1-2. (a) Le Satana ongolanga bantu muswelo’ka? (b) Le i bika byotusa kwisambila’po mu kino kishinte?

SATANA, “shandya bubela,” ongolanga bantu tamba ku ngalwilo kwa mānga ya muzo wa muntu. (Yoa. 8:44) Bubela bumo bidi bwabepanga i bufundiji bwa bubela butala pa lufu ne pa mwikadilanga muntu shi wafu. Buno bufundiji po pemanine bibidiji bivule bitumbe ne kabutyibutyi. Mfulo mfulō, batutu ne bakaka bavule balwanga “bulwi bukatampe pa mwanda wa lwitabijo” kitatyi kifwa muntu wa mu kisaka nansha wa mu kibundi.​—Yude 3.

² Shi ino myanda ibakufikila, le ukalonga namani pa kubingija byobya bifundija Bible pa mwanda utala lufu? (Ef. 6:11) Le i muswelo’ka obwanya kusenga ne kukankamika mwanenu mwine Kidishitu obaningila ekuje mu bibidiji bifītyija Leza mutyima? Kino kishinte kisa kwisambila pa buludiki bwitupele Yehova. Dibajinji, twisambilei bidi pa byobya binena Bible pa mwanda utala lufu.

3. Le i bika byālupukile ku bubela bubajinji?

³ Leza kādipo usaka bantu bafwe. Ino pa kusaka kwikala bōmi nyeke, ba Adama ne Eva bādi bafwaninwe kukōkela Yehova, mwine wēbapele musoñanya upēla amba: “Ku mutyi wa kuyuka biyampe ne bibi, kufwaninwepo kudya’ko, mwanda difuku dyokadya’ko, bine ukafwa.” (Ngo. 2:16, 17) Kupwa Satana wākolomona mwanda. Wānena Eva kupityila kudi nyoka’mba: “Bine kemukafupo.” Ino yō, Eva wāitabija bubela bwandi, wādya ku kipa. Kupwa wandi mulume nandi wādya’ko. (Ngo. 3:4, 6) Mu uno muswelo, bubi ne lufu byātwela mu bantu.​—Loma 5:12.

4-5. Le Satana wendelelanga na kongola bantu namani?

 ⁴ Ba Adama ne Eva bāfwile, enka mwēbalombwedile Leza. Inoko Satana kālekelepo kubepa pa mwanda utala lufu. Mwenda mafuku, wāshilwile kubepa bubela bukwabo. Bubela bumo bidi i bufundiji bwa amba umbidi ufwanga, ino kudi kipindi kyendelelanga na būmi, padi mu kīkalo kya mishipiditu. Buno bubela bwishileshile ke bongole bantu kebabadika kufika ne dyalelo.​—1 Tm. 4:1.

⁵ Mwanda waka bantu bavule bongolwanga? Pa kubepa bubela, Satana utwelelanga pa muswelo otumona lufu. Byotwāpangilwe kwikala’ko nyeke, ketusakengapo kufwa. (Mus. 3:11) Tumwene lufu bu walwana netu.​—1 Ko. 15:26.

6-7. (a) Lelo Satana i mubwanye kufya bubine butala pa bafwe? Shintulula. (b) Lelo bubine bwa mu Bible i bwitunyongolole namani ku moyo wa bitupu wa kutyina bafwe?

⁶ Nansha bilonga Satana bukomo, bubine butala pa lufu budi patōka. Na bubine, pano po pene payukile bantu bavule ne kusapula bufundiji bwa mu Bible pa mwikadile bafwe ne lukulupilo lutala bafwe. (Mus. 9:5, 10; Bil. 24:15) Buno bubine bwituseñanga ne kwitunyongolola ku moyo wa bitupu ne kutatana. Kimfwa, ketutyinangapo bafwe; kadi ketudipo na moyo amba basa kufikilwa na kibi. Tuyukile amba ke bōmipo kadi kebabwanyapo kususula muntu. Badi pamo bwa abo balēle tulo tukatampe. (Yoa. 11:11-14) Kadi tuyukile amba bafwe kebayukilepo mupityila kitatyi. O mwanda pa lusangukilo, enka ne boba bafwile pano ke padi tutwa twa myaka, bakamona’mba pabapite’tu kakitatyi katyetye, pamo bwa kukupila kwa kikufi.

⁷ Mwene ubaitabija’mba bubine bwa mwikadile bafwe budi padi tō, bupēla, kadi bwendele’mo? I bwishile kulampe na bubela bwa Satana! Kutentekela pa kongola bantu, buno bubela buvubakenyanga Mupangi wetu myanda. Pa kwitukwasha twivwanije ne pa mfulo masusu aletele Satana, tusa kubandaula bino bipangujo: Le bubela bwa Satana buvubakenyanga Yehova myanda namani? Le bonanga namani kikulupiji kyotukulupile mu kitapwa kya kinkūlwa kya Yesu? Le bubwejanga’ko namani njia ne masusu a bantu?

8. Mungya Yelemia 19:5, le bubela bwa Satana butala pa bafwe buvubakenyanga Yehova myanda namani?

⁸ Bubela bwa Satana butala pa bafwe buvubakenyanga Yehova myanda. Mu buno  bubela mubadilwa ne bufundiji bwa bubela bwa amba bafwe basusukanga mu mudilo utēma. Buno bufundiji buvubakenyanga Leza myanda! Namani? Na bubine, bulambikanga Leza wa buswe amba udi na ngikadila imo na ya Dyabola. (1 Yo. 4:8) Le kino kibakulengeja wiivwane namani? Nakampata, le kilengejanga Yehova nandi eivwane namani? Aye bidi ushikilwe bibi bya miswelo yonso.​—Tanga Yelemia 19:5.

9. Mungya Yoano 3:16 ne 15:13, le bubela bwa Satana bonanga namani kikulupiji kyotukulupile mu kitapwa kya kinkūlwa kya Kidishitu?

⁹ Bubela bwa Satana butala pa lufu bonanga kikulupiji kyotukulupile mu kitapwa kya kinkūlwa kya Kidishitu. (Mat. 20:28) Bubela bukwabo bwa Satana i bwa amba bantu badi na muya keufu. Shi byadi amba i bya bine, longa bantu bonso badi ba kwikala’ko nyeke. Nankyo Kidishitu kādipo ufwaninwe kupāna būmi bwandi bu kinkūlwa kya kwitukūla tukamone būmi bwa nyeke. Vuluka nyeke amba kitapwa kya Kidishitu i kilomboji kikatampe kya buswe bobālombwele ku bantu. (Tanga Yoano 3:16; 15:13.) Langa’po bidi mwiivwaninanga Yehova ne wandi Mwana pa bufundiji bona kino kyabuntu kilēme!

10. Lelo bubela bwa Satana butala pa lufu bubwejanga’ko njia ne masusu a bantu namani?

¹⁰ Bubela bwa Satana bubwejanga’ko njia ne masusu a bantu. Bambutwile badi na njia ya kufwilwa mwana babwanya kwibalombola’mba Leza ye wasela wabo mwana, padi akekale bu mwikeulu momwa mūlu. Le buno bubela bwa Satana butyepejanga’ni nansha bubwejanga’ko misanshi yabo? Bufundiji bwa bubela bwa kalunganyembo ka mudilo bwadi bufundijibwa mwanda wa kubingija’mba boba bonso bapela bufundiji bwa kipwilo bafwaninwe kususulwa ne kusōkelwa ku mutyi. Kukwatañana na dibuku dimo disambila pa Kīmu kya Kasusu kya mu Eshipanye, bantu bamo badi bepaya boba badi bapela bufundiji bwa kipwilo uno muswelo, badi bakulupile amba “bebatompejanga mususukilanga bantu mu kalunganyembo ka mudilo” mwanda wa besāse kumeso kwa kufwa ne kukūlwa mu kalunganyembo ka mudilo. Mu matanda mavule, baningilanga’mo bantu batōte bankambo wabo bafwile, bebalēmeke, nansha kukimba madyese kobadi. Bakwabo basakanga kutalaja mityima ya bankambo wabo kutyina bakebapa mfuto. I kya bulanda, mwanda nkulupilo imanine pa bubela bwa Satana keiletangapo busengi bwa binebine. Ino, iletanga’tu kuzumbija mutyima ne moyo wa bitupu.

11. Lelo babutule nansha balunda betusakila biyampe, babwanya kwituningila namani tulonge bintu kebikwatañenepo na Kinenwa kya Leza?

¹¹ Buswe botusenswe Leza ne Kinenwa kyandi bwitukomejanga tukōkele Yehova nansha shi babutule ne balunda betusakila biyampe betuningila tulonge bilongwa byampikwa kukwatañana na Bisonekwa pa mwanda utala bafwe. Babwanya ne kukimba kwitufwija bumvu, padi na kunena’mba ketwadipo tusenswe nansha kulēmeka ufwile. Nansha padi babwanya kwitunena’mba bilongwa byetu bikalengeja yewa ufwile asusule bōmi mu muswelo kampanda. Le tukabingija bubine bwa mu Bible namani? Tala muswelo obwanya kwingidija misoñanya ya mu Bible ilonda’ko.

12. Le i bibidiji’ka bitala pa bafwe kebikwatañenepo na Bisonekwa?

¹² Sumininwa “kwisansanya” na nkulupilo ne bibidiji kebikwatañenepo na Bisonekwa. (2 Ko. 6:17) Mu muzo wa Karaibe, bantu bavule bakulupile amba shi muntu wafu, “muya” wandi wendanga ujokoloka ne kupa mfuto boba badi bamususula. Dibuku dimo dya pa Entelenete dinena’mba  “muya” ubwanya’nka ne “kuleta makambakano mu kibundi.” Mu matanda mavule a mu Afrika bantu badi na kibidiji kya kufya makalashi mu njibo ya yewa ufwile ne kutadija mafoto andi ku lubumbu. Mwanda waka? Bamo batyinanga’mba boba bafwile bakemona! Batwe bengidi ba Yehova, ketukulupilangapo mfumo nansha kwiela mu bilongwa bikwatakanya bubela bwa Satana!​—1 Ko. 10:21, 22.

13. Mungya Yakoba 1:5, le i bika byofwaninwe kulonga shi ukitatana pa kibidiji kampanda?

¹³ Shi ukitatana pa kilongwa nansha kibidiji kampanda, nabya lombela kudi Yehova, mulombe na lwitabijo akupe tunangu twa bwine Leza. (Tanga Yakoba 1:5.) Kupwa longa bukimbi mu mabuku etu. Shi bibwanika, kepangule bakulumpe ba kyenu kipwilo. Kebakakulombolapo bya kulonga, ino bakakulombola misoñanya ya kamweno ya mu Bible, pamo bwa ino yotwesambila’po. Shi ulonge namino, ukebidija ‘ñeni yobe ya kujingulula’ bintu, kadi ino ñeni ikakukwasha “mwa kushiañenya ne kiyampe ne kibi.”​—Bah. 5:14.

14. Le i muswelo’ka otukaleka kukukaja bantu?

¹⁴ “Longai byonso mwanda wa ntumbo ya Leza. Lekai kwikala bu kikukaja.” (1 Ko. 10:31, 32) Shi tubakwata butyibi bwa kwikuja mu kibidiji nansha kisela kampanda, tufwaninwe ne kulangulukila pa mukekadila butyibi bwetu na lupusa pa mityima ya mundamunda ya bakwetu, nakampata banabetu bene Kidishitu. Ketufwaninwepo kukukaja muntu nansha umo! (Mako 9:42) Ne kadi, ketusakengapo kusanshija bya bituputupu boba ke Batumonipo. Buswe buketutonona twisambe nabo bya bulēme, mu muswelo utumbija Yehova. Na bubine, ketufwaninwepo kwipotomeja na bantu nansha kufutulula bisela byabo. Tuvulukei amba buswe budi na bukomo! Shi twibulombole mu muswelo muyampe ne na bulēme, tukatalaja’nka ne mityima ya balwana.

15-16. (a) Mwanda waka i biyampe kulombola bakwenu nkulupilo yobe? Leta kimfwa. (b) Le binenwa bya Polo bidi mu Bene Loma 1:16 bitutala namani?

¹⁵ Lombola bantu ba mu kyenu kibundi amba wi Kamoni wa Yehova. (Isa. 43:10) Padi ukapēlelwa kushintulula nkulupilo yobe shi babutule ne balondakani nobe bayukile amba utōtanga Yehova Leza. Francisco, ushikete mu Mozambike walembele amba: “Ami ne wami mukaji Carolina  potwefundile bubine, twasapwidile kisaka kyetu amba ketukitōtapo monka bafwe. Butyibi bwetu bwetuletēle makambakano kitatyi kyafwile kakwa Carolina. Kibidiji kya kwabo i kya koija umbidi wa yewa ufwile. Kupwa babutule ba pabwipi bafwaninwe kulāla mafuku asatu pa kifuko pamwangilwe mema obamoije. Bamonanga’mba bino bibidiji bitalajanga mushipiditu wa yewa ufwile. Kisaka kya Carolina kyadi kikimba nandi akalāle’po.”

¹⁶ Le Francisco ne wandi mukaji balongele’po namani? Francisco ushintulula’mba: “Byotusenswe Yehova kadi tusaka kumusangaja, twapelele kwikuja mu kino kibidiji. Kisaka kya Carolina kyakalabala. Kyetutopeka’mba ketulēmekelepo ufwile ne amba kisaka kyonso kekikapitepo kwetu nansha kwitukwasha kwine. Ino byotwebashintulwidile kala nkulupilo yetu, ketwesambilepo nabo kitatyi kyobadi bakalabale. Babutule bamo betubingija’nka ne kwitubingija’mba twebalombwele kala mwimanino wetu. Kitatyi pa kupita’po, babutule ba Carolina beikija, kupwa twaikala monka mu ndoe. Na bubine, bamo baile’nka ne ku yetu njibo kulomba mabuku esambila pa Bible.” Nanshi ketwakafwai bumvu bwa kubingija bubine butala pa lufu.​—Tanga Bene Loma 1:16.

17. Le i bika bibwanya kwitukwasha twikale bu mulunda wa bine wa mwanetu mwine Kidishitu ufwidilwe?

¹⁷ Shi mwanetu mwine Kidishitu wafwilwa muntu wasenswe, tufwaninwe kulonga bukomo bwa kwikala bu “mulunda wa bine . . . , [mwanabo] mubutulwe mwanda wa bitatyi bya tusua.” (Nki. 17:17) Le i muswelo’ka otubwanya kwikala bu “mulunda wa bine,” nakampata shi tutu nansha kaka ufwidilwe bamuningilanga alonge bilongwa byampikwa kukwatañana na Bisonekwa? Tutalei misoñanya ibidi ya mu Bible ibwanya kwitukwasha tusenge yewa ufwidilwe.

18. Le i bika byālengeje Yesu asūmije impolo, ne i ñeni’ka yotubwanya kuboila ku kimfwa kyandi?

¹⁸ “Dilai na boba badila.” (Loma 12:15) Tubwanya kukomenwa kuyuka bya kwisamba na muntu ulēmenenwe na njia. Kyaba kimo kudila i kutabuke’nka ne kwisamba.  Kitatyi kyāfwile Lazalasa mulunda na Yesu, ba Mata, Madia, ne bakwabo bādidile mwanabo kadi mulunda obasenswe. Yesu pa kufika ke papite mafuku aná, nandi “wasūmija impolo,” nansha byaādi uyukile amba usa kusangula Lazalasa. (Yoa. 11:17, 33-35) Impolo ya Yesu yālombwele mwiivwaninanga Shandi. Kadi yālombwele amba Yesu usenswe kino kisaka, ne kino kyāsengele ba Madia ne Mata. Muswelo umo onka, shi banabetu bamone amba twibaswele ne kwibata mutyima, bakamona’mba kebadipo bunka, ino badi mu bukata mwa balunda bebatele mutyima ne kwibakwasha.

19. Kitatyi kyotusenga mwanetu mwine Kidishitu udi na njia, le i muswelo’ka otubwanya kwingidija Musapudi 3:7?

¹⁹ “Kitatyi kya kwikala talala ne kitatyi kya kwisamba.” (Mus. 3:7) Muswelo mukwabo wa kusenga mwanetu mwine Kidishitu udi na njia i kumuteja’tu senene. Leka mwanenu akulombole bidi ku mutyima, kadi kokamulobeja na “binenwa byampikwa kulanga.” (Yoba 6:2, 3) Padi i muvutakanibwe bininge pa mwanda wa babutule ke Batumonipo bamukambakanya. O mwanda lombela nandi. Zenza “Mwine wivwananga milombelo” amupe bukomo ne ñeni mibwane. (Ñim. 65:2) Shi bibwanika, tangai nandi Bible. Nansha kutanga kishinte kya kamweno kidi mu mabuku etu, kimfwa nsekununi ya mu būmi ikankamika.

20. Le i bika byotukesambila’po mu kishinte kilonda’ko?

²⁰ Bine, tudi na dyese dya kuyuka bubine butala pa bafwe, ne būmi buyampe bwa kumeso butengēle boba badi mu bibundu bivulukwa! (Yoa. 5:28, 29) Nanshi, kupityila ku binenwa ne bilongwa byetu, tubingijei na bukankamane bubine bwa mu Bible ne kusapwila’bo bakwetu ponso potumona mukenga. Kishinte kilonda’ko kikesambila pa kintu kikwabo kingidijanga Satana mwanda wa kwela bantu mu fukutu ya ku mushipiditu​—majende. Tukayuka mwanda waka tufwaninwe kunyema bilongwa ne kwipwija mukose kukwatañene na dino dikinga dya bandemona.