Tubwanya kulekelwa bubi bwetu enka kupityila pa kitapwa kya kinkūlwa kyāfutyile Yesu na mashi andi. (Ef. 1:7) Inoko Bible unena’mba: “Leza wadi utyumwina mu manwi ne kulekela bubi bwālongelwe pa kala,” ko kunena’mba, kumeso kwa Yesu kupāna kinkūlwa. (Loma 3:​25, kunshi kwa dyani.) Le Yehova wābwenye namani kulonga kino koku ulamine musoñanya wandi mubwaninine wa boloke?

Mu mumweno wa Yehova, kinkūlwa kyādi pamo bwa akyo ke kifutwe kala tamba kitatyi kyaākwete butyibi bwa kuleta’ko “lutundu” lukanyongolola bantu ba lwitabijo. (Ngo. 3:15; 22:18) Leza wādi ukulupile bya binebine amba pa kitatyi kyatungile, wandi Mwana wa bunka uketabija na mutyima tō kupāna kinkūlwa. (Ngt. 4:4; Bah. 10:​7-10) Yesu paādi pano pa ntanda bu mukendi wa Leza, wādi na lupusa lwa kulekela bubi kumeso kwa kupāna kinkūlwa. Wālongele namino na kwingidija bulēme bwa kitapwa kyaādi wa kulambula ku bantu bālombwele lwitabijo.—Mat. 9:​2-6.