BATUTU ne bakaka bavule bavilukile pa kala mu matanda mendelele a Kushika, bajokēle mu yabo ntanda. Byobadi basenswe Yehova ne bakwabo, bavilukīle ku bifuko kusakilwa basapudi bavule ba Bulopwe. (Mat. 22:37-39) Le i bika byobesuminwe, ne i madyese’ka obaeselwe? Pa kulondolola, twisambilei bidi pa ntanda ya Kamerune idi mu Afrika wa kushika.

Mu 1998, tutu Onésime wavilukile mu Kamerune. Wakashikete mu ntanda ya bweni myaka 14. Difuku dimo, paadi ku kupwila, waivwana kimfwa kīsambila pa mwingilo wa busapudi. Muneni wanena’mba, “Shi balunda babidi bapoya mu bifuko bishile, umo wakwata mwita mungi kupita mukwabo, le yewa kakwetepo mwita mungu, kakendapo ku kifuko kobakwata mwita mungi?”

Kino kimfwa kyalengeje Onésime alangulukile pa kujokela mu Kamerune mwanda wa kukakwasha’ko basapudi badi’mo. Ino wadi ulangalanga. Le ukebidila kwikala mu yabo ntanda pa kupwa kushikata mu ntanda ya bweni mu ino myaka yonso’i? Pa kuyuka shi ukabwanya, Onésime waendele mu Kamerune myeji isamba. Kupwa mu 2012, wakajokela’mo lonso.

Onésime unena’mba: “Nadi mfwaninwe kwibidila kyanga ne būmi budi’mo. Mu Njibo ya Bulopwe, nadi nenwe kushikata monka pa bibasa byumubyumu. Inoko unena na mimungomungo amba, ponadi nta mutyima bininge ku mpangiko, nadi ngilwa bityi biyampe bya mu Mobo a Bulopwe makwabo.”

Mu 2013, Onésime wasonga Géraldine, mwine wajokēle mu Kamerune pa kupwa kushikata mu France myaka kitema. Le i madyese’ka aeselwe bano ba mulume ne mukaji pa mwanda wa kuta mutyima ku mingilo ya kiteokratike mu būmi bwabo? Onésime unena’mba: “Twaendele ku Masomo a Basapudi ba Bulopwe ne kwingila ku Betele. Mwaka wapityile, bantu 20 badi befunda Bible mu kyetu kipwilo babatyijibwe. Pano nemonanga bu ngidi mu kifuko kiyampe kya ‘kupoya.’” (Mako 1:17, 18) Géraldine ubweja’ko amba: “Ne mweselwe bininge kupita ne monadi nangila.”

Judith wavilukīle mu États-Unis ino wadi wabila kusapula bininge. Unena’mba, “Kitatyi kyonso kyonadi nkapempula kisaka mu Kamerune, nadi ndila pa kushiya bantu bavule bonadi nshilula kwifunda nabo Bible.” Inoko, Judith wadi wishisa kujokela mu Kamerune. Wadi na kaji ka mfutwa miyampe kadi kamukwasha ondapije shandi mu Kamerune. Ino, byaadi ukulupile mudi Yehova, Judith wakajoka.  Unena’mba, wadi ulanga būmi buyampe bwaadi nabo mu ntanda ya bweni. Ebiya walomba Yehova amukwashe ashinte, kupwa wamukwasha kupityila kudi mutadi wa kipindi ne wandi mukaji bamukankamikile.

Judith uvuluka’mba “mu myaka’tu isatu, naikele na nsangaji ya kusokola bana baná ba ku mushipiditu.” Judith washilula kwingila bu pania wa pa bula. Dyalelo, bengilanga na wandi mulume Sam-Castel, mutadi wa kipindi. Ino le byaikele namani na shandya Judith? Aye ne kisaka kyabo babwenye kusokola lupitalo mu ntanda ya bweni lwaitabije kufuta lupeto lwa lupasulo lwa shandi. Na bya dyese, lupasulo lwapityile biyampe.

Tutu Victor wavilukīle mu Kanada. Aye pa kutanga kishinte kya Kiteba kya Mulami kīsambila pa masomo malamala, walangulukila pa masomo aadi ufunda. Waleka’byo kufunda ku inivelesite, wakafunda masomo a mu kitatyi kityetye a kwikala na busendwe. Unena’mba, “aunkweshe nsokole kaji bukidibukidi, kadi nonge bintu byonadi nsaka kulonga tamba kala​—ke kwingila bu pania kadi.” Mwenda mafuku, Victor wasonga Caroline, kupwa abo bonso bubidi baenda mu Kamerune. Abo pa kukapempula’mo ku bilo ya musambo, bebakankamika balangulukile pa kwingidila mu Kamerune. Victor unena’mba, “Ketwamwenepo bubinga bwa kupelela, kadi byotwadi ketudi na būmi bwa kwisuminwa, twaitabija lwito.” Nansha Caroline byaadi na tumisongo tutyetutye, bakwata butyibi bwa kuviluka.

Ba Victor ne Caroline bashilula kwingila bu bapania ba lonso mwanda wa kukwasha bantu basangela mu busapudi. Baleya’ko lupeto lwa kwibakwasha kutyina bakemika mwingilo kebakimbe kaji. Kupwa bakengila mu Kanada mu myeji mityetye, kwine kwebakweshe bajokele mu Kamerune ne kwendelela na mwingilo wa bupania. Le baeselwe madyese’ka? Bakafundile ku Masomo a Basapudi ba Bulopwe, baingile bu bapania ba pa bula, kadi pano bengilanga mu mwingilo wa lūbako. Victor unena’mba, “Kushiya kifuko kyetu kiyampe kwetukweshe twimwene bukwashi bwa Yehova.”

Mu 2002, Alain, mwanā masomo wa ku inivelesite ya mu Alemanye, watangile trakte unena’mba Bansongwanzele​—Lelo Musaka Kulonga Bika mu Bwenu Būmi? Myanda yadi’mo yamulengeje etungile bitungo bikwabo. Mu 2006, wakafunda ku Masomo a Bufundiji bwa Mingilo, kupwa bamutuma mu Kamerune, ntanda yabo.

Mu Kamerune, Alain wasokola kaji ka kwingila mu kitatyi kityetye. Mwenda mafuku, wasokola kaji ka mfutwa miyampe, ino wadi ulangalanga’mba kano kaji kekakamulengejapo asapule bininge. O mwanda kitatyi kyobamunenene engile bu pania wa pa bula, waitabija pampikwa kwikaka. Mukulu wandi wa kaji wamunena’mba usa kumubweja’ko lupeto, ino aye Alain wapela. Mwenda mafuku Alain wasonga Stéphanie, mwine wakashikete mu France myaka mivule. Le nandi watenwe na makambakano’ka paajokēle mu Kamerune?

Stéphanie unena’mba: “Nashilwile kubela tumisongo tutyetutye ne tukwabo tutamba ku byakudya, ino nadi nonga bukomo bwa kwiundapija kitatyi ne kitatyi kadi nadi ngivwana biyampe.” Bano ba mulume ne mukaji baeselwe pa kūminina kwabo. Alain  unena’mba: “Potwaendele kukasapula ku Katé, kakibundi ka mufula, twatene’ko bantu bavule badi basaka kwifunda Bible. Kupwa, twabwanya kufundija bano bantu Bible ku telefone. Babidi mu bano bantu badi befunda Bible babatyijibwa, kupwa kwabundwa kisumpi kya busapudi.” Stéphanie ubweja’ko amba: “I kutupu nsangaji itabukile ya kukwasha bantu bepāne kudi Yehova. Potwakengile’ko, twemwenine ino nsangaji misunsa mivule.” Dyalelo, ba Alain ne Stéphanie bengilanga mu kipindi.

Gisèle wabatyijibwe paadi ufunda masomo a kiñanga mu Itadi. Watengelwe na būmi bwa kwisuminwa bwadi na ba mulume ne mukaji bapania badi bamufundija Bible, kupwa wasaka kulonga bivule mu busapudi. Ebiya Gisèle washilula kwingila bu pania wa lonso paapwile masomo.

Gisèle wadi usaka kwingidila Yehova bininge shi wakajokela mu Kamerune, ino wadi ulangalanga. Unena’mba, “Nadi nangalanga pa kujimija mikanda ya kushikata mu Itadi, ne kushiya balunda ne bantu ba mu kisaka bashikete mu Itadi.” Nansha nabya, Gisèle wakajokele mu Kamerune mu Kweji 5, 2016.

Mwenda mafuku, bamusonga kudi Léonce, kupwa bilo ya musambo ya mu Kamerune yebanena bavilukile ku Ayos, kibundi kikatampe kyadi kisakilwa basapudi bavule ba Bulopwe.

Le būmi bwadi namani mu Ayos? Gisèle unena’mba: “Divule dine mudilo wa nshinga wadi wenda mayenga mavule, kadi ketwadipo tubwanya kutweja mudilo mu matelefone. Kitatyi kivule keadipo engila. Nefundile kutēkela pa mudilo wa nkuni, kadi twadi twenda na mangolofwana ne malampi kukateka mema bufuku ku nsulo, kitatyi kyadi kityepa’ko bantu.” Le bano ba mulume ne mukaji baūminine namani? Gisèle unena’mba: “Bakwashibwe na mushipiditu wa Yehova, bekwasha abo bene na bene, bebakankamika kudi bantu ba mu kisaka ne balunda, ne kwibakwasha na lupeto.”

Le Gisèle usangedile kujokela mu yabo ntanda? Unena’mba “En-en! Ne kutatana kwine mpika. Dibajinji twadi na makambakano ne milangwe ya kutyumukwa mutyima, ino batwe pa kwibinekenya, ami ne wami mulume twamwene amba twalongele enka byotwadi tufwaninwe kulonga. Twakulupile mudi Yehova ne kwimona bu tudi nandi pabwipi.” Ba Léonce ne Gisèle bakafundile ku Masomo a Basapudi ba Bulopwe, kadi pano bengilanga bu bapania ba pa bula ba mu kitatyi kityetye.

Pamo bwa babiluwe ba lui bōmininanga makambakano meshileshile pa kukwata mwita muvule, boba bajokelanga ku yabo ntanda nabo bepānanga na mutyima tō mwanda wa kukwasha bantu ba mityima myoloke betabija musapu wa Bulopwe. Na bubine, Yehova ukavuluka biyampe bano basapudi bankanka pa mwanda wa buswe bobalombwele mwanda wa dijina dyandi. (Neh. 5:19; Bah. 6:10) Shi udi mu ntanda ya bweni, ino mu yenu ntanda musakilwa basapudi ba Bulopwe, le ubwanya kujoka? Shi ulonge namino, madyese mavule akutengēle.​—Nki. 10:22.