapolofeto ne balembi ba Bible nabo bādi batwalwa na mushipiditu ujila mwanda wa kuvuija mwingilo wabo. Kadi uno mwifundi unena monka’mba: “Bidi pamo bwa bapolofeto bātulwile bidindo byabo.” Yehova wāvuije mwingilo wandi. Wāletele “luvula,” ke mushipiditu ujila kadi. Balembi ba Bible nabo bāvuije mwingilo wabo. Bālekele uno mushipiditu wibaludike.

10-11. Le i bintu’ka bibidi byotufwaninwe kulonga pa kuludikwa na mushipiditu ujila? Leta kimfwa.

¹⁰ Na bubine, kitatyi kya kulemba na bukomo bwa mushipiditu ke kipite. Inoko, mushipiditu ujila ukipanga bantu ba Leza bukomo. Yehova nandi ukivuijanga mwingilo wandi. Le i muswelo’ka otubwanya kuludikwa na mushipiditu ujila wa Leza? Tufwaninwe kujingulula shi tuvuijanga nyeke mwingilo wetu. Le tukavuija’o namani?

¹¹ Langulukila pa kino kimfwa. Pa kwendejibwa na luvula, ngovi ufwaninwe kulonga bintu bibidi. Kibajinji, ufwaninwe kolwela bwato mwenda luvula. Inoko bwato kebukendapo shi ngovi webwimika mu kyepa mwampikwa luvula. Kya bubidi, ufwaninwe kutulula kidindo ne kwikibāla bininge. Na bubine, nansha shi luvula lupukuma, bwato bwandi bukenda enka shi luvula lubapi mu kidindo. Mu muswelo umo onka, tukōminina mu mwingilo wa Yehova enka shi tukwashibwa na mushipiditu ujila. Pa kuludikwa na uno mushipiditu, tufwaninwe kulonga bintu bibidi. Kibajinji, tufwaninwe kwikala pantu padi mushipiditu wa Leza na kwingila mingilo ilengeja mushipiditu wa Leza wituludike. Kya bubidi, tufwaninwe “kutulula bidindo byetu” bininge na kwingila ino mingilo mwendele bukomo bwetu. (Ñim. 119:32) Shi tulonge bino bintu, mushipiditu ujila uketukwasha tūminine makambakano ne matompo adi pamo bwa mantanki, kadi uketukwasha tūminine na kikōkeji enka ne byotukatwela mu ntanda mipya ya Leza.

12. Le i bika byotusa kwisambila’po pano?

 ¹² Twadi tubesambilanga pa miswelo ibidi itukwashanga mushipiditu ujila. Mushipiditu ujila witupanga bukomo ne kwitukwasha twikale nyeke bakōkele nansha shi tudi mu makambakano. Kadi mushipiditu ujila wituludikanga ne kwitukwasha twikale nyeke mu dishinda ditwala ku būmi bwa nyeke. Pano twisambilei pa bintu biná byotufwaninwe kulonga pa kuludikwa ne pa mfulo na mushipiditu ujila.

13. Mungya 2 Temote 3:16, 17, le Bisonekwa bibwanya kwitukwasha namani, ino i bika byotufwaninwe kulonga?

¹³ Kibajinji, kwifunda Kinenwa kya Leza. (Tanga 2 Temote 3:16, 17.) Kishima kya Kingidiki kyalamwinwe bu “kisonekejibwe na mushipiditu wa Leza” kishintulula’tu amba “umpuya wa Leza.” Leza wāingidije mushipiditu wandi, “wātūla” milangwe yandi mu ñeni ya balembi ba Bible. Kitatyi kyotutanga Bible ne kulangulukila pa byotutanga, bufundiji bwa Leza butwelanga mu ñeni ne mu mutyima wetu. Ino milangwe ya ku bukomo bwa mushipiditu itukwashanga twiendeje mungya kiswa-mutyima kya Leza. (Bah. 4:12) Pa kuludikwa ne pa mfulo na mushipiditu ujila, tufwaninwe kwitūdila’ko kitatyi kya kutanga Bible kyaba ne kyaba ne kulangulukila bininge pa byotutanga. Nabya Kinenwa kya Leza kikekala na lupusa pa byonso byotunena ne byotulonga.

14. (a) Mwanda waka tubwanya kunena’mba “luvula lupukumanga” ku kupwila kwetu kwa bwine Kidishitu? (b) Le tubwanya kutanwa ku kupwila na “bidindo bibāle” muswelo’ka?

¹⁴ Kya bubidi, kutōtela Leza pamo. (Ñim. 22:22) Ku kupwila kwetu kwa bwine Kidishitu “kupukumanga luvula” mu muneneno wa kyelekejo. Mushipiditu wa Yehova wikalanga ku kupwila. (Kus. 2:29) Mwanda waka tubwanya kunena namino? Mwanda shi tubebunge na banabetu bene Kidishitu mwanda wa kutōta, tulombanga mushipiditu ujila, twimba ñimbo ya Bulopwe itambile mu Kinenwa kya Leza, ne kuteja bufundiji bwa mu Bible buletwa na batutu batongelwe na mushipiditu ujila. Kadi uno mushipiditu ujila ukwashanga bakaka bateakanye ne kupityija bipindi byabo. Inoko pa kuludikwa ne pa mfulo na mushipiditu ujila, tufwaninwe kuteakanya kupwila ne kulondolola’ko. Mu uno muswelo, tutanwanga ku kupwila na “bidindo bibāle.”

15. Le mushipiditu ujila witukwashanga namani mu mwingilo wa busapudi?

¹⁵ Kya busatu, kusapula. Kitatyi kyotwingidija Bible mu mwingilo wa kusapula ne kufundija, tulekanga mushipiditu ujila witukwashe mu mwingilo wetu. (Loma 15:18, 19) Inoko pa kuludikwa ne pa mfulo na mushipiditu wa Leza, tufwaninwe kusapula kyaba ne kyaba ne kwingidija Bible ponso pobibwanika. Muswelo umo obwanya kulumbulula musapwilo obe, i kwingidija misapwilo ya kulondela’po idi mu Kabuku ka ku Kupwila Būmi ne Mwingilo.

16. Le i muswelo’ka muyampe wa kutambula mushipiditu ujila?

¹⁶ Kya buná, kulombela kudi Yehova. (Mat. 7:7-11; Luka 11:13) Muswelo muyampe otubwanya kutambula mushipiditu ujila i kulomba’o Yehova mu milombelo. I kutupu kintu nansha kimo kibwanya kujikakanya milombelo yetu ileke kufika kudi Yehova, nansha kukalakanya kyabuntu kiyampe kya mushipiditu wa Leza kileke kwitufikila​—nansha ke lubumbu lwa kifungo ne Satana mwine. (Yak. 1:17) Le i muswelo’ka otufwaninwe kulombela mwanda wa tuludikwe ne pa mfulo na mushipiditu ujila? Pa kulondolola kino kipangujo, tubandaulei senene mwanda utala milombelo na kulangulukila pa kyelekejo kidi’nka mu Evanjile ya Luka kete. *

17. Le i ñeni’ka yotubwanya kuboila ku kyelekejo kya Yesu kidi mu Luka 11:5-9, 13 pa mwanda utala milombelo?

¹⁷ Tanga Luka 11:5-9, 13. Kyelekejo kya Yesu kilombola muswelo otufwaninwe kulomba mushipiditu ujila. Mu kino kyelekejo, muntu umo wāpelwe byaādi usaka “pa mwanda wa lupuñanya lwandi lukomo.” Kāivwenepo moyo wa kulomba mulunda nandi amukwashe nansha bufuku byobwādi ke bwile bininge. (Tala bilembwa bya kwifunda pa Luka 11:8 mu mwb18.07.) Le Yesu wākwatañenye namani kino kyelekejo na mwanda utala milombelo. Wānenene amba: “Lombai’nka kulomba, nabya mukapebwa; kimbai’nka kukimba, nabya mukamona; kokolai’nka kukokola, nabya mukashitwilwa.” Penepa, i ñeni’ka yotuboila’ko? I ya amba, pa kutambula bukwashi bwa mushipiditu ujila, tufwaninwe kulomba’o na kininga.

18. Kukwatañana na kyelekejo kya Yesu, mwanda waka tubwanya kukulupila’mba Yehova uketupa mushipiditu wandi ujila?

¹⁸ Kadi kyelekejo kya Yesu kitukwasha tuyuke kine kitupelanga Yehova mushipiditu ujila. Muntu wa mu kyelekejo wādi usaka kwikala mufikilwa muyampe. Wādi umwene amba ufwaninwe’nka kupa mweni wandi wa bufuku byakudya, ino kādipo na kintu kya kumupa. Yesu wānenene amba mulondakani wāmupele mukate mwanda wāmulombele’o na kininga. Le i bika byādi bisaka kunena Yesu? Shi muntu wampikwa kubwaninina waitabija kukwasha mulondakani nandi wamuningila, le Tata wetu wa mūlu wa lusa ke pepi, abulwepo kukwasha boba bamulomba mushipiditu ujila na kininga! Nanshi, tubwanya kulomba na kikulupiji kya’mba Yehova ukalondolola milombelo yotumulomba mushipiditu ujila.​—Ñim. 10:17; 66:19.

19. Mwanda waka tubwanya kukulupila’mba tusa kunekenya?

¹⁹ Tubwanya kukulupila’mba nansha Satana byalonga nyeke bukomo bwa kwitunekenya, tusa kumunekenya. Mwanda waka? Mwanda mushipiditu ujila witukwashanga mu miswelo ibidi. Mubajinji, witupanga bukomo botusakilwa pa kūminina makambakano. Wa bubidi, ao i bukomo “budinda bidindo byetu,” bwine bwitukwasha twendelele kwingidila Yehova kufika ne byotukatwela mu ntanda mipya ya Leza. Nanshi tusumininwei kuludikwa ne pa mfulo na mushipiditu ujila!