1-2. Le i kika kinenenwa amba tubwanya kulonda mu mayo a Yesu? Leta kimfwa.

FWATAKANYA’PO bidi shi udi mu kibumbo kya bantu benda mu ntanda mutuputupu, mu dishinda dya kyaka didi’mo musenga. Ebiya muntu umo wa bwino wimutangidile kumeso. Paenda, mayo andi enda afwatula mu musenga. Kyaba kimo wemujimina, kemukimumwenepo! Inoko, kemuzakelepo. Abe ne bomwenda nabo, kemulonda senene mu mayo andi!

² Batwe bene Kidishitu ba bine netu, tudi pamo bwa batwe badi mu dishinda dya kyaka didi mu ntanda mutuputupu—ke ino ntanda mibi kadi. Na bya dyese, Yehova i mwitupe muntu mubwaninine wa kwituludika—wandi Mwana Yesu Kidishitu, mwine wētushidile mayo otubwanya kulonda’mo senene. (1 Pe. 2:21) Dibuku dimo dīsambila pa Bible dinenena’mba, mu kino kisonekwa Petelo udingakanya Yesu na mutangidiji. Monka mufwatwilanga mayo a mutangidiji, Yesu nandi wētushidile mayo otubwanya kulonda’mo. Tulondololei bidi bipangujo bisatu mu mwanda utala kulonda mu mayo andi—Le kushintulula bika? mwanda waka tulonde’mo? ne namani?

3. Le kulonda mu mayo a muntu kushintulula bika?

³ Le kulonda mu mayo a muntu kushintulula bika? Mu Bible, kishima ‘kunanga’ ne “maulu,” kyaba kimo bifunkilanga pa mwiendelejo wa muntu. (Ngo. 6:9; Nki. 4:26) Mwiendelejo wa muntu ubwanya kudingakanibwa na mayo efwatula paenda.  Nanshi, kulonda mu mayo a muntu kushintulula kulonda kimfwa kyandi nansha kumwiula.

4. Le kulonda mu mayo a Yesu kushintulula bika?

⁴ Le penepa kulonda mu mayo a Yesu kushintulula bika? Mu kīpi, i kwiula kimfwa kyandi. Mu kisonekwa kimanine’po mutwe wa mwanda, mutumibwa Petelo wisambila pa kimfwa kyāshile Yesu pa mwanda utala kūminina masusu. Inoko, kudi ne myanda mikwabo mivule yotubwanya kwiula’mo Yesu. (1 Pe. 2:18-25) Na bubine, mu būmi bwandi bonso—Yesu wētushidile kimfwa kyotufwaninwe kulonda—kupityila ku bintu byonso byaānenene ne byaālongele.

5. Le bine bantu bampikwa kubwaninina babwanya kulonda kimfwa kibwaninine kya Yesu? Shintulula.

⁵ Le bine batwe bantu bampikwa kubwaninina, tubwanya kulonda kimfwa kya Yesu? En-en, tubwanya. Vuluka’mba Petelo witusoñanya kulonda “senene mu mayo” a Yesu—ino ke mu muswelopo mubwaninine. Shi tulonde senene mu mayo andi, ko kunena’mba tulonge bukomo nansha byotudi bampikwa kubwaninina, tukakōkela binenwa bya mutumibwa Yoano bya amba: ‘Nanga nyeke, monka mwānangile Yesu.’​—1 Yo. 2:6.

6-7. Mwanda waka tubwanya kunena’mba kulonda mu mayo a Yesu kuketufwenya kubwipi na Yehova?

⁶ Kulonda mu mayo a Yesu kuketufwenya kubwipi na Yehova. I kika kyotwanenena namino? Dibajinji, Yesu wāshile kimfwa kilumbuluke kya mwa kwiendejeja mu muswelo usangaja Leza. (Yoa. 8:29) Nanshi, shi tulonde mu mayo a Yesu tukasangaja Yehova. Kadi tubwanya kukulupila’mba Tata wetu wa mūlu ukafwena pabwipi na boba balonga bukomo bwa kwikala balunda nandi.​—Yak. 4:8.

⁷ Dya bubidi, Yesu wāiwile Shandi mu muswelo mubwaninine. O mwanda Yesu wānenene amba: “Yewa ense umona ami wamone ne  Tata mwine.” (Yoa. 14:9) Shi twiula ngikadila ya Yesu ne muswelo waādi wikele na bakwabo —kimfwa, lusa lwaāivwanine wa makopo, kwitūla kwāetūdile pa kyaba kya mwana-mukaji wādi ubela bininge, ne lusa lwaāivwanine bafwilwe—twiulanga Yehova. (Mako 1:40, 41; 5:25-34; Yoa. 11:33-35) Potwenda twiula ngikadila ya Yehova, tufwenanga kwadi bininge.

8. Shintulula kine kinenenwa amba kulonda mu mayo a Yesu kuketukwasha ‘tunekenye’ ino ntanda.

⁸ Kulonda mu mayo a Yesu kuketukwasha tuleke kulabikwa na ino ntanda mibi. Mu bufuku bwandi bwa mfulo pano pa ntanda, Yesu wānenene amba: “Ami nanekenya ino ntanda.” (Yoa. 16:33) Wādi ukimba kunena’mba, aye wāpelele kulonda mulangilo, bitungo, ne bilongwa bya ino ntanda. Yesu kālekelepo kintu nansha kimo kimulengeje aleke kuta mutyima ku bubinga bwine bobāmutumīne pano pa ntanda—ke kubingija Yehova kadi. Le batwe netu le? Mu ino ntanda mudi bintu bivule bibwanya kwitulabika. Ino shi netu tute mutyima ku kulonga kiswa-mutyima kya Yehova, ‘tukanekenya’ ino ntanda.​—1 Yo. 5:5.

9. Le i bika byotufwaninwe kulonga pa kushala nyeke mu dishinda ditwala ku būmi bwa nyeke?

⁹ Kulonda mu mayo a Yesu kuketuletela būmi bwa nyeke. Nsongwalume umo mpeta pawāipangwile byafwaninwe kulonga pa kukamona būmi bwa nyeke, Yesu wāmulondolwele amba: “Iya wikale mulondi wami.” (Mat. 19:16-21) Kadi Yesu wālombwele Bayuda bamo bādi kebakulupilepo amba i Kidishitu, amba: “Mikōko yami . . . inondanga. Neipanga būmi bwa nyeke.” (Yoa. 10:24-29) Yesu wāsapwidile Nikodema, muntu umo wa mu Sanedini wāsangedile bufundiji bwandi amba, ense “ulombola lwitabijo mudi aye” ukamona “būmi bwa nyeke.” (Yoa. 3:16) Tulombolanga lwitabijo mudi Yesu na kulonda byaāfundije ne kwiula byaālongele. Shi tulonge namino, tukashala nyeke mu dishinda ditwala ku būmi bwa nyeke.​—Mat. 7:14.

10. Le i bika byotufwaninwe kulonga pa kwendelela kuyuka Yesu senene? (Yoano 17:3)

¹⁰ Pa kulonda senene mu mayo a Yesu, tufwaninwe kwendelela kumuyuka. (Tanga Yoano 17:3.) ‘Kwendelela kuyuka Yesu,’ ke mwingilopo wa difuku dimo. Tufwaninwe kumuyukidija biyampe—na kwifunda ngikadila yandi, mulangilo wandi ne misoñanya yandi. Nansha shi ketudi balonge myaka inga mu bubine, tufwaninwe kulonga bukomo bwa ‘kwendelela kuyuka’ Yehova ne wandi Mwana.

11. Le mu Maevanjile aná mudi bika?

¹¹ Pa kwitukwasha twendelele kuyuka wandi mwana, Yehova i mulembeje na buswe Maevanjile aná mu Kinenwa kyandi. Mu ano Maevanjile mudi mānga ya būmi bwa Yesu ne ya mwingilo wandi. Ino nsekununi itulombola byānenene Yesu, byaālongele ne mwaādi wiivwanina. Ino mikanda iná itukwasha tute “mutyima bininge” ku kimfwa kya Yesu. (Bah. 12:3)  Na bubine, ye amo mudi mayo āshile Yesu. Nanshi, shi twifunde ano Maevanjile, tukayukidija Yesu biyampe. Ebiya, tukabwanya kulonda mu mayo andi senene.

12. Le i bika byotufwaninwe kulonga pa kumwena ne pa mfulo mu Maevanjile?

¹² Pa kumwena ne pa mfulo mu ano Maevanjile aná, tufwaninwe kulonga bivule kupita’ko’tu kutanga’o. Tufwaninwe kwitūdila’ko kitatyi kya kwifunda’o senene ne kulangulukila’po bininge. (Dingakanya na Yoshua 1:8, kunshi kwa dyani.) Tutalei bidi madingi abidi abwanya kwitukwasha tulangulukile pa Maevanjile ne kwingidija byobya byotutanga’mo.

13. Le i bika byobwanya kulonga pa kumona nsekununi ya mu Maevanjile pamo bwa ayo ilongeka?

¹³ Mabajinji, mona nsekununi ya mu Maevanjile pamo bwa ayo ilongeka. Fwatakanya, amba umone, wiivwane ne kwivwanija byālongekele. Pa kubwanya kino, longa bukimbi mu mabuku a kwifunda aleta bulongolodi bwa Yehova. Tanga myanda idi kūlu ne kunshi kwa vese owifunda. Kimbila’ko myanda mikwabo itala bantu ne bifuko bidi mu nsekununi yowifunda. Dingakanya nsekununi yowifunda na nsekununi ikwatañene nayo idi mu Evanjile mikwabo. Kyaba kimo mulembi umo wa Evanjile ubwanya kubweja’ko tumyanda tumo tushile mulembi mukwabo.

14-15. Le i bika byotufwaninwe kulonga pa kwingidija nsekununi idi mu Maevanjile mu būmi bwetu?

¹⁴ A bubidi, ingidija nsekununi idi mu Maevanjile mu būmi bobe. (Yoa. 13:17) Shi ubapu kwifunda senene nsekununi idi mu Evanjile, wiipangule amba: ‘Le i bika byonefunda mu ino nsekununi, byombwanya kwingidija mu būmi bwami? Le mbwanya namani kukwasha muntu mukwabo na ino nsekununi?’ Longa bukomo bwa kuvuluka muntu oyukile, ebiya pa kitatyi kifwaninwe, umulombole byowefunda na bunwa kadi na buswe.

¹⁵ Pano tulangulukilei pa muswelo otubwanya kwingidija ano madingi abidi. Tusa kwisambila pa nsekununi ya mukaji wa kishala mufudile obāmwene kudi Yesu mu tempelo.

16. Sekununa myanda ilembelwe mu Mako 12:41.

¹⁶ Mona nsekununi bwa ayo ilongeka. (Tanga Mako 12:41.) Mona mu ñeni bintu bilongeka. Tudi mu Kweji wa Nisane 11, mu mwaka wa 33 Yesu ke Mwiye—Yesu usa kufwa mu mafuku matyetye’tu. Yesu walonga kubwipi kwa difuku dituntulu ufundija mu tempelo. Koku bendeji ba bipwilo balwana nandi bamulwa. Dibajinji, bamo mu bukata mwabo, badi batatana kwine kwadi kutamba lupusa lwadi nalo. Bakwabo bamwipangula bipangujo byobadi balanga’mba i bikomo kulondolola. (Mako 11:27-33; 12:13-34) Pano, Yesu waenda ku mutamba mukwabo wa tempelo. Padi—i mu kifuko kyādi kītwa bu Kipango kya Bana-bakaji—kwine kwakokeja kumona bilambwilo bipange dya ku lubumbu lwa kipango. Washikata katale mutūdila bantu byabuntu mu bilambwilo. Wamone bampeta bavule bela’mo bityele bivule. Padi udi kubwipi kwakokeja kwivwana lunwa lwa bityele biponena mu bilambwilo.

17. Le i bika byālongele mukaji wa kishala mulanda utelelwe mu Mako 12:42?

¹⁷ Tanga Mako 12:42. Kakitatyi’tu katyetye pa kupita’po, Yesu wamone mwana-mukaji umo. I mulanda, “mukaji wa kishala mufudile.” (Luka 21:2) Būmi bwandi i bukomo bininge, padi i mukomenwe enka ne kusokola bisakibwa byandi bya mu būmi. Ino waenda ku kilambwilo kimo, waela’mo kufula, tubibese tubidi twa bityele, twine padi ketuvuminepo ne bininge bine potwaponena mu kilambwilo. Yesu uyukile bine byawaela’mo—lepitoni ibidi, tubityele tutyetye bininge twādi twingidijibwa mu kine kitatyi’kya. I lupeto kelubwanyapo kupota nansha musolwe umo, toni twa kudya twādi tupotejibwa na bei mityetye bininge.

18. Mungya Mako 12:43, 44, le Yesu wānenene bika pa kyabuntu kya mukaji wa kishala?

¹⁸ Tanga Mako 12:43, 44. Yesu watengwa bininge na byalonga uno mukaji wa kishala. O mwanda waite bandi bana ba bwanga, webafunkila uno mwana-mukaji kanena’mba: “Uno mukaji wa kishala mulanda waela’mo kutabuka bonso.” Kupwa webashintulwila amba: “Bonso [nakampata bampeta] abaela’mo bya musubu byabo, ino aye, mu bufudile bwandi, waela’mo tonso twaadi nato, tonso twa kumukwasha mu būmi.” Uno mukaji wa kishala wa kikōkeji pa kuleta lupeto lonso lwaādi nalo mu dine difuku’dya, wākulupile amba Yehova ukavuija bisakibwa byandi.​—Ñim. 26:3.

19. Le binenwa byānenene Yesu padi mukaji wa kishala mulanda bibwanya kwitufundija bika?

¹⁹ Ingidija nsekununi mu būmi bobe. Wiipangule amba, ‘Le binenwa bya Yesu byaānenene mukaji wa kishala mulanda bimfundija bika?’ Langulukila padi umo mukaji wa kishala. Ne kutatana kwine mpika, ye uno nandi wādi usaka kupa Yehova bivule. Inoko, wālongele byaādi ubwanya kulonga; wāpēle Yehova bintu bilumbuluke byaādi nabyo. Kadi Yesu wādi uyukile amba kyabuntu kya uno mwana-mukaji kyādi na bulēme kumeso a Shandi. Ñeni yotuboila’ko i ino: Yehova usangalanga shi tumupa bintu bilumbuluke byotudi nabyo—kumwingidila na mutyima umo ne na muya onso. (Mat. 22:37; Kol. 3:23) Yehova usangalanga paetumona twielela’ko! Kadi usangelanga ne kitatyi kyotwitūdilanga’ko ne bukomo botuloñanga mwanda wa kumutōta, kimfwa potwendanga mu busapudi ne ku kupwila.

20. Le i muswelo’ka obwanya kwingidija ñeni yowaboila ku nsekununi ya mukaji wa kishala? Leta kimfwa.

²⁰ Le i muswelo’ka obwanya kwingidijija ñeni yowaboila ku nsekununi ya mukaji wa kishala? Langulukila pa bantu basakilwa kukulupujibwa amba bukomo bobalonga busangajanga Yehova. Kimfwa, le uyukile’ko kaka mununu witopeka nansha kwityepelwa mwanda kabelabelanga kadi kakidipo na  bukomo bwa kusapula mwaadi usapwilanga? Nansha kadi, le uyukile’ko tutu ubela misongo ya zenzeka kadi isansa, utyumukilwe mutyima mwanda kakibwanyapo kukapwila ku Njibo ya Bulopwe kitatyi ne kitatyi? Kwasha bano banabetu na kunena binenwa ‘biyampe mwanda wa kūbaka.’ (Ef. 4:29) Wibalombole bintu bikankamika byowefunda ku nsekununi ya mukaji wa kishala mulanda. Binenwa byobe bikankamika bibwanya kwibakulupija amba, Yehova usangalanga shi tumupa byobya bilumbuluke byotudi nabyo. (Nki. 15:23; 1 Ts. 5:11) Shi ufwija’ko bakwenu pa mwanda wa kupa kobapa Yehova bintu bilumbuluke byobadi nabyo—nansha shi i bityetye namani—ulondanga mu mayo a Yesu senene.

21. Lelo ubasumininwa kulonga bika?

²¹ Bine, tufwijanga’ko pa myanda mivule ya būmi bwa Yesu idi mu Maevanjile, mine itukwasha tumwiule ne kulonda senene mu mayo andi! Ubulwepo kwitūdila’ko mpangiko ya kwifunda ano Maevanjile mu kifundwa kyobe kya pa kasuku nansha mu butōtyi bwenu bwa kisaka? Tuvulukei amba pa kumwena’mo ne pa mfulo kitatyi kyotwifunda ano Maevanjile, tufwaninwe kumona nsekununi bwa ayo ilongeka ne kwiingidija mu būmi bwetu. Kadi tufwaninwe kwiula byobya byālongele Yesu, ne kwivwana byobya byaānenene. Mu kishinte kilonda’ko, tukesambila pa ñeni yotubwanya kuboila ku binenwa bya mfulo byānenene Yesu paādi pano pa ntanda.