YESU wālaile amba balondi bandi bakengila mwingilo wa mwangulo mukatampe mu kino kitatyi kya ku mfulo. (Mateo 9:37; 24:14) Tala muswelo ufikidile binenwa byandi mu muswelo wa pa bula mu Transcarpathia, mu Ikrene. Mu bibundi bisatu bilondakane bya mu uno mwaba, mudi bipwilo 50 ne basapudi 5 400 ne musubu. * Ko kunena’mba, muntu 1 pa 4 mu bekadi bonso i Kamoni wa Yehova!

Le uno mwaba udi namani? Tutu wa mu ino ntanda witwa bu Vasile unena’mba, “Muno bantu balēmekele Bible, basenswe boloke, bekutyile umbumo mu bisaka ne kadi baloñanga bukomo bwa kwikwasha.” Ubweja’ko amba: “Ke ponsopo pobetabijanga nkulupilo yetu. Ino shi ubebalombola kintu kimo kya mu Bible, batejanga na katentekeji.”

Na bubine, batutu ne bakaka batanwanga na bikoleja kampanda pobasapula mu mwaba mudi basapudi bavule kupita bungi bwa bantu. Kimfwa, kipwilo kimo kidi na basapudi 134 inoko na mobo 50 mu wabo mwaba! Le basapudi baloñanga’po namani?

Batutu ne bakaka bavule i bepāne abo bene mwanda wa kukasapula mu bifuko bikwabo musakilwa basapudi bavule. Tutu Ionash wa myaka 90 unena’mba, “Bungi bwa basapudi ne bungi bwa mobo a bantu ba mu mwaba wa kyetu kipwilo i musapudi 1 na mobo 2. Nadi nsapulanga mu kibundi kityetye, kufika ne kitatyi kyonabelele nadi ñenda kintu kya makilometele 160 mu mwaba kemwasapwilwe, mwine monadi nsapula mu ludimi lwa Kihongrois.” Basapudi banenwe kwipāna mwanda wa kukakwasha ku myaba mikwabo. Ionash unena’mba, “Pa kukanda kudiye, nadi nanguka na 4:00 ya lubanga ne kusapula kufika ne ku 6:00 ya kyolwa, kitatyi kyadi kijokela kudiye kwetu. Nadi nonga namino mafuku abidi nansha asatu ku yenga.” Le i mumone amba bukomo bwandi bwadi na mvubu? Unena’mba, “Natene nsangaji mivule mu uno muswelo wa busapudi. Naikele na nsangaji ya kukwasha kisaka kimo kidi mu mwaba mwitolwele kifunde bubine.”

Na bubine, ke bonsopo mu bipwilo bya uno mwaba babwanya kwenda ñendo milampe. Inoko bonso, kubadila’mo’nka ne basapudi banunu, baloñanga bukomo bwa kusapula ne pa mfulo mu mwaba obashikete’mo. Mu mwaka 2017, bantu batenwe ku Kivulukilo mu bino bibundi bisatu bapityile bungi bwa basapudi pabidi​—nansha pa bukata bwa bungi bwa bekadi bonso. Ne kutatana kwine mpika, ekale nansha shi twingidilanga kwepi, kukidi ‘bivule bya kulonga mu mwingilo wa Mfumwetu.’​—1 Kodinda 15:58.