Le ubwanya kulondolola bino bipangujo kukwatañana na manimelo a Kiteba kya Mulami kya 2019?

Le mulao wa Leza wa amba: “I kutupu kyabulwi nansha kimo kikupungīlwe kikalonga kintu” ushintulula bika? (Isa. 54:17)

Tubwanya kukulupila’mba Leza uketukinga ku bino bya bulwi bidi pamo bwa “lunwa lwa bantu ba kasusu.” (Isa. 25:4, 5) Balwana netu kebakabwanyapo kwitusanshija lonso.—w19.01, p. 6-7.

Le muswelo wādi wikele Leza na bene Kenani ne bene Isalela batomboke ulombola namani boloke bwandi?

Leza wāletele butyibi pa boba bādi balonga bilongwa bya disubi bya busekese nansha kususula bana-bakaji ne bana. Wāesele bantu bādi bamukōkele ne boba bādi balongela bakwabo bintu na boloke.—w19.02, p. 22-23.

Le tukalonga namani shi tubatanwa palombela muntu wampikwa kwitabija?

Tukekala talala kadi na bulēme, ino pampikwa kunena “amena” nansha kwikwata ku makasa na bantu batenwe’po. Tubwanya kulombela milombelo yetu mundamunda.—w19.03, p. 31.

Mwanda waka kona mwana na busekese i bubi bukatampe?

Kona mwana na busekese i kulubila mwine onenwe, kipwilo, ba lupusa ba ino ntanda, ne Leza. Shi bijila bya ntanda bilomba kukatūla mwanda wa kona mwana ku Leta, bakulumpe bakebilonda.—w19.05, p. 9-10.

Le i muswelo’ka obwanya kushinta nansha kulumbulula mulangilo obe mwinemwine?

Bintu bikatampe i bino: Wisambe na Yehova mu milombelo. Languluka na kitungo kya kwibandaula abe mwine. Tonga balunda na tunangu.—w19.06, p. 11.

Le i bika byotubwanya kulonga tamba’nka pano pa kwiteakanya ku kupangwapangwa?

Tufwaninwe kuningija kipwano kyetu na Yehova. Kumukulupila’mba witusenswe ne amba kaketwelapo nansha dimo. Kutanga Bible difuku ne difuku, ne kulombela kitatyi ne kitatyi. Kulupila’mba madyese a Bulopwe akafikidila. Kwatyila bisonekwa byosenswe ne ñimbo ya mitendelo.—w19.07, p. 2-4.

Le i bika byotubwanya kulonga pa kukwasha babutule nabo bakapande?

Tufwaninwe kwitūla pa kyabo kyaba, tulekei mwiendelejo wetu muyampe ulete bukamoni, kadi twikalei na kitūkijetyima ne bunwa.—w19.08, p. 15-17.

Le tutūjibwanga namani, na mwālaile’kyo Yesu mu Mateo 11:28?

Tudi na batadi bene Kidishitu ba buswe, balunda bayampe, ne mwingilo muyampe.—w19.09, p. 23.

Le Leza witupanga namani mutyima ne bukomo bwa kulonga kintu? (Fid. 2:13)

Kitatyi kyotutanga Kinenwa kya Leza ne kulangulukila’po, Leza ubwanya kwitukomeja, kwitupa mutyima wa kulonga kiswa-mutyima kyandi ne bukomo bwa kulonga kintu. Mushipiditu wandi ubwanya kuvudija bwino bwetu.—w19.10, p. 21.

Le i bintu’ka bya tunangu byotufwaninwe kulonga kumeso kwa kukwata butyibi bukatampe?

Bintu bitano i bino: Kimba bininge. Lomba tunangu. Bandaula kine kyokwatyila butyibi. Ikala na bitungo bipotoloke. Ikala na mumweno muyampe.—w19.11, p. 27-29.

Le mulangwe wa kubulwa kufwa kwa muya i mutambe ku byobāsapwidile Eva kudi Satana?

Bimweka’mba ke amopo. Satana wāsapwidile Eva amba kakafupo, kāmunenenepo amba ukamweka’tu bu mufwe. I kutupu mulangwe wa bipwilo nansha umo wa bubela wāshele’ko pa kupwa kwa Dilobe. Padi, lukulupilo lwa kubulwa kufwa kwa muya lwāikele’ko kumeso kwa Leza kupalakanya bantu bādi bōbaka kiteba kya Babele.—w19.12, p. 15.