1-2. Le i bika bifwaninwe kulonga muntu kumeso kwa kubatyijibwa?

 MU BULA bwa myaka itano ipityile’i, bantu mudiyo umo ne kupita i babatyijibwe ke Batumoni ba Yehova. Bavule mu bano’ba, bafundijibwe “tamba ku bwanuke” pamo bwa mwanā bwanga Temote wa mu myaka katwa kabajinji. (2 Tm. 3:​14, 15) Bakwabo befundile myanda ya Yehova ke batame, kadi bamo befundile’yo pobadi ke banunu. Lolo umo wadi wifunda Bible na Batumoni ba Yehova, wabatyijibwe na myaka 97!

² Shi ukīfundanga Bible nansha bambutwile bobe i Batumoni, lelo ulañanga ya kubatyijibwa? Kino i kitungo kilumbuluke’po kashā! Inoko kumeso kwa kubatyijibwa, ufwaninwe kwipāna kudi Yehova. Kino kishinte kisa kulombola mushintulwila kupāna būmi bobe kudi Leza. Kadi kisa kukukwasha umone mwanda waka kekudipo bubinga nansha bumo bwa kukulengeja wikake kutabula dino ditabula ne kubatyijibwa, shi kodi mwiteakanye.

LE KWIPĀNA BYO BIKA?

3. Leta bimfwa bya mu Bible bya bantu bādi bepāne kudi Yehova.

³ Mu Bible, kwipāna kushintulula kutūlwa pafula mwanda wa kwingila mwingilo wa pa bula. Isalela wādi muzo mwipāne kudi Yehova. Inoko bene Isalela bamo bādi bepāne kudi Yehova mu muswelo wa pa bula. Kimfwa, Alone wādi uvwala “kiyukeno kijila kya kwipāna”—kipāpo kya olo kikelema kumeso kwa kivwalwa kyandi kya ku mutwe. Kino kipāpo kya olo kyādi kilombola’mba  i mutūlwe pafula mwanda wa kwingila mu muswelo wa pa bula—ke bu kitobo mukatampe wa Isalela kadi. (Levi 8:9) Ne bene Nazila nabo bādi bepāne kudi Yehova mu muswelo wa pa bula. Kishima “Mwine Nazila,” i kitambe ku kishima kya Kihebelu nazir, kishintulula “Mutūlwe Pafula,” nansha “Mwipāne.” Bene Nazila bādi banenwe kukōkela bijila bya pa bula bya mu Bijila bya Mosesa.—Umb. 6:​2-8.

4. (a) Le boba bepānanga kudi Yehova batūlwanga pafula mwanda wa kwingila mwingilo wa pa bula mu buluji’ka? (b) Le ‘kwipela abe mwine’ kushintulula bika? (Tala ne kifwatulo.)

⁴ Shi ubepāna kudi Yehova, ubatonge kwikala mwanā bwanga wa Yesu Kidishitu, ne kutūla kulonga kiswa-mutyima kya Leza bu kintu kya mvubu mpata mu bobe būmi. Le kwipāna kwa bwine Kidishitu kukakulomba bika? Yesu wānenene amba: “Shi muntu usaka kunonda, nankyo epele aye mwine.” (Mat. 16:24) Shi kodi mwingidi wa Yehova mwipāne, bikakulomba kupela kintu kyo-kyonso kekikwatañenepo na kiswa-mutyima kyandi. (2 Ko. 5:​14, 15) Ko kunena’mba ukapela “mingilo ya ngitu,” pamo bwa busekese. (Ngt. 5:​19-21; 1 Ko. 6:18) Le kukōkela bino bijila kukakulengeja wikale na būmi bwa kutyinibwa mbavu? Kukebimonepo namino shi usenswe Yehova ne kukulupila’mba bijila byandi bidi’ko mwanda wa kamweno kobe. (Ñim. 119:97; Isa. 48:​17, 18) Tutu umo witwa bu Nicholas unena’mba, “Ubwanya kumona misoñanya ya Leza pamo bwa kipango kya ku buloko kikukankaja kulonga bintu byosaka, nansha kwiimona bu kipango kitūdilwe mu kifuko mudi ntambo kine kikukinga ku kyaka.”

5. (a) Le ukepāna namani kudi Yehova? (b) Le i kwishila’ka kudi pa bukata bwa kwipāna ne kubatyijibwa? (Tala ne kifwatulo.)

⁵ Le ukepāna namani kudi Yehova? I na kumulaya mu milombelo amba ukamutōta  enka aye bunka bwandi, ne amba ukatūla kiswa-mutyima kyandi pa kifuko kibajinji mu bobe būmi. Na bubine, i kulaya Yehova amba ukendelela kumusanswa “na mutyima obe onso, na muya obe onso, na ñeni yobe yonso, ne na bukomo bobe bonso.” (Mako 12:30) Ukepāna kufula, kwa bunka bobe na Yehova. Inoko ukabatyijibwa ku meso a bantu bonso, bine bikalombola bantu bakwabo amba wi mwipāne. Kwipāna kobe i mpiko ikola. Ufwaninwe kulonga bukomo bwa kufikidija ino mpiko, kadi bino byo bikusakila ne Yehova.—Mus. 5:​4, 5.

MWANDA WAKA WIPĀNE KUDI YEHOVA?

6. I bika bitononanga muntu epāne kudi Yehova?

⁶ Bubinga bukatampe bowipānina kudi Yehova, i buswe bomusenswe. Buswe bobe kebwimaninepo’tu pa muswelo owiivwana kete. Ino bwimanine pa “buyuki bwa binebine” ne pa “kwivwanija kuletwa na mushipiditu”—ko kunena’mba, bintu byowefundile padi Yehova byo bikulengeje uningije buswe bomusenswe. (Kol. 1:9) Kwifunda Bisonekwa i kukukulupije (1) amba Yehova udi’ko bine, (2) amba Bible i Kinenwa kyandi kya ku bukomo bwa mushipiditu ne (3) amba wingidijanga bulongolodi bwandi mwanda wa kulonga kiswa-mutyima kyandi.

7. Le i bika byotunenwe kulonga kumeso kwa kwipāna kudi Leza?

⁷ Boba bepāna kudi Yehova bafwaninwe kuyuka bufundiji bwa kyalwilo budi mu Kinenwa kya Leza ne kwiendeja mungya misoñanya idi’mo. Basapwilanga bantu bakwabo bintu byobefundile kukwatañana na ngikadilo yabo. (Mat. 28:​19, 20) Buswe bobasenswe Yehova i buvudile’ko, kadi basakanga bya binebine  kumutōta enka aye bunka bwandi. Mwene ye mobikadile ne kodi? Shi usanswe Yehova namino, kukepānapo ne kubatyijibwa mwanda’tu wa kusangaja yewa ukufundijanga Bible nansha bambutwile bobe, nansha kulonga’byo’tu mwanda byo bilonga balunda nobe bonso.

8. Le kufwija’ko kubwanya kukukwasha namani ukwate butyibi bwa kwipāna kudi Yehova? (Ñimbo ya Mitōto 116:​12-14)

⁸ Ukakwata butyibi bwa kwipāna kudi Yehova, shi ulangulukile pa bintu byonso byakulongēle. (Tanga Ñimbo ya Mitōto 116:​12-14.) Bible utela Yehova bu yewa upananga “kyabuntu kyonso kiyampe ne kya kupānwa kyonso kibwaninine.” (Yak. 1:17) Kyabuntu kikatampe kyaetupele, i kitapwa kya wandi Mwana Yesu. Langa’po bidi! Kinkūlwa i kikulengeje ubwanye kwikala mu kipwano kya mpwaninine na Yehova. Kadi Yehova i mwitupe mukenga wa kwikala’ko nyenke. (1 Yo. 4:​9, 10, 19) Kwipāna kudi Yehova i muswelo muyampe wa kulombola’mba umufwijanga’ko pa kilongwa kikatampe kyakulongēle, ne pa madyese onso akwesele. (Kup. 16:17; 2 Ko. 5:15) Kuno kufwija’ko i kwisambilwe’po mu dibuku Ikala Mūmi Nyeke! mu kifundwa 46 kipindi 4, mwine mudi ne video ya minite 3 inena’mba Pá Leza Byabuntu Byobe.

LELO WI MWITEAKANYE MWANDA WA KWIPĀNA NE KUBATYIJIBWA?

9. Mwanda waka muntu kafwaninwepo kuningilwa kwipāna?

⁹ Ubwanya kumona’mba kweteakenye mwanda wa kwipāna ne kubatyijibwa. Padi ukisakilwa kushinta bintu kampanda mu bobe būmi mwanda wa kwibukwatañanya na misoñanya ya Yehova, nansha padi ukisakilwa’ko kitatyi mwanda wa kuningija lwitabijo lobe. (Kol. 2:​6, 7) Bonso befunda Bible kebendelelangapo muswelo umo, kadi ke bankasampepo bonso beteakanyanga mwanda wa kwipāna ne kubatyijibwa na myaka imo. Nanshi bandaula kwendelela kobe kukwatañana na byobwanya kulonga, ke na kwidingakanyapo na bantu bakwabo.—Ngt. 6:​4, 5.

10. Le i bika byobwanya kulonga shi ubamone amba kweteakenye mwanda wa kwipāna ne kubatyijibwa? (Tala ne kapango “ Ku Bankasampe ba mu Kisaka kya Batumoni.”)

¹⁰ Nansha shi ubamone amba kweteakenye mwanda wa kwipāna kudi Yehova, endelela kwitungila kino kitungo. Lomba Yehova akwesele pa bukomo bolonga mwanda wa kushinta popa ponso posakilwa kushinta. (Fid. 2:13; 3:16) Kulupila’mba ukateja milombelo yobe ne kwiilondolola.—1 Yo. 5:14.

MWANDA WAKA BAMO BEKAKANGA

11. Le Yehova uketukwasha namani twikale nyeke ba kikōkeji?

¹¹ Bamo beteakenye mwanda wa kwipāna ne kubatyijibwa, bendelelanga kwikaka. Ye bano beipangulanga’mba, ‘Le bikekala namani shi nalonga bubi bukatampe ne kupangwa?’ Shi ye moyo odi nao, kulupila’mba Yehova ukakupa byonso byosakilwa “amba [unangile mwa kumufwaninwa] mwanda wa kumusangaja ne pa mfulo.” (Kol. 1:10) Kadi ukakupa bukomo bwa kulonga byobya byoloke. Ke mukwashe kala bantu bavule balonge namino. (1 Ko. 10:13) Buno bo bubinga bumo bidi bulengeje kwikale bantu batyetye kete bapangwa mu kipwilo kya bwine Kidishitu. Yehova ukwashanga bantu bandi bekale nyeke ba kikōkeji.

12. Le i muswelo’ka otubwanya kwepuka kulonga bubi bukatampe?

¹² Muntu yense wa kubulwa kubwaninina utompibwanga na bintu bibi. (Yak. 1:14) Inoko abe ye wa kutonga byokalonga’po shi ubatompibwa. Bubine i amba, abe ye wa kukwata butyibi pa mosaka kwiendejeja mu  būmi. Bantu bamo babwanya kunena’mba kubwanyapo kutādila mwiivwanino obe ne bintu byolonga. Inoko buno i bubela. Ubwanya kwifunda kutādila bya kusakasaka. Nanshi nansha shi ubatompibwa ubwanya kupela kulonga bibi. Pa kufikila’po, lomba Yehova difuku ne difuku. Ikala nyeke na bibidiji biyampe bya kwifunda pa kasuku Kinenwa kya Leza. Tanwa ku kupwila. Sapwila bantu bakwabo bintu byowifundile. Kulonga bino bintu kitatyi kyonso kukakukwasha ulonge bintu mungya mpiko yobe ya kwipāna. Kadi vuluka nyeke amba Yehova ukakukwasha wibilonge.—Ngt. 5:16.

13. Le i kimfwa’ka kiyampe kitushidile Yosefa?

¹³ Bikakupēlela kwiendeja mungya kwipāna kobe, shi ukwate kumeso kwa kitatyi butyibi bwa byokalonga’po shi ubatompibwa. Mu Bible mudi bimfwa bivule bya bantu bālongele namino, nansha byobādi ba kubulwa kubwaninina pamo bwa batwe. Kimfwa, mukaja Potifela wādi ulonga kyaba kyonso bukomo bwa kulāla na Yosefa. Inoko Yosefa wādi uyukile kala bya kulonga’po. Bible witusapwila’mba “wāpela,” ne kunena’mba: “Le mbwanya’tu namani kulonga kibi kikatampe namino ne kupya binebine mambo kudi Leza?” (Ngo. 39:​8-10) Na bubine, Yosefa wāyukile byākalonga’po kumeso ne kwa uno mwana-mukaji kumutompa. Kino kyāmulengeje akwate butyibi buyampe paātenwe na ditompo.

14. I muswelo’ka otubwanya kwifunda kukomena matompo?

¹⁴ Le i muswelo’ka obwanya kukōkela Leza pamo bwa Yosefa kitatyi kyotompibwa? Kwata butyibi tamba’nka pano bwa byokalonga’po shi ubatanwa na ditompo. Wifunde kupela kiponka na ponka bintu bishikilwe Yehova, ne kupela nansha kulangulukila’po kwine. (Ñim. 97:10; 119:165) Namino, kukalongapo bubi kitatyi kyotompibwa. Ukayuka kala bya kulonga’po.

15. Le muntu ubwanya kulombola namani amba ‘ukimbanga Yehova na mikeketo’? (Bahebelu 11:6)

¹⁵ Padi abe uyukile amba wi musokole bubine kadi usakanga kwingidila Yehova na mutyima obe onso, inoko ukīkaka kwipāna ne kubatyijibwa. Nabya ubwanya kulonga byālongele Mulopwe Davida. Ubwanya kuzenza Yehova amba: “Mandaule, a Leza, yuka mutyima wami. Mandaule, yuka milangwe yami inkambakanya. Tala shi munda mwami mudi dishinda dibi, ñendeje mu dishinda dya nyeke.” (Ñim. 139:​23, 24) Yehova weselanga  boba “bamukimba na mikeketo.” Bukomo bolonga bwa kufikila pa kitungo kya kwipāna ne kubatyijibwa bulombola’mba umukimbanga.—Tanga Bahebelu 11:6.

FWENA NYEKE KUDI YEHOVA

16-17. Le Yehova ukokanga namani boba ba mu kisaka kya Batumoni? (Yoano 6:44)

¹⁶ Yesu wānenene amba bandi bana ba bwanga bakokwanga na Yehova. (Tanga Yoano 6:44.) Langulukila pa mwikadile uno mulangwe bu wa kutendelwa ne pa mobishintulwila kodi. Yehova umonanga kintu kampanda kiyampe mu umo ne umo motudi, ebiya wamukokela kwadi. Umonanga muntu ne muntu bu “kintu kyandi kya pa bula,” nansha bu “kintu kya bulēme.” (Kup. 7:6; kunshi kwa dyani.) Ye mwakumwena ne abe.

¹⁷ Inoko padi wi nkasampe utamīne mu kisaka kya Batumoni. Ubwanya kulanga’mba shi wingidilanga Yehova ke mwandapo wakukokēle kwadi, ino i mwanda wa bambutwile bobe bamwingidila. Inoko Bible unena’mba: “Fwenai kudi Leza, nandi ukemufwena.” (Yak. 4:8; 1 Bi. 28:9) Shi ubakwata mulangwe wa kufwena Yehova, nadi ukakufwena. Yehova kakumonengapo’tu bu muntu wa mu kisumpi kya bantu bākokēle kwadi. Ukokelanga muntu ne muntu kwadi—kubadila’mo ne muntu yense wa mu kisaka kya Batumoni. Tubamone mu Yakoba 4:8 amba, muntu shi wakwata butyibi bwa kufwena Yehova, nandi umufwenanga.—Dingakanya na 2 Bene Tesalonika 2:13.

18. Le i bika byotukesambila’po mu kishinte kilonda’ko? (Ñimbo ya Mitōto 40:8)

¹⁸ Kitatyi kyowipāna kudi Yehova ne kubatyijibwa, umwekejanga mwikadila wa Yesu. Wēlombwele aye mwine kudi Shandi mwanda wa kulonga byobya byonso byaāmunenene kulonga. (Tanga Ñimbo ya Mitōto 40:8; Bah. 10:7) Mu kishinte kilonda’ko, tukesambila’mo pa bintu bibwanya kukukwasha wendelele kwingidila Yehova na kikōkeji pa kupwa kubatyijibwa.