Mwingilo umo bidi wādi wingila bantu ba mu kisaka kya Levi ba kubulwa kwikala bu babitobo i wa bumpulushi. Bādi bendejibwa na kapita wa tempelo. Philo mulembi umo Muyuda ulombola mingilo ya bano bampulushi amba: “Bamo mu bano [bene Levi] bādi bemana pa bibelo bu batulama ba ku kibelo pa bibelo byonso, bakwabo munda mwa [tempelo] kampalampala na kipandulwe mwanda wa kukankaja bantu bapelejibwe kutwela’mo bakatyampa’mo lwayo ku kusaka nansha mu kalengwa. Bangi nabo bādi bajokoloka’mo bepingakana bufuku ne dyuba, mwanda wa kwiilama.”

Bano bampulushi bādi bakwasha ne Sanedini. I enka Bayuda kete bāpelwe lupusa na bene Loma lwa kwilumbila byabulwi.

Mungya mufundi umo Joachim Jeremias, “binenwa bya kutopeka byānenene Yesu pobāmukwete, amba difuku ne difuku nadi mfundija mu tempelo, ino kemwankwetepo (Mat. 26:55), bibwanya kwivwanikwa senene shi i bampulushi ba ku tempelo bāile kumukwata.” Kadi uno mulembi ukulupile amba boba bobātumine kukakwata Yesu dibajinji nabo bādi bampulushi ba ku tempelo. (Yoa. 7:32, 45, 46) Bano bampulushi ne kapita wabo bātuminwe mwenda mafuku amba bakaselele bana ba bwanga ba Yesu ku meso a Sanedini, kadi padi bābulwidile Polo panja pa tempelo.​—Bil. 4:1-3; 5:17-27; 21:27-30