Balopwe Belwa mu Kitatyi kya ku Mfulo Bupolofeto bulembelwe mu ino tabulo bwafikidile mu kitatyi kimo. Bulombola mu miswelo mivule amba tudi mu “kitatyi kya ku mfulo.”—Dan. 12:4.

• Bisonekwa: Kus. 11:7; 12:13, 17; 13:1-8, 12

  Bupolofeto: “Kinyema kya ntanda” kinangakana pa ntanda mu myaka tutwa na tutwa. Mu kitatyi kya ku mfulo, mutwe wakyo wa busamba-bubidi i mutapwe. Mwenda mafuku, mutwe wakoma kadi “bantu ba ntanda yonso” balonda kinyema. Satana wingidijanga kino kinyema mwanda wa “kukatamba divita bashele’ko.”

  Kufikidila: Pa kupwa kwa Dilobe, maludiki a bantu ālwile na Yehova. Myaka tutwa na tutwa pa kupita’po, mu Divita I dya Ntanda, Umbikalo wa Beletanye wazoza bininge. Kupwa waikala monka na bukomo pobelungile na États-Unis. Nakampata mu kitatyi kya ku mfulo, Satana wingidijanga maludiki andi onso a politike mwanda wa kupangapanga bantu ba Leza.

• Bisonekwa: Dan. 11:25-45

  Bupolofeto: Mulopwe wa kungala ne mulopwe wa kunshi belwa mu kitatyi kya ku mfulo.

  Kufikidila: Umbikalo wa Alemanye ne Angeletele-Amerika belwa. Mu 1945 Inio Sovietike ne bamukūkile abaikala bu mulopwe wa kungala. Mu 1991, Inio Sovietike wapone, kadi mwenda mafuku, Rusi ne bamukūkile waikala ke mulopwe wa kungala.

• Bisonekwa: Isa. 61:1; Mal. 3:1; Luka 4:18

  Bupolofeto: Yehova watume “mukendi” wandi wa ‘kutōkeja dishinda’ kumeso kwa Bulopwa bwa Meshiasa kushimikwa. Kino kisumpi kyashilwile kusapwila “betyepeje myanda miyampe.”

  Kufikidila: Tamba mu myaka ya 1870 ne kwenda kumeso, Tutu Charles Taze Russell ne balunda nandi baingile bininge mwanda wa kushintulula bubine bwa mu Bible. Mu myaka ya 1880, bashilwile kulombola’mba bengidi ba Leza bafwaninwe kusapula. Balupula kishinte kinena’mba, “Kusakilwa Basapudi 1000” ne kikwabo kinena’mba, “Bashingwe Māni Mwanda wa Kusapula.”

• Bisonekwa: Mat. 13:24-30, 36-43

  Bupolofeto: Walwana wakune biyombo bityani mu budimi bwa ñano, abebileka bitame ne kujikakanya ñano enka ne bifika kitatyi kya mwangulo; kupwa abasansanya biyombo bityani na ñano.

  Kufikidila: Tamba ku mfulo kwa myaka ya 1800 ne kwenda kumeso, bene Kidishitu ba bine bashilwile kwisansanya na bene Kidishitu ba bubela. Mu kitatyi kya ku mfulo, bene Kidishitu ba bine bakongakanibwe ne kusansanibwa na bene Kidishitu ba bubela.

• Bisonekwa: Dan. 2:31-33, 41-43

  Bupolofeto: Binyantyilo bya kyuma ne dilongo bya nkishi i bilongwe na bintu palapala.

  Kufikidila: Dilongo dyelekeja bantu bapela muludikilo wa Umbikalo wa Ntanda wa Angeletele-Amerika. Bano bantu batyepejanga bukomo bwa kulonga bintu pamo bwa kyuma budi na uno umbikalo wa ntanda.

• Bisonekwa: Mat. 13:30; 24:14, 45; 28:19, 20

  Bupolofeto: “Ñano” ibakongakanibwa mu “kibīko” kadi “umpika mukōkele ne mudyumuke” watongwe kulama “bengidi . . . ba mu njibo.” Musapu wa “myanda miyampe ya Bulopwe” ubashilula kuzambalala pa “ntanda yonso ikelwe na bantu.”

  Kufikidila: Mu 1919 umpika mukōkele watongelwe kulama bantu ba Leza. Tamba mu uno mwaka ne kwenda kumeso, Befundi ba Bible baingile bininge mwingilo wabo wa busapudi. Dyalelo, Batumoni ba Yehova basapulanga mu matanda 200 ne kupita ne kulupula mabuku esambila pa Bible mu ndimi 1 000 ne musubu.

• Bisonekwa: Dan. 12:11; Kus. 13:11, 14, 15

  Bupolofeto: Kinyema kya ntanda kya masengo abidi kyakweshe ku kulonga “kyelekejo kya kinyema kya ntanda” ne kupa ‘kyelekejo umpuya.’

  Kufikidila: Umbikalo wa Ntanda wa Angeletele-Amerika wakweshe ku kubunda Kitango kya Mizo. Kino kitango kyakwatakanibwe na mizo mikwabo. Mwenda mafuku, mulopwe wa kungala nandi welunga na kino Kitango, tamba’tu mu 1926 kutūla mu 1933. Pamo bwa Bumo bwa Mizo (O.N.U) bwalondele’po, kino Kitango kyatumbijibwe ntumbo ifwaninwe’nka Bulopwe bwa Leza kete.

• Bisonekwa: Dan. 8:23, 24

  Bupolofeto: Mulopwe wa mpala ya bukalabale waleta ‘musala mu muswelo utulumukwa.’

  Kufikidila: Umbikalo wa Ntanda wa Angeletele-Amerika waletele musala mukatampe. Kimfwa, mu Divita II dya Ntanda, États-Unis waletele musala kewamwekele kashā pawaelele mabombe atomike abidi pa walwana nandi.

• Bisonekwa: Dan. 11:31; Kus. 17:3, 7-11

  Bupolofeto: Kinyema kya “musombelo utyila pyā” kya masengo dikumi kyabuka mu lupongo kadi i mulopwe wa mwānda. Mukanda wa Danyele utela uno mulopwe bu “kintu kya mukenye kileta musala.”

  Kufikidila: Kitango kya Mizo kyalekele kwingila mu Divita II dya Ntanda. Divita pa kupwa, “batūla’ko” Bumo bwa Mizo. Pamo bwa Kitango kya Mizo, Bumo bwa Mizo nabo bwatumbijibwe ntumbo ifwaninwe Bulopwe bwa Leza kete. Bumo bwa Mizo bukatamba bipwilo divita.

• Bisonekwa: 1 Ts. 5:3; Kus. 17:16

  Bupolofeto: Mizo yela lubila lwa “ndoe ne mutyima-ntenke,” ebiya “masengo dikumi” ne “kinyema kya ntanda” abatambe’dyo “ndumba” ne kumonakanya. Kupwa, mizo ibaonakanibwa.

  Kufikidila: Mizo ibwanya kunena’mba ibafikila pa kitungo kya kuleta ndoe ne mutyima-ntenke. Ebiya mizo ikwatakenye Bumo bwa Mizo ikonakanya malongolodi a bipwilo bya bubela. Ino yo ikekala ñanjilo ya kyamalwa kikatampe. Kino kyamalwa kikafula pakonakanibwa ngikadilo yonso ya ntanda pa Amakedona.

• Bisonekwa: Ezk. 38:11, 14-17; Mat. 24:31

  Bupolofeto: Koka ukatamba ntanda ya bantu ba Leza. Kupwa, bamwikeulu bakakongakanya “batongwe.”

  Kufikidila: Mulopwe wa kungala, wingidila pamo na maludiki a ntanda, ukatamba bantu ba Leza. Kitatyi kampanda pa kupwa kuno kutambwa kushilula, bashingwe māni bashele’ko bakakongakanibwa momwa mūlu.

• Bisonekwa: Ezk. 38:18-23; Dan. 2:34, 35, 44, 45; Kus. 6:2; 16:14, 16; 17:14; 19:20

  Bupolofeto: “Yewa wadi ushikete” pa “kabalwe katōka” wavuya “bushindañani bwandi” na konakanya Koka ne kibumbo kyandi kya divita. “Kinyema kya ntanda” kibaelwa “mu dijiba dya mudilo,” ne nkishi mukatampe nandi wavingakanibwa.

  Kufikidila: Yesu, Mulopwe wa Bulopwe bwa Leza, usa kwiya kukūla bantu. Aye pamo ne bantu 144 000 bakaludika nabo ne bibumbo byandi bya bamwikeulu, ukonakanya mizo mikutyile mu bumo, ne maludiki onso a politike a Satana.