Mwanda waka Yesu wāpitulukile mu binenwa bya Davida bidi mu Ñimbo ya Mitōto 22:1 kumeso’tu kwa kufwa?

Mu binenwa byānenene Yesu kumeso’tu kwa kufwa, mudi ne byobya bisonekelwe mu Mateo 27:46 bya amba: “Leza wami, Leza wami, i kika kyowangelela?” Yesu pa kunena bino binenwa, wāfikidije binenwa bya mulembi wa Mitōto bidi mu Ñimbo ya Mitōto 22:1. (Mako 15:34) Ke biyampepo kunena’mba Yesu wāpitulukile mu bino binenwa mwanda wātyumukilwe mutyima, nansha’mba mwanda wābudilwe lwitabijo mu kitatyi kityetye. Yesu wādi wivwanije biyampe kine kyaādi ufwaninwe kufwila, kadi wādi witabije kufwa. (Mat. 16:21; 20:28) Ne kadi wādi uyukile amba pa kitatyi kya lufu lwandi, Yehova wādi wa kutalula ‘lusao lo-lonso lwa kumukinga.’ (Yoba 1:10) Mu uno muswelo, Yehova wālekele Yesu alombole patōkelela’mba ukashala nyeke na kikōkeji nansha shi waipaibwa muswelo’ka.​—Mako 14:35, 36.

Penepa, mwanda waka Yesu wānenene binenwa bidi mu ino ñimbo ya mitōto? Nansha byoketuyukilepo biyampe bubinga bwinebwine, inoko tupimei kulangulukila pa bubinga bumobumo. *

Le Yesu pa kunena bino binenwa, wālombwele amba Yehova kādipo wa kulonga kintu pa lufu lwandi? Yesu wādi ufwaninwe kufuta kinkūlwa pampikwa bukwashi bwa Yehova. Wādi muntu wa mashi ne mema, kadi wādi ufwaninwe kufwa amba “atompe lufu pa mwanda wa muntu ense.”​—Bah. 2:9.

 Le Yesu pa kupituluka mu binenwa bityetye bya mu uno vese, wādi ukimba kukokela milangwe ya bakwabo pa shapita yense mutuntulu wa uno mutōto? Mu kine kitatyi’kya, Bayuda bādi bavudile kukwatyila pa mutwe ñimbo ya mitōto. Aye pa kwibavuluja’tu vese umo wa ñimbo ya mitōto, bādi kala babwanya kulangulukila pa shapita yense wa uno mutōto. Shi bino ye byādi bikimba kulonga Yesu, nabya wādi wa kukwasha balondi bandi Bayuda, bavuluke bupolofeto buvule budi mu uno mutōto butala pa byādi bya kulongeka pa lufu lwandi. (Ñim. 22:7, 8, 15, 16, 18, 24) Kadi mu mavese a ku mfulo kwa uno mutōto, batendela’mo Yehova ne kulombola’mba bulopwe bwandi bukafika ne ku mafulo a ntanda.​—Ñim. 22:27-31.

Le Yesu pa kupituluka mu bino binenwa bya Davida, wādi ukimba kulombola’mba i muntu wampikwa mambo? Yesu kumeso kwa kwipaibwa, bāmutwejeje mu kidye kyampikwa kukwatañana na bijila, bamutyibila mambo amba i muntu utuka Leza. (Mat. 26:65, 66) Kino kidye bēkilongele bukidibukidi kadi bufuku bininge mu muswelo wampikwa kukwatañana na bijila. (Mat. 26:59; Mako 14:56-59) Yesu pa kupituluka mu bino binenwa na kwipangula kipangujo kya bututudyatutu, padi wādi ukimba kulombola’mba i kutupu kibi kyalongele kyafwaninwe kufwila.

Le Yesu wādi ukimba kuvuluja bakwabo amba, nansha Yehova byaālekele Davida mulembi wa uno mutōto asusuke, ke kunenapo amba wāmupelele? Kipangujo kyāipangwile Davida, kekilombolapo amba wābudilwe lwitabijo. Pa kupwa’tu kwipangula kino kipangujo, Davida wānenene kadi ne binenwa bikwabo bilombola amba ukulupile amba Yehova udi na bukomo bwa kupandija bantu bandi, ne amba Yehova wādi wendelela na kumwesela. (Ñim. 22:23, 24, 27) Mu muswelo umo onka, nansha shi Yesu “Mwanā Davida” wāsusukile ku mutyi wa masusu, ke kunenapo amba Yehova wāmupelele.​—Mat. 21:9.

Le Yesu wāzumbije mutyima bininge pa kuleka kwālekele kumukinga Yehova mu kakitatyi katyetye mwanda wa alombole ne pa mfulo bululame bwandi? Masusu ne lufu lwa Yesu, kebyādipo mu mpango mibajinjibajinji ya Yehova. Byāmulombele kususuka ne kufwa, enka pātombokele ba Adama ne Eva. Yesu kālongelepo kibi, ino wādi ufwaninwe kususuka ne kufwa pa mwanda wa kupwa mwanda mukatampe wākolomwene Satana, ne kufuta kinkūlwa mwanda wa kwaluja bintu byājimije Adama. (Mako 8:31; 1 Pe. 2:21-24) Kino kyādi kya kulongeka, poso shi enka Yehova wālekele kukinga Yesu mu kakitatyi katyetye, kadi musunsa mubajinji mu būmi bwandi.

Le Yesu wādi ukimba kukwasha balondi bandi balangulukile pa kine kyāmulekēle Yehova afwile ku mutyi wa masusu? * Yesu wādi uyukile amba, kufwila ku mutyi wa masusu pamo bwa nkuma-bibi, kwādi kwa kukukaja bantu bavule. (1 Ko. 1:23) Shi balondi bandi bātele mutyima ku kine kyaāfwidile, bādi ba kwivwanija kamweno kādi na lufu lwandi. (Ngt. 3:13, 14) Bādi ba kumumona bu Mupandiji, ke bu nkuma-bibipo.

Nansha shi Yesu wāpitulukile mu bino binenwa pa bubinga’ka, wādi uyukile amba kwitabija kufwila ku mutyi wa masusu i kulonga kiswa-mutyima kya Yehova. Pa kupwa’tu kupituluka mu uno mutōto, Yesu wānenene amba: “Kibafikidila!” (Yoa. 19:30; Luka 22:37) Bine, kuleka kwālekele Yehova kukinga Yesu mu kakitatyi katyetye, kwāmukweshe afikidije ne pa mfulo byonso byobāmutumine kulonga pano pa ntanda. Kadi kwāmukweshe afikidije bintu byonso byādi bilembelwe pa mwanda wandi “mu Bijila bya Mosesa ne mu Bapolofeto ne mu Ñimbo ya Mitōto.”​—Luka 24:44.