Nsekununi idi mu Kupituluka mu Bijila 22:25-27, keīsambilangapo dibajinji pa kulambikwa mambo kwa mwana-mulume, mwanda mwana-mulume wādi kala mulambikwe mambo. Kino kijila kīsambila pa kujingulula shi mwana-mukaji i wampikwa mambo. Tala myanda īsambilwe’po.

Mavese abadikile esambila pa mwana-mulume walāla mu “kibundi” na mwana-mukaji obakwatyīle. Pa kulonga namino, wādi ulambikwa mambo a makoji, mwanda mwana-mukaji obakwatyīle wādi umonwa bu musongwe. Le mwana-mukaji nandi? “Kadidilepo mu kibundi.” Shi wadidile, bantu badi ba kumwivwana ne kumukūla. Ino kadidilepo. Mu uno muswelo, wālongele makoji, abo bonso bubidi bādi balambikwa mambo.​—Kup. 22:23, 24.

Kadi Bijila bīsambila ne pa uno mwanda’mba: “Shi mwana-mulume watene mu ntanda mwana-mukaji obakwatyīle, kadi mwana-mulume wamupite bukomo walāla nandi, nabya mwana-mulume walēle nandi’wa ukafwa bunka, kufwaninwepo kulonga mwana-mukaji kintu. Mwana-mukaji kalongelepo bubi bwafwaninwe kufwila. Bidi pamo’nka na muntu watamba mukwabo, wamwipaya. Mwanda wamutene mu ntanda, kadi mwana-mukaji mukwatyilwe’wa wadidile, ino kekwadipo muntu wa kumukūla.”​—Kup. 22:25-27.

Mu uno mwanda, batyibi bādi betabija binena mwana-mukaji. Mwanda waka? Mwanda byādi bimweka bu mwana-mukaji “wadidile, ino kekwadipo muntu wa kumukūla.” Nanshi mwana-mukaji kālongelepo makoji. Ino mwana-mulume wādi ulambikwa mambo a kulāla ku bukomo na mwana-mukaji obakwatyīle ne a makoji mwanda “wamupite bukomo walāla nandi.”

Inoko, nansha shi kino kijila kīsambila pa kubulwa mambo kwa mwana-mukaji, nsekununi ilombola patōka’mba mwana-mulume wādi ulambikwa mambo a kulāla nandi ku bukomo ne a makoji. Tubwanya kukulupila’mba batyibi bādi ‘bakimba mwanda senene’ ne kutyiba mambo mungya misoñanya yādi itūdile’ko Leza, mine yādi ipitulukwa’mo kitatyi ne kitatyi.​—Kup. 13:14; 17:4; Div. 20:14.