Mutumibwa Polo wālembēle Temote mukulumpe mukwabo amba: “Nakusoñanya na kusumininwa ku meso a Leza ne a Kidishitu Yesu ne a bamwikeulu batongwe amba lama buno bulombodi pampikwa mfwatakani ne mboloji nansha imo.”—1 Tm. 5:21.

Pa kwitukwasha twivwanije bano bamwikeulu i bāni, tusa kwisambila bidi pa bamwikeulu kebabwanyapo kubadilwa mu kisumpi kya bamwikeulu batelelwe mu 1 Temote 5:21. Na bubine, bano bamwikeulu ke kibumbopo kya ba 144000. Polo paālembēle Temote, lusangukilo lwa mūlu lwa bene Kidishitu bashingwe māni lwādi ke lwashilwile. Batumibwa ne bashingwe māni bakwabo bādi kebaikele bipangwa bya ku mushipiditu, o mwanda “bamwikeulu batongwe” kebabwanyapo kufunkila pobadi.—1 Ko. 15:​50-54; 1 Ts. 4:​13-17; 1 Yoa. 3:2.

Kadi “bamwikeulu batongwe” kebafunkilapo pa bamwikeulu bābudilwe kikōkeji kitatyi kya Dilobe. Bano bamwikeulu bēlungile ku mutamba wa Satana bāikala ke bandemona, balwana na Yesu. (Ngo. 6:2; Luka 8:​30, 31; 2 Pe. 2:4) Mu mafuku āya kumeso bakelwa mu lupongo mu bula bwa myaka 1000 kupwa bakonakanibwa pamo na Dyabola.—Yude 6; Kus. 20:​1-3, 10.

“Bamwikeulu batongwe” bātelele Polo i bamwikeulu badi mūlu bene bādi bakwatakanya ‘Leza ne Kidishitu Yesu,’ bantu batelelwe mu vese umo yenka.

Kudi bamwikeulu ba kikōkeji tununu ne tununu. (Bah. 12:​22, 23) Ketufwaninwepo kulanga’mba mwikeulu yense wingilanga mwingilo umo onka. (Kus. 14:​17, 18) Kimfwa Yehova wānenene mwikeulu umo epaye basola bene Ashidia 185000. (2 Ba. 19:35) Bamwikeulu bavule ye bano i bapebwe mwingilo wa “[kukongakenya panja pa Bulopwe bwa Yesu] bintu byonso bikukaja ne bantu bajilulajilula bijila.” (Mat. 13:​39-41) Kadi bamwikeulu ye bano i bapebwe mwingilo wa ‘kubungakenya batongwe bandi’ mūlu. (Mat. 24:31) Ne kadi bamwikeulu bakwabo i bapebwe musoñanya wa ‘kwitulama mu mashinda etu onso.’—Ñim. 91:11; Mat. 18:10; dingakanya na Mateo 4:11; Luka 22:43.

“Bamwikeulu batongwe” batelelwe mu 1 Temote 5:21 padi i boba bāpelwe mwingilo wa kukwatakanya kipwilo. Polo wādingile bakulumpe pa muswelo obafwaninwe kuvuija biselwa byabo, ne kudingila bantu mu kipwilo amba bafwaninwe kulēmeka bakulumpe. Bakulumpe nabo bafwaninwe kuvuija biselwa byabo “pampikwa mfwatakani ne mboloji nansha imo,” kadi kebafwaninwepo kukwata butyibi bwa bukidibukidi nansha kutyiba mambo na kansontomokela. Bubinga bukatampe bobafwaninwe kulondela madingi a Polo a ku bukomo bwa mushipiditu i amba bengilanga “ku meso a Leza ne a Kidishitu Yesu ne a bamwikeulu batongwe.” O mwanda i kimweke patōka’mba, bamwikeulu bamo i bapebwe mwingilo wa kukwasha kipwilo, kimfwa kukinga bengidi ba Yehova, kwibakwasha mu mwingilo wa busapudi, ne kutūla lapolo kudi Yehova.—Mat. 18:10; Kus. 14:6.