Muntu utanga bukidibukidi ino nsekununi ubwanya kwiipangula kino kipangujo. Mu ano mavese i mutelwe bantu babidi betwa bu Mefibosheta, kadi tubwanya kuboila’ko ñeni mivule na kulangulukila pa byālongekele.

Solo mulopwe wa Isalela wādi na bana bana-balume basamba-babidi ne bana bana-bakaji babidi. Wandi mwana mubajinji wādi Yonafane. Mwenda mafuku, mulopwe Solo wabutula na Dizepa wandi mukaji wa pafula, mwana mwana-mulume wāmwinika bu Mefibosheta. Ino Yonafane wandi mwana nandi wābutwile mwana mwana-mulume wāmwinika bu Mefibosheta. Ko kunena’mba, Mulopwe Solo wādi na mwana mwana-mulume witwa bu Mefibosheta, ne munkana mwana-mulume witwa bu Mefibosheta.

Kyaba kimo Mulopwe Solo, wāshikilwe bene Ngibeone bādi bashikata mu bukata mwa bene Isalela, kakimbe kwibakubija. Mobimwekela, bantu bavule mobadi bāipailwe. Bine, kino kyādi kibi mpata. Mwanda waka? Mwanda mu mafuku a Yoshua, bamfumu bene Isalela bāsambile kipwano kya ndoe na bene Ngibeone.​—Yos. 9:3-27.

Kino kipwano kyādi kikidi na bulēme ne mu mafuku a Mulopwe Solo. Ne kubanga kipwano kyabo kwine mpika, mulopwe wākimbile kukubija bene Ngibeone. Kulonga namino kwāletele “mambo a mashi padi Solo ne pa njibo yandi.” (2 Sa. 21:1) Kupwa Davida wāikala mulopwe. Ebiya bene Ngibeone bāpandile, bākalombola Davida kino kilubo kikatampe. Ebiya Davida wēbepangula byobabwanya kwibafuta pa kino kilongwa kibi kyālongele Solo, mwanda wa Yehova esele ntanda. Pa kyaba kya kulomba lupeto, bene Ngibeone bālomba bebape bana basamba-babidi ba Solo, mwine ‘wākutyile nkuku ya kwibakubija,’ amba nabo bebepaye. (Umb. 35:30, 31) Davida nandi wāitabija.​—2 Sa. 21:2-6.

Mu kino kitatyi ba Solo ne Yonafane bādi ke bafwe ku divita, inoko Mefibosheta mwanā Yonafane wādi ukidi’ko mūmi. Wālemene ukidi’tu mwanuke mu akishida, kadi kākweshe’kopo nkambo wandi paādi ukimba kukubija bene Ngibeone. Davida wāsambile kipwano na Yonafane, kipwano kyādi kya kumwena’mo bandi bana kubadila’mo ne Mefibosheta mwanā Yonafane. (1Sa. 18:1; 20:42) Nsekununi inena’mba: “Mulopwe [Davida] waivwanina bulanda Mefibosheta, mwanā Yonafane mwanā Solo, mwanda wa mutyipo wetyipile ba Davida ne Yonafane mwanā Solo ku meso a Yehova.”​—2 Sa. 21:7.

Inoko, Davida wālongele byāmulombele bene Ngibeone. Wēbapele bana babidi bana-balume ba Solo, mwādi umo witwa bu Mefibosheta, ne bankana ba Solo batano. (2 Sa. 21:8,9) Kilongwa kya Davida, kyālengeje ntanda ileke kulambikwa mambo a mashi.

Uno mwanda ke māngapo’tu bitupu. Kijila kya Leza kyādi padi tō. Kyādi kinena amba: “Bana nabo kebakepaibwapo pa mwanda wa bilongele bashabo.” (Kup. 24:16) Yehova kādipo wa kwitabija byobālongele bana ba Solo babidi bana-balume ne bandi bankana bana-balume batano shi kebādipo na mambo. Kino kijila kibweja’ko amba: “Muntu ukepaibwa pa bubi bwa aye mwine.” Bimweka bu bana babidi ba Solo ne bandi bankana batano bāipailwe, bālungile kuboko mu muswelo kampanda ku nkuku ya Solo ya kwipaya bene Ngibeone. Pa kino, bano bantu basamba-babidi bāfwile pa mwanda wa bubi bwabo.

Ino nsekununi ilombola amba, muntu kabwanyapo kubingija kilongwa kibi kyalongele na kunena nansha kulanga’mba, i mwikilonge mwanda bamusoñenye ekilonge. Lukindi lumo lwa tunangu lunena’mba: “Seneja biyampe dishinda dya maulu obe, kadi mashinda obe onso akekala senene.”​—Nki. 4:24-27; Ef. 5:15.