Le Wadi Uyukile?
Mwanda waka Mulopwe Davida wāingidije mu kibumbo kyandi kya divita bana-balume ke bene Isalelapo?
MU KIBUMBO kya divita kya Davida mwādi basola ke bene Isalelapo, pamo bwa Zeleke mwine Amone, Udia mwine Hiti, ne Itama mwine Moabu. a (1 Bi. 11:39, 41, 46) Kadi mu kibumbo kya Davida mwādi “ne bene Keleta bonso, ne bene Peletyi, ne bene Ngata.” (2 Sa. 15:18) Bimweka bu bene Keleta ne bene Peletyi bādi babutule ba pabwipi ba bene Fidishitia. (Ezk. 25:16) Bene Ngata nabo bātambile mu kibundi kya Ngata kya bene Fidishitia.—Yos. 13:2, 3; 1 Sa. 6:17, 18.
Mwanda waka Davida wālekele bano bana-balume bengile mu kibumbo kyandi kya divita? I mwanda wādi ukulupile amba bādi ba lulamato kwadi, ne nakampata kudi Yehova. Kimfwa, pa mwanda utala bene Keleta ne bene Peletyi, dikishonele dimo dishintulula myanda ya mu Bible dinena’mba: “Baendelele kulamata Davida mu bitatyi bya makambakano makatampe mu buludiki bwandi.” Muswelo’ka? “Bana-balume bonso ba Isalela” pobālekele Mulopwe Davida kebalonda muntu umo “uleta kavutakanya witwa bu Sheba,” bene Keleta ne bene Peletyi bāendelele kulamata Davida ne kumukwasha kupwija butomboki bwa Sheba. (2 Sa. 20:1, 2, 7) Kitatyi kikwabo, Adonia mwanā Mulopwe Davida wāsakile kusela lupona ku bukomo. Inoko bene Keleta ne bene Peletyi bāikele nyeke ba lulamato kudi Davida, ne kumukwasha abikike Solomone mwine wātongelwe na Yehova bu mpingakani wa Mulopwe.—1 Ba. 1:24-27, 38, 39.
Muntu mukwabo ke mwine Isalelapo wāshele wa lulamato kudi Davida, i Itai mwine Ngata. Itai ne basola 600 bākwatakenye Mulopwe Davida pāmutombokele wandi mwana Abisalome ne kwiba mityima ya bana-balume bene Isalela mwanda wa batombokele Mulopwe. Dibajinji Davida wāsapwidile Itai amba, byadi ke mwine Isalelapo kanenwepo kulwa pa mwanda wandi. Inoko Itai wanena’mba: “Bine ne Yehova byadi mūmi, kadi bine ne mfumwami mulopwe byadi mūmi, konso kukekala mfumwami mulopwe, kwikale ku lufu nansha ku būmi, ko kukekala ne mwingidi obe!”—2 Sa. 15:6, 18-21.
Itai wālamete Davida, Mulopwe mushingwe māni wa Yehova
Nansha bene Keleta, bene Peletyi ne bene Ngata byokebādipo bene Isalela, bālēmekele Yehova bu Leza wa bine ne Davida bu mushingwe māni wa Yehova. Na bubine Davida wāfwijije’ko pa kwikala na bano bana-balume ba lulamato!
a Kijila kya Leza kidi mu Kupituluka mu Bijila 23:3-6 kyākankeje bene Amone ne bene Moabu kwikala mu kipwilo kya Isalela. Inoko, bimweka bu kino kijila kyādi kifunkila pa kuleka kwitabijibwa mungya bijila bu bantu ba mu uno muzo. Inoko kekyādipo kipeleja bano beni kwilunga na bantu ba Leza nansha kwikala umbukata mwabo. Tala dibuku Étude perspicace des Écritures, Volime 1, p. 100.
