Ino i kya bulanda, mwanda ponabwenye kintu kya myaka 13, kipwano kyami na Yehova kyazoza. Bakwetu ba ku masomo badi bamweka bu badi na bwanapabo bonso, ebiya nami kensake kwikala na bwanapabo bonso. Namwene amba bijila bya bambutwile ne misoñanya ya bwine Kidishitu bibandēmena, kadi mwingilo wa ku mushipiditu nao keneumone bu mukomo. Nansha byonkyadipo ntatana kwikala’ko kwa Yehova, ino nkyakidipo mpwene nandi.

Shako nkyalekele’byopo kusapula, ino nadi nkesapula bya kajilwilo bitupu. Ponadi nkasapula nkyadipo neteakanya, o mwanda nadi nkomenwa kushilula mīsambo na muntu, nansha kwisamba nandi bilampe. Mfulo mfulō, nkyakidipo na kujokela’mo nansha kifundwa kya Bible, kadi nsangaji yampwa, bine byanengeje nshikwe busapudi bininge. Nadi neipangula’mba, ‘le muntu ubwanya’tu namani kusapula yenga ne yenga, kweji ne kweji?’

Ponabwenye myaka 17, nadi kensake kwikala na bwanapabo. Ebiya nakuta bivwe, nataluka ku njibo, navilukila mu Ostrali. Bambutwile bami baivwene  bulanda ponatalukile ku njibo. Baikele na malangalanga, inoko badi bamwene amba nkendelela kwingidila Yehova.

Mu Ostrali, mo mwine monkyakidipo ñingidila Yehova bininge. Nadi keñenda ku kupwila na dimodimo. Kupwa napwana na bankasampe badi basenswe pamo bwa ami, kwenda kukatoma ne kuja mu mabala bufuku pa kupwa kupwila. Shi mvuluke, nadi kendi kūlu kumo mu bubine, kūlu kukwabo nako mu ino ntanda, ino konso kekwakidipo kunsangaja.

Kintu kya myaka ibidi pa kupita’po, twetana mu kyaba kityetye na kaka umo waunkweshe aye kuyuka mpika, nshilule kulangulukila pa mwādi mwa kwikadila būmi bwami. Twadi tushikata na bakaka bankungakaji batano, ebiya twaita mutadi wa kipindi ne wandi mukaji Tamara bāye tushikate nabo yenga umo. Padi penda wandi mulume ku myanda ya kipwilo, twadi tushala na Tamara twisamba koku tusepa. Byansangeje. Wadi muntu ulumbwa kadi upēla kwisamba nandi. Byauntulumwije pa kumona muntu mukomo ku mushipiditu inoko uzaula ne na bantu.

Tamara wadi na buzanzamuke bininge. Wetusambwidile buswe bwaadi usenswe bubine ne busapudi. Wadi na nsangaji mwanda wadi wingidila Yehova na mutyima umo, ino ami nkyadipo na nsangaji mwanda nadi’tu mwingidila bya kajilwilo. Mwiendelejo wandi muyampe ne nsangaji ya binebine yaadi nayo byankweshe mu būmi. Kimfwa kyandi kyaunengeje nangulukile pa bubine bwa mu Bisonekwa bwa amba: Yehova usakanga batwe bonso tumwingidile “na nsangaji” ne “na nsadi ya tusepo.”—Ñim. 100:2.

Nadi nsaka kwikala na nsangaji na yadi na Tamara, inoko pa kwikala nayo byadi binomba kushinta bininge. Byalombele kitatyi, ino nashilwile kushinta bityebitye. Nashilula kwiteakanya pa kwenda mu busapudi, ne kwingila bu pania mukwashi kitatyi ne kitatyi. Kino kyankweshe ndeke  kwikala na moyo, ebiya nashilula kusapula na bukankamane. Byonadi ñingidija Bible bininge mu busapudi, nebusenswe bininge. Kepejije, nashilula kwingila bu pania mukwashi kweji ne kweji.

Nashilula kupwana na balunda ba myaka mishileshile badi basenswe bubine, kadi badi bengidila Yehova na nsangaji. Kimfwa kyabo kiyampe kyaunkweshe mandaule bintu byonadi ntangidije kumeso ne kwikala na kibidiji kiyampe kya kutanga Bible difuku ne difuku. Nashilula kutanga Bible bininge, ebiya mwenda mafuku nashilula kwingila bu pania wa lonso. Uno o musunsa mubajinji mu bula bwa myaka, onaivwene monka nsangaji ne mutyima-ntenke ku kupwila.

Mwaka umo pa kupita’po, twetana na Alex, muntu wa kanye kadi muyampe wadi usenswe Yehova ne busapudi. Wadi mwingidi wa mingilo, kadi wadi ke mwingile bu pania myaka isamba. Ne kadi kyaba kimo, Alex wakengile mu Malawi mwadi musakilwa basapudi bavule. Kwine’kwa, wapwene’ko na bamishonele, bene bamushidile kimfwa kiyampe ne kumukankamika atūle nyeke tumweno twa Bulopwe pa kifuko kibajinji.

Mu 2003, twesonga na Alex, ebiya twaendelela kwingila mwingilo wa kitatyi kyonso. Twefundile bintu bivule mu būmi, kadi Yehova wetwesele mu miswelo mivule.

Mu 2009, betunena kukengila bu bamishonele mu Timor-Leste, kakibundi katyetye ka mu bisanga bya mu Endonezi. Batwe bonso twatulumukile bininge, twasangala, kadi twaivwana ne moyo. Myeji itano pa kupita’po, twafika mu Dili mu kibikelo.

Kuviluka kwetulengeje tushinte bintu bivule mu būmi. Twadi tunenwe kwibidila bibidiji bingi, ludimi, byakudya, ne mwikadilo ungi. Mu busapudi twadi tuvudile kutana bantu balanda, bampikwa kufunda bininge ne basusulwa. Kadi twamwene’mo  bantu bavule badi na makambakano ku ngitu ne mu ñeni pa mwanda wa divita ne bya lūma. *

Busapudi bwadi busangaja bininge! Kimfwa, natene’mo nkasampe mwana-mukaji wa myaka 13 wadi na bulanda, witwa bu Maria. * Wafwidilwe inandi myaka mityetye kunyuma, kadi kadipo wimona kyaba ne kyaba na shandi. Pamo bwa bana bavule ba yandi myaka, Maria kadipo uyukile kya kulonga mu būmi. Mvuluka difuku dimo dyaadi unombola mwawiivwanina koku udila. Inoko nkyadipo ngivwanije byaadi unombola, mwanda nkyadipo nesamba ludimi lwabo biyampe. Nalomba Yehova ankwashe mukankamike, ebiya namutangila bisonekwa bya kumukankamika. Myaka mityetye yalondole’po, namona mwashintyile bubine mwiendelejo wa Maria, mumwekelo wandi, ne būmi bwandi. Wabatyijibwa, kadi pano nandi wendejanga bifundwa bya Bible. Dyalelo Maria udi mu kisaka kikatampe kya bantu ba Leza, kadi wimonanga bu muswedibwe.

Yehova weselanga mwingilo wa busapudi mu Timor-Leste. Nansha basapudi bavule byobabatyijibwe mu myaka dikumi ishele kunyuma’i, bavule i bapania, bengidi ba mingilo, ne bakulumpe. Bakwabo bengilanga ku bilo ya bwalamuni ne kukwasha ku mwingilo wa kulupula byakudya bya ku mushipiditu mu yabo ndimi. Mutyima wami usangala bininge ponebamona benda ku kupwila, mapala abo masangale, ne pomona bendelela ku mushipiditu.

Būmi botwadi nabo mu Timor-Leste bwadi bwishile bininge na botwadi nabo mu Ostrali, inoko nkyadipo nanga’mba nkekala na buno būmi bwa nsangaji. Kyaba kimo, twadi twikila mu kamotoka katyetye muyule bantu bavule, mwadi ne bitōyo ne mani byadi bikapotwa ku nsoko. Mafuku amo twadi twifunda Bible na bantu mu tumobo twa kitalela, inoko amo kyanga ne busala ne banzolo banangakana koku ne koku. Shako, nansha byokwadi ano makambakano, nadi mona kyaba kyonso amba ‘i mwingilo muyampe!’

Ponagulukilanga pa būmi bwami bwa pa kala, mfwijanga’ko bambutwile bami pa bukomo bobalongele bwa kumfundija mashinda a Yehova ne kunkwasha nansha ke mu bitatyi bikomo bya pa bwanuke. Kisonekwa kya Nkindi 22:6 i kifikidile pondi. Ba tata ne mama betwitembanga ami ne Alex; basangalanga pobetumona twingidijibwa na Yehova. Tamba mu 2016, twingilanga mu mwingilo wa kipindi mu mwaba wa musambo wa Ostralazi.

I bikomo kwitabija’mba amiwa uno’u nkyadipo nsangela mwingilo wa busapudi kyaba kimo. Pano nasanswa busapudi! Najingulula’mba, ekale mu bitatyi biyampe nansha bibi, nsangaji ya bine itambanga enka ku kwingidila Yehova na mutyima umo. Bine, ino myaka 18 yotwaingidila Yehova pamo na Alex, i myaka ya nsangaji bininge mu būmi bwami. Pano naivwanija bubine bwa binenwa byobānenene Yehova kudi Davida mulembi wa mitōto amba: “Boba bonso banyemena modi bakasangalanga; bakela nyeke nsadi ya tusepo. . . . Kadi boba basenswe dijina dyobe bakakusangela.”​—Ñim. 5:11.