1-2. (a) Le Yehova wisambanga namani na bantu? (b) I bika byotusa kwisambila’po mu kino kishinte?

YEHOVA usenswe kwisamba netu. Pa kala wādi wisamba kupityila ku bapolofeto, bamwikeulu, ne wandi Mwana, Kidishitu Yesu pa kwitulombola milangwe yandi. (Amo. 3:7; Ngt. 3:19; Kus. 1:1) Dyalelo wisambanga netu kupityila ku Kinenwa kyandi Bible. I mwitupe’ye mwanda wa tuyuke milangwe yandi ne kwivwanija mashinda andi.

² Pādi Yesu pano pa ntanda, Yehova wēsambile misunsa isatu aye mūlu. Twisambilei’ko bidi pa bintu byānenene Yehova, pa ñeni yotuboila ku binenwa byandi, ne pa muswelo otubwanya kumwena ku byawānenene.

3. Potutanga Mako 1:9-11, le Yehova wānenene bika pābatyijibwe Yesu, ne bino binenwa bilombola myanda’ka isatu ya mvubu?

³ Mu Mako 1:9-11 i mulembwe musunsa mubajinji wēsambile Yehova aye mūlu. (Tanga.) Wānenene amba: “Abe wi wami Mwana, muswedibwe; nakuloelelwa.” Langa’po bidi mwātengēlwe mutyima wa Yesu pa kwivwana diwi dya Shandi umulombola mwamusanshilwe ne kumukulupila! Bino binenwa bya Yehova bilombola myanda isatu ya mvubu itala Yesu. Mubajinji, Yesu i wandi Mwana. Wa bubidi, Yehova usenswe wandi Mwana. Ne wa busatu, Yehova uloelelwe wandi Mwana. Lekai tubandaule senene musunsa ne musunsa.

4. Pa kubatyijibwa kwa Yesu, le Leza wāsambile nandi kipwano’ka kipya?

⁴ “Abe wi wami Mwana.” Kupityila ku bino binenwa, Yehova wālombwele amba wasamba kipwano kipya na  Yesu, wandi Mwana wasenswe. Yesu paādi momwa mūlu wādi mwanā Leza wa ku mushipiditu. Ino pa lubatyijo lwandi, wāshingilwe māni na mushipiditu ujila. Pano Leza wālombwele amba Yesu, byaādi wandi Mwana mushingwe māni, wāikele na lukulupilo tamba penepa lwa kujokela mūlu akekale bu Mulopwe mutongwe na Leza ne bu Kitobo Mukatampe. (Luka 1:31-33; Bah. 1:8, 9; 2:17) Nanshi Shandi wādi na bubinga bwa kunena pa lubatyijo lwa Yesu amba: “Abe wi wami Mwana.”​—Luka 3:22.

5. Le i muswelo’ka otubwanya kwiula kimfwa kya Yehova kya kukankamika ne kulombola buswe?

⁵ “Abe wi . . . muswedibwe.” Kimfwa kya Yehova kya kukankamika ne kulombola buswe kitufundija’mba tufwaninwe kukimba mikenga ya kukankamika bakwetu. (Yoa. 5:20) Tukankamikwanga shi muntu otutele mutyima witusenswe ne kwitufwija’ko pa bintu biyampe byotulonga. Muswelo umo onka, netu tufwaninwe kusanswa ne kukankamika batutu ne bakaka mu kipwilo ne bantu ba mu kyetu kisaka. Shi tufwija’ko bakwetu, tukomejanga lwitabijo lwabo ne kwibakwasha bengidile Yehova na kikōkeji. Nakampata bambutwile bafwaninwe kukankamika babo bana. Shi bambutwile bafwija’ko babo bana bya binebine ne kulombola’mba bebasenswe, nabya bakakwasha babo bana bendelele.

6. Mwanda waka tufwaninwe kukulupila Yesu Kidishitu?

⁶ “Nakuloelelwa.” Bino binenwa bilombola’mba Yehova wādi ukulupile amba Yesu ukavuija na kikōkeji kiswa-mutyima kya Shandi. Yehova byaādi ukulupile wandi Mwana uno muswelo, netu tubwanya kukulupila ne pa mfulo amba Yesu ukafikidija na kikōkeji milao ya Yehova  yonso. (2 Ko. 1:20) Shi tulangulukile pa kimfwa kya Yesu, tukekala na mutyima wa kuboila ñeni kwadi ne kulonda kimfwa kyandi. Kadi Yehova ukulupile amba bengidi bandi bakendelela na kuboila ñeni kudi wandi Mwana.​—1 Pe. 2:21.

7. Mungya Mateo 17:1-5, le i kitatyi’ka kyēsambile Yehova aye mūlu, ne i bika byaānenene?

⁷ Tanga Mateo 17:1-5. Musunsa wa bubidi wēsambile Yehova aye mūlu i kitatyi ‘kyāshintyile’ Yesu. Yesu wāityile ba Petelo, Yakoba, ne Yoano bakamutūle ku lūlu lulampe. Kwine’kwa, bamona kimonwa kikatampe. Mpala ya Yesu keyeñenya ne bivwalwa byandi kebikelema. Penepo bantu babidi, umo welekeja Mosesa mukwabo nandi Ediya, bāanza kwisamba na Yesu myanda itala lufu ne lusangukilo lwandi. Nansha bano batumibwa basatu byobādi ‘balēmenenwe na tulo,’ bāmwene kino kimonwa kitulumukwa abo ke babūke. (Luka 9:29-32) Kupwa dikumbi dilelema dyēbapūta, kadi bāivwana diwi dyatamba mu dikumbi—ke diwi dya Leza kadi! Enka na pa lubatyijo lwa Yesu, Yehova wālombola’mba uloelelwe wandi mwana kadi umusenswe na kunena’mba: “Uno’u i wami Mwana, muswedibwe, ondoelelwe.” Ino pano, Yehova wābwejeje’ko amba: “Mwivwanei.”

8. Le kino kimonwa kyākweshe namani Yesu ne bana ba bwanga?

⁸ Kino kimonwa kyālombwele ntumbo ne bukomo bwādi bwa kukekala na Yesu bu Mulopwe wa Bulopwe bwa Leza. Na bubine, Kidishitu wākankamikilwe ne kukomejibwa mwanda wādi wa kususuka ne kufwa lufu lusansa. Kadi kino kimonwa kyāningije lwitabijo lwa bana ba bwanga ne kwibakomeja ku matompo ādi ebatengēle kumeso, ne ku mwingilo mukomo obādi ba kwingila mu bula bwa myaka. Kintu kya myaka 30 pa kupita’po, mutumibwa Petelo wēsambīle pa kimonwa kya kushinta, wālombola’mba wādi ukivulukile biyampe kino kimonwa.​—2 Pe. 1:16-18.

9. Lelo Yesu wādingīle bandi bana ba bwanga madingi’ka a kamweno?

⁹ “Mwivwanei.” Yehova wālombwele patōkelela’mba usakanga twivwane binenwa bya wandi Mwana ne kwibikōkela. Le i bika byānenene Yesu paādi pano pa ntanda? Wānenene bintu bivule bya mvubu byotufwaninwe kwivwana! Kimfwa wāfundije na buswe balondi bandi mwa kusapwila myanda miyampe, kadi wēbavulwije misunsa mivule bakeshe’nka kukesha. (Mat. 24:42; 28:19, 20) Ne kadi wēbasoñenye beelele’ko bininge ne kwibakankamika baleke kukōka. (Luka 13:24) Yesu wākankamikile balondi bandi besanswe abo bene na bene, bekale nyeke mu bumo, ne kulama mbila yandi. (Yoa. 15:10, 12, 13) Ano shao o madingi mayampe obādingīle bana ba bwanga kudi Yesu! Ano madingi akidi na kamweno ne dyalelo enka moādi ekadile mu kitatyi kyāletele’o Yesu.

10-11. Le i muswelo’ka otukalombola’mba twivwananga Yesu?

¹⁰ Yesu wānenene amba: “Yewa ense udi ku mutamba wa bubine wivwananga diwi dyami.” (Yoa. 18:37) Tulombolanga’mba twivwananga diwi dyandi shi ‘twendelela kwitūkijija mityima batwe bene na bene ne kwilekela na mutyima umo.’ (Kol. 3:13; Luka 17:3, 4) Kadi tulombolanga’mba twivwananga diwi dyandi na kusapula myanda miyampe na bupyasakane “mu bitatyi biyampe ne mu bitatyi bya makambakano.”​—2 Tm. 4:2.

¹¹ Yesu wānenene amba: “Mikōko yami ivwananga diwi dyami.” (Yoa. 10:27) Balondi  ba Kidishitu balombolanga’mba bevwananga Yesu ke enkapo na kuteja bitupu binenwa byandi, ino i ne kwibingidija. Kebalabikilwepo na “kuzumbija mutyima kwa mu būmi.” (Luka 21:34) Ino bakōkelanga dibajinji mbila ya Yesu mu būmi bwabo, nansha ke pobimweka bu bikomo pene. Banabetu bavule bōmininanga matompo makomo, kubadila’mo kutambwa na balwana, bufudile, ne bimpengele bya kipangila. Nansha byokudi ano matompo onso’a, abo bakōkelanga nyeke Yehova nansha shi bibaikala namani. Yesu wibakulupija’mba: “Yewa ense udi na mbila yami ne kulama’yo ye unsenswe. Ne kadi yewa ense unsenswe, ne Tata nandi ukamusanswa.”—Yoa. 14:21.

12. Le i muswelo’ka mukwabo otulombolanga’mba twivwananga Yesu?

¹² Muswelo mukwabo otulombolanga’mba twivwananga Yesu i kwingidila pamo na boba batongele mwanda wa kwitutangidila. (Bah. 13:7, 17) Mu ino myaka bulongolodi bwa Leza i bushinte bintu bivule, mwine mubadilwa ne kwingidija bingidilwa ne manwa mapya mu mwingilo wetu, muswelo upita kupwila kwetu kwa mu bukata bwa yenga, ne muswelo wa kūbaka, kulongolola, ne kulama Mobo a Bulopwe. Bine tufwijanga’ko pa buno buswe ne bwendeji bulumbuluke! Tukulupile amba Yehova uketwesela pa bukomo botulonga bwa kulonda bulombodi botupebwa na bulongolodi.

13. Le i bika byotukamwena mu kwivwana Yesu?

¹³ Tumwenanga mu kwivwana bintu byonso byāfundije Yesu. Yesu wākulupije bandi bana ba bwanga’mba bufundiji bwandi bukebatūja. Wānenene amba: “Mukamona kutūja. Mwanda lupungu lwami i luyampe, ne kiselwa kyami nakyo i kipēla.” (Mat. 11:28-30) Kinenwa kya Leza, kubadila’mo ne Maevanjile aná esambila pa būmi ne mwingilo wa Yesu, kitutūjanga, kitwalwija bukomo bwa ku mushipiditu, ne kwitupa tunangu. (Ñim. 19:7; 23:3) Yesu wānenene amba: “Ba nsangaji i boba bevwana mwanda wa Leza ne kwiulama!”—Luka 11:28.

14-15. (a) Mungya Yoano 12:27, 28, le i kitatyi’ka kyēsambile Yehova musunsa wa busatu aye mūlu? (b) Mwanda waka binenwa bya Yehova byākankamikile Yesu ne kumukomeja?

¹⁴ Tanga Yoano 12:27, 28. Mu Evanjile ya Yoano mo mulembelwe musunsa  wa busatu wēsambile Yehova aye mūlu. Mafuku matyetye kumeso kwa lufu lwandi, Yesu wādi mu Yelusalema mwanda wa kutanwa ku Pashika yandi ya mfulo. Wānenene amba: “Navutakanibwa.” Kupwa wālombela’mba: “Tata, tumbija dijina dyobe.” Ebiya Shandi nandi wānena aye mūlu amba: “Neditumbija kadi nkeditumbijanga dikwabo.”

¹⁵ Yesu wāvutakanibwe mwanda wādi na kiselwa kikatampe kya kushala mukōkele kudi Yehova. Yesu wādi uyukile amba basa kumususula na bikupilwa ne kufwa lufu lusansa. (Mat. 26:38) Yesu wādi usaka kutumbija dijina dya Shandi kutabuka kintu kyo-kyonso. Yesu wālambikilwe bu muntu utuka Leza, kadi wādi ulangalanga’mba lufu lwandi lusa kufutulwija Leza. Bine, binenwa bya Yehova byākankamikile Yesu bininge! Wākulupile amba dijina dya Yehova dikatumbijibwa. Binenwa bya Shandi, byāsengele Yesu bininge ne kumukankamika ku bintu byādi bimutengēle. Nansha byobimweka bu Yesu kete ye wāivwene byobya byānenene Shandi mu kine kitatyi’kya, Yehova wālembeje binenwa Byandi pa mwanda wa batwe bonso.​—Yoa. 12:29, 30.

16. Mwanda waka kyaba kimo tubwanya kulangalanga pa muswelo ufutululwa dijina dya Leza?

¹⁶ Pamo bwa Yesu, netu tubwanya kulangalanga pa muswelo ufutululwa dijina dya Yehova. Padi tubwanya kulongelwa  bukondame pamo bwa Yesu. Pakwabo twi bavutakanibwe na myanda ya bubela izambalaja balwana netu. Tubwanya kulangulukila pa muswelo ubwanya ino myanda kufutulwija dijina dya Yehova ne bulongolodi bwandi. Mu bitatyi bya uno muswelo, binenwa bya Yehova bituseñanga bininge. I kutupu kyotufwaninwe kuzumbijija mutyima. Tukulupilei amba ‘ndoe ya Leza itabukile ñeni yonso ikalama mityima yetu ne mifwatakanyo yetu kupityila kudi Kidishitu Yesu.’ (Fid. 4:6, 7) Yehova ukatumbija nyeke dijina dyandi. Kupityila ku Bulopwe, ukalongolwela bengidi bandi ba kikōkeji bintu byonso byonene Satana ne ntanda yandi.—Ñim. 94:22, 23; Isa. 65:17.

17. Mungya Isaya 30:21, le i muswelo’ka wisambanga netu Yehova dyalelo?

¹⁷ Yehova wisambanga netu ne dyalelo. (Tanga Isaya 30:21.) Na bubine, ketukokejapo kumwivwana wisamba netu aye mūlu. Inoko i mwitupe Bible, Kinenwa kyandi kisonekwe, mwine mwaetupa bulombodi. Kadi mushipiditu wa Yehova uludikanga “kalama mukōkele” ape nyeke bengidi ba Leza bidibwa byobasakilwa. (Luka 12:42) Bine tudi na bidibwa bivule bya ku mushipiditu bitampe, bya pa Entelenete, mavideo, ne mawi makwatwe!

18. Le binenwa bya Yehova bibakomeja namani lwitabijo lobe ne kukupa bukankamane?

¹⁸ Tuvulukei nyeke binenwa byānenene Yehova kitatyi kyādi wandi Mwana pano pa ntanda! Nanshi binenwa bya Leza bilembelwe mu Bible, bitukulupije amba Yehova uyukile bintu byonso kadi ukalongolola bintu byonso byonene Satana ne ntanda yandi mine. Kadi tusumininwei kwivwana diwi dya Yehova na katentekeji. Shi tulonge uno muswelo, tukōminina makambakano onso otulwa nao dyalelo ne oa aketutana mu mafuku āya kumeso. Bible wituvuluja’mba: “Mufwaninwe kūminina, amba shi mubapu kulonga kiswa-mutyima kya Leza, mumone kufikidila kwa mulao.”​—Bah. 10:36.