1. Le bamo beivwananga namani pa kwisamba na bantu bakwabo mu busapudi? (Tala ne kifwatulo.)

 BATWE bantu ba Yehova tusapwilanga bantu bakwabo mwanda tusenswe Tata wetu wa mūlu, kadi tusakanga kwibakwasha bamuyuke. Basapudi bavule basangelanga bininge mwingilo wa busapudi. Inoko bakwabo bakolelwanga kutana nsangaji mu uno mwingilo. Mwanda waka? Bamo padi i ba bumvu bininge kadi ba kubulwa kwikulupila. Bakwabo bakolelwanga kwenda ku mobo a bantu kokebetyilwepo. Bangi nabo ye bano batyinanga’mba babwanya kwibapanga ku mobo. Bakwabo nabo i bafundijibwe kuleka kwikoleja na bantu. Nansha byobasenswe Yehova bininge, bano batutu ne bakaka bakolelwanga kufwena bantu bokebebidilepo mwanda wa kwibasapwila myanda miyampe. Inoko bevwanije amba uno mwingilo i wa mvubu mpata, o mwanda basapulanga kitatyi ne kitatyi. Bine, kino kisangajanga Yehova!

2. Shi ukolelwanga kutana nsangaji mu busapudi, mwanda waka kufwaninwepo kutyumukwa mutyima?

² Lelo kyaba kimo ukolelwanga kutana nsangaji mu busapudi pa mwanda wa uno mwiivwanino? Shi i amo, kokityumukwa mutyima. Kubulwa kwikulupila kobe kubwanya kwikala bu kilomboji kya amba wi mwityepeje, ne amba kusakengapo kukokela milangwe ya bantu bakwabo podi, kadi kusakengapo kwikoleja na bantu bakwabo. Na bubine, batwe bonso ketusakengapo betumone bibi, nakampata potukimba kulongela bantu bakwabo bintu biyampe. Tata obe wa mūlu uyukile senene bikoleja byowikonda nabyo, kadi usakanga kukukwasha. (Isa. 41:13) Mu kino kishinte, tusa kubandaula’mo bintu bitano  biketukwasha tulwe na uno mwiivwanino ne kutana nsangaji mu busapudi.

LEKA KINENWA KYA LEZA KIKUKOMEJE

3. Le i bika byākweshe mupolofeto Yelemia asapwile bantu bakwabo?

³ Tamba kala, musapu utamba kudi Leza wākomeje bengidi bandi kitatyi kyobādi bengila mwingilo mukomo obāpelwe. Kimfwa kimo bidi i kya mupolofeto Yelemia. Wākwetwe moyo pāmupele Yehova mwingilo wa kusapula. Yelemia wānenene amba: “Nkiyukilepo kwisamba, mwanda nakidi mwanuke.” (Yel. 1:6) Le i bika byāmukweshe ekale na bukankamane? Kinenwa kya Leza kyo kyāmukweshe. Wānenene amba: “Kyaikele pamo bwa mudilo utēma mushityile mu mikupa yami, kadi nakōkele kwikilamina munda.” (Yel. 20:​8, 9) Nansha mwaba wa Yelemia byowādi mukomo, musapu obāmupele kusapula wāmupele bukomo bwaādi usakilwa pa kwingila mwingilo.

4. Le i bika bilongekanga potutanga Kinenwa kya Leza ne kulangulukila’po? (Bene Kolose 1:​9, 10)

⁴ Bene Kidishitu bakomejibwanga na musapu udi mu Kinenwa kya Leza. Mutumibwa Polo paālembēle kipwilo kya mu Kolose mukanda, wānenene amba kwikala na buyuki bwa binebine kukalengeja banababo banangile “mwa kufwaninwa Yehova” pobendelela kupa “bipa mu mwingilo onso muyampe.” (Tanga Bene Kolose 1:​9, 10.) Mu uno mwingilo muyampe mubadilwa ne kusapula myanda miyampe. Nanshi potutanga Kinenwa kya Leza ne kulangulukila’po, lwitabijo lwetu mudi Yehova lukomenanga’ko, kadi twivwanijanga mvubu ya kusapula musapu wa Bulopwe.

5. Le i muswelo’ka otubwanya kumwena bininge mu kutanga Bible ne kwifunda’ye?

⁵ Pa kumwena bininge mu Kinenwa kya Leza, ketufwaninwepo kutanga, kwifunda, ne kulangulukila’po bukidibukidi. Witūdile’ko kitatyi. Shi ubatange kisonekwa kyowakolelwa kwivwanija, kokapita’po bukidibukidi. Ingidija Index nansha Dibuku dya Bukimbi dya Batumoni ba Yehova pa kusokola nshintulwilo ya kisonekwa’kya. Shi witūdile’ko kitatyi kivule kya kwifunda, ukaningija kikulupiji kyobe kya amba Kinenwa kya Leza i kya bine. (1 Ts. 5:21) Shi kikulupiji kyobe kibaningila’ko, po pene ukasangela kusapwila bantu bakwabo byowifunda.

 WITEAKANYE SENENE PA KWENDA MU BUSAPUDI

6. Mwanda waka tufwaninwe kwiteakanya senene pa kwenda mu busapudi?

⁶ Shi wi mwiteakanye senene, kukaselapo mutyima kūlu powisamba na bantu. Yesu wākweshe bandi bana ba bwanga beteakanye kumeso kwa kwibatuma mu busapudi. (Luka 10:​1-11) Bana ba bwanga ba Yesu byobāingidije byāebafundije, bābwenye kulonga bintu bivule biyampe. Ne kino kyēbaletele nsangaji.—Luka 10:17.

7. Le i muswelo’ka otubwanya kwiteakanya pa kwenda mu busapudi? (Tala ne kifwatulo.)

⁷ Le i muswelo’ka otubwanya kwiteakanya pa kwenda mu busapudi? Tufwaninwe kulangulukila pa bubine botukasapula ne pa muswelo wa kwibunena mu byetu bishima. Kadi i biyampe tubadikile kulangulukila pa miswelo ibidi nansha isatu ibwanya kulondolola bantu ba mu wetu mwaba, ne kuyuka mwa kulondolwela ku mwanda ne mwanda. Kupwa kitatyi kyotwisamba na bantu, tubwanya kulonga bukomo bwa kutūkija mutyima, kumungamunga, ne kwisamba bya bulunda.

8. Le bene Kidishitu badi pamo bwa bipungwa bya dīma bitelelwe mu kyelekejo kya mutumibwa Polo muswelo’ka?

⁸ Mutumibwa Polo wāletele kyelekejo kilombola byotuloñanga mu mwingilo wa busapudi na kunena’mba: “Tudi na kino kyabulēme mu bipungwa bya dīma.” (2 Ko. 4:7) Le kino kyabulēmbe i kika? I mwingilo upandija būmi wa kusapula musapu wa Bulopwe. (2 Ko. 4:1) Le bipungwa bya dīma nabyo byo bika? Bifunkila pa bengidi ba Yehova basapwila bantu bakwabo myanda miyampe. Mu mafuku a Polo, bansunga bādi bengidija mityibi ya dīma mwanda wa kuselela’mo bintu bya bulēme, pamo bwa byakudya, vinyu, ne lupeto. Ne Yehova nandi, i mwitupe musapu wa bulēme wa kusapula myanda miyampe. Na bukwashi bwandi, tudi na bukomo botusakilwa pa kusapula musapu wetu na kikōkeji.

LOMBA YEHOVA AKUPE BUKANKAMANE

9. Le i muswelo’ka otubwanya kukomena kityino kya bantu nansha bintu bibi byobabwanya kwitunena mu busapudi? (Tala ne kifwatulo.)

⁹ Kyaba kimo tubwanya kutyina bantu nansha kutyina kunenwa bintu bibi mu busapudi.  Le i muswelo’ka otubwanya kunekenya kino kikoleja? Tubandaulei’ko byālombele batumibwa pobēbakankeje kusapula. Pa kyaba kya kukwatwa moyo, bālombele Yehova ebakwashe “besambe’nka kwisamba mwanda [wandi] pampikwa moyo nansha dimo.” Yehova wālondolwele milombelo yabo kiponka na ponka. (Bil. 4:​18, 29, 31) Netu shi tubaikala na kityino kya bantu, tufwaninwe kulomba Yehova etukwashe. Nanshi lomba Yehova akukwashe uningije buswe bosenswe bantu, amba uleke kukwatwa moyo wa kwibasapwila myanda miyampe.

10. Le Yehova witukwashanga namani tuvuije mwingilo wetu wa bu Batumoni bandi? (Isaya 43:​10-12)

¹⁰ Yehova i mwitutonge bu Batumoni bandi, kadi i mulaye kwitukwasha twikale bakankamane. (Tanga Isaya 43:​10-12.) Tubandaulei’ko’tu miswelo iná yaetukwashanga’mo. Mubajinji, Yesu udi netu kitatyi kyonso kyotusapula myanda miyampe. (Mat. 28:​18-20) Wa bubidi, Yehova i mutonge bamwikeulu mwanda wa kwitukwasha. (Kus. 14:6) Wa busatu, Yehova i mwitupe mushipiditu wandi ujila wituvuluje bintu byotwifundile. (Yoa. 14:​25, 26) Wa buná, Yehova i mwitupe batutu ne bakaka ba kusapula nabo. Na bukwashi bwa Yehova ne bwa batutu ne bakaka baswe, tudi na byonso byotusakilwa pa kwendelela kusapula.

IKALA MUNTU UPĒLELWA KUSHINTA NE NA MUMWENO MUYAMPE

11. Le i muswelo’ka obwanya kutana bantu bavule podi mu busapudi? (Tala ne kifwatulo.)

¹¹ Lelo utyumukwanga mutyima kitatyi kyokutanapo bantu bavule ku mobo? Wabulwa’po kwiipangula’mba: ‘Le bantu ba mu wami mwaba badi kwepi mu kino kitatyi?’ (Bil. 16:13) ‘Le badi ku mingilo’ni nansha ku nsoko?’ Shi ye kobadi, lelo ukatana bantu bavule na kusapula mu kipito? Tutu umo witwa bu Joshua unena’mba, “Nasokwele mikenga ya kusapula kitatyi kyonadi nangila kokwa kobapoteja bintu, nansha mu bifuko munangila bantu bavule.” Kadi aye ne wandi mukaji Bridget, batene bantu bavule ku mobo pobadi basapula shi dyuba dibaoloba, ne mu Dya Yenga kyolwa.—Ef. 5:​15, 16.

12. Le i muswelo’ka otubwanya kujingulula byobya bikulupile bantu nansha byobatele’ko mutyima?

¹² Shi bantu kebasangelapo musapu, tompa  kuyuka bine byobakulupile nansha byobatele’ko mutyima. Ba Joshua ne Bridget bengidijanga kipangujo kidi pa paje umbajinji wa trakte pa kushilula mīsambo. Kimfwa, pobengidija trakte Lelo Umonanga Bible Namani? banenanga’mba: “Bantu bamo bamonanga Bible bu dibuku dya Leza, inoko bakwabo nabo kebamumonengapo namino. Le abe nobe umumonanga namani?” Divule kino kibakwashanga bashilule mīsambo.

13. Mwanda waka tubwanya kumona’mba tuvuijanga mwingilo wetu nansha shi bantu kebatejepo byotwibasapwila? (Nkindi 27:11)

¹³ Tuvuijanga mwingilo wetu nansha shi bantu kebatejepo byotwibasapwila. Mwanda waka? Mwanda tuloñanga byobya bitusakila ba Yehova ne Yesu kulonga—ko kunena’mba kupāna bukamoni. (Bil. 10:42) Nansha ke kitatyi kyoketutenepo muntu wa kwisamba nandi nansha kipelwa musapu wetu, tubwanya kwikala na nsangaji mwanda tuyukile amba tusangajanga Tata wetu wa mūlu.—Tanga Nkindi 27:11.

14. Mwanda waka tubwanya kusangala kitatyi kisokola musapudi mukwabo muntu usangela musapu mu mwaba?

¹⁴ Kadi tubwanya kusangala kitatyi kisokola musapudi mukwabo muntu usangela musapu mu mwaba. Kiteba kya Mulami kyadingakenye mwingilo wetu na kukimba mwana ujimine. I bantu bavule bamukimbanga, badi mu kyoki kifuko ke kyoki. Shi mwana wamweka, ke enkapo yewa umusokola usangalanga, ino i bonso basangalanga. Ne mwingilo wa kulonga bana ba bwanga nao i mwingilo wa kisumpi. Pa kusambakanya mwaba, tusakilwa bukwashi bwa musapudi yense mu kipwilo. O mwanda batwe bonso tusangalanga shi muntu washilula kutanwa ku kupwila.

TÁ MUTYIMA PA BUSWE BOSENSWE YEHOVA NE BANTU

15. Le kwingidija Mateo 22:​37-39 kubwanya kwitukwasha namani tuvudijije’ko buzanzamuke bwetu mu busapudi? (Tala ne kya pa kibalu.)

¹⁵ Tubwanya kuvudijija’ko buzanzamuke bwetu mu busapudi na kuta mutyima pa buswe botusenswe Yehova ne bantu. (Tanga Mateo 22:​37-39.) Fwatakanya’po musangelanga Yehova paetumona twingila uno mwingilo ne musangelanga bantu pobashilula kwifunda Bible! Kadi langulukila ne pa lupandilo lutengēle boba bateja musapu wetu.—Yoa. 6:40; 1 Tm. 4:16.

16. Le i muswelo’ka otubwanya kutana nsangaji mu mwingilo wa busapudi kitatyi kyotudi kijabanda ku njibo? Leta bimfwa.

 ¹⁶ Le kudi bubinga kampanda bukulengeja wikale kijabanda ku njibo? Shi i amo, tá mutyima pa byobwanya kulonga mwanda wa kulombola buswe bosenswe Yehova ne bantu. Mu kitatyi kya kipupo kya Corona, Samuel ne Dania kebadipo babwanya kutamba ku njibo. Mu kino kitatyi kikomo, basapwile kyaba ne kyaba ku telefone, kupityila ku mikanda, ne kwendeja bifundwa bya Bible ku Zum. Samuel wadi usapwila bantu baadi witana nabo ku lupitalo pobadi bakamundapa dyaya. Unena’mba: “Makambakano etulengejanga tuzumbije mutyima ne kukōka mu malango, ku ngitu, ne ku mushipiditu. Tunenwe kutana nsangaji mu kwingidila Yehova.” Mu kine kitatyi’kya, Dania waponene waikala ke enka wa mu butanda mu bula bwa myeji isatu. Kupwa byamulomba kwendela mu kakinga mu bula bwa myeji isamba. Dania unena’mba: “Nalongele bukomo bwa kulonga byonso byombwanya mungya ngikadilo yami. Nadi nsapwila bañanga badi bampepula ne kwisamba na boba badi baleta bintu ku njibo. Kadi nesambile biyampe ku telefone na mwana-mukaji umo wa ku bulongolodi bumo bwa myanda ya bundapi.” Makambakano atene ba Samuel ne Dania ebalengeje bakomenwe kulonga bivule mu mwingilo wa busapudi, inoko balongele byonso byobadi babwanya ne kutana’mo nsangaji.

17. Le i muswelo’ka otubwanya kumwena bininge mu madingi otwabandaula mu kino kishinte?

¹⁷ Madingi obetupa mu kino kishinte abwanya kwitukwasha shi twiengidije onso kya pamo. Madingi ne madingi adi pamo bwa kisombelwa kampanda mu kisuku. Shi bisombelwa byonso bibasambakanibwa pamo, bilupulanga soshi miyampe. Netu shi tulonde madingi onso otwabandaula, tukakumbanibwa senene mwa kulwila na milangwe mibi ne kutana nsangaji mu mwingilo wa busapudi.