KUZUMBIJA mutyima kudi pamo bwa kiselwa kilēma kyotudi nakyo mu mutyima. (Nki. 12:25) Lelo kodi mususuke pa mwanda wa kuzumbija mutyima? Lelo wamwene bu kukibwanyapo kūminina? Shi i amo, kudipo bunka. Bavule mu bukata mwetu, padi badi balelele muntu wa mu kisaka ubela, ke bafwilwe muntu obasenswe, kuponenwa na kimpengele kya kipangila, nansha kutanwa na mwanda udi pamo bwa ino, bakōka bininge, batyumukwa mutyima, ne kuvutakanibwa ñeni. Ino le i bika biketukwasha tūminine kitatyi kyotutyumukwa mutyima? *

Tubwanya kwifunda bivule pa mwa kūminina kuzumbija mutyima, na kulangulukila pa kimfwa kya Mulopwe Davida. Wātenwe na bimyanda bivule mu būmi bwandi, kadi kyaba kimo būmi bwandi bwāikele enka ne mu kyaka. (1 Sa. 17:34, 35; 18:10, 11) Le i bika byākweshe Davida ōminine kitatyi kyaādi uzumbija mutyima? Ne i muswelo’ka otubwanya kwiula kimfwa kyandi?

Davida wātenwe na makambakano mavule mu kitatyi kimo kyonka. Kimfwa, langulukila bidi pa mwanda wāmutene kitatyi kyaādi unyema Mulopwe Solo wādi ukimba kumwipaya. Davida ne bantu bandi pobādi bajoka ku divita, bātene balwana nabo bebebe bintu byabo, basōke abo mobo, ne kusela bisaka byabo bu misungi. Le Davida wālongele’po namani? “Davida ne bana-balume baadi nabo bashilula kudila bininge enka ne byokebashelepo na bukomo nansha bumo bwa kudila.” Kadi Davida wāvutakanibwe ñeni bininge mwanda bana-balume bakulupilwa baādi nabo, bādi “banena kumwasa mabwe.” (1 Sa. 30:1-6) Pano Davida wātenwe na bikoleja bikatampe bisatu mu kitatyi kimo kyonka: Kisaka kyandi kyādi mu kyaka, wādi na moyo wa amba bana-balume baādi nabo babwanya kumwipaya, kadi Mulopwe Solo wādi’nka umukimba mwanda wa kumwipaya. Bine, Davida ye uno wāzumbije mutyima bininge!

Ino le i bika byālongele’po Davida? Ponka’po “wekomeja na bukwashi bwa Yehova Leza wandi.” Le Davida wālongele kino namani? Davida wādi na kibidiji kya kulombela Yehova amukwashe, ne kulangulukila pa muswelo wāmukweshe Yehova pa kala. (1 Sa. 17:37; Ñim. 18:2, 6) Davida wāmwene amba ufwaninwe kunena Yehova amulombole bya kulonga, ebiya wāipangula Yehova amulombole byafwaninwe kulonga. Yehova pa kulombola Davida bya kulonga, Davida wālonga’po kintu kiponka na ponka. Ku mfulo, Yehova wāmwesela, aye ne bantu bandi, bākūla byabo bisaka ne kujokeja bintu byabo. (1 Sa. 30:7-9, 18, 19) Lelo ubamone bintu bisatu byālongele Davida? Wālombele Yehova amukwashe, wālangulukila pa bintu byāmulongēle Yehova pa kala, ne kulonga’po kintu mungya bulombodi bwa Yehova. Le i muswelo’ka otubwanya kwiula Davida? Tutalei bidi miswelo isatu.

1. Lombela. Kitatyi kyonso kyotushilula kuzumbija mutyima, tubwanya kulomba Yehova etukwashe twikale na tunangu. Tubwanya kwiivwana biyampe kitatyi kyotumulombola kintu kyo-kyonso kituzumbija mutyima. Nansha padi tubwanya kulombela milombelo mīpi ya mundamunda shi ngikadilo yotudi’mo keitulengejapo tulombele milombelo milampe. Kitatyi kyonso kyotulomba Yehova etukwashe, tumulombolanga’mba tumukulupile pamo na mwādi mumukulupidile Davida wānenene amba: “Yehova i kidibwe kyami ne kifuko  kyami kikomejibwe kadi i Aye unkūlanga. Leza wami i dibwe dyami, mwine monyemena.” (Ñim. 18:2) Le bine milombelo ikwashanga? Kaka umo pania witwa bu Kahlia unena’mba: “Shi napu kulombela neivwananga biyampe. Kulombela kunkwashanga nange na mulangila Yehova, kadi mukulupilanga bininge.” Na bubine, milombelo i kyabuntu kitupele Yehova kitukwasha tūminine kitatyi kyotuzumbija mutyima.

2. Languluka. Kitatyi kyolangulukila pa byakutene mu būmi, le ubwanya kuvuluka makambakano owabwenye kūminina pa mwanda’tu wa bukwashi bwa Yehova? Shi tulangulukila pa muswelo wetukweshe Yehova, ne waākweshe bantu bandi ba pa kala, twikalanga monka na bukomo ne kumukulupila bininge. (Ñim. 18:17-19) Mukulumpe umo witwa bu Joshua unena’mba, “ne mulembe milombelo yami yonso ke milondololwe. Kino kinkwashanga mvuluke kitatyi kyonalombele Yehova kintu kampanda, waumpa enka byonadi nsakilwa.” Bine, shi tulangulukila pa bintu bitulongēle kala Yehova, twikalanga monka na bukomo bwa kulwa na kuzumbija mutyima.

3. Longa’po kintu. Mu mwanda kampanda kumeso kwa kukwata butyibi bwa kulonga’po kintu, tubwanya bidi kukimba mu Kinenwa kya Leza bulombodi bukulupilwa. (Ñim. 19:7, 11) Bavule bamwene amba, kitatyi kyobalonga bukimbi pa vese kampanda, bevwanijanga muswelo wa kwingidija mwine vese’wa mu būmi bwabo. Mukulumpe umo witwa bu Jarrod ushintulula’mba: “Kulonga bukimbi kunkwashanga ndyuke bivule pa vese ne kwivwanija byobya binsapwila Yehova. Kulonga namino kunkwashanga nkulupile byobya byontanga mwanda wa nonge bintu mungya bulombodi bwandi.” Shi tukimba buludiki bwa Yehova mu bisonekwa ne kwibulonda, tukapēlelwa kūminina kitatyi kyotuzumbija mutyima.

Davida wāivwanije amba pa kūminina kuzumbija mutyima, usakilwa bukwashi bwa Yehova. Wāfwijije’ko pa bukwashi bwāmupēle Yehova, ebiya wafula ku kunena’mba: “Na bukomo bwa Leza mbwanya kukanda lubumbu. Leza wa bine ye umvwika bukomo.” (Ñim. 18:29, 32) Padi tubwanya kulanga’mba makambakano etu adi pamo bwa lubumbu kelukandwapo. Inoko na bukwashi bwa Yehova, tubwanya kunekenya makambakano o-onso adi pamo bwa lubumbu! Bine, shi tulomba Yehova etukwashe, tulangulukila pa byonso byaetulongēle ne kulonga’po kintu mungya buludiki bwandi, tubwanya kukulupila’mba uketupa bukomo ne tunangu totusakilwa pa kūminina kuzumbija mutyima!