1. Le i milangwe’ka ibwanya kwikonda na bengidi bamo ba Yehova ba kikōkeji?

 BINE, bisenga’po kashā kuyuka’mba Yehova uloelelwe bantu bandi mu kikonge! Bible unena’mba: “Yehova uloelelwe bantu bandi.” (Ñim. 149:4) Inoko kyaba kimo, bamo batyumukwanga mutyima kebeipangula’mba, ‘Le Yehova undoelelwe?’ Batōtyi ba Yehova bavule ba mu kitatyi kyāsonekelwe Bible bēkondele na ino milangwe.—1 Sa. 1:​6-10; Yoba 29:​2, 4; Ñim. 51:11.

2. Le i ani obaloelelwe kudi Yehova?

² Bible ulombola patōka’mba bantu ba kubulwa kubwaninina babwanya kwitabijibwa nansha kuloelelwa na Yehova. Muswelo’ka? Tufwaninwe kulombola lwitabijo mudi Yesu Kidishitu ne kubatyijibwa. (Yoa. 3:16) Mu uno muswelo, tulombolanga ku meso a bantu bonso amba twi besāse bubi bwetu ne kulaya Leza amba tukalonga kiswa-mutyima kyandi. (Bil. 2:38; 3:19) Yehova usangalanga bininge paetumona tulonga bino bintu mwanda wa kupwana nandi. Kitatyi kyonso kyotwendelela kulonga bukomo bwa kwiendeja mungya mpiko yetu ya kwipāna, Yehova wituloelelwanga ne kwitumona bu balunda nandi ba binebine.—Ñim. 25:14.

3. Le i bika byoketwisambila’po pano?

³ Ino mwanda waka bamo balañanga kyaba kimo amba Leza kebaloelelwepo? Le Yehova ulombolanga namani amba wituloelelwe? Ne i muswelo’ka ubwanya mwine Kidishitu kuningija kikulupiji kyandi kya amba Leza umuloelelwe? Bino ye byoketwisambila’po pano.

KINE KIBWANYA KULENGEJA BAMO BALANGE AMBA YEHOVA KEBALOELELWEPO

4-5. Nansha shi twimonanga bu bampikwa mvubu, le i bika byotubwanya kukulupila?

⁴ Bavule motudi bekondanga na milangwe ya kwityepelwa tamba ku bunkasampe bwabo. (Ñim. 88:15) Tutu umo witwa  bu Adrián unena’mba: “Nemonanga nyeke bu wampikwa mvubu. Mvuluka ponakidi mwanuke, nadi nombela’mba kisaka kyami kikekale’ko mu Paladisa nansha byonadi nemona bu nkifwaninwepo kwikala’mo.” Tony, mwine katamīnepo mu kisaka kya Batumoni unena’mba: “Bambutwile bami kebadipo banombola nansha dimo amba bansenswe nansha’mba bantendelanga. Kino kyanengeje mone amba i kutupu kintu nansha kimo kyonkalonga kikebasangaja.”

⁵ Shi netu kyaba kimo twimonanga bu bampikwa mvubu, tuvulukei nyeke amba Yehova aye mwine ye wetukokēle kwadi. (Yoa. 6:44) Umonanga biyampe bidi motudi bine byoketubwanyapo batwe bene kumona, kadi uyukile muntu wetu wa munda. (1 Sa. 16:7; 2 Bi. 6:30) Nanshi tubwanya kumukulupila pānena’mba twibalēme.—1 Yo. 3:​19, 20.

6. Le Polo wādi wiivwana namani pa bubi bwandi bwa pa kala?

⁶ Kumeso kwa kwifunda bubine, bamo motudi balongele bintu bine bibwanya kulengeja mutyima wikale wibatopeka enka ne pano. (1 Pe. 4:3) Nansha ke bene Kidishitu ba kikōkeji bekondanga na milangwe ya kulonga bubi. Lelo mutyima obe ukutopekanga? Shi i amo, ukasengibwa na kuyuka’mba bengidi ba Yehova ba kikōkeji bēkondele na milangwe pamo bwa ino. Kimfwa, mutumibwa Polo wēmwene bu kimonya-malwa paādi ulangulukila pa kubulwa kubwaninina kwandi. (Loma 7:24) Na bubine, Polo wēsāshile bubi bwandi ne kubatyijibwa. Inoko wētelele aye mwine bu “mutyetyetyetye mu batumibwa” ne bu ‘mutabuke’mo’ mu babipya-mambo.—1 Ko. 15:9; 1 Tm. 1:15.

7. Le i bika byotufwaninwe kuvuluka pa mwanda utala bubi bwetu bwa pa kala?

⁷ Tata wetu wa mūlu i mulaye kwitulekela shi tubesāsa. (Ñim. 86:5) Nanshi shi tubealakanya bya binebine pa bubi botwalongele, tubwanya kukulupila’mba byobya binenene Yehova i bya bine, ne amba i mwitulekele.—Kol. 2:13.

8-9. Le i muswelo’ka otubwanya kunekenya milangwe ya kwimona’mba ketubwanyapo nansha dimo kusangaja Yehova?

⁸ Batwe bonso tusakanga kulonga byonso byotubwanya mwanda wa kwingidila Yehova bininge. Inoko bamo balañanga’mba, kebabwanyapo kulonga byobya bifwaninwe pa kusaka’mba Yehova ebaloelelwe. Kaka umo witwa bu Amanda unena’mba: “Nañanga nyeke amba kupa Yehova bilumbuluke byami i kulonga nyeke bivule. O mwanda noñanga kyaba kyonso bukomo bwa kulonga bivule kutabuka pa byobya byombwanya. Shi ‘natunya’ kufikila pa byobya byonkimba kulonga, monanga’mba natyumuna Yehova mutyima ne kwimona ami mwine bu wa bule.”

⁹ Le i muswelo’ka otubwanya kunekenya milangwe ya kwimona’mba ketubwanyapo nansha dimo kusangaja Yehova? I na kuvuluka’mba Yehova ke wa kasuminijipo nansha wa kubulwa mutyima unekena. Ketulombengapo tulonge bivule kupita pa byobya byotubwanya mungya bukomo bwetu. Usangelanga byonso byotumulongela ponso potumupa bilumbuluke byetu. Kadi langulukila pa bimfwa bya mu Bible bya boba bāingidile Yehova na muya wabo onso. Kimfwa langulukila padi Polo. Wēpene na bupyasakane mu bula bwa myaka mivule, wenda ñendo ya makilometele tununu ne tununu ne kushimika bipwilo bivule. Ino pāshintyile bintu mu būmi bwandi kakibwanyapo kulonga bivule mu mwingilo wa busapudi, le Yehova kākimuloelelwepo? Aa. Polo wāendelele kulonga byobya byaādi ubwanya kadi Yehova wāmwesele. (Bil. 28:​30, 31) Ne batwe netu, byobya byotupa Yehova bibwanya kushinta kyaba kimo. Inoko kintu kya mvubu kwadi  i kine kitutonona twibilonge. Shi ke pano, twisambilei’ko pa miswelo imo ilombolanga’mo Yehova amba wituloelelwe.

LE YEHOVA ULOMBOLANGA NAMANI AMBA WITULOELELWE?

10. Le i muswelo’ka otubwanya ‘kwivwana’ Yehova witusapwila’mba wituloelelwe? (Yoano 16:27)

¹⁰ Kupityila ku Bible. Yehova usenswe kulombola boba bāsenswe amba wibaloelelwe. Mu Bisonekwa mudi nsekununi ilombola misunsa ibidi mobālombwele Yesu kudi Yehova amba, i wandi Mwana wasenswe kadi waloelelwe. (Mat. 3:17; 17:5) Lelo ukasaka kwivwana Yehova ukukulupija’mba ukuloelelwe? Dyalelo Yehova kakīsambengapo netu na diwi divwanikwa, ino wisambanga netu kupityila ku Kinenwa kyandi. Tubwanya ‘kuteja’ diwi dya Yehova ditulombola’mba wituloelelwe, potutanga binenwa bya Yesu bidi mu Maevanjile. (Tanga Yoano 16:27.) Yesu wālombwele bumuntu bwa Shandi mu muswelo mubwaninine. Nanshi kitatyi kyotutanga’mba Yesu wālombwele balondi bandi ba kubulwa kubwanina abo’ko ba kikōkeji amba wibaloelelwe, tubwanya kumona mu ñeni Yehova witusapwila bino binenwa.—Yoa. 15:​9, 15.

11. Mwanda waka kutanwa na makambakano kekushintululapo amba Yehova kakituloelelwepo? (Yakoba 1:12)

¹¹ Kupityila ku bilongwa byandi. Yehova usakanga kwitukwasha, kimfwa na kuvuija bisakibwa byetu bya ku ngitu. Kyaba kimo, Yehova ubwanya kuleka bintu bibi bitufikile monka mwaālongedile’byo kudi Yoba muntu moloke. (Yoba 1:​8-11) Kutanwa na makambakano kekushintululapo amba Yehova kakituloelelwepo. Ino kwitupanga mukenga wa kulombola motusanshilwe bininge Leza ne kutūla kikulupiji kyetu mwadi. (Tanga Yakoba 1:12.) Netu tukamona mwaetusanshilwe bininge ne mwaetukwashisha tūminine.

12. Le i ñeni’ka yotubwanya kuboila ku kimfwa kya Dmitrii?

¹² Tubandaulei’ko byatene tutu umo wa mu Azia witwa bu Dmitrii. Wajimije kaji ne kwikala mu bulofwa mu bula bwa myeji mivule. Ebiya wakwata butyibi bwa kulonga bivule mu mwingilo wa busapudi mwanda wa kulombola kikulupiji kyandi mudi Yehova. Kadi myeji mivule yapita’po kusokola kaji mpika. Kupwa wabela misongo mine yamwikadije ke’nka wa mu butanda. Washilula kulanga’mba kakidipo mulume nansha tata muyampe, ne kwanza kwiipangula shi Yehova ukimuloelelwe. Ebiya  wandi mwana mwana-mukaji watampa pa papye binenwa bidi mu Isaya 30:15 binena’mba: “Mukekala bakomo shi mwikale talala nyā ne kukulupila.” Wamutūdila’byo ku butanda ne kunena’mba, “Tata, shi ubeivwana bibi ubwanya kuvuluka kino kisonekwa.” Dmitrii wajingulula’mba na bukwashi bwa Yehova, kisaka kyandi kyadi nyeke na bidibwa, bivwalwa, ne mwa kushikata. Unena’mba, “Kintu kyonadi mfwaninwe kulonga i kwikala talala ne kwendelela kukulupila mudi Leza wami.” Shi nobe wikondanga na makambakano bwa ano, ubwanya kukulupila’mba Yehova ukukwatakanyanga kadi ukakukwasha ūminine.

13. Le Yehova ubwanya kwingidija bāni mwanda wa kwitukulupija’mba wituloelelwe, ne wibengidijanga muswelo’ka?

¹³ Kupityila ku batutu ne bakaka. Yehova wingidijanga batutu ne bakaka mwanda wa kwitulombola’mba wituloelelwe. Kimfwa, ubwanya kulengeja bantu bakwabo betusapwile binenwa bikankamika pa kitatyi kifwaninwe. Kaka umo wa mu Azia wemwenine uno mwanda kitatyi kyaavutakanibwe ñeni bininge. Wajimije kaji ne kubela bininge. Kupwa wandi mulume walonga bubi bukatampe ne kuyatwa madyese a bukulumpe. Wanenene amba, “Nkyaivwanijepo mwanda waka bino bintu byamfikīle. Nalangile amba padi kudi kintu kibi kyonongele kadi Leza kakindoelelwepo.” Kaka wetu wazenzele Yehova amukulupije amba umuloelelwe. Le Yehova wamukulupije namani? Unena’mba, “Bakulumpe pa kipwilo besambile nami ne kunkulupija’mba Yehova unsenswe.” Mwenda mafuku, walombele monka Yehova amukwashe. Unena’mba, “Difuku’dya natambwile mukanda wantumine kisumpi kya batutu ne bakaka. Ponatangile binenwa byabo bisenga, namwene amba Yehova wangivwene.” Bine, Yehova ulombolanga divule amba wituloelelwe kupityila ku binenwa biyampe bya bantu bakwabo.—Ñim. 10:17.

14. Le i muswelo’ka mukwabo witulombolanga’mo Yehova amba wituloelelwe?

 ¹⁴ Kadi Yehova witulombolanga’mba wituloelelwe na kwingidija banabetu mu lwitabijo mwanda wa betupe madingi kitatyi kyotusakilwa’o. Kimfwa, mu myaka katwa kabajinji, Yehova wāingidije mutumibwa Polo alembele banababo mu lwitabijo mikanda 14 ya ku bukomo bwa mushipiditu. Mu ino mikanda mwādi madingi masumininwe inoko kadi a buswe. Mwanda waka Yehova wāpele Polo bukomo bwa mushipiditu amba alembe ano madingi? Yehova i Tata muyampe, kadi ulemununanga bandi bana ‘bāloelelwe.’ (Nki. 3:​11, 12) Nanshi kitatyi kyobetudingila madingi akwatañene na Bible, ketwakilangai amba Leza kakituloelelwepo. Twiamonei bu bubinga bulombola’mba Leza wituloelelwe. (Bah. 12:6) Le i bubinga’ka bukwabo bulombola’mba Leza wituloelelwe?

BUBINGA BUKWABO BULOMBOLA AMBA YEHOVA WITULOELELWE

15. Le Yehova upānga bāni mushipiditu wandi ujila, ne mwanda waka kino kibwanya kwitukulupija?

¹⁵ Yehova upānanga wandi mushipiditu ujila ku boba baloelelwe. (Mat. 12:18) Tubwanya kwiipangula’mba, ‘Lelo mwekejanga ngikadila kampanda ya mu kipa kya mushipiditu ujila mu bwami būmi?’ Lelo wi mumone amba kotūkijijanga bantu bakwabo mutyima kutabuka powadi kwayukile Yehova? Na bubine, poenda wifunda kumwekeja ngikadila ya kipa kya mushipiditu wa Leza, po pene ukamona’mba Yehova ukuloelelwe!—Tala kapango “ Kipa kya Mushipiditu I . . . ”

16. Le Yehova wingidijanga bāni mwanda wa kusapula myanda miyampe, ne kino kikulengeja wiivwane namani? (1 Bene Tesalonika 2:4)

¹⁶ Yehova i mupe boba baloelelwe myanda miyampe. (Tanga 1 Bene Tesalonika 2:4.) Tala kaka Jocelyn mwaamwenine mu kusapwila bantu bakwabo myanda miyampe. Difuku dimo, Jocelyn wabūkile ñeni mimuvutakane. Unena’mba: “Nkyadipo na bukomo kadi nemwene bu wampikwa mvubu. Inoko nadi pania, kadi difuku’dya dyadi dya ami kwenda mu busapudi. Ebiya nalombela, kupwa naenda mu busapudi.” Difuku’dya lubanga Jocelyn wetana na Mary, mwana-mukaji wa ngikadila miyampe waitabije kwifunda Bible. Myeji mityetye pa kupita’po, Mary wanenene amba paile Jocelyn kukokola ku yami njibo, nadi nombela Leza ankwashe. Jocelyn palangulukila pa uno mwanda unena’mba, “Neivwene’nka  bwa Yehova unombola’mba, ‘Nkuloelelwe.’” Shako, ke muntupo yense ukasangela musapu wetu. Inoko tubwanya kukulupila’mba Yehova usangalanga potulonga bukomo bwetu bonso mwanda wa kusapwila bantu bakwabo myanda miyampe.

17. Le i ñeni’ka yowaboila ku byanenene Vicky pangala pa kinkūlwa? (Ñimbo ya Mitōto 5:12)

¹⁷ Yehova wingidijanga bulēme bwa kinkūlwa ku boba baloelelwe. (1 Tm. 2:​5, 6) Ino le bikekala namani shi mutyima wetu wendelela kutatana mulangwe wa amba Yehova wituloelelwe nansha shi tudi na lwitabijo mu kinkūlwa kadi ketudi babatyijibwe? Tuvulukei amba, ketubwanyapo nyeke kukulupila mwiivwanino wetu, inoko tubwanya kukulupila Yehova. Aye umonanga boba badi na lwitabijo mu kinkūlwa bu boloke kadi i mulaye kwibesela. (Tanga Ñimbo ya Mitōto 5:12; Loma 3:26) Kulangulukila pa kinkūlwa kwakweshe Vicky. Difuku dimo pa kupwa kulangulukila pa kinkūlwa, wanenene amba: “Yehova wantūkijije mutyima mu bula bwa kitatyi kilampe. . . . Inoko nadi’nka bwa amiwa umusapwila’mba: ‘Buswe bobe ke bukatampepo bubwanya kufika kondi. Kitapwa kya obe mwana kekibwanyapo kupūta bubi bwami.’” Byaalangulukile pa kyabuntu kya kinkūlwa, washilwile kumona’mba Yehova umusenswe. Netu shi tulangulukila pa kitapwa kya kinkūlwa, tukamona’mba Yehova witusenswe kadi wituloelelwe.

18. Le i bika byotubwanya nyeke kukulupila shi tusanswe nyeke Tata wetu wa mūlu?

¹⁸ Nansha byotubwanya kwielela’ko kulonda madingi otwefunda mu kino kishinte, tubwanya kyaba kimo kutyumukwa mutyima ne kwiipangula shi Yehova wituloelelwe. Shi kino kibetufikila, tuvulukei amba aye uloelelwe “boba bamusenswe nyeke.” (Yak. 1:12) Nanshi endelela kufwena Yehova ne kuta mutyima ku miswelo yonso yakulombola’mba ukuloelelwe. Kadi vuluka nyeke amba Yehova kadipo “bine kulampe na batwe bonso.”—Bil. 17:27.