1, 2. Lelo Bahebelu 13:4 ufwaninwe kwitutonona tulonge bika?

BATWE bonso tusakanga kulēmeka Yehova. Aye ye otufwaninwe kulēmeka, kadi nandi i mulaye kwitulēmeka. (1 Samwele 2:30; Nkindi 3:9; Kusokwelwa 4:11) Kadi witusakilanga tulēmeke ne bantu bakwabo, pamo bwa bakatampe ba lupusa. (Loma 12:10; 13:7) Ino kudi mu mwanda umo motufwaninwe kulombola nakampata bulēme. I mu busongi.

² Mutumibwa Polo wālembele amba: “Busongi bulēmekibwe na bonsololo, ne butanda bwa buluo nabo bwikale bwampikwa disubi.” (Bahebelu 13:4) Polo kādipo’tu wisambila bitupu pa busongi. Ino wādi ulombola bene Kidishitu amba bafwaninwe kulēmeka busongi, ko kunena’mba kwibumona bu bulēme. Le nobe ye momwena busongi, nakampata bobe shi wi musonge nansha kusongwa?

3. Le Yesu wāletele madingi’ka a mvubu atala pa busongi? (Tala kifwatulo ku ngalwilo.)

³ Shi umwene busongi na bulēme, nabya ulondanga kimfwa kiyampe. Yesu wādi ulēmekele busongi. Pāmwipangwile Bafadiseo myanda ya dilubu, wātelele binenwa byānenene Leza pa busongi bubajinji amba: “O mwanda mwine mwana-mulume ukashiya shandi ne inandi, penepo abo babidi bakekala ngitu imo.” Yesu wābwejeje’ko amba: “Kyokya kyakuta Leza pamo mu lupungu,  muntu nansha umo kakikalañanya’kyo.”​—Tanga Mako 10:2-12; Ngalwilo 2:24.

4. Le mpango ya Yehova pa busongi i mpango’ka?

⁴ Yesu wāitabije amba Leza ye wāshilwile busongi ne amba busongi bufwaninwe kwikala bwa lonso. Leza paāshilwile busongi bubajinji, kālombwelepo ba Adama ne Eva amba bakelubula. Ino, mpango yandi yādi ya amba “abo babidi” bekale nyeke mu bumo mu busongi.

5. Le lufu lwāikele na lupusa’ka pa busongi?

⁵ Inoko uyukile amba Adama pa kujilula, bintu bivule byāshintyile. Kushinta kumo bidi i kufwa kwa bantu, ne kuno kushinta kwāikele na lupusa pa busongi. Mutumibwa Polo wāshintulwidile bene Kidishitu amba, lufu lufudijanga busongi ne amba yewa washala mūmi udi na bwanapabo bwa kusonga nansha kusongwa.​—Loma 7:1-3.

6. Le Bijila bya Mosesa bitufundija bika pa mumwena Leza busongi?

⁶ Bijila byobāpele Isalela kudi Leza byālombwele myanda mivule itala busongi. Kimfwa, byālekele bene Isalela bekale na bakaji bavule. Kino kibidiji kyāikele’ko kumeso kwa Leza kuleta Bijila. Inoko, Bijila byādi bikinga bana-bakaji ne bana ku kususulwa. Kimfwa, shi mwine Isalela wasonge mupika, kupwa wasonge mukaji mukwabo, wādi ufwaninwe nyeke kuvuija bisakibwa bya mukaji mubajinji enka na mwaādi ulongela kala. Leza wādi umusakila endelele kumulama ne kumuta mutyima. (Divilu 21:9, 10) Shako batwe ketulondangapo Bijila bya Mosesa dyalelo. Inoko bitufundija’mba Leza umwene amba busongi i bulēme bininge. Na bubine kino kitukwashanga netu tulēmeke busongi.

7, 8. (a) Le Bijila byādi binena bika pa dilubu kukwatañana na Kupituluka 24:1? (b) Le Yehova umwene dilubu namani?

⁷ Le Bijila byādi binena bika pa dilubu? Nansha Yehova byakādipo usaka ba mulume ne mukaji belubule, ino Bijila byālekele mwine Isalela alubule wandi mukaji shi “watana mwadi kintu kyampikwa kwendela’mo.” (Tanga Kupituluka 24:1.) Bijila kebyālombwelepo bine byādi bikokeja kumonwa bu “kintu kyampikwa kwendela’mo.” Inoko, kyādi kifwaninwe kwikala kintu kileta bumvu nansha kikatampe bininge, ke kamwandapo’tu katyetye. (Kupituluka 23:14) Ino i kya bulanda, mwanda dya mu mafuku a Yesu, Bayuda bavule bādi balubula babo bakaji “pa myanda yo-yonso.” (Mateo 19:3) Na bubine batwe ketusakengapo kutamija uno mwikadilo.

⁸ Mu mafuku a mupolofeto Malaki namo, bantu bādi na kibidiji kya kulubula mukaji mubajinji, padi mwanda wa kusonga nsongwakaji kengidilapo Yehova. Ino Leza wālombwele patōkelela mwamwena dilubu. Wānenene amba: “Ami nshikilwe dilubu.” (Malaki 2:14-16) Muswelo umona Leza busongi keushintyilepo tamba ku ngalwilo, kitatyi kine kyaānenene amba muntu “ukalamata wandi mukaji, penepo bakekala ke ngitu imo.” (Ngalwilo 2:24) Yesu nandi wākwatakenye muswelo umona Shandi busongi paānenene amba: “Kyokya kyakuta Leza pamo mu lupungu, muntu nansha umo kakikalañanya’kyo.”​—Mateo 19:6.

9. Le binenwa bya Yesu bidi mu Mako 10:11, 12 bishintulula bika?

⁹ Bamo babwanya kwiipangula’mba, ‘Le kekudipo bubinga bwa mwine Kidishitu kwilubula ne kwisonga na mukwabo?’ Yuka’mba Yesu wānenene amba: “Yewa ense ulubula wandi mukaji kadi wasonga ungi nankyo wamupi mambo a makoji, kadi shi mwana-mukaji nandi wapu kwilubula na mulumyandi, asongwe na ungi, walonga makoji.” (Mako 10:11, 12; Luka 16:18) Na bubine Yesu wādi ulēmekele busongi, kadi wādi usaka bantu bakwabo nabo bebulēmeke. Shi muntu walubula mukaji umulamete, wasonge mukwabo, nabya walonga makoji. Mo monka ne mwana-mukaji wilubula na wandi mulume umulamete. Bidi uno muswelo mwanda ke dilubupo’tu  difudijanga busongi. Leza ukimwene bano ba mulume ne mukaji bu “ngitu imo.” Kadi Yesu wānenene amba shi muntu walubula wandi mukaji wampikwa mambo, watūla mukaji mu kyaka kya kulonga makoji. Namani? Tamba penepa, mukaji mulubulwe ubwanya kumona’mba ufwaninwe kusongwa monka mwanda wa kumukwatakanya na lupeto. Busongi bwa uno muswelo nabo i makoji.

10. Le i bubinga’ka bumo kete bubwanya kwilubwila mwine Kidishitu ne kwikala na bwanapabo bwa kwisonga na mukwabo?

¹⁰ Yesu wāfundije amba kudi bubinga bumo kete bwa kwilubwila paānenene amba: “Ami nemunena’mba yewa ense ulubula wandi mukaji shi ke’nkapo pa mwanda wa busekese, kadi wasonga ungi nankyo walonga makoji.” (Mateo 19:9) Wēsambīle pa uno mwanda umo onka ne mu Busapudi bwa ku Lūlu. (Mateo 5:31, 32) Misunsa yonso ibidi, Yesu wātelele “busekese.” Mu busekese mubadilwa bubi pamo bwa makoji, bundumba, kulāla kwa bantu babidi bampikwa kwisonga, kulāla kwa bantu ba ngitu imo, ne kulāla na banyema. Kimfwa shi mwana-mulume musonge walonga busekese, wandi mukaji ubwanya kukwata butyibi bwa kwilubula nansha kuleka kwilubula. Shi abelubula, Leza kakebamonepo monka bu besonge.

11. Mwanda waka mwine Kidishitu ubwanya kukwata butyibi bwa kuleka kwilubula nansha shi mwinē pandi walonga busekese?

¹¹ Yuka’mba Yesu kānenenepo amba shi muntu musonge nansha musongwe walonga busekese, mwinē pandi wambulwa mambo ufwaninwe’nka kwilubula nandi. Kimfwa mukaji ubwanya kukwata butyibi bwa kushikata na wandi mulume nansha shi i mulonge busekese. Mwanda waka? Padi ukimusenswe ne kadi wamulekela na mutyima umo, abo bonso kebalonga bukomo bwa kulumbulula busongi bwabo. Kadi shi abelubula ino kakisongelwepo, ubwanya kutanwa na makambakano kampanda. Kimfwa, le bikekala namani pa kuvuija bisakibwa byandi bya ku ngitu ne bya kusambakena pamo? Le abulwe kukemona bu udi bunka? Le dilubu dikekala na lupusa’ka pa bana? Le kakakomenwapo kwibatamija mu bubine? (1 Kodinda 7:14) Na bubine, yewa wambulwa mambo wakwata butyibi bwa kwilubula, ubwanya kutanwa na makambakano makatampe.

12, 13. (a) Le i bika byālongekele mu busongi bwa Hosea? (b) Mwanda waka Hosea wājokeje Ngomela, ne i ñeni’ka yotubwanya kuboila ku busongi bwandi?

 ¹² Myanda yātene mupolofeto Hosea itufundija bivule pa mumwena Leza busongi. Leza wānenene Hosea akasonge mwana-mukaji witwa bu Ngomela, wādi wa kwikala “wa busekese” ne kwikala na “bana ba mu busekese.” Ba Ngomela ne Hosea bābutwile mwana umo mwana-mulume. (Hosea 1:2, 3) Mwenda mafuku, Ngomela wābutula mwana mwana-mukaji ne mwana-mulume, padi i na mulume mukwabo. Nansha Ngomela byaālongele makoji misunsa mivule, Hosea wāshikete nandi. Ku mfulo, wānyema Hosea, wāikala ke mupika. Inoko Hosea wāmujokeje. (Hosea 3:1, 2) Yehova wāingidije Hosea mwanda wa kulombola muswelo waādi ulekela Isalela kyaba ne kyaba, kitatyi kyādi kibulwa muzo kikōkeji kwadi ne kutōta baleza bangi. Le i ñeni’ka yotuboila ku busongi bwa Hosea?

¹³ Shi mwine Kidishitu musonge nansha musongwe walonga busekese, yewa wambulwa mambo unenwe kukwata butyibi. Yesu wānenene amba yewa wambulwa mambo ukekala na bubinga bwendele’mo bwa kwilubwila ne na bwanapabo bwa kwisonga na mukwabo. Inoko ke bibipo shi yewa wambulwa mambo wakwata butyibi bwa kulekela mwinē pandi. Hosea wājokeje Ngomela. Paājokēle kwa Hosea, Hosea wāmulombwele amba kafwaninwepo kulāla na muntu mukwabo. Hosea ‘kālelepo’ na Ngomela mu bula bwa kitatyi kampanda. (Hosea 3:3, kunshi kwa dyani) Ino mwenda mafuku, Hosea wālāla monka na wandi mukaji. Kino kilombola’mba Leza wāitabije kujokeja bene Isalela ne kwendelela kupwana nabo. (Hosea 1:11; 3:3-5) Le kino kitufundija bika pa busongi dyalelo? Shi muntu wambulwa mambo walāla monka na mwinē pandi udi na mambo, kino kikalombola’mba yewa wambulwa mambo wamulekela. (1 Kodinda 7:3, 5) Papo kepakidipo bubinga bwendele’mo bwa kwilubwila. Kupwa ba mulume ne mukaji bakalonga abo bonso bukomo bwa kwikwasha amba bamone busongi na mwibumwena Leza.

14. Kukwatañana na 1 Kodinda 7:10, 11, le i bika padi bibwanya kulongeka mu busongi?

¹⁴ Bene Kidishitu bonso bafwaninwe kulēmeka busongi na mwibulēmekēle ba Yehova ne Yesu. Inoko, kyaba kimo bantu bamo kebebulēmekangapo pa mwanda wa kubulwa kubwaninina. (Loma 7:18-23) Nanshi kebifwaninwepo kwitusansa shi bene Kidishitu bamo mu myaka katwa kabajinji bādi na makambakano makatampe mu busongi bwabo. Polo wālembele amba, “mukaji kafwaninwepo kusansana na mulumyandi.” Inoko kyaba kimo bādi basansana.​—Tanga 1 Kodinda 7:10, 11.

15, 16. (a) Le i bika bifwaninwe kulonga ba mulume ne mukaji shi kubaikala makambakano mu busongi bwabo, ne mwanda waka? (b) Le bikekala namani shi umo pa besongele kengidilangapo Yehova?

¹⁵ Polo kālombwelepo myanda yādi ilengeja ba mulume ne mukaji basansane. Ino tuyukile amba keādipo makambakano kimfwa, a mulume kulonga busekese. Shi bitupu, mukaji wādi wa kwikala na bubinga bwa kwilubwila ne kusongwa na mukwabo. Polo wālembele amba mukaji usansana na wandi mulume “ekale kusongwa mpika shi bitupu apwane monka na wandi mulume.” Nanshi Leza wādi ukimwene bano ba mulume ne mukaji bu besonge. Polo wānenene amba nansha shi ba mulume ne mukaji badi na makambakano ne bikoleja bya muswelo’ka, shi kepadipo ulongele busekese, bafwaninwe kupwana monka, ko kunena’mba kupwija makambakano abo ne kushikatyila pamo. Babwanya ne kunena bakulumpe bebakwashe. Bakulumpe kebakalamatapo ku mutamba umo, ino bakebapa madingi mayampe a mu Bible.

¹⁶ Ino le bikekala namani shi mwine Kidishitu i mwisonge na muntu kengidilapo  Yehova? Le i biyampe kusansana shi mu busongi bwabo mubaikala makambakano? Enka na motwanenenanga kala, Bible unena’mba busekese bo bubinga bwendele’mo bwa kwilubwila. Inoko Bible kaletelepo bubinga bubwanya kusansena ba mulume ne mukaji. Polo wālembele amba: “Shi mwana-mukaji udi na mulume wampikwa kwitabija ino mulume uloelelwe kwikala nandi, kakashiya wandi mulume.” (1 Kodinda 7:12, 13) Ano madingi akidi na mvubu ne dyalelo.

17, 18. Mwanda waka bene Kidishitu bamo bashikete na benē pabo nansha byobadi na makambakano makatampe?

¹⁷ Inoko kubwanya kwikala myanda imo mubwanya “mulume wampikwa kwitabija” kulombola’mba kaloelelwepo “kwikala” na wandi mukaji. Kimfwa, ubwanya kumususula bininge ku ngitu, kufika ne byamona’mba bukomo bwandi bwa ngitu ne būmi bwandi bubaikala mu kyaka. Ubwanya kupela kumukwatakanya aye ne kisaka na bintu bya ku ngitu nansha kumulengeja akomenwe kwingidila Leza. Mu myanda ya uno muswelo, mukaji mwine Kidishitu ukakwata butyibi aye mwine amba mulume kakiloelelwepo “kwikala” nandi ne amba i biyampe kusansana nansha shi wanena bika. Inoko bene Kidishitu bakwabo batenwe na myanda ya uno muswelo, bakwete butyibi bwa kushikata na benē pabo. Baūminine ne kulonga bukomo bwa kulumbulula busongi bwabo. Mwanda waka bakwete butyibi bwa uno muswelo?

¹⁸ Shi ba mulume ne mukaji abasansana pa uno mwanda, bakekala nyeke besonge kadi babwanya kutanwa na makambakano otwatelanga kala. Mutumibwa Polo wāletele bubinga bukwabo bwa ba mulume ne mukaji kushikatyila pamo. Wālembele amba: “Mulume wampikwa kwitabija i mupandulwe pa mwanda wa mukaji, mukaji wampikwa kwitabija nandi i mupandulwe pa mwanda wa mwanetu; shi bitupu benu bana badi ba kwikala ba disubi, ino pano i bajila.” (1 Kodinda 7:14) Bene Kidishitu bavule bakwete butyibi bwa kushikata na benē pabo kebengidilapo Yehova nansha byobadi mu ngikadilo mikomo. Basangele bininge pa kwipāna uno muswelo kitatyi kyaikele benē pabo ke Batumoni ba Yehova mwenda mafuku.​—Tanga 1 Kodinda 7:16; 1 Petelo 3:1, 2.

19. Mwanda waka kudi masongi mavule mayampe mu kipwilo kya bwine Kidishitu?

¹⁹ Yesu wāletele madingi atala pa dilubu, mutumibwa Polo nandi wāleta madingi atala pa kusansana. Abo bonso babidi bādi basaka bengidi ba Leza balēmeke busongi. Kujokoloka ntanda yonso dyalelo, kudi masongi mavule mayampe mu kipwilo kya bwine Kidishitu. Padi ubwanya kutana bantu bavule besongele badi na nsangaji mu kipwilo kyenu, balume ba lulamato basenswe babo bakaji ne bakaji ba buswe balēmekele babo balume. Abo bonso balombolanga’mba busongi bubwanya kulēmekibwa. Kadi tubwanya kusangala pa kuyuka’mba balume ne bakaji midiyo ne midiyo balombolanga’mba binenwa bya Leza i bya bine bya amba: “O mwanda mwine mwana-mulume ukashiya shandi ne inandi kadi ukalamata wandi mukaji, penepo abo babidi bakekala ngitu imo.”​—Efisesa 5:31, 33.