1. Le Yehova i muleke muntu ne muntu alonge bika?

YEHOVA i mwituleke tutonge motusakila kwikadila mu būmi. Witufundijanga mwa kukwatyila butyibi buyampe, ne kwitukwasha tufikile pa butyibi bumusangaja botukwete. (Ñim. 119:173) Shi twingidije tunangu tudi mu Kinenwa kya Leza, tukakwata butyibi buyampe.​—Bah. 5:14.

2. Le i makambakano’ka otubwanya kulwa nao pa kupwa kukwata butyibi?

² Inoko nansha shi tubakwata butyibi bwa tunangu, tubwanya kukomenwa kuvuya byotwashilwile. Tutalei bidi bino bimfwa: Tutu umo nkasampe wakwata butyibi bwa kutanga Bible ense. Watange’ye’tu biyampe mu mayenga matyetye, ino kupwa waleka’byo pa bubinga kampanda. Kaka umo wakwata butyibi bwa kwingila bu pania wa lonso, ino katundulula’nka kutundulula difuku dya kushilula’bo. Kitango kya bakulumpe kibakwata butyibi mwa kimo bwa kukumba bantu ba mu kipwilo, ino pabapite myeji mivule kwibapempula mpika. Nansha ino myanda byoidi mishile, ino i miifwane mu kintu kimo. Abo bonso kebafikīlepo pa butyibi bwabo. Bene Kidishitu ba mu myaka katwa kabajinji ba mu Kodinda nabo bālwile na makambakano pamo bwa ano. Tutalei ñeni yotubwanya kuboila kobadi.

3. Le bene Kodinda bākwete butyibi’ka, ino byāikala namani?

³ Dya mu 55 Yesu Ke Mwiye, bene Kodinda bākwete butyibi buyampe. Bāivwene amba banababo ba mu Yelusalema ne mu Yudea badi mu makambakano, mu bulanda, ne amba bipwilo bikwabo byakongakenye lupeto lwa kwibakwasha nalo. Na kanye ne buntu, bene Kodinda nabo bākwata butyibi bwa kwibakwasha ne kwipangula mutumibwa Polo muswelo obabwanya kwibakwasha. Wātumina kipwilo bulombodi ne kutonga Tetusa emanine mwingilo wa kukongakanya lupeto. (1 Ko. 16:1; 2 Ko. 8:6) Ino myeji  mityetye pa kupita’po, Polo wāivwana’mba bene Kodinda kebaletelepo byabuntu byabo. Mfulo mfulō, byabo byabuntu kebyāmwekelepo kufika ne byābwene kitatyi kya kukatūla byabuntu bya bipwilo byonso ku Yelusalema.​—2 Ko. 9:4, 5.

4. Mungya 2 Bene Kodinda 8:7, 10, 11, le mutumibwa Polo wākankamikile bene Kodinda balonge bika?

⁴ Bene Kodinda bākwete butyibi buyampe, kadi Polo wēbafwijije’ko pa lwitabijo lwabo lukomo ne mutyima wabo wa kusaka kulombola buntu. Ino kadi wēbakankamikile bavuye byobāshilwile. (Tanga 2 Bene Kodinda 8:7, 10, 11.) Kimfwa kyabo kitufundija’mba, nansha ke bene Kidishitu ba kikōkeji babwanya kukomenwa kufikila pa butyibi buyampe bobakwete.

5. Le i bipangujo’ka byotusa kulondolola?

⁵ Pamo bwa bene Kodinda, tubwanya kukomenwa kufikila pa butyibi bwetu. Mwanda waka? Pa mwanda wa kubulwa kubwaninina, tubwanya’tu kutundululatundulula bintu. Nansha padi myanda yampikwa kulaya ibwanya kwitulengeja tukomenwe kufikila pa butyibi botwakwete. (Mus. 9:11; Loma 7:18) Le i muswelo’ka otubwanya kubandaula butyibi ne kumona shi bilomba kwibushinta? Ne i muswelo’ka otubwanya kuvuya senene byobya byotwashilwile?

6. Le i kitatyi’ka kyotubwanya kushinta butyibi?

⁶ Kudi butyibi bumo bwa mvubu boketubwanyapo kushinta. Kimfwa, tulamete ku butyibi bwetu bwa kwingidila Yehova, kadi twi basumininwe kulamata mwinē petu. (Mat. 16:24; 19:6) Ino kudi butyibi bukwabo botubwanya kushinta. Mwanda waka? Mwanda ngikadilo ishintanga. Le i bika bibwanya kwitukwasha tukwate butyibi buyampe?

7. Le i bika byotufwaninwe kulomba, ne mwanda waka?

⁷ Lomba tunangu. Yehova wāpele Yakoba mushipiditu wālemba’mba: “Nanshi, shi momudi’mo mudi umo ubudilwe tunangu, nankyo alombe’to nyeke kudi Leza, mwanda aye upanga bonso na mutyima tō.” (Yak. 1:5) Kyaba kimo batwe bonso ‘tubulwanga tunangu.’ Nanshi kulupila mudi Yehova kitatyi kyokwata butyibi ne kitatyi kyosaka kushinta’bo. Nabya Yehova ukakukwasha ukwate butyibi bwa tunangu.

8. Le i bukimbi’ka botufwaninwe kulonga kumeso kwa kukwata butyibi?

⁸ Kimba bininge. Kimba mu Kinenwa kya Leza, tanga mabuku a bulongolodi bwa Yehova, ne kusapwila’mo bantu bokulupīle. (Nki. 20:18) Bukimbi bwa uno muswelo budi na mvubu kumeso kwa kukwata butyibi bwa kushinta kaji, kuviluka, nansha kutonga masomo a kufunda akakukwasha wikwatakanye mu mwingilo obe.

9. Le i bika byotukamwena’mo shi ketwidimbilepo batwe bene?

⁹ Bandaula kine kyokwatyila butyibi. Yehova utele mutyima ku kine kitutonona tulonge kintu kampanda. (Nki. 16:2) Usakanga twikale bampikwa budimbidimbi mu bintu byonso. O mwanda kitatyi kyotukwata butyibi, ketusakengapo kwidimba nansha kudimba bakwetu pa kine kyotukwatyila butyibi. Shi twidimbe batwe bene, tukakomenwa padi kufikila pa butyibi botukwete. Kimfwa, tutu nkasampe ubwanya kukwata butyibi bwa kwingila bu pania wa lonso. Ino kitatyi pa kupita’po, wakomenwa kubwanya mansá alombelwe ne kutunya kusangela mwingilo wandi. Ubwanya padi kulanga’mba kine kyaingidila bu pania i kusangaja Yehova. Ino le bibwanika padi wadi ukimba’tu kusangaja bambutwile bandi nansha muntu mukwabo?

10. Le i bika bibwanya kukwasha muntu ashinte?

 ¹⁰ Tulangulukilei bidi pa kimfwa kya mwifundi wa Bible wakwata butyibi bwa kuleka kutoma mfwanka. Dibajinji, walonga bukomo, waleka kutama’yo yenga umo nansha abidi, kupwa kadi watome’yo. Ino ku mfulo wabwanya kuleka’yo! Buswe bwasenswe Yehova ne mutyima wandi wa kusaka kumusangaja bibamukwasha aleke kino kibidiji.​—Kol. 1:10; 3:23.

11. Mwanda waka tufwaninwe kwikala na bitungo bipotoloke?

¹¹ Ikala na bitungo bipotoloke. Shi udi na bitungo bipotoloke, padi ukalonga bukomo bwa kuvuya byobya byowashilwile. Kimfwa, padi wakwete butyibi bwa kutanga Bible bininge. Ino shi kudipo na mpangiko mipotoloke, kubwanyapo kufikila pa kitungo kyobe. * Nansha padi bakulumpe mu kipwilo babwanya kukwata butyibi bwa kukumba mikōko kitatyi ne kitatyi, inoko papita ne kitatyi kufikila pa buno butyibi mpika. Pa kufikila pa butyibi bwabo, bafwaninwe kwiipangula bino bipangujo: “Le tujingulwile batutu ne bakaka basakilwa nakampata bupempudi bwa bukumbi? Le twi batonge kitatyi kya kukebapempula?”

12. Le i bika padi byotubwanya kulonga, ne mwanda waka?

¹² Ikala na mumweno muyampe. Batwe bonso ketudipo na kitatyi, lupeto, nansha bukomo bwa kulonga kyonso kyotusaka kulonga. Nanshi ikala na mumweno muyampe ne bujalale. Shi bibwanika, ukokeja kushinta butyibi bokubwanyapo kufikila’po. (Mus. 3:6) Langa’po bidi shi ubabandaula butyibi bobe, ubashinta’bo, kupwa ubamone amba ubwanya kufikila’po. Tala bintu bitano bibwanya kukukwasha uvuye byobya byowashilwile.

13. Le i muswelo’ka okamona bukomo bwa kufikila pa butyibi bobe?

¹³ Lomba Leza akupe bukomo bwa kulonga kintu. Leza ubwanya kukupa “bukomo bwa kulonga” kintu mwanda wa ufikile pa butyibi bobe. (Fid. 2:13) Nanshi lomba Yehova mushipiditu wandi ujila wa kukupa bukomo bosakilwa. Endelela na kulombela nansha shi umona’mba milombelo yobe ibaije kulondololwa mpika. Yesu wānenene amba: “Lombai’nka kulomba, nabya mukapebwa [mushipiditu ujila].”​—Luka 11:9, 13.

14. Le musoñanya udi mu Nkindi 21:5 ubwanya kukukwasha namani ufikile pa butyibi bobe?

¹⁴ Witūdile’ko mpangiko. (Tanga Nkindi 21:5.) Pa kuvuya mwingilo o-onso owashilwile, ufwaninwe kwitūdila’ko mpangiko. Kupwa ukalonga bukomo bwa kulonda ino mpangiko. Pokwata butyibi napo mo monka, lemba bintu byofwaninwe kulonga pa kufikila pa butyibi bobe. Kwabanya mingilo mikatampe mu tumingilo tutyetutye kubwanya kukukwasha upēlelwe kwiivuija. Polo wākankamikile bene Kodinda balee’ko lupeto lwa byabuntu “mu difuku dibajinji dya yenga ne yenga” pa kyaba kya kwilaija afike bidi kupwa kebakonge lupeto. (1 Ko. 16:2) Kwabanya mingilo mikatampe mu tumingilo tutyetutye kubwanya kukukwasha uleke kulēmenenwa.

15. Le i bika byobwanya kulonga shi ubapu kwitūdila’ko mpangiko?

¹⁵ Mpangiko milembe senene ibwanya kukukwasha ufikile pa butyibi bowakwete. (1 Ko. 14:40) Kimfwa, bitango bya bakulumpe i bipebwe bulombodi bwa kutonga’ko mukulumpe umo wa kulemba butyibi bonso bukwata kitango kya  bakulumpe, kubadila’mo ne boba batongwa kuvuija mwingilo ne kitatyi kine kya kupwa’o. Bakulumpe balonda buno bulombodi bakapēlelwa kufikila pa butyibi bwabo. (1 Ko. 9:26) Nobe ubwanya kulonga uno muswelo mu myanda ikutala. Kimfwa, ubwanya kulemba bya kulonga difuku ne difuku ne kwibipanga mungya mvubu yabyo. Kino kibwanya kukukwasha uvuye byowashilwile ne kwibilonga mu kitatyi kityetye.

16. Le i kika kyofwaninwe kulonga pa kufikila pa butyibi bobe, ne kisonekwa kya Bene Loma 12:11 kibingija uno mwanda namani?

¹⁶ Wielele’ko. Pa kulonda mpangiko yobe ne kuvuya byowashilwile bilombanga kulonga bukomo. (Tanga Bene Loma 12:11.) Polo wāsapwidile Temote amba, “wielele’ko nyeke” kadi “ūminina” wikale mufundiji muyampe. Ano madingi adi na kamweno ne ku bitungo bikwabo bya ku mushipiditu.​—1 Tm. 4:13, 16.

17. Le kulonda madingi adi mu Bene Efisesa 5:15, 16 kubwanya kukukwasha namani ufikile pa butyibi bobe?

¹⁷ Ingidija kitatyi kyobe na tunangu. (Tanga Bene Efisesa 5:15, 16.) Tunga kitatyi kya kufikila pa butyibi bobe ne kwikilēmeka. Leka kwilaija na kulanga’mba bintu bisa kulumbuluka, mwanda bintu kebibwanyapo padi kulumbuluka. (Mus. 11:4) Tá mutyima kutyina bintu bya mvubu mityetye byakakudila kitatyi ne kukupwa bukomo bwa kulonga bintu bya mvubu mikatampe. (Fid. 1:10) Shi bibwanika, tonga kitatyi kyokebabwanyapo kukupuakanya. Lombola bakwenu bayuke amba usakilwa kuta mutyima ku byolonga. Bula telefone, ne kutanga misapu nansha kutwela pa lezo ya mīsambo kyaba kikwabo. *

18-19. Le i bika bikakukwasha ufikile pa butyibi buyampe nansha shi ubatanwa na bikoleja?

¹⁸ Tá mutyima ku bintu bikalupuka’ko. Bintu bikalupuka ku butyibi bobe bidi pamo bwa kwenda ku kifuko kampanda. Shi bine usaka kukafika koenda, ukenda’nka kwenda nansha shi dishinda dibabipa kebikulombe kwenda dishinda dingi. Muswelo umo onka, shi tute mutyima ku bintu bikalupuka ku butyibi bwetu, ketukeyumbilapo kuleka’byo kitatyi kyotukatanwa na bikoleja.​—Ngt. 6:9.

¹⁹ I bikomo kukwata butyibi buyampe, kadi ubwanya kukomenwa kufikila’po. Inoko na bukwashi bwa Yehova, ubwanya kwikala na tunangu ne bukomo bosakilwa pa kuvuya byobya byowashilwile.