1. Le i madyese’ka otweselwanga pa mwanda wa kwikala kotwikele mu bulongolodi bwa Yehova?

 BINE, tudi na dyese dikatampe dya kubadilwa mu bulongolodi bwa Yehova mu ano mafuku a mfulo a makambakano. Nansha būmi byobwenda bubipila’ko bininge mu ino ntanda, Yehova i mwitupe kisaka kya ku mushipiditu kīlungile mu bumo kya batutu ne bakaka. (Ñim. 133:1) Witukwashanga twikale na būmi bwa nsangaji mu kisaka. (Ef. 5:33–6:1) Kadi witupanga ñeni ne tunangu totusakilwa pa kwikala na ndoe ya bine ya mutyima.

2. Le i bika byotufwaninwe kulonga, ne mwanda waka?

² Inoko, tufwaninwe kwendelela kulonga bukomo pa kwingidila Yehova na kikōkeji. Mwanda waka? Mwanda kyaba kimo tubwanya kutyumukwa mutyima pa mwanda wa kubulwa kubwaninina kwa bantu bakwabo. Kadi tubwanya kutyumukwa mutyima pa mwanda wa bukōkekōke bwetu, nakampata shi tujokela enka mu bilubo bimo byonka. Tufwaninwe kwendelela kwingidila Yehova (1) shi abetusanshija kudi tutu nansha kaka, (2) shi mwinē petu wetutyumuna mutyima, ne (3) shi tubatyumukwa mutyima pa bukōkekōke bwetu. Mu kino kishinte, tusa kubandaula’mo ino myanda. Kadi tusa kubandaula’mo ne ñeni yotubwanya kuboila ku muntu umo wa mu Bible wa kikōkeji.

ENDELELA KWINGIDILA YEHOVA SHI TUTU NANSHA KAKA WAKUSANSHIJA

3. Le i kikoleja’ka kīkondanga na bantu ba Yehova?

³ Kikoleja. Batutu ne bakaka bamo badi na ngikadila itulobeja. Bakwabo babwanya kwitutyumuna mutyima nansha kwitulongela bintu pa kubulwa kanye. Bakulumpe babwanya kulonga bilubo. Myanda pamo bwa ino ibwanya kulengeja bamo batatane  amba buno ke bulongolodipo bwa Leza. Pa kyaba kya kwendelela kwingidila Leza “kipuji na kipuji” na batutu ne bakaka, babwanya kuleka kuneneja boba bebasanshije, padi enka ne kuleka’byo kupwila. (Zef. 3:9) Le i kya tunangu kulonga namino? Tubandaulei’ko ñeni yotubwanya kuboila ku muntu umo wa mu Bible wātenwe na makambakano bwa ano.

4. Le i bikoleja’ka byēkondele na mutumibwa Polo?

⁴ Kimfwa kya mu Bible. Mutumibwa Polo wādi uyukile amba banababo bene Kidishitu i bantu ba kubulwa kubwaninina. Kimfwa, bamo mu kipwilo kya mu Yelusalema pobētene nandi, bāmutatene amba ke mwanā bwangapo. (Bil. 9:26) Mwenda mafuku, bamo bādi bamunenena bibi mwanda wa kulengeja bantu bakwabo baleke kumukulupila. (2 Ko. 10:10) Kadi Polo wāmwene mukulumpe umo ukwata butyibi bubi bwādi bwa kukukaja bantu bakwabo. (Ngt. 2:​11, 12) Ne kadi, Mako mulunda nandi umo wa pabwipi wāmutyumwine mutyima. (Bil. 15:​37, 38) Polo wādi ubwanya kuleka mwanda o-onso pa ino’i umulengeje aleke kupwana na boba bāmusanshije. Inoko, aye wāendelele kwikala na mumweno muyampe pa batutu ne bakaka ne kulonga nyeke bivule mu mwingilo wa Yehova. Le i bika byāmukweshe?

5. Le i bika byākweshe Polo endelele kupwana na banababo? (Bene Kolose 3:​13, 14) (Tala ne kifwatulo.)

⁵ Polo wādi usenswe banababo mu lwitabijo. Buswe bwaādi usenswe bantu bakwabo bwāmukweshe ate mutyima pa ngikadila yabo miyampe, pa kyaba kya kuta’o pa kubulwa kubwaninina kwabo. Kadi buswe bwākweshe Polo engidije myanda yaālembele aye mwine mu Bene Kolose 3:​13, 14. (Tanga.) Kimfwa, tala muswelo waālekele Mako. Nansha Mako byaāshile Polo mu lwendo lwandi lubajinji lwa bu mishonele, Polo kāendelelepo kumulobela. Mwenda mafuku, Polo paālembēle kipwilo kya mu Kolose mukanda wa buswe, wātendele Mako amba i mwingidi nandi wa mvubu mpata, “nsulo ya busengi bukatampe.” (Kol. 4:​10, 11) Polo paākutyilwe mu Loma, wālombele Mako ende akamukwashe. (2 Tm. 4:11) Na bubine, Polo wāendelele kupwana na banababo. Le i ñeni’ka yotubwanya kuboila kudi Polo?

6-7. Le i bika biketukwasha twendelele kusanswa batutu ne bakaka nansha byobadi ba kubulwa kubwaninina? (1 Yoano 4:7)

⁶ Ñeni yotuboila’ko. Yehova usakanga twendelele kulombola buswe ku batutu ne bakaka. (Tanga 1 Yoano 4:7.) Shi tutu nansha kaka watunya kumwekeja ngikadila kampanda ya bwine Kidishitu, tubwanya kukulupila’mba kadipo usaka kwitusanshija, ne  amba uloñanga bukomo bwa kulonga byobya byoloke ku meso a Yehova. (Nki. 12:18) Leza usenswe bengidi bandi ba kikōkeji nansha byobadi ba kubulwa kubwaninina. Ketwelangapo shi tubalonga bilubo; kadi ketulaminangapo kīji. (Ñim. 103:9) Bine, i kya mvubu mpata twiule Tata wetu wa lulekelo!—Ef. 4:32–5:1.

⁷ Kadi vuluka’mba, pano penda pafwena mfulo, tusakilwa kwikala nyeke pabwipi na batutu ne bakaka. Kupangwapangwa kubwanya kuningila’ko. Kadi tubwanya enka ne kukutwa mu buloko pa mwanda wa lwitabijo lwetu. Shi kino kibetufikila, po pene tukasakilwa batutu ne bakaka. (Nki. 17:17) Tala byatene mukulumpe umo wa mu Eshipanye witwa bu Josep. a Aye ne batutu bakwabo bakutyilwe kya pamo mu buloko pa mwanda wa kuleka kwikuja mu bya ino ntanda. Unena’mba: “Mu buloko, mwadi kyaka kikatampe kya kulobela mwanetu mu lwitabijo mwanda wa kushikatyila bininge pamo. Ino twadi twityumwina mu manwi ne kwilekela na mutyima umo. Kino kyetukweshe twikale nyeke mu bumo ne kwikwatakanya. Twadi’mo na bantu kebengidilapo Yehova. Difuku dimo, netapile kilonda ku kuboko, pa kino nkyadipo nekibwanya kwilongela bintu ami mwine. Inoko tutu umo wankendēle bisandi ne kunkwatakanya mu miswelo mikwabo ya kamweno. Nemwenine buswe bwa binebine kitatyi kyonadi nsakilwa’bo bininge.” Bine, buno i bubinga buyampe botufwaninwe kupwijija myanda na banabetu tamba’nka pano!

ENDELELA KWINGIDILA YEHOVA SHI MWINĒ POBE WAKUTYUMUNA MUTYIMA

8. Le i kikoleja’ka kīkondanga na boba besongele?

⁸ Kikoleja. Mu masongi onso mudi bikoleja. Bible ulombola patōka’mba boba besongele “bakamonanga byamalwa mu ngitu.” (1 Ko. 7:28) Mwanda waka? Mwanda busongi bulungilanga pamo bantu babidi ba kubulwa kubwaninina, kadi ba ngikadila mishile ne basenswe bintu bishile. Ba mulume ne mukaji babwanya kutamba mu bibidiji bishile, nansha kwikala na bitamina bishile. Mu kupita kwa kitatyi, babwanya kumwekeja ngikadila keyadipo imweka pobadi kebesongele. Bino byonso bibwanya kuleta makambakano. Pa kyaba kya kwitabija amba abo bonso badi na kilubo ne kulonga bukomo bwa kupwija myanda, babwanya kwanza kwitopeka. Babwanya enka ne kulanga’mba kusansana nansha kwilubula ko kukapwija myanda. Ino le kino kyo kikapwija myanda? b Lekai tuboile ñeni ku muntu umo wa mu Bible wāendelele kwingidila Yehova, nansha busongi bwabo byobwādi bwa makambakano.

9. Le i kikoleja’ka kyēkondele na Abikele?

⁹ Kimfwa kya mu Bible. Abikele wāsongelwe na Nabalu, mwine utelwa na Bible bu muntu wādi na mutyima mūmu kadi wādi ulonga bilongwa bibi. (1 Sa. 25:3) Ye uno byādi bikomo bininge kudi Abikele kwikala na uno mwana-mulume. Le Abikele wādi na mukenga wa kufudija busongi bwabo? En-en. Wāikele na uno mukenga pāile Davida, mulopwe wa Isalela wa mu mafuku a kumeso, mwanda wa kwipaya wandi mulume pangala pa mutonko waāmusholele, aye pamo ne bana-balume baādi nabo. (1 Sa. 25:​9-13) Abikele wādi ubwanya kunyema ne kuleka Davida afikidije mpango yandi. Inoko kālongelepo namino, aye wāendele kukanekenya Davida mwanda wa aleke kwipaya Nabalu. (1 Sa. 25:​23-27) Mwanda waka wālongele namino?

10. Le i kika padi kyālengeje Abikele endelele kwikala mu busongi bwa makambakano?

 ¹⁰ Abikele wādi usenswe Yehova ne kulēmeka misoñanya yandi itala busongi. Na bubine, wādi uyukile byānenene Leza kudi ba Adama ne Eva, paāshilwile busongi bubajinji. (Ngo. 2:24) Abikele wādi uyukile amba Yehova umonanga busongi bu bukola ku meso andi. Wādi usaka kusangaja Leza, kadi kino kyo kyāmulengeje alonge byonso byaādi ubwanya mwanda wa kukinga ba mu njibo yandi, kubadila’mo ne wandi mulume. Wālongele’po kintu bukidibukidi mwanda wa kukankaja Davida aleke kwipaya Nabalu. Kadi wālombele lusa na mutyima umo pa bintu bibi byākalongelepo. Na bubine, Yehova wāsenswe uno mwana-mukaji nkanka kadi wampikwa kwisakila. Le i ñeni’ka ibwanya kuboila balume ne bakaji ku kimfwa kya Abikele?

11. (a) Le i bika bitengēle Yehova ku boba besongele? (Bene Efisesa 5:33) (b) Le i ñeni’ka yowaboila ku bukomo bwalongele Carmen bwa kulama busongi bwabo? (Tala ne kifwatulo.)

¹¹ Ñeni yotuboila’ko. Yehova i musoñanye boba besongele balēmeke busongi, nansha shi mwinē pabo i muntu mukomo kwikala nandi. Bine, Yehova usangalanga bininge pamona boba besongele balonga bukomo bwa kupwija makambakano abo, ne kwita mutyima abo bene na bene ne kwilēmeka. (Tanga Bene Efisesa 5:33.) Twisambilei’ko pa kimfwa kya Carmen. Kintu kya myaka isamba na pobesongele, Carmen washilwile kwifunda Bible na Batumoni ba Yehova, kupwa mwenda mafuku wabatyijibwa. Carmen unena’mba: “Kino kekyasangejepo wami mulume. Washilwile kwivwanina Yehova mukao. Wadi untuka ne kunzakaja amba usa kunshiya.” Nansha nakyo, Carmen waendelele kwikala mu buno busongi. Wālongele bukomo bwa kulēmeka wandi mulume ne kumusanswa mu bula bwa myaka 50. Unena’mba: “Mu kupita kwa myaka, nefundile kwikadila’ko na kusansanya ne kwisamba na bunwa na wami mulume. Byonayukile amba busongi i bukola ku meso a Yehova, nalongele bukomo bwami bonso mwanda wa kwibulama. Byonsenswe Yehova, nkyakimbilepo nansha dimo kunyema wami mulume.” c Shi kubaikala makambakano mu busongi bwenu, ubwanya kukulupila’mba Yehova ukakukwatakanya ne kukukwasha ūminine.

ENDELELA KWINGIDILA YEHOVA SHI UBATYUMUKWA MUTYIMA PA BUKŌKEKŌKE BOBE

12. Le i kikoleja’ka kyotubwanya kwikonda nakyo shi tubalonga bubi bukatampe?

¹² Kikoleja. Tubwanya kutyumukwa mutyima bininge shi tubalonga bubi bukatampe. Bible ulombola’mba bubi bwetu bubwanya  kwitushiya na “mutyima mutyumuke ne musonsakane.” (Ñim. 51:17) Tutu umo witwa bu Robert walongele bukomo mu bula bwa myaka, mwanda wa kubwanya bisakibwa bya kwingila bu mwingidi wa mingilo. Inoko, walongele bubi bukatampe ne kujingulula’mba walubila Yehova. Unena’mba: “Mutyima wami wa mundamunda wantopekele bininge, nabela’nka ne misongo ya eshitoma. Nadidile ne kulomba Yehova. Nadi nanga’mba Leza kakekambakanyapo monka nansha dimo mwanda wa kungivwana. Le kyakantejeja i kika? Ne mumulubile.” Shi tubalonga bubi, tubwanya kutyumukwa mutyima bininge, mwanda mutyima wetu musonsakane ukulupilanga’mba Yehova kaketwitabijapo monka. (Ñim. 38:4) Shi ye moweivwanine, langulukila pa kimfwa kya muntu wa mu Bible wa kikōkeji wāendelele kwingidila Yehova nansha byaālongele bubi bukatampe.

13. Le i bubi’ka bukatampe bwālongele mutumibwa Petelo, ne i bika kyāmufikije ku kwibulonga?

¹³ Kimfwa kya mu Bible. Bufuku bukya Yesu kaipaibwa, mutumibwa Petelo wālongele bilubo byāmufikije ku kulonga bubi bukatampe. Dibajinji, wēkulupile bipitepite na kwianya amba ukalonda Yesu, nansha shi batumibwa bakwabo abamunyema. (Mako 14:​27-29) Kupwa, pobādi mu budimi bwa Ngesemani, Petelo wākomenwe misunsa mivule kwendelela kukesha. (Mako 14:​32, 37-41) Ebiya kibumbo pokyāile kukwata Yesu, Petelo wāmunyema. (Mako 14:50) Ku mfulo, Petelo wātuna Yesu misunsa isatu amba kamuyukilepo, kadi wātyipa enka ne mutyipo pangala pa buno bubela. (Mako 14:​66-71) Le Petelo wālongele’po namani paājingulwile amba walonga bubi bukatampe? Kinku kyāmukwete kadila, wātyumukwa enka ne mutyima na milangwe ya kwitopeka. (Mako 14:72) Fwatakanya’po njia yādi na Petelo pobādi bepaya mulunda nandi Yesu. Na bubine, Petelo ye uno wēmwene bu muntu wa bule!

14. Le i bika byākweshe Petelo endelele kwingidila Yehova? (Tala kifwatulo )

¹⁴ Petelo wāendelele kwingidila Yehova pa bubinga buvule. Kāikelepo kwitolwela; wāendele kudi bana ba bwanga bakwabo, kadi na bubine bāikele kumusenga. (Luka 24:33) Ne kadi, Yesu musanguke wāmwekēle Petelo, padi mwanda wa kumukankamika. (Luka 24:34; 1 Ko. 15:5) Kupwa kitatyi kikwabo, pa kyaba kya Yesu kufunina Petelo pa bilubo byaālongele, aye wāsapwidile uno mulunda nandi amba ukapebwa biselwa bikatampe. (Yoa. 21:​15-17) Petelo wāyukile amba wālongele bubi bukatampe, inoko wāendelele kulonga bukomo bwa kulonga byobya byoloke. Mwanda waka? Mwanda  wādi ukulupile amba Mfumwandi, Yesu, wādi ukimusenswe. Kadi bana ba bwanga bakwabo bāendelele kukwatakanya Petelo. Le i ñeni’ka yotubwanya kuboila ku kimfwa kya Petelo?

15. Le Yehova usakanga tukulupile bika? (Ñimbo ya Mitōto 86:5; Bene Loma 8:​38, 39) (Tala ne kifwatulo.)

¹⁵ Ñeni yotuboila’ko. Yehova usakanga tukulupile amba witusenswe kadi usakanga kwitulekela. (Tanga Ñimbo ya Mitōto 86:5; Bene Loma 8:​38, 39.) Kitatyi kyotulonga bubi, mutyima witutopekanga. I bifwaninwe kadi byendele’mo kwiivwana namino. Inoko, ketufwaninwepo kulanga’mba Yehova kakitusenswepo nansha amba kabwanyapo kwitulekela. Tufwaninwe kukimba bukwashi kiponka na ponka. Robert otwesambilanga’po, unena’mba: “Nalongele bubi mwanda nakulupile mu bukomo bwa ami mwine pa kunekenya ditompo.” Wamwene amba ufwaninwe kulombola’mo bakulumpe. Unena’mba: “Ponebalombwele’mo, kiponka na ponka nemwenine buswe bunsenswe Yehova kupityila kobadi. Kadi namwene amba ne bakulumpe nabo bansenswe. Bankweshe nkulupile amba Yehova kangelelepo.” Netu tubwanya kukulupila’mba Yehova witusenswe kadi witulekelanga shi tubesāsa bubi bwetu, tubakimbe bukwashi botusakilwa, ne kusumininwa kuleka kujokela’mo. (1 Yo. 1:​8, 9) Kino kikulupiji kiketukwasha twendelele kwingidila Yehova, nansha shi tubalonga bilubo.

16. Mwanda waka ubasumininwa kwendelela kwingidila Yehova?

¹⁶ Yehova usangelanga bininge bukomo botulonga bwa kumwingidila mu ano mafuku a mfulo. Na bukwashi bwa Yehova, tubwanya kwendelela kumwingidila nansha shi tubatyumukwa mutyima. Tubwanya kwendelela kusanswa batutu ne bakaka ne kwibalekela nansha shi abetusanshija. Tubwanya kulombola buswe bukatampe botusenswe Leza ne kulēmeka mpangiko yandi ya busongi, na kulonga bukomo bwetu bonso mwanda wa kupwija myanda ibwanya kulupuka mu busongi bwetu. Kadi shi tubalonga bubi, tubwanya kukimba bukwashi bwa Yehova, kwitabija amba witusenswe kadi witulekelanga, ne kwendelela kumwingidila. Tukulupilei amba Yehova uketwesela bininge shi ketulekele’byopo “kulonga bilumbuluke.”—Ngt. 6:9.