1-2. Shintulula muswelo ubwanya misoñanya ya mu Bible kwikala na kamweno kakatampe kotudi shi ngikadilo yotudi’mo ibashinta.

 MU DIFUKU dyabo dya butundaile, ba musoñañani ne mutundaile wandi muyampe, bevwananga na katentekeji mwisambo wimanine pa Bible wisambila pa busongi. Misoñanya īsambilwanga’po mu mwisambo beiyukile kala. Inoko tamba mu dino difuku, ino misoñanya ikekala na kamweno kakatampe kobadi. Mwanda waka? Mwanda bakengidija ino misoñanya mu būmi bwabo.

² Ye mobikadilanga ne shi bene Kidishitu besonge ababutula mwana. Mu bula bwa myaka mivule, badi padi bevwana mīsambo īsambila pa mwa kulelela bana. Ino pano pobabutula mwana, misoñanya’ya ikekala na kamweno kakatampe kobadi. Abaikala na wabo mwana wa kulela. Bine, kino i kiselwa kikatampe! Na bubine, shi ngikadilo yotudi’mo ibashinta, muswelo otumona misoñanya ya mu Bible yotuyukile’tu biyampe nao ushintanga. O mwanda mwine batōtyi ba Yehova batañanga Bisonekwa difuku ne difuku, ne kulangulukila’po “mafuku onso” mu būmi bwabo, na mobānenene balopwe ba Isalela kulonga.​—Kup. 17:19.

3. Le i bika byotusa kwisambila’po mu kino kishinte?

³ A bambutwile, mudi na dyese dikatampe dibwanya kwikala na mwine Kidishitu, dya kufundija benu bana basanswe Yehova. Inoko, musakanga kulonga bivule kupita’ko’tu kwibafundija myanda ya Leza. Musakanga kukwasha benu bana basanswe Yehova bininge. Le i bika byomubwanya kulonga pa kukwasha benu bana basanswe Yehova? Mu kino kishinte, tusa kwisambila’mo pa misoñanya  iná ya mu Bible ibwanya kukwasha bambutwile. (2 Tm. 3:16) Kadi tusa kumona muswelo wamwenine bambutwile bamo bene Kidishitu mu kwingidija madingi a mu Bible.

4. Le i musoñanya’ka umo ukokeja kukwasha bambutwile bakwashe babo bana basanswe Yehova mu mityima yabo? (Yakoba 1:5)

⁴ Musoñanya 1: Kimba buludiki bwa Yehova. Lomba Yehova akupe tunangu tosakilwa pa kukwasha bobe bana bamusanswe. (Tanga Yakoba 1:5.) Aye ye muntu ufwaninwe kuleta madingi. Kudi bubinga buvule botwanenena namino. Twisambilei’ko bidi pa bubinga bubidi. Bubajinji, Yehova ye mbutwile wa bwino kutabuka. (Ñim. 36:9) Ne bwa bubidi, madingi a tunangu aletanga adi nyeke na kamweno.​—Isa. 48:17.

5. (a) Le bulongolodi bwa Yehova bukwashanga bambutwile namani? (b) Monka mulombwela’kyo video, le i ñeni’ka yobwanya kuboila ku muswelo watamije ba Tutu Amorim ne wandi mukaji babo bana?

⁵ Kupityila ku Kinenwa kyandi ne bulongolodi bwandi, Yehova uletanga bidibwa bivule bya ku mushipiditu bibwanya kukukwasha nobe ukwashe bobe bana. (Mat. 24:45) Kimfwa, ukokeja kutana madingi mavule a kamweno mu bishinte binena’mba “Bukwashi ku Bisaka,” byalupwilwe mu bula bwa myaka mu dipepala Langukai! kadi pano bitanwa pa site yetu. Kadi mu mavideo mavule alupwilwe pa jw.org, mudi bwipangudi ne madrame abwanya kukwasha bambutwile bengidije madingi a Yehova pobalelele babo bana. *​—Nki. 2:4-6.

6. Le shabana umo wamwene namani buludiki bwebapele Yehova aye ne wandi mukaji kupityila ku bulongolodi bwandi?

⁶ Bambutwile bavule bafwijanga’ko pa bukwashi bwibapa Yehova kupityila ku bulongolodi bwandi. Shabana umo witwa bu Joe unena’mba: “Kutamija bana basatu mu bubine ke makayopo. Ami ne wami mukaji tulombanga nyeke Yehova etukwashe. Kadi divule dine tumonanga’mba kishinte kampanda nansha video ibaiya’nka pa kitatyi kifwaninwe mwanda wa kwitukwasha tunekenye makambakano  otwikonda nao. Tukimbanga nyeke buludiki bwa Yehova mu būmi bwetu.” Ba Joe ne wandi mukaji bamwene amba bino bishinte ne mavideo bikwashanga babo bana bafwene kudi Yehova.

7. Mwanda waka i biyampe bambutwile balonge bukomo bwa kuleta kimfwa kiyampe? (Loma 2:21)

⁷ Musoñanya 2: Leta kimfwa kiyampe. Bana batalanga bininge bambutwile babo kadi divule dine bebeulanga. Shako kekudipo mbutwile mubwaninine. (Loma 3:23) Ino nansha nankyo, bambutwile ba tunangu baloñanga bukomo bwa kushila babo bana kimfwa kiyampe. (Tanga Loma 2:21.) Shabana umo wanenene pa mwanda utala bana’mba: “Badi pamo bwa butonge bubuta mema.” Ubweja’ko amba: “Babwanya kwitulombola shi byotulonga kebikwatañenepo na byotwibafundija.” Nanshi, shi tusaka betu bana basanswe Yehova, batwe bene tufwaninwe kumusanswa bininge ne kumwekeja buswe botumusenswe.

8-9. Le i ñeni’ka yowaboila ku byanenene ba Andrew ne Emma?

⁸ Kudi miswelo mivule ibwanya bambutwile kufundija babo bana basanswe Yehova. Tutu Andrew wa myaka 17 unena’mba: “Bambutwile bami badi bamfundija nyeke amba milombelo idi na kamweno. Mafuku onso bufuku, tata wadi ulombela nami pamo nansha shi kendi mulombele kala. Bambutwile bami badi bamvuluja nyeke amba: ‘Ubwanya kwisamba na Yehova misunsa yonso yosaka.’ Pa kino, namwene amba milombelo idi na kamweno bininge kadi pano mpēlelwanga kulomba kudi Yehova ne kumumona bu Tata wa buswe.” A bambutwile, vulukai nyeke amba buswe bomusenswe Yehova bubwanya kukwasha benu bana nabo bamusanswe.

⁹ Twisambilei bidi ne pa kimfwa kya Emma. Shandi paashile kisaka kyabo, washile inandi na mapu mavule. Emma unena’mba: “Kudi bitatyi bivule kebyadipo mama na lupeto luvule, inoko wadi wisambila nyeke pa muswelo uvuijanga Yehova bisakibwa bya bengidi bandi. Namwene amba ukulupile byanena, kupityila ku muswelo waadi wikele mu būmi. Mama wadi wingidija byaadi usapula.” Le i ñeni’ka yotuboila’ko? I ya amba, bambutwile babwanya kufundija kupityila ku kimfwa kyabo nansha shi badi mu makambakano.​—Gal. 6:9.

10. Le bambutwile bavule bene Isalela bādi na mikenga’ka ya kwisamba na babo bana? (Kupituluka mu Bijila 6:6, 7)

¹⁰ Musoñanya 3: Wisambe na bobe bana kitatyi ne kitatyi. Yehova wālombwele bene Isalela ba pa kala bafundije babo bana kitatyi ne kitatyi. (Tanga Kupituluka mu Bijila 6:6, 7.) Bano bambutwile bādi na mikenga mivule mu bula bwa difuku, ya kwisamba na babo bana ne kwibakwasha basanswe Yehova mu mityima yabo. Kimfwa, nkasampe mwine Isalela mwana-mulume wādi ukokeja kupityija kitatyi kilampe ukwasha shandi na kukuna nkunwa ne kwangula. Mwanabo mwana-mukaji nandi, wādi ubwanya kupityija kitatyi kilampe mu bula bwa difuku ukwasha’ko inandi na kusona, kusuka, ne na mingilo mikwabo ya njibo. Bambutwile ne bana byobādi bengidila pamo, bādi bakokeja kwisambila pa myanda mivule ya kamweno. Kimfwa, bādi bakokeja kwisambila pa ngikadila ya Yehova ya buyampe, ne pa muswelo waādi ukwasha kyabo kisaka.

11. Le i mukenga’ka umo bidi udi na bambutwile bene Kidishitu wa kwisamba na babo bana?

¹¹ Dyalelo bintu ke bishinte. Mu matanda mavule, bambutwile ne bana kebabwanyapo kupityija kitatyi pamo mu bula bwa difuku. Bambutwile babwanya padi kwikala ku kaji, babo bana nabo ku masomo. O mwanda bambutwile bafwaninwe kukimba mikenga ya  kwisamba na babo bana. (Ef. 5:15, 16; Fid. 1:10) Mukenga umo bidi i butōtyi bwa kisaka. Tutu umo nkasampe witwa bu Alexander unena’mba: “Tata utūlanga’ko nyeke mpangiko ya butōtyi bwa kisaka, kadi kalekangapo kintu nansha kimo kitukankaje tuleke kulonga’bo. Shi tubapu kwifunda, twisambilanga pa myanda mikwano ya kamweno.”

12. Le i bika bifwaninwe kuvuluka mutwe wa kisaka pobalonga butōtyi bwa kisaka?

¹² Shi abe ye mutwe wa kisaka, le i bika byobwanya kulonga amba butōtyi bwenu bwa kisaka busangaje benu bana? Ubulwepo kwifunda na bobe bana mu dibuku dyetu dipya Ikala Mūmi Nyeke! Kwifunda nabo mu dino dibuku kukakupa mukenga wa kwisamba nabo. Usakanga bobe bana bakulombole mobeivwanina ne makambakano abo, o mwanda kokengidija kitatyi kya butōtyi bwa kisaka mwanda wa kwibafutulula nansha kwibafunina. Kadi kokaloba shi bobe bana abanena bintu kebikwatañenepo na misoñanya ya mu Bible. Ino wibafwije’ko pa kukulombola pampikwa budimbidimbi mobeivwanina, kadi wibakankamike besambe na bwanapabo. Ukabwanya kukwasha bobe bana senene enka shi uyukile mobeivwanina.

13. Le bambutwile badi na mikenga’ka mikwabo ya kukwasha babo bana bafwene kudi Yehova?

¹³ A bambutwile, kimbai mikenga mu bula bwa difuku ya kukwasha benu bana bafwene kudi Yehova. Kemufwaninwepo kukungila’nka kitatyi kya kwifunda Bible, ye kemwibafundija myanda ya Leza wetu wa buswe. Inabana umo witwa bu Lisa unena’mba: “Twadi tukwasha betu bana bayuke myanda ya Yehova kupityila ku bupangi. Kimfwa, kitatyi kyadi kilonga wetu mbwa bintu bisepeja betu bana, twadi twibalombola’mba Yehova i Leza wa nsangaji ne amba usakanga twikale na nsangaji kadi tusangele bintu bya mizaulo.”

14. Mwanda waka i biyampe bambutwile bakwashe babo bana batonge balunda na tunangu? (Nkindi 13:20)

¹⁴ Musoñanya 4: Kwasha bobe bana bapwane na balunda bayampe. Kinenwa kya Leza kinena patōkelela’mba, balunda badi na lupusa potudi​—luyampe  nansha lubi. (Tanga Nkindi 13:20.) A bambutwile, le muyukile balunda ba benu bana? Le mwitananga nabo ne kupityija nabo kitatyi pamo? Le i bika byomukokeja kulonga pa kukwasha benu bana bapwane na bantu basenswe Yehova? (1 Ko. 15:33) Mubwanya kwibakwasha batonge balunda bayampe, na kwita bantu bendelela biyampe ku mushipiditu, mulonge nabo pamo bintu kampanda mu kisaka.​—Ñim. 119:63.

15. Le i bika bibwanya kulonga bambutwile pa kukwasha babo bana bapwane na balunda bayampe?

¹⁵ Twisambilei bidi pa kimfwa kya shabana umo witwa bu Tony. Ushintulula bintu byobalongele aye ne wandi mukaji pa kukwasha babo bana, amba: “Mu bula bwa myaka, ami ne wami mukaji twitanga ku yetu njibo batutu ne bakaka ba myaka ne bitamina bishileshile. Tudyanga nabo byakudya kadi batanwanga ku butōtyi bwetu bwa kisaka. Uno o muswelo muyampe wa kuyuka boba basenswe Yehova kadi bamwingidila na nsangaji. Twadi na dyese dya kutambula batadi ba bipindi, bamishonele, ne banabetu bakwabo ku yetu njibo. Bwino bwabo, bupyasakane bwabo, ne mushipiditu wabo wa kwipāna, byadi na lupusa pa betu bana kadi byebakweshe bafwene kudi Yehova.” A bambutwile, sumininwai kukwasha benu bana bapwane na balunda bayampe.

16. Le bikekala namani shi obe mwana wanena’mba kasakilepo kwingidila Yehova?

¹⁶ Ino le bikekala namani shi obe mwana wanena’mba kasakilepo kwingidila Yehova nansha byolonga bukomo bwa kumufundija? Kokalanga’mba kudipo mbutwile muyampe. Yehova i mwitupe batwe bonso​—kubadila’mo ne obe mwana—​kyabuntu kya bwanapabo bwa kwitongela, ko kunena’mba bukomo bwa kutonga kwingidila Leza nansha kuleka kumwingidila. Shi obe mwana wakwata butyibi bwa kuleka kwingidila Yehova, kokajimija kikulupiji kya amba, difuku dimo ukajoka. Vuluka kyelekejo kya mwana mujimine. (Luka 15:11-19, 22-24) Uno nsongwalume wālongele bintu bivule bibi, ino ku mfulo wājoka. Bamo babwanya padi kunena’mba, “kyādi’tu kyelekejo bitupu, le bibwanya kulongeka mu būmi?” Bine, bibwanya kulongeka.  Kadi kino kyo kyafikīle nkasampe umo mwana-mulume witwa bu Elie.

17. Le kimfwa kya Elie kibakukankamika namani?

¹⁷ Elie wanenene pangala pa bambutwile bandi amba: “Badi balonga bukomo bwa kunkwasha nsanswe Yehova ne Kinenwa kyandi Bible. Inoko ponadi nkasampe nashilwile kutomboka.” Elie washilwile kwikala na būmi bwa mapala abidi ne kupela padi palonga bambutwile bandi bukomo bwa kumukwasha ku mushipiditu. Aye pa kutaluka ku njibo, washilula kwiendeja bibi. Nansha nabya, kyaba kimo wadi wisamba na mulunda nandi umo myanda ya mu Bible. Elie unena’mba: “Kitatyi kyonso kyonadi nesambila na mulunda nami pa myanda ya Yehova, nadi nangulukila bininge padi Yehova. Bityebitye, nkunwa ya bubine bwa mu Bible yadi mu mutyima wami​—nkunwa mine yakunine’mo bambutwile bami—​yashilula kutama.” Mwenda mafuku, Elie wajokela mu bubine. * Fwatakanya’po bidi nsangaji yaivwene bambutwile pa mwanda wa bukomo bobalongele bwa kumufundija ukidi mwanuke asanswe Yehova!​—2 Tm. 3:14, 15.

18. Le umona namani bambutwile balonga bukomo bwa kukwasha babo bana basanswe Yehova?

¹⁸ A bambutwile, mudi na dyese dikatampe kadi diyampe, dya kutamija lukongo lupya lwa batōtyi ba Yehova. (Ñim. 78:4-6) Uno ke mwingilopo upēla, o mwanda twimufwija’ko bya binebine pa bukomo bukatampe bomulonga bwa kukwasha benu bana! Shi mwendelele kulonga bukomo bwa kukwasha benu bana basanswe Yehova ne kwibatamija na kwibalemununa ne kwibadyumuna bidyumu, kulupilai amba Tata wetu wa mūlu kadi wa buswe ukasangala.​—Ef. 6:4.