1. Le Yesu wāshidile balondi bandi kimfwa’ka, ne nabo bālongele’po namani? (Tala kifwatulo pa kibalu.)

YESU wādi nyeke na mumweno muyampe paādi usapula pano pa ntanda, kadi wādi usaka balondi bandi nabo bekale na mumweno muyampe pa busapudi. (Yoa. 4:35, 36) Yesu paādi na bandi bana ba bwanga, bādi basapula na bupyasakane. (Luka 10:1, 5-11, 17) Ino pobākwete Yesu ne kumwipaya, bālekele’byo kusapula mu kitatyi kityetye. (Yoa. 16:32) Yesu pa kusanguka wēbasoñanya bate mutyima ku busapudi. Aye pa kwenda mūlu, bāsapula na bupyasakane balwana nabo ke bebatompwela ne kwibatompwela’mba: “Talai! mubayuja Yelusalema na bufundiji bwenu.”​—Bil. 5:28.

2. Le Yehova wāesele namani mwingilo wa busapudi?

² Yesu wāendeje mwingilo wādi wingila bano bene Kidishitu ba mu myaka katwa kabajinji, kadi Yehova wēbesele bāvudila’ko. Kimfwa pa Pentekosa 33 Yesu ke mwiye, kwābatyijibwe kintu kya bantu 3000. (Bil. 2:41) Kadi bana ba bwanga bādi benda bavudila’ko bininge. (Bil. 6:7) Inoko Yesu wālaile amba bantu bavule baketabija myanda miyampe mu mafuku a mfulo.​—Yoa. 14:12; Bil. 1:8.

3-4. Mwanda waka bamo bamonanga’mba i bikomo kusapula, ne i bika byotusa kwisambila’po mu kino kishinte?

³ Batwe bonso tuloñanga bukomo bwa kwikala na mumweno muyampe pa busapudi. Mu matanda amo bipēlanga kusapula. Mwanda waka? Mwanda bantu bavule basangelanga kwifunda Bible, kadi bamo belaijanga kufika ne byobasokola Kamoni wa kwibafundija! Inoko mu bipindi bikwabo bya ntanda basapudi bamwene amba i bikomo bininge kusapula;  mwanda bantu kebavudilepo kutanwa ku mobo, kadi boba batanwa ku mobo nabo kebasangelangapo bininge myanda ya mu Bible.

⁴ Shi ushikatanga mu kifuko mukomene kusapula, madingi adi mu kino kishinte abwanya kukukwasha. Tusa kwisambila pa bintu byalongele banabetu bamo pa kwisamba na bantu bavule mu busapudi. Kadi tusa kwisambila pa bubinga bwa kwikadila nyeke na mumweno muyampe, ekale shi bantu betabija musapu nansha shi beupela.

5. Le i makambakano’ka ekondanga na Batumoni bavule?

⁵ Batumoni bavule bakomenwanga bininge kwisamba na bantu ku mobo abo. Basapudi bamo bashikatanga mu bifuko mudi mobo alaminwe bininge nansha mobo makomo kutwela’ko. Kubwanya kwikala nzamu nansha mulami, upelela muntu yense kutwela’ko shi ketyilwepo na mwinē njibo. Basapudi bakwabo nabo babwanya kusapula ku njibo ne njibo pampikwa kukambakanibwa, inoko batana bantu batyetye’tu ku mobo. Basapudi bangi nabo basapulanga mu bibundi bya kunja nansha bya kulampe mudi’tu bantu batyetye kete. Basapudi babwanya padi kwenda lwendo lulampe mwanda’tu wa kukatala muntu umo, ino bamutana padi ne ku njibo kwine kutupu’ye. Shi tusapulanga mu myaba mikomo ya uno muswelo, ketufwaninwepo kuleka’byo. Le i bika byotubwanya kulonga pa kunekenya bino bikoleja amba twisambe na bantu bavule mu busapudi?

6. Le basapudi beifwene namani na babiluwe ba lui?

⁶ Yesu wādingakenye mwingilo wa busapudi na mwingilo wa kiluwe kya lui. (Mako 1:17) Babiluwe ba lui bamo babwanya padi kupoya mafuku mavule ino pampikwa kukwata keta. Inoko kebalekanga’byopo, bashintanga mupoilo. Bashintanga kitatyi, kifuko, nansha muswelo wa kupoya. Netu tubwanya kushinta uno muswelo ne mu busapudi. Twisambilei bidi pa ano madingi.

7. Le i bika bibwanya kulupuka’ko shi tushinta kitatyi kya kusapula?

⁷ Longa bukomo bwa kutana bantu mu bitatyi bishileshile. Tukesamba na bantu bavule shi tusapula kitatyi kyobabwanya padi kutanwa ku njibo. Na bubine, muntu yense ufulanga’nka ku kujokela ku njibo! Batutu ne bakaka bavule basapulanga kyolwa nansha kabufuku mwanda batananga’ko bantu bavule. Mu bino bitatyi, benē njibo bekalanga padi kebetūje kadi badi na kitatyi kya kwisamba. Nansha padi ubwanya kulonda madingi aletele mukulumpe umo witwa bu David. Unena’mba, pa kupwa kusapula mu mwaba mu kitatyi kampanda, ami ne otusapula nandi tujokelanga boba bonso boketwadipo tutene ku njibo. Kadi ubweja’ko amba, “ngikalanga ntulumuka pa kutana benē njibo bavule ku mobo abo kitatyi kyotwibajokela dya bubidi.” *

8. Le i muswelo’ka otubwanya kwingidija Musapudi 11:6 mu busapudi?

⁸ Ketufwaninwepo kuleka’byo. Kisonekwa kīmanine’po mutwe wa mwanda kituvuluja mumweno otufwaninwe kwikala nao. (Tanga Musapudi 11:6.) David otwatelanga kalekele’byopo. Wafudile ku kutana muntu ku njibo pa kupwa kumujokela misunsa mivule ino kumutana’ko mpika. Uno muntu wadi usangedile kwisamba myanda ya mu Bible kadi wamulombola’mba, “kendi mulonge pano’pa kintu kya myaka mwānda, kashā nkyamwene Kamoni wa Yehova ku yami njibo.” David unena’mba, “najingulwile amba shi ku mfulo  ubatana bantu ku njibo, divule dine bevwananga musapu otusapula.”

9. Le Batumoni bamo balongele namani pa kwisamba na bantu kebavudilepo kutanwa ku mobo?

⁹ Tompa kushinta kifuko. Pa kwisamba na bantu kebavudilepo kutanwa ku mobo, basapudi bamo bashintanga kifuko kwa kukasapula. Kimfwa, kusapula mu bipito ne kusapula na matempa i manwa mayampe pa kwisamba na bantu bashikatanga mu mobo mobetupelelanga kutwela potusapula ku njibo ne njibo. Kino kikwashanga Batumoni basapwile bantu bashikatanga mu ano mobo. Kadi basapudi bavule bamwene amba bantu betabijanga kwisamba nabo nansha kutambula dibuku ku biwanza, mu mansoko ne ku bifuko bya busunga. Floiran, mutadi umo wa kipindi wa mu Bolivi unena’mba: “Twendanga mu mansoko ne mu bifuko bya busunga kushilwila ku 1:00 kutūla ku 3:00 ya kyolwa pekalanga bansunga na bampotyi batyetye. Tuvudile kwisamba biyampe na bantu, enka ne kushilula bifundwa bya Bible.”

10. Le i manwa’ka okokeja kwingidija pa kusapwila bantu?

¹⁰ Tompa misapwilo mishileshile. Langa’po bidi shi walongele bukomo kitatyi ne kitatyi bwa kukemona na muntu. Ubamujokela mu bitatyi bishileshile ino kumutana ku njibo mpika. Lelo kudi muswelo mukwabo obwanya kwisamba nandi? Katarína unena’mba, “nembelanga boba bonkitanapo ku njibo mikanda, nebashintulwila bine byonadi kimba kwibasapwila.” Le i ñeni’ka yotuboila’ko? Tompa manwa meshileshile posapwila bantu ba mu wenu mwaba.

11. Mwanda waka bantu bamo bapelanga musapu otusapula?

¹¹ Bantu bamo bapelanga musapu otusapula. Bamwene amba kebasakilwapo kwifunda myanda ya Leza nansha ya mu Bible. Kebakulupilepo mudi Leza, mwanda bamonanga masusu mavule mu ino ntanda. Bapelanga myanda ya mu Bible, mwanda bamonanga buzazangi bwa bendeji ba bipwilo banena’mba balondanga binena dino dibuku. Bakwabo nabo batele mutyima bininge ku twabo twaji, bisaka ne makambakano abo, bine bibalengeja balange amba Bible kabwanyapo kwibakwasha. Le tukalama nsangaji yetu namani shi bantu botusapwila kebamwenepo musapu wetu na bulēme?

12. Le kwingidija binenwa bidi mu Bene Fidipai 2:4, kubwanya kwitukwasha namani mu busapudi?

¹² Tá bantu mutyima. Bantu bavule badi bapela dibajinji myanda miyampe, beitabijanga mwenda mafuku pa kumona’mba musapudi webatele mutyima bya binebine. (Tanga Bene Fidipai 2:4.) Kimfwa, David otwatelanga kala unena’mba, “shi muntu wanena’mba kebimusangejepo, tutūlanga Mabible ne bitabo byetu kufula kupwa twanena’mba: ‘Tusaka kuyuka mwanda waka kebikusangejepo.’” Bantu babwanya kujingulula shi muntu wibatele mutyima. Babwanya kwilwa bine byotwanenene, inoko padi bakavuluka muswelo otwebatele mutyima. Nansha shi mwinē njibo wapele tunene, tubwanya kulombola’mba tumutele mutyima kupityila ku byotulonga ne ku mumwekelo wetu wa mpala.

13. Le i muswelo’ka otubwanya kukwatañanya musapu wetu na bisakibwa bya muntu ne muntu?

¹³ Tulombolanga’mba tutele muntu mutyima, shi tukwatañanya musapu wetu na bisakibwa byandi ne na bintu byasangela. Kimfwa, le tubamone kilomboji kilombola’mba muntu’wa udi na bana? Bambutwile babwanya kusangela madingi a mu Bible esambila pa mwa kulelela bana, nansha mwa kwikadila na nsangaji mu kisaka. Le tubamone mankufidi mangimangi ku mulango? Tubwanya kwisambila na mwinē njibo pa bupolapola bwine bwibalengeja bekale na moyo, kadi kino kibwanya kumulengeja akimbe kuyuka muswelo wa kupwa bupolapola lonso. Mu ngikadilo yo-yonso, longa bukomo bwa kukwasha boba bakwivwana bamone amba madingi a mu Bible abwanya kwibakwasha. Katarína otwatelanga kala unena’mba, “nangulukilanga pa muswelo walumbulwile Bible būmi bwami.” Pano Katarína wisambanga na kikulupiji, kadi bantu baesamba nabo bamonanga kino kikulupiji.

14. Mungya Nkindi 27:17, le bantu basapwila pamo babwanya kwikwasha namani?

 ¹⁴ Mwena mu bukwashi bwa bakwenu. Mu myaka katwa kabajinji, Polo wālombwele Temote manwa andi a kusapula ne kufundija, kupwa wākankamika Temote engidije ano manwa pa kukwasha bantu bakwabo. (1 Ko. 4:17) Pamo bwa Temote, tubwanya kuboila ñeni kudi banabetu ba bwino ba mu kyetu kipwilo. (Tanga Nkindi 27:17.) Twisambilei bidi pa kimfwa kya tutu umo witwa bu Shawn. Waingile bu pania mu kitatyi kampanda kunja kwadi bantu bavule basangela’nka byabo bipwilo. Le walamine nsangaji yandi namani? Unena’mba, “ponso pobyadi bibwanika nadi nsapula na muntu. Mu dishinda potutamba ku njibo imo ketwenda ku njibo mikwabo, twadi twisambila pa mwa kulumbulwila bwino bwetu bwa kufundija. Kimfwa, twadi tulangulukila pa motwesambilanga na muntu. Kupwa twesambila pa muswelo mukwabo otubwanya kulonga shi tubatanwa monka na mwanda wa uno muswelo.”

15. Mwanda waka milombelo idi na mvubu pa mwanda utala busapudi?

¹⁵ Lomba Yehova akukwashe. Lomba Yehova akuludike ponso posapula. Pampikwa bukwashi bwa mushipiditu wandi ujila, ketubwanyapo kulonga kintu nansha kimo. (Ñim. 127:1; Luka 11:13) Polomba Yehova akukwashe, mulombe bintu bipotoloke. Kimfwa, munene akuludikile kudi muntu usaka kwifunda yandi myanda kadi usaka kuteja. Kupwa longa mungya milombelo yobe na kusapwila muntu yense otana.

16. Le i kika kinenenwa’mba kifundwa kya pa kasuku kibwanya kwitukwasha mu busapudi?

¹⁶ Witūdile’ko kitatyi kya kwifunda pa kasuku. Kinenwa kya Leza kinena’mba: “[Jingululai] banwe bene kiswa-mutyima kya Leza kiyampe, kitabijibwe ne kibwaninine.” (Loma 12:2) Shi tukulupile amba tuyukile bubine butala padi Leza, tukasapwila bakwetu na kikulupiji. Katarína, otwatelanga kala unena’mba: “Pano kepadi myaka mityetye’tu, najingulwile amba nadi nsakilwa kuningija lwitabijo lwami mu bufundiji bumobumo bwa mu Bible. Ebiya nefunda na katentekeji bintu bibingija’mba Umpangi udi’ko, amba Bible i Kinenwa kya Leza binebine, ne amba Leza udi na bulongolodi bumutangidile dyalelo.” Katarína unena’mba kifundwa kyandi kya pa kasuku kyaningije lwitabijo lwandi ne kumuletela nsangaji mivule mu busapudi.

17. Mwanda waka Yesu wādi nyeke na mumweno muyampe mu busapudi?

¹⁷ Yesu wādi nyeke na mumweno muyampe kadi wāendelele kusapula nansha bantu bamo byobāpelele musapu wandi. Mwanda waka? Wādi uyukile amba bantu basakilwa bininge kuyuka bubine, kadi wādi usaka kwibapa mikenga mivule ya kwitabija musapu wa Bulopwe. Kadi wādi uyukile amba bantu bamo bādi bapela kwitabija musapu wandi dibajinji, bakokeja kwitabija mwenda mafuku. Tulangulukilei bidi pa byālongekele mu kyabo kisaka. Mu myaka isatu ne kipindi yāsapwile Yesu, i kutupu mwanabo nansha umo wāikele ke wandi mwanā bwanga. (Yoa. 7:5) Inoko Yesu pa kupwa kusanguka, banababo bāikele ke bene Kidishitu.​—Bil. 1:14.

18. Mwanda waka twendelelanga kusapula?

¹⁸ Ketuyukilepo i ani uketabija mwenda mafuku bubine bwa mu Bible botufundija. Ku bamo bibalombanga kitatyi kivule pa kwitabija musapu otusapula kupita’ko bakwabo. Enka ne boba bapela kwitwivwana, bakokeja ‘kutumbija Leza’ mwenda mafuku pobamona mwiendelejo wetu muyampe ne mumweno wetu muyampe.​—1 Pe. 2:12.

19. Mungya 1 Bene Kodinda 3:6, 7, le i bika byotufwaninwe kuvuluka?

 ¹⁹ Potukuna ne kusangila, tufwaninwe kuvuluka’mba Leza ye utamijanga’byo. (Tanga 1 Bene Kodinda 3:6, 7.) Getahun, tutu umo wingilanga mu Efiopya unena’mba: “Konshikete, nadi Kamoni wa Yehova umo kete mu bula bwa myaka 20 ne musubu. Ino pano kudi basapudi 14. Mu bano basapudi, mwabatyijibwe basapudi dikumi ne basatu, kubadila’mo ne wami mukaji ne bami bana basatu. Ku kupwila kwiyanga kintu kya bantu 32.” Getahun i musangale mwanda waendelele kusapula koku wilaije na kitūkijetyima Yehova akokele bantu ba mityima myoloke ku bulongolodi bwandi!​—Yoa. 6:44.

20. Le twiifwene namani na bantu ba kukūla bantu?

²⁰ Yehova umwene amba bantu bonso i balēme. I mwitupe dyese dya kwingila pamo na wandi Mwana mwingilo wa kukongakanya bantu ba mizo yonso kumeso kwa mfulo ya ino ngikadilo kufika. (Hak. 2:7) Mwingilo wetu wa busapudi ubwanya kudingakanibwa na mwingilo wa kukūla bantu. Kadi tudi pamo bwa bantu ba mu kisumpi kya kukūla bantu batuminwe kukūla boba bafīkilwe mu mungotyi. Nansha byobabwanya kutana bantu’tu batyetye bakishele bōmi, mwingilo wa bonso ba kwibakūla udi na mvubu. Ye mobikadile ne na mwingilo wa busapudi otwingila. Ketuyukilepo i bantu banga basa kupanda mu ino ngikadilo ya Satana. Inoko Yehova ubwanya kwingidija muntu ye-yense motudi mwanda wa kwibakwasha. Andreas, ushikatanga mu Bolivi unena’mba, “ndyukile amba shi muntu wefunde bubine bwa mu Bible ne kubatyijibwa, i mwanda bantu bavule balongele bukomo bwa kumukwasha.” Nanshi netu twikalei nyeke na mumweno muyampe pa busapudi. Shi twikale nyeke na mumweno muyampe, Yehova uketwesela, kadi mwingilo wa busapudi uketuletela nsangaji.