LELO bikukomenanga kulonga kifundwa kyobe kya pa kasuku kitatyi ne kitatyi ne kwikisangela? Kyaba kimo bitufikilanga batwe bonso. Inoko langulukila pa bintu bikwabo byotuloñanga kitatyi ne kitatyi, pamo bwa koya mema. Koya mema kulombanga kitatyi ne bukomo, inoko twiivwananga biyampe shi tubapu koya! Kwifunda Bible nako kubwanya kwitulengeja twiivwane biyampe. (Ef. 5:26) Tala bintu bimo bibwanya kukukwasha:

• Tūla’ko mpangiko. Kifundwa kya Bible kya pa kasuku kibadilwa mu “bintu bya mvubu mikatampe” kebifwaninwepo kusūla mwine Kidishitu. (Fid. 1:10) Pa kukukwasha ulēmeke mpangiko yobe, wiilembe pa papye ne kwiilamika pantu popēlelwa kwiimona. Nansha kadi tūla kañengele mu telefone yobe ka kukuvuluja kitatyi kityetye kumeso kwa abe kushilula kwifunda.

• Tonga bya kwifunda mungya bisakibwa byobe. Lelo bikupēlelanga kuta mutyima ku byowifunda mu bula bwa kitatyi kilampe nansha mu kitatyi kityetye? Abe ye wiyukile senene. Jadika kitatyi kyobe kya kwifunda mungya bukomo bobe. Shi kitatyi kyobe kya kwifunda kibabwana inoko kwivwenepo bifunda, wabulwapo kwifunda nansha mu minite’tu dikumi? Shi wifunde’tu nansha mu kitatyi kityetye, ukamwena’mo bintu bivule kupita’ko kuleka kwifunda. Kadi shi ubashilula, ubwanya kwikala na mutyima wa kusaka kwendeleja.—Fid. 2:13.

• Tonga myanda ya kwifunda kumeso kwa kitatyi. Shi kitatyi kya kwifunda kibwane ebiya ye kolangulukila pa bya kwifunda, ubwanya kutunya ‘kwingidija biyampe shē kitatyi kyobe.’ (Ef. 5:16) Le wabulwapo kutandika bishinte nansha myanda yokimba kwifunda? Shi ubaikala na kipangujo mu ñeni, lemba’kyo. Kadi kitatyi kyonso kyopwa kwifunda, ubwanya kubweja milangwe mikwabo ku bintu byotandikile kwifunda.

• Pēlelwa kushinta. Potandika mpangiko yobe, wiilonge mu muswelo wa kupēlelwa kushinta bintu, kimfwa bula bwa kitatyi kya abe kulonga mu kwifunda nansha myanda ya abe kwifunda. Kya mvubu—ke kitatyipo kyowifunda, bula bwa kitatyi kyolonga mu kwifunda, nansha bine byowifunda—inoko i kwifunda kitatyi ne kitatyi.

Tumwenanga bya binebine mu kwifunda kitatyi ne kitatyi. Tufwenanga kudi Yehova, twifunda kulonga bintu na tunangu, ne kutūkijibwa mutyima.—Yos. 1:8.