Mu uno mwanda, kipwilo kikamona busongi bubajinji bu bwapwile pasongele mulume mukaji mukwabo, kadi kikamona busongi bwa bubidi bu i bwendele’mo. Pa kwivwanija kine kyotwanenena namino, tulangulukilei pa byānenene Yesu bitala dilubu ne kusonga dikwabo.

Monka mokilombwedilwe mu Mateo 19:9, Yesu wālombwele bubinga bumo kete bwa mu Bisonekwa, bubwanya kulengeja busongi bupwe. Wānenene amba: “Yewa ense ulubula wandi mukaji shi ke’nkapo pa mwanda wa busekese, kadi wasonga ungi nankyo walonga makoji.” Bino binenwa bya Yesu bitufundija’mba, (1) busekese bo bubinga bumo kete bwa mu Bisonekwa bubwanya kwilubwila bantu, ne amba (2) shi muntu walubula mukaji pampikwa bubinga bwa mu Bisonekwa wasonge mukwabo walonga makoji. *

Le binenwa bya Yesu bishintulula’mba, shi muntu walonga busekese ne kwilubula na wandi mukaji, udi na bwanapabo bwa mu Bisonekwa bwa kwisonga na muntu mukwabo? Ke amopo. Shi mulume walonga makoji, wandi mukaji wampikwa mambo ye wa kukwata butyibi bwa kumulekela nansha bwa kuleka kumulekela. Shi wapele kumulekela kupwa abelubula mungya bijila, abo bonso abaikala na bwanapabo bwa kwisonga na muntu mukwabo pobapwa’tu kwilubula.

Pakwabo napo, mukaji wampikwa mambo ubwanya kwikala na mutyima wa kulama busongi, ne kwitabija kulekela wandi mulume. Ino, le bikekala namani shi mulume ulongele makoji wapele kwitabija kumulekela kwasaka kumulekela wandi mukaji, kupwa wamulubula mungya bijila? Mulume kakekalapo na bubinga bwa mu Bisonekwa bwa kwisonga na mukwabo, mwanda mukaji i mwitabije kumulekela ne kwendelela kwikala nandi. Shi waumija mutyima wasonge mwana-mukaji mukwabo, aye papo pampikwa bwanapabo bwa mu Bisonekwa bwa kusonga, nankyo walonga monka makoji, mene akalengeja bakulumpe pa kipwilo bamutweje monka mu komite wa butyibi.​—1 Ko. 5:1, 2; 6:9, 10.

Shi mulume wampikwa bwanapabo bwa mu Bisonekwa wasonge mukaji mukwabo, le kipwilo kikamona namani busongi bubajinji ne bwa bubidi? Mungya Bisonekwa, le busongi bubajinji bukidi’ko? Lelo mukaji wampikwa mambo, ukidi’nka na butyibi bwa kukwata, shi bwa kulekela wandi mulume nansha kuleka kumulekela? Le busongi bwa bubidi bukamonwa bu makoji?

Pa kala, kipwilo kyadi kimona busongi bwa bubidi bu makoji shi mukaji wampikwa mambo ukidi mūmi, kasongelwe, kadi kalongelepo busekese. Inoko, Yesu kātelelepo mukaji wampikwa mambo kitatyi kyaādi wisambila pa dilubu ne kwisonga na muntu mukwabo. Ino aye wāshintulwile amba, shi muntu walubula mwinē pandi wasonge mukaji mukwabo, walonga makoji. Mu uno mwanda, dilubu nansha kwisonga na muntu mukwabo, kwine kwātelele Yesu bu makoji, bipwanga busongi bubajinji.

 Shi mulume walubula mukaji, kupwa wasonge mukaji mukwabo, mukaji mubajinji kakidi’popo na butyibi. Ko kunena’mba kakidipo na butyibi bwa kukwata, shi bwa kulekela wandi mulume nansha kuleka kumulekela. Ne kadi, kipwilo kikamona busongi bwa bubidi bu bwendele’mo nansha shi mukaji mubajinji wampikwa mambo kafwile, kasongelwe monka, kadi kalongele busekese. *

Mu kimfwa kyotwesambila’po kūlu’ku, mulume walongele makoji mene alengeje belubule. Ino le bikekala namani shi mulume kalongelepo makoji, ino walubula wandi mukaji kupwa wasonge mukaji mukwabo? Nansha le bikekala namani shi mulume kalongelepo busekese kumeso kwa kwilubula na wandi mukaji, ino walonga’bo ke belubule, kupwa wasonge mukaji mukwabo nansha bitabije wandi mukaji mubajinji kumulekela? Mu bino bimfwa byonso, dilubu ne kusonga mukaji mukwabo, bine bilombola’mba padi makoji bikapwa busongi bubajinji. Busongi bwa bubidi i bwibalunge mungya bijila. Kiteba kya Mulami kya Falanse kya mafuku 15 Kweji 2, 1980 pa paje 31 kinena’mba: “Pano pakadi musonge mukaji mukwabo, kadi kakibwanyapo kutyiba’bo ne kujokela mu busongi bwandi bubajinji; busongi bubajinji bwapwile pobelubwile, pawalongele makoji, ne pawasongele mukaji mukwabo.”

Uno mwivwanino mupya, keulombolapo amba busongi kebukidipo bukola, nansha kutyepeka bubi bwa makoji. Mulume ulubula wandi mukaji pampikwa bubinga bwa mu Bisonekwa, ne kusonga mukaji mukwabo pampikwa bwanapabo bwa mu Bisonekwa, ukatwejibwa mu komite wa butyibi pa mambo a makoji. (Shi mukaji wasongele i mwine Kidishitu, nandi ukatwejibwa mu komite pa mambo a makoji.) Nansha buno busongi bukwabo byokebukamonwepo bu makoji, ino muntu’wa kakabwanyapo bisakibwa bya kupebwa madyese mu kipwilo mu bula bwa myaka mivule, ne kadi kakapebwapo madyese shi bantu bakwabo mu kipwilo bakimulobēle pa bilongwa bibi byaalongele ne kadi bakimona’mba kafwaninwepo kulēmekibwa. Kumeso kwa kumupa madyese, bakulumpe bakalangulukila pa ngikadilo idi’mo mukaji mubajinji, mwine waalongēle buzazangi, ne pa bana bonso batyetye bashile.​—Mal. 2:14-16.

Pa mwanda wa bipa bibi bilupukanga ku kwilubula ne ku kwisonga na muntu mukwabo, bene Kidishitu bakeula Yehova na tunangu ne kumona busongi bu bujila.​—Mus. 5:4, 5; Bah. 13:4.