1-2. Mwanda waka Yesu wāvutakanibwe?

MU DIFUKU dyandi dya mfulo bu muntu, Yesu wāvutakanibwe. Wādi utengēle kwipaibwa mu muswelo usansa na bantu babi. Inoko kudi kintu kyādi kilanga Yesu bininge kupita’ko lufu lwandi lwāfwenene. Wādi usenswe Shandi bininge kadi wādi usaka kumusangaja. Yesu wādi uyukile amba shi alame kikōkeji mu matompo makomo amutengēle, nabya ukabingija dijina dya Yehova. Kadi Yesu wādi usenswe bantu, wādi uyukile amba pa kusaka tukamone būmi bwa nyeke, wādi ufwaninwe kufwa na kikōkeji.

² Nansha Yesu byaādi muvutakanibwe bininge, wādi na ndoe. Wāsapwidile batumibwa bandi amba: “Nemupe ndoe yami.” (Yoa. 14:27) Wādi na “ndoe ya Leza,” ko kunena’mba kutūkija mutyima ne mutyima-ntenke bikalanga na muntu shi udi mu kipwano kilēme na Yehova. Ino ndoe yākweshe Yesu aleke kulangalanga mu ñeni nansha mu mutyima.​—Fid. 4:6, 7.

3. Le i bika byotusa kubandaula mu kino kishinte?

³ I kutupu muntu mu bukata mwetu ubwanya kususuka na mwāsusukile Yesu, inoko bonso balonda Yesu bakatanwa na makambakano. (Mat. 16:24, 25; Yoa. 15:20) Kadi pamo bwa Yesu, kyaba kimo tubwanya kuvutakanibwa ñeni. Le tukalonga namani tuleke kuzumbija mutyima ne kujimija ndoe yetu ya mutyima? Tubandaulei bintu bisatu byālongele Yesu mu mwingilo wandi pano pa ntanda, tumone muswelo otubwanya kumwiula potulwa na matompo.

4. Mungya 1 Bene Tesalonika 5:17, leta bimfwa bimobimo bilombola’mba Yesu wālombele bininge mu difuku dya mfulo dya būmi bwandi pano pa ntanda.

⁴ Tanga 1 Bene Tesalonika 5:17. Yesu wālombele bininge mu difuku dya mfulo dya būmi bwandi pano pa ntanda. Paāshilwile Kivulukilo kya lufu lwandi, wālombele pangala pa mukate ne vinyu. (1 Ko. 11:23-25) Kumeso kwa kutaluka pa kifuko kyobālongēle’po Pashika, wālombele na bandi bana ba bwanga. (Yoa. 17:1-26) Aye ne bandi bana ba bwanga pa kufika ku Lūlu lwa Impafu bwine bufuku’bwa, wālombele bininge. (Mat. 26:36-39, 42, 44) Kadi binenwa bya mfulo byēsambile Yesu kumeso kwa kufwa i milombelo. (Luka 23:46) Yesu wālombele kudi Yehova pa mwanda o-onso wālongekele mu dine difuku’dya.

5. Mwanda waka batumibwa bāzozele?

⁵ Kintu kimo bidi kyākweshe Yesu ōminine makambakano andi i mwanda wādi ulombela kudi Shandi. Inoko batumibwa, bākomenwe kutakamana mu milombelo bwine bufuku’bwa. Mfulo mfulō, bāzoza pāfikile kitatyi kya kutompibwa. (Mat. 26:40, 41, 43, 45, 56) Shi tubatanwa na matompo, tukekala nyeke na kikōkeji enka shi tulonda kimfwa kya Yesu kya “kulombela kyaba kyonso.” Le tukalomba bika?

6. Le lwitabijo luketukwasha namani twikale nyeke na ndoe?

⁶ Tubwanya kulomba Yehova ‘etubweje’ko lwitabijo.’ (Luka 17:5; Yoa. 14:1) Tusakilwa lwitabijo mwanda Satana ukatompa boba bonso balonda Yesu. (Luka 22:31) Le lwitabijo luketukwasha namani twikale nyeke na ndoe nansha shi tubatanwa na makambakano mavule? Shi tubalonga byonso byotubwanya mungya bukomo  bwetu pa kupwija makambakano, lwitabijo luketutonona tuleke Yehova mwine alonge’po kintu. Byotukulupile amba aye ubwanya kupwija myanda biyampe kwitupita, tudi na ndoe ya mutyima.​—1 Pe. 5:6, 7.

7. Le i ñeni’ka yoboila ku binenwa bya Robert?

⁷ Milombelo itukwashanga twikale nyeke na ndoe ya mutyima nansha shi tubatanwa na makambakano’ka. Tulangulukilei bidi pa kimfwa kya Robert, mukulumpe wa kikōkeji udi pano na myaka 80 ne musubu. Unena’mba: “Madingi adi mu Bene Fidipai 4:6, 7 i mankwashe ñūminine matompo mavule mu būmi bwami. Nadi ndwa na makambakano a kusokola lupeto. Kadi mu bula bwa kitatyi kampanda, najimije mwingilo wa bu mukulumpe.” Le i bika byakweshe Robert ekale nyeke na ndoe ya mutyima? Unena’mba: “Kitatyi kyonso kyonadi nshilula’tu kuzumbija mutyima, nadi nombela. Nkulupile amba ponso ponombela bininge kyaba ne kyaba, ngikalanga na ndoe.”

8. Mungya Yoano 8:29, le i kintu’ka kikwabo kyākweshe Yesu ekale na ndoe ya mutyima?

⁸ Tanga Yoano 8:29. Yesu wādi na ndoe ya mutyima nansha byobādi bamupangapanga, mwanda wādi uyukile amba usangajanga Shandi. Wākōkele nyeke nansha byobyādi bikomo. Wādi usenswe Shandi ne kumona mwingilo wa Yehova bu wa mvubu mu būmi bwandi. Kumeso kwa kwiya’ye pano pa ntanda, wādi “mwingidi mukatampe” wa Leza. (Nki. 8:30) Kadi paādi pano pa ntanda, wādi ufundija bakwabo  myanda ya Shandi na bupyasakane. (Mat. 6:9; Yoa. 5:17) Uno mwingilo wāletēle Yesu nsangaji mikatampe.​—Yoa. 4:34-36.

9. Le kuvudilwa bya kulonga mu mwingilo wa busapudi kwitukwashanga namani twikale nyeke na ndoe ya mutyima?

⁹ Tubwanya kwiula Yesu na kukōkela Yehova ne kuvudilwa “mafuku onso bya kulonga mu mwingilo wa Mfumwetu.” (1 Ko. 15:58) Kitatyi ‘kyotwipāna bininge’ mu mwingilo wa busapudi, tukekala na mumweno muyampe pa makambakano etu. (Bil. 18:5) Kimfwa, divule dine bantu botutana mu busapudi bekondanga na makambakano makatampe kupita ne etu. Inoko, kitatyi kyobefunda kusanswa Yehova ne kwingidija madingi andi, balumbululanga būmi bwabo ne kwikala na nsangaji. Kitatyi kyotumona bino bilongeka, tukulupilanga bininge amba Yehova witutele mutyima. Kadi kino kikulupiji kitukwashanga tulame nyeke ndoe ya mutyima. Kaka umo wadi mutyumukwe mutyima kadi wimona bule mu būmi bwandi, wabingije uno mulangwe. Unena’mba: “Shi ne muvudilwe bya kulonga mu mwingilo, nealujanga mu ñeni kadi ngikalanga na nsangaji. Nemonanga bu ngidi pabwipi na Yehova kitatyi kyondi mu mwingilo wa busapudi.”

10. Le i ñeni’ka yoboila ku binenwa bya Brenda?

¹⁰ Tulangulukilei ne pa kimfwa kya kaka Brenda. Aye ne wandi mwana mwana-mukaji badi babela misongo mivule ya bulebe. Brenda ushikete kijabanda mu kakinga, kadi udi na bukomo butyetye. Usapulanga ku njibo ne njibo ponso pabwanya kusapula, ino usapulanga divule na kulemba mikanda. Unena’mba: “Shi naitabija mu ñeni amba misongo yami keisapo kupwa mu ino ngikadilo, ntanga mutyima ku mwingilo wami. Na bubine, kusapula kunkwashanga ndeke kuzumbija mutyima. Kunengejanga nte mutyima ku kukwasha boba bonetana nabo mu mwaba wa kyetu kipwilo. Kadi kumvulujanga kyaba kyonso lukulupilo lwa kumeso londi nalo.”

11-13. (a) Lelo batumibwa ne bantu bakwabo bēlombwele namani amba i balunda ba bine ba Yesu? (b) Le balunda na Yesu bāmukweshe eivwane namani?

¹¹ Mu mwingilo mukomo wa Yesu, batumibwa ba kikōkeji bēlombwele bu balunda ba bine ba Yesu. Bālondele luno lukindi lunena’mba: “Kudi mulunda ulamata bininge kupita mwanabo.” (Nki. 18:24) Yesu wādi umwene bano balunda na mvubu. Mu mwingilo wandi, i kutupu mwanabo wa ku ngitu nansha umo wāitabije mwadi. (Yoa. 7:3-5) Difuku dimo, babutule bandi bālangile amba wabela bulubi. (Mako 3:21) Ino Yesu wādi na bubinga bwa kunenena batumibwa ba kikōkeji mu bufuku bukya ke lufu lwandi amba: “Banwe e bandamete mu matompo ami.”​—Luka 22:28.

¹² Kyaba kimo, batumibwa bātyumwine Yesu mutyima, ino aye kātelepo mutyima ku bilubo byabo, wēbamwene amba badi na lwitabijo mwadi. (Mat. 26:40; Mako 10:13, 14; Yoa. 6:66-69) Paādi nabo mu bufuku bwa mfulo kumeso kwa kwipaibwa, Yesu wānenene bano bantu ba lulamato amba: “Nemwite bu balunda, mwanda nemuyukija bintu byonso byonaivwene kudi Tata.” (Yoa. 15:15) Na bubine, balunda na Yesu bādi bamukankamika bininge. Kukwasha kobāmukweshe mu mwingilo, kwāsangeje mutyima wa Yesu bininge.​—Luka 10:17, 21.

¹³ Kutentekela pa batumibwa, Yesu wādi ne na balunda bakwabo bana-balume ne bana-bakaji, bene bāmukweshe mu mwingilo wa busapudi ne mu miswelo mikwabo ya kamweno. Bamo bāmwityile ku  mobo abo amba badye nandi byakudya. (Luka 10:38-42; Yoa. 12:1, 2) Bakwabo bādi benda nandi ñendo ne kumupa bintu. (Luka 8:3) Yesu wādi na balunda bayampe mwanda aye mwine wādi mulunda muyampe kobadi. Wādi wibalongela bintu biyampe, kadi kādipo usaka bamulongele bintu bitabukile bukomo bwabo. Yesu wādi mubwaninine, inoko wāitabije bukwashi bwa balunda nandi ba kubulwa kubwaninina. Na bubine, bāmukweshe alame ndoe ya mutyima.

14-15. Le i muswelo’ka otubwanya kusokola balunda bayampe, ne babwanya kwitukwasha namani?

¹⁴ Balunda bayampe baketukwasha tulamate nyeke kudi Yehova. Kadi muswelo muyampe wa kusokola balunda bayampe, i kwikala batwe bene balunda bayampe. (Mat. 7:12) Kimfwa, Bible witukankamika twipānine bakwetu, nakampata boba ‘bafudilwe.’ (Ef. 4:28) Le ubavuluka’ko muntu umo mu kyenu kipwilo okokeja kukwasha? Le ubulwepo kukwasha musapudi ushikete kijabanda na kukamupotela tubintu? Le ubulwepo kukwasha kisaka kidi na makambakano a misokwe na kwikipa bidibwa? Shi uyukile mwa kwingidijija diteba dya jw.org^® ne mpangiko ya JW Library^®, ubulwepo kukwasha bantu ba mu kyenu kipwilo bengidije myanda idi’po? Shi tute mutyima ku kukwasha bakwetu, ketukabulwepo kwikala na nsangaji.​—Bil. 20:35.

¹⁵ Balunda botupwana nabo baketukwasha kitatyi kyotwikonda na makambakano, kadi baketukwasha twikale nyeke na ndoe ya mutyima. Monka mwādi mwivwanina Edihu pādi pamulombola Yoba makambakano andi, balunda netu nabo  betukwashanga pa kwituteja na kitūkijetyima potwibalombola makambakano etu. (Yoba 32:4) Ketufwaninwepo kunena balunda netu bakwate butyibi pa kyetu kyaba, ino i biyampe kuteja madingi atamba mu Bible obetupa. (Nki. 15:22) Kadi monka mwāitabijije Mulopwe Davida na kwityepeja bamukwashe kudi balunda nandi, netu ketufwaninwepo kwitatula na kupela bukwashi bwitukwasha balunda netu mu kitatyi kyotusakilwa bukwashi. (2 Sa. 17:27-29) Na bubine, balunda bayampe ba uno muswelo i kyabuntu kitamba kudi Yehova.​—Yak. 1:17.

16. Mungya Bene Fidipai 4:6, 7, le i muswelo’ka umo kete otubwanya kwikala na ndoe? Shintulula.

¹⁶ Tanga Bene Fidipai 4:6, 7. Mwanda waka Yehova witulombola’mba tubwanya kwikala na ndoe yaetupa “kupityila kudi Kidishitu Yesu”? Mwanda tubwanya kwikala nyeke na ndoe mu ñeni ne mu mutyima enka shi twivwanije ne kwitabija mwingilo wingila Yesu mu mpango ya Leza. Kimfwa, kupityila ku kitapwa kya kinkūlwa kya Yesu, tubwanya kulekelwa bubi bwetu bonso. (1 Yo. 2:12) Bine, uno i mulangwe witusenga bininge! Yesu byadi Mulopwe wa Bulopwe bwa Leza, ukalongolola bintu byonso bitususula nabyo Satana ne ngikadilo yandi ya bintu. (Isa. 65:17; 1 Yo. 3:8; Kus. 21:3, 4) Bine, kino kitupanga kikulupiji! Nansha Yesu byaetupele mwingilo mukomo, aye udi netu, witukwashanga mu ano mafuku a mfulo a ino ngikadilo ya bintu. (Mat. 28:19, 20) Bine, kino kitukankamikanga bininge! Kusengibwa, lukulupilo, ne bukankamane​—byo biketukwasha twikale na ndoe ya mutyima.

17. (a) Lelo mwine Kidishitu ubwanya kulama ndoe ya mutyima namani? (b) Mungya mulao udi mu Yoano 16:33, le i bika byotukabwanya kulonga?

¹⁷ Penepa le ukalama namani ndoe ya mutyima kitatyi kyojingwa mutyima na makambakano makomo? Ubwanya kwiilama na kwiula bintu byālongele Yesu. Kibajinji, lombela ne kutakamana mu milombelo. Kya bubidi, kōkela Yehova ne kusapula na bupyasakane nansha ke pobimweka bu bikomo pene. Kya busatu, nena balunda nobe bakukwashe mu makambakano. Nabya ndoe ya Leza ikalama ñeni ne mutyima obe. Kadi pamo bwa Yesu, ukanekenya makambakano o-onso.​—Tanga Yoano 16:33.