Aa. Byālembele Davida byādi bya bine.

Tubandaulei’ko byaālembele mu uno vese ne mu mavese makwabo eifwene na uno: “Nkembilanga nyeke dijina dyobe mitendelo koku mfikidija mpiko yami difuku ne difuku.” “A Yehova Leza wami, nkutendelanga na mutyima wami onso, kadi nkatumbijanga dijina dyobe nyeke.” “Nkatendelanga dijina dyobe nyeke ne nyekeke.”—Ñim. 61:8; 86:12; 145:1, 2.

Davida kāpityije’byopo kipimo na kulanga’mba kakafupo. Wādi uyukile amba Yehova wānenene amba bantu bakafwa mwanda bālongele bubi, kadi Davida wādi witabije amba i kipya-mambo. (Ngo. 3:3, 17-19; Ñim. 51:4, 5) Ne kadi wādi uyukile amba enka ne bana-balume bādi betabijibwe na Leza, pamo bwa Abalahama, Izake, ne Yakoba, bāfwile. Nanshi Davida wādi uyukile nandi amba ukafwa. (Ñim. 37:25; 39:4) Inoko binenwa byandi bidi mu Ñimbo ya Mitōto 61:8 bilombola’mba wādi usaka kadi wādi usumininwe kutendela Leza nyeke, ko kunena’mba mu būmi bwandi bonso.—2 Sa. 7:12.

Mu bintu byālembele Davida wālembele’mo ne byāmutene mafuku kunyuma, monka motubwanya kwibimwena mu bilembwa bya kūlu bya Ñimbo ya Mitōto 18, 51, ne 52. Mu Ñimbo ya Mitōto 23, Davida utela’mo Yehova bu mukumbi uludikañana, utūkijañana mutyima, ne ukiñañana. Davida wādi mukumbi wa uno muswelo. Kadi wādi usaka kwingidila Leza mafuku onso a būmi bwandi.—Ñim. 23:6.

Kadi vuluka’mba, Yehova ye wāpele Davida bukomo bwa mushipiditu alembe bino binenwa. Mu byaālembele mubadilwa ne bupolofeto bwisambila pa bintu byādi bya kufika mu mafuku a kumeso bininge. Kimfwa, mu Ñimbo ya Mitōto 110, Davida wisambila’mo pa kitatyi ‘kikashikata Mfumwandi ku kuboko kwa lundyo kwa Leza’ momwa mūlu, ne kupebwa lupusa lukatampe. Mwanda wa kulonga bika? Mwanda wa kunekenya balwana na Leza ne ‘kufikidija butyibi pa mizo’ pano pa ntanda. Davida wādi mukulutuba wa Meshiasa, mwine wādi wa kubikala mūlu ne kwikala bu “kitobo nyeke.” (Ñim. 110:1-6) Yesu wāitabije amba bupolofeto budi mu Ñimbo ya Mitōto 110 bwādi bwisambila pādi, ne amba bukafikidila mu mafuku āya kumeso.—Mat. 22:41-45.

Bine, Davida wāpelwe bukomo bwa mushipiditu wālemba myanda yādi īsambila pa kitatyi kyandi, ne pa kitatyi kya kumeso kyakasangulwa ne kwikala na mukenga wa kutendela Yehova nyeke. Kino kitukwasha twivwanije amba Ñimbo ya Mitōto 37:10, 11, 29 īsambilanga pa ngikadilo yādi’ko mu Isalela wa kala ne pa ngikadilo ikekala’ko ntanda yonso mu mafuku āya kumeso, kitatyi kikafikidija Leza milao yandi.—Tala musango 8 mu kishinte “Ukekalanga Nami mu Paladisa” mu kino Kiteba.

Nanshi Ñimbo ya Mitōto 61:8 ne mavese makwabo esambila pa ino myanda imo yonka, alombola’mba Davida wādi usaka kutumbija Yehova mu Isalela wa kala kufika enka ne byafwa. Kadi ano mavese alombola bikalonga Davida mu mafuku a kumeso kitatyi kyobakamusangula kudi Yehova.