1-2. Le i makambakano’ka ekondanga na Batumoni bavule?

MUTUMIBWA Polo wākankamikile Temote, enka ne bene Kidishitu bonso, bengile mwingilo wabo ne pa mfulo. (2 Tm. 4:5) Batwe bonso tulondanga madingi a Polo. Inoko twikondanga na makambakano kyaba kimo. Batutu ne bakaka bavule bibalombanga bukankamane pa kusapula. (2 Tm. 4:2) Kimfwa langulukila pa banabetu bashikete mu matanda mobapeleje mingilo imoimo nansha kukankaja mwingilo wetu onso. Basapulanga nansha byobayukile amba babwanya kukutwa!

² Bantu ba Yehova bekondanga na makambakano meshileshile mene abwanya kwibatyumuna mutyima. Kimfwa bavule bengilanga mansá mavule mwanda’tu wa kusokola bisakibwa bya byabo bisaka. Badi padi na mutyima wa kusapula bininge, inoko ku mfulo kwa yenga bukomo bwebatyepa. Bakwabo nabo kebabwanyapo kusapula pa mwanda wa misongo ya zenzeka nansha bununu, kadi padi bashikete kijabanda ku njibo. Bakwabo nabo bekondanga kitatyi kyonso na milangwe ya kwityepelwa. Kaka umo witwa bu Mary, * unena’mba: “Binombanga kulonga bukomo bininge pa kutalula milangwe mibi mine inkokejanga mu ñeni. Kadi netopekanga mwanda injimijijanga kitatyi ne bukomo bwa kusapula.”

3. Le i bika byotusa kwisambila’po mu kino kishinte?

³ Nansha shi tudi mu ngikadilo’ka, Yehova ubwanya kwitupa bukomo bwa kulwa na makambakano etu koku kadi tumwingidila mungya ngikadilo yotudi’mo. Kumeso kwa kwisambila pa muswelo ubwanya kwitukwasha Yehova, twisambilei bidi pa muswelo waākomeje ba Polo ne Temote bengile mwingilo wabo nansha ke mu makambakano.

4. Le Polo wātenwe na makambakano’ka?

⁴ Polo wātenwe na makambakano mavule. Nakampata wādi usakilwa bukomo pobāmukupile, bāmwasa mabwe, ne pobāmukutyile. (2 Ko. 11:23-25) Polo wālombwele patōka amba kyaba kimo wātyumukilwe mutyima. (Loma 7:18, 19, 24) Kadi wāuminine makambakano ādi pamo bwa “mwiba mu ngitu,” mene awādi usaka Leza amutalule’o.​—2 Ko. 12:7, 8.

5. Lelo Polo wābwenye kulonga bika nansha byaātenwe na makambakano?

⁵ Yehova wāpele Polo bukomo bwa kwingila mwingilo wandi nansha byaātenwe na ano makambakano onso’a. Tala byālongele Polo. Kimfwa paādi mu njibo ya kifungo mu Loma, wābingije na bupyasakane myanda miyampe ku meso a bendeji Bayuda ne padi ku meso a bambikavu. (Bil. 28:17; Fid. 4:21,22) Kadi wāsapwidile Balami bavule ba mulopwe, enka ne bonso bādi bāya kumupempula. (Bil. 28:30, 31; Fid. 1:13) Mu kino kitatyi, Polo wālembele mikanda ya ku bukomo bwa mushipiditu mine ikwasha ne bene Kidishitu ba bine dyalelo. Ne kadi, kimfwa kya Polo kyākankamikile kipwilo kya mu Loma, wālengeja banababo bekale na “bukankamane bukatampe bwa kwisamba mwanda wa Leza pampikwa moyo.” (Fid. 1:14) Nansha Polo byākadipo ubwanya kulonga bintu bimo mu kine kitatyi’kya, ino wālongele byaādi ubwanya kulonga mwanda wa kukwasha ku “kwendeja myanda miyampe kumeso.”​—Fid. 1:12.

6. Mungya 2 Bene Kodinda 12:9, 10, le i bika byākweshe Polo engile mwingilo wandi?

⁶ Polo wādi uyukile amba kintu kyonso kyaādi ulonga mu mwingilo wa Yehova, wēkilongele na bukomo bwa Leza ke bwa aye mwinepo. Wānenene amba bukomo bwa Leza “bufikijibwanga pa bubwaninine mu buzoze.” (Tanga 2 Bene Kodinda 12:9, 10.) Kupityila ku mushipiditu wandi ujila, Yehova wāpele Polo bukomo bwa kwingila mwingilo wandi ne pa mfulo, mu kupangwapangwa, mu kukutwa ne mu makambakano makwabo āmutene.

7. Le i makambakano’ka ādi anenwe kunekenya Temote pa kwingila mwingilo wandi?

⁷ Temote nkasampe wādi wingila na Polo, nandi wādi ukulupile amba Leza ukamupa bukomo bwa kwingila mwingilo wandi. Temote wādi wenda na Polo mu ñendo milampe ya bu mishonele. Kadi Polo wāmutumine  mu ñendo mikwabo kukapempula bipwilo ne kwibikankamika. (1 Ko. 4:17) Padi Temote wēmwene bu kabwenyepo bisakibwa. O mwanda padi kyo kine kyāmusapwidile Polo amba: “Muntu kakikufutulula nansha dimo amba wi mwanuke.” (1 Tm. 4:12) Kadi mu kine kitatyi’kya Temote nandi wādi na mwiba mu ngitu, ko kunena’mba “kubelabela.” (1 Tm. 5:23) Inoko Temote wādi uyukile amba mushipiditu ujila wa bukomo wa Yehova, ukamupa bukomo bwasakilwa bwa kusapula myanda miyampe ne kwingidila banababo.​—2 Tm. 1:7.

8. Le Yehova ukomejanga bantu bandi dyalelo namani?

⁸ Dyalelo Yehova upanga bantu bandi “bukomo butabukile bwikalanga na bantu,” mwanda wa bendelele kumwingidila na kikōkeji. (2 Ko. 4:7) Twisambilei bidi pa bintu biná bitupele Yehova mwanda wa kwitukomeja ne kwitukwasha tumukōkele nyeke: milombelo, Bible, batutu ne bakaka, ne busapudi.

9. Le milombelo ibwanya kwitukwasha namani?

⁹ Bakomejibwe na milombelo. Monka mokilembelwe mu Bene Efisesa 6:18, Polo witukankamika tulombele Leza “kyaba kyonso.” Leza nandi uketukomeja. Jonnie ushikatanga mu Bolivi, wemwenine mwa mukwashishe milombelo kitatyi kyaadi mu makambakano. Wandi mukaji ne bandi bambutwile babelele misongo mikatampe mwa kimo. Jonnie wadi wikonda pa kuvuija bisakibwa bya abo bonso busatu. Inandi wafwa, kadi papita kitatyi kilampe pa kusaka’mba wandi mukaji ne shandi bakome. Jonnie uvuluka’mba, “kitatyi kyonadi ntyinibwa bininge, kintu kyadi kinkwasha nyeke i kulomba bintu bipotoloke.” Yehova wapele Jonnie bukomo bwaadi usakilwa pa kūminina. Ronald mukulumpe umo wa mu Bolivi, bamulombwele amba inandi udi na dyaya. Myeji mityetye pa kupita’po inandi wafwa. Le i bika byamukweshe ōminine? Unena’mba: “Ponadi nomba Yehova nadi mupungulwila mutyima wami ne kumulombola monso moneivwanina. Ndyukile amba wivwanije ngikadilo yondi’mo kupita muntu ye-yense, enka ne ami mwine.” Kyaba kimo tubwanya kulēmenenwa bininge nansha kukomenwa kuyuka bya kulomba. Inoko Yehova witunena tumulombe nansha shi tubakomenwa bishima bya kulombola motulangila ne motwiivwanina.​—Loma 8:26, 27.

10. Monka mokilombwedilwe mu Bahebelu 4:12, mwanda waka kutanga Bible ne kulangulukila pa byotutanga kudi na kamweno?

¹⁰ Bakomejibwe na Bible. Monka mwādi mukulupidile Polo amba Bisonekwa bikamupa bukomo ne kumusenga, netu tubwanya kwibikulupila. (Loma 15:4) Shi tutanga Kinenwa kya Leza ne kulangulukila’po, Yehova ubwanya kwingidija mushipiditu wandi ujila mwanda wa kwitukwasha twivwanije muswelo wa kwingidija Bisonekwa mu myanda itutene. (Tanga Bahebelu 4:12.) Ronald otwatelanga kala unena’mba: “Ne musangale bininge pa kwikala na kibidiji kya kutanga Bible difuku ne difuku ku kyolwa. Nangulukilanga bininge pa ngikadila ya Yehova ne pa muswelo waikele na bengidi bandi na buswe. Kino kinkwashanga ngikale monka na bukomo.”

11. Lelo Bible wakomeje kaka umo wa njia namani?

¹¹ Shi tulangulukila pa Kinenwa kya Leza, tubwanya kwikala na mumweno muyampe pa ngikadilo yotudi’mo. Tala Bible mwaakwashishe kaka umo wa kishala wadi na njia. Mukulumpe umo wamudingile amba kutanga mukanda wa Yoba kubwanya kumukwasha. Paatangile’o waikele mubajinji kutopeka Yoba pa milangwe yandi mibi. Mu ñeni yandi wadi  udyumuna Yoba amba: “A Yoba! Kokikala na milangwe mibi!” Ino kupwa wajingulula’mba mulangilo wandi nao wadi ke mwiifwane na wa Yoba. Kino kyamukweshe alemunune mumweno wandi ne kumukomeja ōminine misanshi yaadi nayo ya kufwilwa wandi mulume.

12. Le Yehova witukomejanga namani kupityila ku banabetu mu lwitabijo?

¹² Bakomejibwe na batutu ne bakaka. Muswelo mukwabo obakomejanga bene Kidishitu kudi Yehova i kupityila ku banababo mu lwitabijo. Polo wālembele amba wādi wabila ‘kwikankamika’ na banababo mu lwitabijo. (Loma 1:11, 12) Mary otwatelanga kala, usangelanga kwitana pamo na banababo mu lwitabijo. Unena’mba: “Yehova waingidije batutu ne bakaka bene kebadipo bayukile nansha makambakano ami. Badi banena bintu bikankamika ne kuntumina tumikanda, bintu bine byonadi nsakilwa. Kadi i biyampe kulombola’mo bakaka bakwabo batenwe na makambakano na otudi nao ne kuboila ñeni ku byobalongele’po. Bakulumpe nabo bankwashanga nyeke nemone amba ne mulēme mu kipwilo.”

13. Le i muswelo’ka otubwanya kwikankamika batwe bene na bene ku kupwila?

¹³ Kifuko kimo kiyampe kyotubwanya kwikankamika batwe bene na bene i ku kupwila. Shi ubaenda ku kupwila, longa bukomo bwa kukomeja bakwenu na kwibalombola’mba wibasenswe bya binebine ne kwibafwija’ko pa byobalonga. Kimfwa, difuku dimo kumeso kwa kupwila kushilula, mukulumpe umo witwa bu Peter wanenene inabana udi na mulume wampikwa kwitabija amba: “Bine, potukumonanga wiya ku kupwila bitukankamikanga bininge. Wiyanga na bobe bana bonso basamba kadi beteakanye mwa kulondolwela.” Impolo ya nsangaji yatengalala uno kaka mu meso, wamulondolola’mba: “Bine, ye binenwa byonadi nsakilwa kwivwana dyalelo.”

14. Lelo kusapula kwitukwashanga namani?

¹⁴ Bakomejibwe na busapudi. Potusapwila bakwetu bubine bwa mu Bible tutūkijibwanga mutyima ne kukomejibwa, ekale shi abapele nansha shi abaitabija. (Nki. 11:25) Kaka umo witwa bu Stacy nandi wakomejibwe na busapudi. Papangilwe muntu umo wa mu kyabo kisaka, wafītyilwe bininge ne kwiipangula kyaba kyonso amba, ‘le kudi byonatuninye kulonga pa kumukwasha?’ Stacy wadi ulangulukila pa uno mwanda kyaba kyonso. Le i bika byamukweshe ōminine uno mwanda uvutakanya ñeni? I busapudi! Paadi wenda mu busapudi, wadi kate mutyima ku bisakibwa bya bantu ba mu wabo mwaba badi basakilwa bukwashi. Unena’mba: “Mu kine kitatyi’kya, Yehova wankweshe nsokole muntu wa kwifunda Bible wadi wendelela bukidibukidi. Kino kyankankamikile bininge. Kintu kinkwashanga bininge mu bwami būmi i kwenda mu busapudi.”

15. Le i ñeni’ka yowaboila ku byanenene Mary?

¹⁵ Pa mwanda wa ngikadilo yobadi’mo, bantu bamo babwanya kulanga’mba kebakokejapo kusapula bininge. Shi nobe ye molangila, vuluka’mba Yehova usangalanga bininge pakumona wielela’ko. Langulukila monka pa kimfwa kya Mary. Paavilukīle mu kipwilo kya ludimi lweni, wemwene’nka na aye kadipo kyalonga. Unena’mba, “kyaba kimo nadi nondolola’tu twipi, kutanga vese mu Bible, nansha kupāna trakte mu busapudi.” Kino kyamulengeje emone amba boba bayukile ludimi biyampe i bamupite. Inoko walemunwine mumweno wandi. Wajingulwile amba Yehova ubwanya kumwingidija nansha byakadipo uyukile ludimi. Unena’mba, “bubine bupandija būmi i bupēla’tu, kadi buno bubine ye abo bushintanga būmi bwa bantu.”

16. Le i bika bibwanya kukwasha boba bashikete kijabanda ku njibo amba bekale na bukomo?

 ¹⁶ Yehova umonanga kadi ufwijanga’ko pa mutyima wetu wa kusaka kusapula nansha shi tushikete kijabanda ku njibo. Ubwanya kwitushitwila mikenga ya kusapwila boba betulama nansha betundapa. Shi tudingakanya byotwingila dyalelo na byotwadi twingila pa kala, tubwanya kutyumukwa mutyima. Ino shi twivwanije muswelo witukwasha Yehova dyalelo, tukekala na bukomo botusakilwa pa kūminina na nsangaji makambakano o-onso.

17. Mungya Musapudi 11:6, mwanda waka tufwaninwe kwendelela kusapula nansha shi kekudipo muntu witabija musapu?

¹⁷ Ketuyukilepo i nkunwa’ka ya bubine yotukuna ibwanya kumena ne kutama. (Tanga Musapudi 11:6.) Kimfwa, Barbara kaka umo wa myaka 80 ne musubu, usapulanga kitatyi ne kitatyi ku telefone ne na mikanda. Mu mukanda umo waalembele waelele’mo Kiteba kya Mulami kya 1 Kweji 3, 2014, kyadi na mutwe wa mwanda unena’mba “Bintu Bikulongēle Leza.” Aye kuyuka mpika, nanshi watumine uno mukanda kudi ba mulume ne mukaji kebakidipo monka Batumoni ba Yehova. Batangile kino kiteba misunsa mivule. Mulume wamwene pamo’nka bwa Yehova wisamba nandi. Bano ba mulume ne mukaji bashilula kutanwa ku kupwila, mwenda mafuku pa kupwa kulonga myaka 27 ne kupita, baikala monka Batumoni bengila bininge. Langa’po bidi mwakankamikilwe ne kukomejibwa Barbara pa kumona byalupukile ku mukanda’tu umo!

18. Le i bika byotufwaninwe kulonga pa kukomejibwa na Leza?

¹⁸ Yehova i mwitupe bintu bya kwitukwasha twikale na bukomo buvule. Shi twingidije bintu byaetupele, kimfwa milombelo, Bible, batutu ne bakaka ne busapudi, tukalombola’mba tukulupile amba Yehova udi na bukomo bwa kwitukwasha ne amba usakanga kwitukwasha. Shi ke pano tukulupilei nyeke Tata wetu wa mūlu, mwine usakanga “kulombola bukomo bwandi pangala pa boba badi na mutyima mubwane kwadi.”​—2 Bi. 16:9.