Lelo watangile senene manimelo a uno mwaka a Kiteba kya Mulami? Nabya, tala bidi shi ubwanya kulondolola bino bipangujo:

Le mu ‘kushinta ñeni yetu’ mubadilwa bika ne bika? (Loma 12:2)

Ke enkapo’tu kuneñenya būmi bwetu na mingilo miyampe. Ino mubadilwa ne kubandaula mwine motwikadile munda mwetu, ne kushinta popa potusakilwa kushinta mwanda wa kukwatañanya bininge būmi bwetu na misoñanya ya Leza.—w23.01, p. 8-9.

Le i muswelo’ka otubwanya kulombola bujalale potubandaula binkumenkume bya mu ino ntanda?

Tukimbanga kumona binkumenkume bilongeka pano mobifikidijija bupolofeto. Pa kyaba kya kunena bintu bya kufwatakanya, bine bibwanya kona bumo bwetu, tuloñanga biyampe kwimika mīsambo yetu pa byobya binenene bulongolodi bwa Yehova. (1 Ko. 1:10)—w23.02, p. 16.

Le lubatyijo lwa Yesu lwādi lwishile namani na lwa balondi bandi?

Yesu byaābutwidilwe mu muzo mwipāne kudi Leza, kādipo unenwe kwipāna kudi Yehova na motwipāninanga batwe. Yesu wādi muntu mubwaninine wampikwa bubi. Kādipo usakilwa kwisāsa bubi bwandi.—w23.03, p. 5.

I muswelo’ka otubwanya kukwasha bantu bakwabo balondolole ku kupwila?

Tubwanya kulondolola bīpi, ne kushila bakwabo mukenga wa kulondolola. Kadi i biyampe kwepuka kwisambila pa myanda mivule. Namino ukashila bakwabo mukenga wa kwisambila pa myanda mikwabo.—w23.04, p. 23.

Le “Dishinda dya Buujila” ditelelwe mu Isaya 35:8 difunkila pa bika?

Dino dishinda dikatampe dya kyelekejo dyāfunkīle dibajinji pa dishinda dya Bayuda dya kutamba ku Babiloni kwenda ku yabo ntanda. Le mu ano etu mafuku namo? Mu myaka tutwa na tutwa itwala ku 1919, kwaingilwe mwingilo wa kulongolola dishinda—kimfwa kwalamuna ne kutampa Mabible. Bantu ba Leza bendanga mu “Dishinda dya Buujila” ditwala ku paladisa ya ku mushipiditu, mine itwala ku madyese a mu Bulopwe.—w23.05, p. 15-19.

Le Nkindi 9 uleta madingi’ka atala bana-bakaji babidi ba kyelekejo?

Mukanda wa Nkindi wisambila pa “mwana-mukaji kivila” wa lwito lutwala ku “Kibundu” ne “tunangu twa bine,” twelekejibwe na mwana-mukaji wa lwito lutwala ku “dishinda dya ñeni” ne ku būmi. (Nki. 9:​1, 6, 13, 18)—w23.06, p. 22-24.

Le kwityepeja kwa Leza ne mutyima wandi unekena byāmwekele namani mu muswelo waālongēle Lota bintu?

Yehova wālombwele Lota anyeme mu Sodoma ende akashikate mu ntanda ya ngulu. Inoko Lota paālombele akashikate ku Zoale, Leza wāitabije kulomba kwandi.—w23.07, p. 21.

Le i bika bibwanya kulonga mukaji shi wandi mulume utalanga porno?

Ufwaninwe kuvuluka’mba ke ayepo wa kutopeka. Ufwaninwe kuta mutyima ku kipwano kyandi na Leza ne kulangulukila pa nsekununi ya mu Bible ya bana-bakaji bēkondele na njia, bene bātene busengi kwadi. Ubwanya kukwasha wandi mulume epuke bintu bibwanya kumufikija ku kutala porno.— w23.08, p. 14-17.

Le bujinguludi bubwanya kwitukwasha namani twikale batalala kitatyi kyobafutulula nkulupilo yetu?

Tubwanya kumona kipangujo kyobetwipangula nansha kwitufutulula bu muswelo wa kuyuka milangwe ya muntu’wa nansha bintu byatele’ko mutyima. Mu uno muswelo, tukumbanibwanga mwa kulondolwela na kutalala.— w23.09, p. 17.

Le i neni’ka yotubwanya kuboila kudi Madia pa mwa kumwena bukomo?

Madia paāyukile amba ukekala inandya Meshiasa, wāmwene bukomo kupityila kudi bantu bakwabo. Ngabudyele ne Edisabeta bākankamikile Madia kupityila ku Bisonekwa. Netu tubwanya kumona bukomo kupityila ku batōtyi-netu.—w23.10, p. 15.

Lelo Yehova ubwanya kulondolola namani milombelo yetu?

I mulaye amba ukevwana milombelo yetu ne kubandaula moikwatañenine na mpango yandi. (Yel. 29:12) Ubwanya kulondolola milombelo ya muswelo umo mu miswelo mishileshile, inoko uketukwatakanya nyeke.—w23.11, p. 21-22.

Bene Loma 5:2 utela “lukulupilo,” ino mwanda waka vese 4 wisambila kadi pa lukulupilo?

Shi muntu wateje myanda miyampe, ubwanya kwikala na lukulupilo lwa kwikala na būmi bwa nsangaji mu paladisa pano pa ntanda. Inoko kitatyi kyatanwa na kupangwapangwa, kyaūminina, ne kumona’mba i mwitabijibwe na Leza, lukulupilo lwandi luningilanga’ko ne kwikala bu lwa bine kwadi.—w23.12, p. 12-13.