“Batumoni kebadipo’tu biyampe’nka na bantu, ino badi ne biyampe na bami bambwa. Difuku dimo, Elaine wadi wimene kubwipi na kaditempa, wapa bami bambwa byakudya. Kupwa papo, kitatyi kyonso kyotwadi tufwena kubwipi na kaditempa, bami bambwa badi basaka’nka kwenda kudi Batumoni bebape ‘byakudya.’

“Papita myeji mivule. Bambwa badi basangela byakudya bya Batumoni, kadi nami nadi nsangela kwisamba nabo bityetye. Inoko nkyadipo nsaka kwisamba nabo bininge. Nadi na myaka 70 ne kupita, kadi nkyadipo ndyukile bine bikulupile Batumoni. Bipwilo bivule bītela bu bya bwine Kidishitu byobyantyumwine mutyima, namwene amba i biyampe’tu nefunde Bible ami mwine.

“Mu kine kitatyi’kya, nadi mona Batumoni bakwabo bemene kubwipi na tumatempa mu bifuko palapala bya mu kibundi. Abo nabo badi’nka bya bulunda. Badi bavudile kulondolola bipangujo byami kupityila ku Bible, kadi kino kyanengeje nebakulupile bininge.

“Difuku dimo, Elaine wangipangula’mba, ‘lelo witabije amba banyema i kyabuntu kitambile kudi Leza?’ Nami namulondolola’mba, ‘En-en, ngitabije!’ Kupwa Elaine wauntangila Isaya 11:6-9. Tamba mu dine difuku’dya, nadi kensake kwifunda Bible, inoko nkyadipo ngitabija dibuku dyo-dyonso dyobadi bampa kutanga.

“Mafuku alondele’po, nasangedile kwisamba mīsambo mīpi kadi isangaja na ba Elaine ne wandi mulume Brent. Kupwa baunena ntange Mateo kutūla ku Bilongwa, ngivwanije mwine mushintulwila kwikala mwine Kidishitu wa bine. Ebiya natanga bisonekwa’bya. Kitatyi kityetye pa kupita’po, naitabija kwifunda Bible na ba Brent ne Elaine. Padi ke pa bukata bwa mwaka wa 2016.

“Naendelela kwifunda Bible yenga ne yenga ne kutanwa ku kupwila ku Njibo ya Bulopwe. Naivwene nsangaji bininge pa kwifunda bine binena Bible. Pa kupwa’tu kwa mwaka umo ne kupita, nabatyijibwa kendi Kamoni. Pano pondi na myaka 79, ndyukile amba ngidi mu mutōtelo wa bine. Yehova i mungesele pa kumbadila mu kisaka kyandi kya bengidi bandi bepāne.”