Lelo utañanga manimelo a Kiteba kya Mulami a panopano? Eyo, tala bidi shi ubwanya kulondolola bino bipangujo:

Le i bubinga’ka bwa mu Bisonekwa bulombola’mba Leza witwivwaninanga lusa?

Bene Isalela ba pa kala pobādi bapika mu Edipito, Leza wādi uyukile masusu ne misanshi yabo. (Divilu 3:7; Isaya 63:9) Byotupangilwe mu kyelekejo kya Leza, netu tubwanya kwikala na lusa. Leza witwivwaninanga lusa nansha shi twimona bu ketufwaninwepo buswe bwandi.​—wp18.3, p. 8-9.

Le bufundiji bwa Yesu bwākweshe bantu namani banekenye mboloji?

Bayuda bavule ba mu mafuku a Yesu bādi na mboloji. Kidishitu wālombwele mvubu ya kwityepeja ne kutopeka kwitatwila lukoba. Wāsoñenye balondi bandi bemone bu bana na bana.​—w18.06, p. 9-10.

Le kuleka kokebālekelepo Mosesa kudi Leza atwele mu Ntanda ya Mulao kwitufundija bika?

Mosesa wādi upwene bininge na Yehova. (Kupituluka 34:10) Dya ku mfulo kwa myaka 40 yobādi mu ntanda mutuputupu, bantu bātompwele musunsa wa bubidi mwanda wa mema obābudilwe. Leza wālombola Mosesa anene ku kidibwe. Ino Mosesa wākupila ku kidibwe. Yehova wāfityilwe mwanda Mosesa kālondelepo bulombodi bwandi nansha kutumbija Leza pa mwanda wa kingelengele’kya. (Umbadilo 20:6-12) Kino kitufundija’mba kukōkela Yehova ne kumutumbija kudi na mvubu.​—w18.07, p. 13-14.

Le i muswelo’ka otubwanya kuponena mu kilubo shi tutyiba mambo na kulonda mumwekelo wa panja?

Kudi bintu bisatu bilengejanga bantu bavule batyibe mambo na kulonda mumwekelo wa panja: lukoba nansha musaka, lupeto, ne myaka. I biyampe tulonge bukomo bwa kumona bakwetu pampikwa mboloji na mwibamwena Leza! (Bilongwa 10:34, 35)​—w18.08, p. 8-12.

Le banunu bene Kidishitu babwanya kukwasha bakwabo mu bika?

Mununu mwine Kidishitu washintyilwe mwingilo, Leza ukimukwete na bulēme kadi ubwanya kulonga bivule mwanda wa kukwasha bakwabo. Ubwanya kusapwila mulume nansha mukaji wampikwa kwitabija, kukwasha yewa kakingilanga, kwendeja bifundwa bya Bible, ne kutandabula mwingilo wandi.—w18.09, p. 8-11.

Le bene Kidishitu badi na bika mu Bingidilwa Byabo bya Kufundija Nabyo?

Mudi tulata twa bupempudi ne tukanda twa lwito. Matrakte mwānda kubadila’mo ne mapepala a Kiteba kya Mulami ne Langukai! Mu bingidilwa bya kufundija nabyo mudi ne maboloshile matyetye, mabuku abidi a kufundija nao, ne mavideo aná a kamweno, kubadila’mo ne yoya inena’mba Mwanda Waka Twifunde Bible?​—w18.10, p. 16.

Le mwine Kidishitu ubwanya ‘kupota bubine’ namani na musoñenya’kyo Nkindi 23:23?

Ketupotengapo bubine ku lupeto. Inoko, tufwaninwe kwingidija kitatyi ne bukomo bwetu pa kwikala nabo.​—w18.11, p. 4.

Lelo kushikata kwāshikete Hosea na wandi mukaji Ngomela kwitufundija bika?

Ngomela wālongele makoji misunsa mivule, ino Hosea wāmulekela, wāshikata nandi bu mukaji. Shi mwine Kidishitu musonge nansha musongwe walonga busekese, mwinē pandi wambulwa mambo ubwanya kumulekela. Shi walāla na mwinē pandi udi na mambo, kakidipo na bubinga bwa mu Bisonekwa bwa kwilubwila.​—w18.12, p. 13.